Ереме́ё 48 - Библия - Пэ Балтитко Романи чиб (Романэс) 2019

Сэ́ндо пэ Моа́во

¹ Проти Моа́во. Адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: “Бида фороскэ Не́во: Пал-дова́ со ёв исын пхагирдо́, Кариафаимо исын ладжакирдо́ и лыно́; Мизгаво исын ладжакирдо́ и пхагирдо́.

² Буты́р на явэ́на тэ шарэ́н Моа́во, а дро Есево́но [Хешэвоно-ю.о.] придуминэна биба́хт проти дава́ штэ́то, ракири́: ‘Явэ́н, соб (кай) амэ́нгэ тэ хасякирас лэс сыр манушы́тко нацыя.’ И ту адя́кэ-паць, Мадме́на, хасёса [пириячэса тэ явэс-р.с.], курта́ла дотрадэла тут.

³ Зан роибнаскири явэ́ла шундлы Оронаимостыр: ‘Бэдыпэн (би́да) и хасибэ́н’ исын баро́!

⁴ Моа́во исын пхагирдо́ дрэ руи́ны, лэ́скирэ бияты (чхаворэ́) годлэна, со исын шундло.

⁵ Пал-дова́ со роибэ́н джа́ла лэ́нца, ке́ли ёнэ джа́на упрэ́ пэ штэ́то Лухито; ке́ли ёнэ джа́на тэлэ́ Оронаимостыр, ёнэ ровэна пал бэдыпэн (чорорипэн).

⁶ Нашэ́н, зракхэн пэ́скиро джиибэ́н! Явэ́н сы́рбы дова́ хру́сто пэ чхучи́ мал (степ).

⁷ Пир дова́ со ту, Моа́во, допатяндыяпэ зоралэ́с дрэ пэ́скирэ бутя́ и пэ́скирэ кучипэна, тут адя́кэ-паць лэ́на, и Хамосо джа́ла дро пле́но, лэ́скирэ рашая́ и лэ́скирэ тхага́рья кхэтанэ́.

⁸ Розмарибнаскиро явэ́ла пэ кажно фо́ро, со нисаво́ фо́ро на ячэ́лапэ цэ́ло (зракхно), и до́ло хасёла, и ровно фэ́лда хасякирэна [явэ́ла чхучи́-р.с.]: – адя́кэ, сыр и пхэндя́ Рай Дэвэ́л.

Хамосо-Моавоскиро дэвэл

⁹ Дэн пхака́ Моавоскэ, соб (кай) ёв могинэлас тэ вурнял криг, пал-дова́ со лэ́скирэ фо́рья явэ́на чхучэ́, ние́кх на явэ́ла тэ дживэ́л дрэ лэ́ндэ.

¹⁰ “Тэ явэ́н прокошыбэна (арманя) пэ кодолэстэ, кон кэрэ́ла Ра́скирэ-Дэвлэ́скири буты́ биилэскиро, тэ явэ́л прокошыбэ́н пэ кодолэстэ, кон обрикирэла Пэ́скири курта́ла ратэстыр!

¹¹ Моа́во сыс усады / сак (всегда) вольнонэ пэ́скирэ тэрныпнастыр и ёв сыс чхудо пэ пэ́скиро хумэр (дрожджы); лэс на пиричхувэнас екхэ пирьятыр дро яви́р; сы́рбы мол (вино); – ёв ние́кхвар на сыс дро пле́но: палдава́ лэ́скиро смако ячэ́лапэ дрэ лэ́стэ, и лэ́скиро лачхо́ кхандыпэн на парудяпэ.

¹² Палдава́, акэ, явэ́на дывэса́’, – ракирэ́ла Рай Дэвэ́л, – ‘со Мэ бичхава́ва манушэ́н кэ Моа́во тэ пиричхувэн лэс сыр мол (лолы бравинта). Ёнэ чхучакирэна Лэ́скирэ кхорэ́ (сасу́ды) и пхагирэна пэ котэра́ лэ́скирэ штэклы.

¹³ И явэ́ла Моа́во ладжакирдо́ пал Хамосо, сыр и кхэр Израилёскиро сыс ладжакирдо́ пал Вефиль, дро со мануша́ Израилёстыр зоралэ́с патяндынэ́.’

¹⁴ Сыр да тумэ́ ракирэ́на: ‘Амэ сам зоралэ́, и амэ сам мурша́ тэ мараспэ?’

¹⁵ Моа́во ж исын розмардо дрэ руи́ны, и лэ́скирэ форье́ндыр джа́ла тхув, а лэ́скирэ выкэдынэ́ мануша́ гинэ́ тэл курта́ла пэ мэрибэ́н тэ чхинэн лэн, – ракирэ́ла Кра́ли, Конэ́скиро Лав исын Рай Дэвэ́л, болыбна́скирэ-янголэ́нгиро.

¹⁶ Бари би́да пэрэ́ла сыг пэ Моа́во, и биба́хт (хасибэ́н) прастала сы́гэс пэ лэ́стэ.

¹⁷ Тангинэн ясвэ́нца лэс, сарэ́, кон исын пашы́л лэ́стэ, и сарэ́, кон джинэ́ла лэ́скиро лав, пхэнэ́н: ‘Саво́ зорало́ дэсто́ исын пхагирдо́, сави́ шука́р кхия сыс!’

¹⁸ Джа́ тэлэ́ славутнонэ штэто́стыр, и бэш смэгаса тэ пьел, чхай Дивоноскири, кон дживэ́ла дро дова́ фо́ро. Розмарибнаскиро пэ Моа́во явдя́ пэ ту́тэ, ёв розмарэла пэ котэра́ тырэ́ зоралэ́ ва́нты (тва́рдыми).

¹⁹ Ту, сави́ дживэса кэ Арое́ро, тэрдёв пашы́л дром и дыкх цямкэс. Пхучпэ лэ́стыр, саво́ нашэла, и пхучпэ ла́тыр, сави́ ракхэлапэ, и пхэн: ‘Со кэрдя́пэ?’

²⁰ Моа́во ладжакирдо́, пал-дова́ со ёв пхагирдо́ пэ бара́, ров зоралэ́с и дэ го́дла! Пхэн дава́ дро Арноно, со Моа́во исын пхагирдо́ кэ пхув.

²¹ И сэ́ндо явдя́ пэ лошчыны, саво́ исын пэ роўно фэ́лда: пэ Халоно, пэ Яца, пэ Мофафо (Мефа),

²² и пэ Дивоно, и пэ Ново, и пэ Бет-Дивлафаимо;

²³ и пэ Кариафаимо, и пэ Бет-Гамуло; и пэ Бет-Маоно;

²⁴ и пэ Кериофо, и пэ Восоро (Боцра), и пэ сарэ́ фо́рья пэ пхув Моавоскири, дуратунэ́ и пашатунэ́!

²⁵ Моавоскири зор сыр шынг (ро́го) исын чхурдыно́ тэ хасёл, и лэ́стэ васт сы́рбы исын пхагирдо́” – ракирэ́ла Рай Дэвэ́л.

²⁶ “Матякирэн лэс, пал-дова́ со ёв ґаздыя́ пэс пэ Растэ-Дэвлэ́стэ; и Моа́во явэ́ла тэ равэлпэ дрэ пэ́скиро чхадыпэн и мануша́ лэ́на дава́ штэ́то пэ данд тэ санпэ (кокоро́ явэ́ла просандло).’

²⁷ Ци ту, Моа́во, на лыян Израилё пэ данд, соб (кай) тэ саспэ? Ци на отлыджасаспэ ту кэ Израилё, сы́рбы кэ чор? Со ту кунинэса шэрэ́са бут мо́лы, ке́ли ракирэ́са пал лэ́стэ?

²⁸ Тумэ́, савэ́ дживэ́на кэ Моа́во, ячкирэн фо́рья и дживэ́н пэ скалы. Явэ́н сы́рбы голумбы, савэ́ кэрэ́на гня́зды (ку́фы) пэ скалакирэ рига́, кай заджа́на дрэ гэбар (пешчэра).

²⁹ Амэ шундя́м пал пхутькирибэ́н Моавоскиро: ёв исын древа́н пхутькирдо – лэ́стэ исын вучи́ мина пэ муй, – ёв барьякирэ́ла пэс, – ёв пхутёла, – и ёв думинэ́ла вучэ́с пал пэ́стэ дро пэ́скиро ило́.

³⁰ Мэ джино́м лэ́скиро холякирибэ́н’ – ракирэ́ла Рай Дэвэ́л, – ‘лэ́скиро ракирибэ́н исын чхучо́, лэ́стыр нисо́ на выджа́ла чачуно́.

³¹ Палдава́ Мэ ява́ва тэ ровав зоралэ́с пал Моа́во, и Мэ ява́ва тэ дав го́дла пал сарэ́ндэ Моавостыр; Мэ ява́ва тэ тугинав ясвэ́нца пал манушэ́ндэ Кир-Харесостыр.

³² О винагра́днико дрэ Се́вма! Мэ ява́ва тэ ровав буты́р пал ту́тэ сыр пал Иазе́ро (Язэро): тырэ́ отбарьякирибэна пирибаринэ мо́рё (дэрья́в), ёнэ догинэ́ кэ зеро Иазе́ро (Язэро). О росчорибнаскиро пыя́ пэ тумарэ́ лынаитка му́ри и пэ тумарэ́-молякиро (виноскиро) обкэдыпэн.

³³ Ра́дыма и весёлыма (лош) лынэ́ криг пхабунэ фэлдатыр и Моавоскирэ пхувья́тыр; Мэ кэрдём адя́кэ, со нисо́ на явэ́ла дро пре́со ваш мол (вино), ёнэ буты́р на явэ́на тэ штакирэн (тэ топчынэн) радымитконэ годла́са, на явэ́ла буты́р го́дла радыма́са.’

³⁴ Пал лэ́нгири го́дла Есевоностыр (Хешэвоностыр) кэ Елеала (Елалэя), кэ Яаца (Яхазо) ёнэ ґаздынэ́ го́дла Сиоростыр кэ Оронаимо, кэ три́то Эґла (Эґла-Шэлишыя); пал-дова́ со адя́кэ-паць и паня́ Нимримоскирэ пиришутёна.

³⁵ И ишчо (инкэ́) Мэ кэра́ва адя́кэ, со дро Моа́во пириячэна тэ янэ́н свэ́нта яныбэна́ пэ вучэ́ штэ́ты и Мэ мулякирава кодолэ́с, саво́ хачкирэлас дро́га смо́лы пэ́скирэ дэвлорэ́нгэ’, – ракирэ́ла Рай Дэвэ́л.

³⁶ ‘Палдава́ Миро ило́ явэ́ла тэ обровэлпэ пал Моа́во сы́рбы свиролька, и Миро ило́ явэ́ла тэ обровэлпэ пал манушэ́ндэ Кир-Харесостыр; пал-дова́ со баро́ барвалыпэ́н, со ёнэ кэдынэ хасия́.

³⁷ Кажно шэро́ исын мурадо и кажна чхора (брода) исын мурадэ́, пэ кажно васт исын почхиныбэна, и пэ трушула исын балыткса гонэ́.

³⁸ Сарэ́ ракирэ́на ясвэ́нца пэ сарэ́ кхэрэ́скирэ стрэхи (чхакиня), и пэ га́сы дро Моа́во, пал-дова́ со Мэ розмардём Моа́во сы́рбы пири́, сави́ на трэй” – ракирэ́ла Рай Дэвэ́л.

³⁹ Ёнэ ровэна зоралэ́с – сыр да Моа́во розмардо? Сыр да Моа́во рискирдя́ палуй ладжаса! И явэ́на тэ санпэ Моавостыр, и лэ́стыр явэ́на тэ трашадён сарэ́, кон исын пашы́л лэ́стэ.

⁴⁰ Пал-дова́ со ракирэ́ла Рай Дэвэ́л: “Акэ, Вавило́но явэ́ла тэ вурнял сыр о́рло (ки́до), и ёв росчхувэла пэ́скирэ пхака́ пир рига́ упралэстыр пэ Моа́во.

⁴¹ Фо́рья явэ́на лынэ́ и тва́рдыми (кре́пости) заухтылэна. Дро дова́ дывэ́с ило́ зоралэ́-муршэнгирэ Моавостыр явэ́ла сыр ило́ джувля́киро, савья́ мэнчынэна дукха́ тэ биянэ́л.

⁴² И явэ́ла Моа́во вымардо сыр нацыя пир дова́, со ёв барьякирдя пэс [гия́-р.с.] проти Растэ-Дэвлэ́стэ.

⁴³ Дар, ґанби́н и фэлы́ явэ́на пэ ту́тэ, ману́ш Моавоскиро!” – ракирэ́ла Рай Дэвэ́л.

⁴⁴ ‘Кон нашэла дара́тыр, одова́ пэрэ́ла дрэ ґанби́н, и кон выджа́ла ґанбинятыр, одолэ́с ухтылэ́ла фэлы́, пал-дова́ со Мэ ява́ва кэ Моа́во,” – ракирэ́ла Рай Дэвэ́л.

⁴⁵ “Одолэ́, савэ́ нашнэ́, тэрдинэ́ тэл Есево́но (Хешэвоно), пал пэ́скиро бизорьякирибэн. Нэ явэ́ла яг Есевоностыр, явэ́ла бари яг машкиралыпнастыр Сигоностыр и похала ме́жа Моавоскири и шэрэскиро гутуп (темё) пэ чхавэ́ндэ бунтарье́ндэ.

⁴⁶ Бида пэ ту́тэ, Моаве! Мануша́ Хамосостыр хасинэ́; пал-дова́ со тырэ́ чхавэ́н лынэ́ дро пле́но, и тырэ́ чхая́ исын дрэ наволя.

⁴⁷ Нэ Мэ рискира́ва палэ Моавоскирэ пленонэн дрэ палатунэ́ (последня) дывэса́’”, – ракирэ́ла Рай Дэвэ́л. Акэ, дасаво исын сэ́ндо пэ Моа́во.