Ереме́ё 42 - Библия - Пэ Балтитко Романи чиб (Романэс) 2019

Ереме́ё Проти Нашаибэн Кэ Еги́пто

¹ И сарэ́ рая халадэ́нгирэ, и Иоханано, чхаво́ Кареяскиро, и Иезания (Езания), чхаво́ Гошаияскиро, и сарэ́ мануша́ тыкнэстыр кэ са́мо барэды́р гинэ́ пашы́л,

² и пхэндлэ́ Еремеёскэ, пророкоскэ: “Амэ мангаса зоралэ́с тут, соб (кай) тэ пэрэ́л анги́л ту́тэ амари́ па́тери (моли́тва), и, соб (кай) ту тэ помангэспэ пал амэ́ндэ Ра́скэ-Дэвлэ́скэ, тырэ́ Дэвлэ́скэ, пал сарэ́ндэ, савэ́ ячнэ́пэ, пал-дова́ со бутэндыр яця́пэ древа́н на́бут (куты́) амэ́ндыр, сыр ту дыкхэ́са,

³ соб (кай) Рай Дэвэ́л, тыро́ Дэвэ́л, мэк тэ сыкавэ́л амэ́нгэ дром, савэ́са трэй тэ джас и дова́, со амэ́нгэ тэ кэра́с.”

⁴ И пхэндя́ лэ́нгэ проро́ко Ереме́ё адя́кэ: “Мэ шундём. Акэ, мэ ява́ва тэ мангавпэ Ра́скэ-Дэвлэ́скэ, тумарэ́ Дэвлэ́скэ пир тумарэ́ лава́: и соб (кай) тэ на явэ́л, со Рай Дэвэ́л отпхэнэ́ла тумэ́нгэ, дова́ мэ пхэна́ва анги́л сарэ́ндэ тумэ́нгэ: мэ нисо́ на гаравава тумэ́ндыр.”

⁵ Тэ́ньци ёнэ пхэндлэ́ Еремеёскэ: “Мэк Рай Дэвэ́л тэ явэ́л чачуно́ и патяибнаскиро якхи́тко машки́р амэ́ндэ, ко́ли амэ на ява́са тэ кэра́с пир лав, саво́ Рай Дэвэ́л, тыро́ Дэвэ́л, бичхавэ́ла кэ амэ.

⁶ Соб (кай) тэ на явэ́л: лачхо́ ци биба́хт, амэ ява́са тэ шунас зан Ра́скирэ-Дэвлэ́скири, амарэ́ Дэвлэ́скири, кэ Кон амэ бичхадям тут, соб (кай) тэ явэ́л саро́ мишто́ амэ́нца, ке́ли амэ ява́са тэ кандас зан Ра́скирэ-Дэвлэ́скири, амарэ́ Дэвлэ́скири.”

⁷ И дава́ сыс пало́ дэш дывэса́, со лав Ра́скиро-Дэвлэ́скиро явдя́ кэ Ереме́ё.

⁸ И ёв кхардя́ кэ пэ Иоананос, чхавэ́с Кареёскирэс, и сарэ́ ран халадэнгирэн, кон сыс лэ́са и сарэ́ манушэ́н най тыкнэстыр кэ най барэды́р (са́мо баро́),

⁹ и пхэндя́ лэ́нгэ: “Адя́кэ ракирэ́ла Рай Дэвэ́л, Дэвэ́л Израилёскиро, кэ Саво́ тумэ́ бичхадэ́ ман тэ чхував тумаро́ мангипэ́н анги́л Лэ́стэ:

¹⁰ Ко́ли тумэ́ ячэ́напэ пэ дая́ пхув, тэды Мэ ґазда́ва пэ пхув тумэн и обчхувава тумаро́ джиибэ́н и Мэ на вырискирава [мулякирава-р.с.] тумэн: пал-дава́ со Мэ пиридживава пал доя́ би́да, сави́ Мэ кэрдём тумэ́нгэ.

¹¹ На дарэ́н Вавилоно́скирэ крали́стыр, савэ́стыр тумэ́ дарэ́на, на дарэ́н лэ́стыр’, – ракирэ́ла Рай Дэвэ́л, – пал-дова́ со Мэ сом тумэ́нца тэ зракхав тумэн и тэ выракхав тумэн лэ́скирэ вастэ́стыр.

¹² И Мэ сыкава́ва тумэ́нгэ тангипэ́н (ла́ска), соб (кай) ёв, хай, тэ потангинэл тумэн, и тэ рискирэ́л тумэн пэ тумари́ пхув.’

¹³ Нэ ко́ли тумэ́ пхэнэ́на: ‘Амэ на ла́са (камаса) тэ джива́с пэ дая́ пхув’, соб (кай) тэ на кандэ́н зан Ра́скирэ-Дэвлэ́скири, тумарэ́ Дэвлэ́скири, ракири́:

¹⁴ ‘Над, амэ фэды́р джа́са кэ пхув Египто́скири, кай амэ на ява́са тэ дыкхас марибэ́н, и тэ на шунас рогоскири зан, и тэ на явас бокхалэ́ пэ маро́, и, одо́й амэ ява́са тэ джива́с,’

¹⁵ то акана́ шунэ́н лав Ра́стыр-Дэвлэ́стыр, тумэ́, савэ́ ячнэ́пэ Юдастыр! ‘Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: Ко́ли тумэ́ сарэ́са рискирдэ́ пэ́скирэ муя́ тэ джа́н дро Еги́пто, и джа́на тэ дживэ́н одо́й,

¹⁶ то явэ́ла адя́кэ, со курта́ла, савья́тыр трашавэна (дарэ́на) тумэ́, дорэсэ́ла (латхэ́ла) наужакирдэс тумэн одо́й пэ пхув Египто́скири; баро́ бокхалыпэн, савэ́стыр тумэ́ дарэ́на, явэ́ла тэ джал пал тумэ́ндэ пал псикэ́ одо́й, дро Еги́пто, и одо́й тумэ́ мэрэ́на.

¹⁷ И явэ́ла адя́кэ, со сарэ́ мануша́, савэ́ рискирэна пэ́скирэ муя́ тэ джа́н кэ Еги́пто, соб (кай) тэ дживэ́н одо́й, мэрэ́на куртала́тыр, бокха́тыр и мэрибнытконэ франсэндыр, и ние́кх лэ́ндыр на ячэ́лапэ, и никай на кэрлапэ барэ́ бибахтятыр (бидатыр), со Мэ яна́ва пэ лэ́ндэ.’

¹⁸ Палдавэ адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л’: ‘Сыр мири́ холы́ и миро холякирибэ́н чхувэ́лапэ пэ манушэ́ндэ Ерусалимо́стыр, адя́кэ-паць вычхувэлапэ Мири́ холы́ пэ тумэ́ндэ, ке́ли тумэ́ джа́на андрэ́ Еги́пто; пэ тумэ́ндэ явэ́ла прокошыбэ́н (арман), бари дар [чхучипэн-ю.о.], кошыбэ́н, бипатыв; и тумэ́ буты́р на дыкхэ́на дава́ штэ́то’”

¹⁹ Рай Дэвэ́л пхэндя́ тумэ́нгэ: “Тумэ́, савэ́ ячнэ́пэ Юдастыр: на джа́н кэ Еги́пто:” Сарэ́ джинэ́на, со мэ, Ереме́ё, сыклякирдём тумэн тэ приракхэнпэ пал дава́ дывэ́с.

²⁰ Пал-дова́ со тумэ́ хохадэ пэс дрэ тумарэ́ илэ, ке́ли тумэ́ бичхадэ́ ман кэ Рай Дэвэ́л, тумаро́ Дэвэ́л, пхэни́: “Помангпэ пал амэ́ндэ Ра́скэ-Дэвлэ́скэ, амарэ́ Дэвлэ́скэ: и саро́, со Рай Дэвэ́л, амаро́ Дэвэ́л пхэнэ́ла, то ту пхэнэ́са анги́л сарэ́ндэ – и дова́ амэ ява́са тэ кэра́с.”

²¹ И мэ пхэндём дава́ акана́ ададывэ́с тумэ́нгэ, нэ тумэ́ на кандынэ́ зан Ра́скирэ-Дэвлэ́скири, тумарэ́ Дэвлэ́скири и саро́ дова́, со́са Ёв бичхадя́ ман кэ тумэ́.

²² Акана́ палдава́ джинэ́н адя́кэ, со тумэ́ мэрэ́на куртала́тыр, бокха́тыр и мэрибнытконэ франсэндыр пэ дова́ штэ́то, кэ саво́ тумэ́ камэ́на тэ джа́н тэ дживэ́н.’”