Ереме́ё 39 - Библия - Пэ Балтитко Романи чиб (Романэс) 2019

О Навуходоносо́ро Лэ́ла Ерусалимо

¹ И сыс адя́кэ: дро дэ́што чхон, дро еня́то (биекхэ́скиро дэ́што) бэрш, ке́ли о Сэдэки́я сыс Юдэя́киро кра́ли, явдя́ о кра́ли Навуходоносо́ро Вавилоно́стыр и саро́ лэ́скиро халадыбэ́н проти Ерусалимо, и ёнэ обчхудэ трусця́л (кругом) фо́ро.

² И дро дэшупэрво бэрш Сэдэкияскиро дро шта́рто чхон, пэ еня́то (биекхэ́скиро дэ́што) дывэ́с чхонэ́скиро, фо́ро лынэ́,

³ и сарэ́ тхага́рья Вавилоно́скирэ крали́стыр гинэ́ андрэ́ фо́ро и бэшнэ́ пашы́л Машкиратуны по́рта: о Нергал-Шарецэро, о Самгар-Нево, о Сарсехимо, шэрало́ евнухо, о Нергал-Шарецэро, шэрало́ танука, и сарэ́ яви́р тхага́рья крали́скирэ Вавилоно́стыр.

⁴ И сыс адя́кэ: ке́ли о Сэдэки́я, кра́ли Юдэя́киро, и яви́р мурша́ халадэ́нгирэ (марибны́тка) дыкхнэ́ лэн, тэды ёнэ лынэ́ тэ нашэ́н, и ёнэ гинэ́ яври́ форо́стыр раты́, крали́скирэ унтаса (садоса) пирда́л по́рта машкира́л дуй ва́нты. И ёнэ гинэ́ дромэ́са пир до́ло Ёрданоскиро.

⁵ И халадыбэ́н Халдеенгиро традыяпэ пал лэ́ндэ дрэ шалэ и ёнэ дотрадынэ лэс пэ лошчыны (маля) Ерихоноскирэ. И ке́ли ёнэ лынэ́ лэс, то яндлэ́ лэс кэ кра́ли Навуходоносо́ро Вавилоно́скиро кэ Ривла пэ пхув Емафо (Хамато), кай Навуходоносо́ро сэндякирдя лэс.

⁶ И кра́ли Вавилоно́скиро мулякирдя́ чхавэ́н Сэдэкияскирэн анги́л лэ́скирэ якха́ дрэ Ривла, и кра́ли Вавилоно́скиро адя́кэ-паць мулякирдя́ лачхэ́-родоскирэ ран Юдэя́тыр;

⁷ и ёв пхусадя якха́ Сэдэкияскэ и ёв пхандя лэс дрэ састыра́ зандирьенца тэ лыджа́н лэс кэ Вавило́но.

⁸ И э Халде́и хачкирдэ́ крали́скиро кхэр и кхэра́ манушэ́нгирэ яга́са, и ёнэ пхагирдэ́ ва́нты тэлэ́ Ерусалимо́скирэ.

⁹ И о Навузардано, о рай пэ крали́скири стрэ́га, лыджия́ криг дро пле́но кэ Вавило́но манушэ́н, савэ́ ячнэ́пэ дро фо́ро, и кодолэ́н, кон пиригия кэ ёв явирэ манушэ́нца, савэ́ ячнэ́пэ.

¹⁰ Нэ о Навузардано, рай пэ крали́скири стрэ́га, мэкця́ чорорэ́ манушэ́н, конэ́стэ ничы́ на сыс, пэ пхув Юдэякири, и ёв дыя́ лэ́нгэ винаграды́тка барья и фэ́лды дро дова́-паць часо.

Еремеёс Мэкэ́на пэ Во́ля

¹¹ И Навуходоносо́ро, кра́ли Вавилоно́скиро, припхэндя́ адя́кэ пал Еремеёстэ Навузарданоскэ, ра́скэ пэ крали́скири стрэ́га:

¹² “Лэ лэс и дыкх пал лэ́стэ и на кэр чорипэ́н лэ́скэ, нэ кэр ваш лэ́скэ адя́кэ, сыр ёв припхэнэла ту́кэ.”

¹³ И бичхадя́ о Навузардано, рай пэ крали́скири стрэ́га, и о Навузардано, шэрало́ евнухо, и о Нэргал-Шарецэро, шэрало́ танука, и сарэ́ тхага́рья Вавилоно́скирэ крали́скирэ,

¹⁴ и ёнэ бичхадэ́ и лынэ́ Еремеёс штарибнаскирэ грэдатыр (дворостыр) и ёнэ дынэ́ лэс Годолияскэ, чхавэ́скэ Ахакимоскирэскэ (ўнуко Шафаноскиро), соб (кай) ёв тэ лэл (отлыджал) лэс кхэрэ́. Адя́кэ ёв яця́пэ тэ дживэ́л машки́р манушэ́ндэ.

¹⁵ И сыс лав Ра́скирэ-Дэвлэ́скиро Еремеёскэ, ке́ли ёв сыс пхандло пэ штарибнытко грэ́да (дво́ро), ракири́:

¹⁶ “Джа́ и пхэн Авдемелехоскэ (Эве́д-Мелехоскэ), Эфиопляниноскэ: ‘Адя́кэ ракирэ́ла болыбна́скирэ-янголэ́нгиро Рай Дэвэ́л, Дэвэ́л Израилёскиро: ‘Акэ, Мэ яна́ва Мирэ́ лава́ пэ дава́ фо́ро ваш траш (дар), а на ваш лачхипэ́н, и ёнэ кэрэ́напэ дро чачипэ́н дро дова́ дывэ́с анги́л ту́тэ!

¹⁷ Нэ Мэ зракха́ва тут дро дова́ дывэ́с,’ – ракирэ́ла Рай Дэвэ́л, – ‘и тут на выдэна дрэ васта́ манушэ́нгирэ, конэ́стыр ту дарэса.

¹⁸ Пал-дова́ со Мэ чачэс зракха́ва тут, и ту на пэрэса куртала́тыр, нэ тыро́ джиибэ́н явэ́ла сыр дорэсыбэ́н (дыибэ́н) ту́кэ, пал-дова́ со ту рискирэса кэ Мэ пэ́скиро ило́ тэ зракхэспэ’”, – пхэндя́ Рай Дэвэ́л.