Ереме́ё 43 - Библия - Пэ Балтитко Романи чиб (Романэс) 2019

Юды Лэ́на Еремеёс Зорья́са кэ Еги́пто

¹ И сыс адя́кэ: ке́ли Ереме́ё пирияця́ (кончындя) тэ ракирэ́л анги́л сарэ́ манушэ́ндэ сарэ́ лава́ Ра́скирэ-Дэвлэ́скирэ, лэ́нгирэ Дэвлэ́скирэ, савэ́нца Рай Дэвэ́л, лэ́нгиро Дэвэ́л, бичхадя́ лэс кэ ёнэ – сарэ́ далэ́ лава́,

² то Аза́рия, чхаво́ Осаияскиро (Госаияскиро); Иоханано, чхаво́ Кареёскиро и сарэ́ пхутькирдэ́ мануша́, пхэндлэ́ Еремеёскэ: “Ту ракирэ́са начачипэ́н! О Рай Дэвэ́л, амаро́ Дэвэ́л, на бичхадя́ тут тэ пхэнэ́с: ‘На джа́н кэ Еги́пто тэ дживэ́н одо́й!’

³ Нэ дава́ исын Варухо, чхаво́ Нирияскиро, кон подракирэла тут проти амэ́ндэ, соб (кай) тэ выдэс амэн дрэ васта́ Халдеенгирэ, соб (кай) ёнэ, тэ мулякирэ́н амэн, ци тэ лыджа́н криг дро пле́но кэ Вавило́но.”

⁴ Акэ, о Иоханано, чхаво́ Кареёскиро, и сарэ́ рая халадэ́нгирэ и сарэ́ мануша́, на кандынэ́ зан Ра́скирэ-Дэвлэ́скири, соб (кай) тэ ячэ́нпэ тэ дживэ́н пэ пхув Юдэякири.

⁵ Нэ Иоанано, чхаво́ Кареяскиро и сарэ́ рая халадэ́нгирэ, лынэ́ сарэ́н, савэ́ ячнэ́пэ Юдэя́тыр, кон на рисинэ́ тэ ячэ́нпэ тэ дживэ́н пэ Юдэякири пхув, сарэ́ Наюдытконэ́ нацые́ндыр, кэ савэ́ лэн традынэ –

⁶ муршэ́н, джувле́н, биятэ́н, крали́скирэ чхае́н и кажнонэ́ (сваконэ) манушэ́с, конэ́с о Навузардано, рай пэ крали́скири стрэ́га, ячкирдя́ Годолияса, чхавэ́са Ахикамоскирэса (унукоса (непотоса) Шафаноскирэса), и Еремеёс, пророко́с, и Варухос, чхавэ́с Нерияскирэс.

⁷ И ёнэ гинэ́ кэ пхув Египто́скири, пал-дова́ сыр ёнэ на кандынэ́ зан Ра́скирэ-Дэвлэ́скири. И ёнэ догинэ́ кэ Тафнисо [Тафанхе́со-ю.о.].

⁸ И сыс дро Тафнисо лав Ра́стыр-Дэвлэ́стыр кэ Ереме́ё, ракири́:

⁹ “Лэ барэ́ бара́ дрэ васта́ пэ́скирэ и гарав лэн дрэ ґлэя (глина) дро бар, саво́ исын пэ штэ́то, сыр джа́са андрэ́ кхэр Фараоно́скиро пэ якха́ сарэ́ Юдэ́нгирэ,

¹⁰ и пхэн лэ́нгэ: ‘Адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: А́кэ, Мэ бичхава́ва и лава́ Навуходоносорос, крали́с Вавилоноскирэс, Мирэ́ писхари́с, и Мэ чхува́ва лэ́скиро троно пэ кадалэ́ бара́, савэ́ Мэ гарадём. И ёв росчхувэла пир рига́ пэ́скири крали́тко бари ша́тра упра́л пэ лэ́ндэ.

¹¹ И явэ́ла ёв и розмарэла пхув Египто́скири, кон исын банго́ тэ мэрэ́л, джа́ла пэ мэрибэ́н, кон банго́ дро пле́но, джа́ла дро пле́но, кон банго́ тэл курта́ла, джа́ла тэл курта́ла.

¹² Мэ росхачкирава яг дрэ кхэра́, пэ мангипнытка штэ́ты, кай дэвлорэ́ Египто́скирэ, и о Навуходоносо́ро схачкирэ́ла лэн и лэ́ла лэн дро пле́но. И ёв выкэдэ́ла миштыпэ́н пхувья́тыр Египтоскирьятыр сыр о чхупна́ри выкэдэ́ла (урье́ла) пэ пэ́стэ пэ́скиро урибэ́н, и ёв джа́ла криг одотхы́р раманёса (спокоёса).

¹³ Ёв пхагирэ́ла тэлэ́ обсвэнцона сты́лбы (статулы) дро Бэфсамисо (Бэф-Сэмэса), со исын пэ пхув Египто́скири, и мангипнытка (дэвлорэнгирэ) штэ́ты дро Еги́пто ёв хачкирэ́ла сарэ́са яга́са.’”