Ереме́ё 37 - Библия - Пэ Балтитко Романи чиб (Романэс) 2019

Ереме́ё Ивья́ (Напра́снэс) Ужакирэ́ла Лачхипэ́н

¹ И лыя́ тэ кралинэ́л о Сэдэки́я, чхаво́ Иосия́скиро, пэ штэ́то Иехонияскиро, саво́ сыс чхаво́ Иоакимоскиро, конэ́с Навуходоносо́ро кра́ли Вавилоно́скиро чхудя́ сыр крали́с пэ пхув Юдэякири.

² И ни ёв, ни Сэдэки́я, и ние́кх лэ́скирэ дынарье́ндыр (слугэ́ндыр), ни манушэ́ндыр долэ́ пхувья́тыр на причхудэ кан кэ лава́ Ра́скирэ-Дэвлэ́скирэ, со Ёв ракирдя́ пир ма́ндэ, Еремеёстэ.

³ И о Сэдэки́я, кра́ли бичхадя́ Иегухалос, чхавэ́с Сэлэмиякирэс и Софонияс, чхавэ́с Маасеяскирэс, кон сыс раша́й, кэ проро́ко Ереме́ё тэ пхэнэ́н: “Помангпэ пал амэ́ндэ Ра́скэ-Дэвлэ́скэ, амарэ́ Дэвлэ́скэ.”

⁴ Нэ Ереме́ё тэды явэ́лас и псирэлас вольнэс машки́р манушэ́ндэ, пал-дова́ со ёнэ на чхудэ́ лэс ишчо (инкэ́) дро штарибэ́н.

⁵ Тэды фараоно́скиро халадыбэ́н выгия́ Египто́стыр, и ке́ли э Халде́и, савэ́ обчхудэ трусця́л Ерусалимо, шундлэ́ дая́ зан (зве́сь) пал лэ́ндэ, то тэды ёнэ гинэ́ криг Ерусалимо́стыр.

⁶ И сыс лав Ра́скирэ-Дэвлэ́скиро кэ проро́ко Ереме́ё, ракири́:

⁷ “Адя́кэ ракирэ́ла Рай Дэвэ́л, Дэвэ́л Израилёскиро: Адя́кэ тумэ́ пхэнэ́н Юдэя́кирэ крали́скэ, кон бичхадя́ тумэн кэ Мэ, соб (кай) тэ пхучэ́н Ма́ндыр: ‘А́кэ, исын фараоно́скиро халадыбэ́н, со выгия́ тэ подэл васт тумэ́нгэ, явэ́ла тэ рисёл палэ пэ пэ́скири пхув.

⁸ Нэ явэ́на палэ э Халде́и, и явэ́на тэ марэ́нпэ проти дава́ фо́ро, и ёнэ лэ́на лэс, и ёнэ схачкирэна лэс яга́са.’

⁹ Адя́кэ ракирэ́ла Рай Дэвэ́л: ‘На хохавэн пэс’, ракири́: ‘Халде́и, чачэс, гинэ́ амэ́ндыр пэ́скэ’, нэ ёнэ на джа́на пэ́скэ.

¹⁰ Пал-дова́ со на дыкхи́ пэ дова́, со тумэ́ и домарэнас саро́ халадыбэ́н Халдеенгиро, савэ́ марэнаспэ проти тумэ́ндэ, и одо́й тэ ячэ́нпэ фэ́ни дукхадэ (ранена) мануша́ лэ́ндыр, тэды сароекх уштэлас кажно (сва́ко) ману́ш дрэ пэ́скири ша́тра, и хачкирэлас фо́ро яга́са.’”

Еремеёс Пхандлэ

¹¹ И сыс адя́кэ: ке́ли Халдее́нгиро халадыбэ́н мэкця́ осада Ерусалимо пир дова́, со сыс халадыбэ́н Фараоно́скиро,

¹² то о Ереме́ё гия́ криг Ерусалимо́стыр пэ пхув Веньяминоскири, соб (кай) тэ гарадёл машки́р манушэ́ндэ.

¹³ И ке́ли ёв сыс дрэ Веньяминоскири по́рта, одо́й сыс барыдыро́ пэ стрэ́га (ракхибнарье́ндэ), кон кхарэ́ласпэ Ирия, чхаво́ Сэлэмеяскиро (чхаво́ Хананеяскиро), и ёв ухтылдя Еремеёс, пророко́с, и пхэндя́: “Ту нашэса кэ Халде́и.”

¹⁴ Тэды о Ереме́ё пхэндя́: “Дава́ исын начачо! Мэ на нашава кэ Халдеи.” Нэ Иерея [Ирия-ю.о.] на шундя́ лэс, и ёв ухтылдя Еремеёс и яндя́ лэс кэ тхага́рья.

¹⁵ И тхага́рья древа́н холясынэ пэ Еремеёстэ, и ёнэ шулякирэнас (марэнас) лэс и ёнэ чхудэ́ лэс дро штарибэ́н дро кхэр Ионафаноскиро, лыла́-чхиныбнаскирэскэ. Пал-дова́ со ёнэ кэрдэ́ штарибэ́н дро дова́ кхэр.

¹⁶ Ке́ли Ереме́ё загия́ дрэ штарибэ́н ґанбинаса (ямаса), со сыс дрэ кхэлтра (подвало), кай ёв яця́пэ одо́й бут дывэса́,

¹⁷ то кра́ли Сэдэки́я бичхадя́ тэ янэл лэс яври́. О кра́ли пхучэлас чораханэ́с лэ́стыр дро пэ́скиро кхэр и пхэндя́: “Ци исын вари-саво́ лаворо Ра́стыр-Дэвлэ́стыр?” И отпхэндя́ Ереме́ё: “Исын.” Тэ́ньци ёв пхэндя́: “Тут выдэна дрэ васта́ крали́скирэ Вавилоно́стыр!”

¹⁸ И пхэндя́ Ереме́ё крали́скэ Сэдэкияскэ: “Саво́ чорипэ́н мэ кэрдём ту́кэ и тырэ́ дынарье́нгэ, ци тырэ́ манушэ́нгэ, со ту чхудя́н ман дро штарибэ́н?”

¹⁹ И кай исын тырэ́ проро́ки, савэ́ ангилпхэнэлас, ракири́: “О кра́ли Вавилоно́скиро на явэ́ла тэ джал пэ тумэ́ндэ ци проти дая́ пхув?

²⁰ Палдава́ мэ манга́ва тэ шунэ́с акана́: ‘Миро Раё, кра́лё! Мэк тэ прилэс ту миро мангипэ́н, на ри́скир ман дро Ионафаноскиро лыла́-чхиныбнаскиро кхэр, соб (кай) тэ на мэрав мэ одо́й.’”

²¹ Тэ́ньци кра́ли Сэдэки́я припхэндя́, соб (кай) тэ чхувэ́н Еремеёс дрэ грэ́да, кай сыс стрэ́га, и ёнэ дэ́нас лэ́скэ котэ́р (куско) маро́ пэкибнаскирэ гасатыр (вулицатыр) аж кэ дова́, сыр маро́ дро фо́ро кончиндяпэ. И Ереме́ё яця́пэ дрэ грэ́да, кай сыс стрэ́га.