Ереме́ё 33 - Библия - Пэ Балтитко Романи чиб (Романэс) 2019

Рай Дэвэ́л Нэвэ́стыр Дэ́ла Джиибэ́н Юдытконэ Нацыякэ

¹ И сыс лав кэ Ереме́ё Ра́стыр-Дэвлэ́стыр яви́р мо́ло, ке́ли ёв сыс бэшто́ пэ грэ́да (дво́ро) штарибнаскири, ракири́:

² “Адя́кэ ракирэ́ла Рай Дэвэ́л, Саво́ создыя́ саро́ дава́; Рай Дэвэ́л, Саво́ создыя́ пхув, соб (кай) ёй тэ тэрдёл, Рай Дэвэ́л, исын Лэ́скиро лав:

³ ‘Кхар Ман Мирэ́ лавэ́са, и Мэ отпхэнава ту́кэ, и Мэ сыкава́ва ту́кэ барэ́ и гарадэ́ рэ́нды (де́лы), и савэ́ ту на джинэ́са!’

⁴ Пал-дова́ со, акэ, со ракирэ́ла Рай Дэвэ́л, Израилёскиро Дэвэ́л, пал кхэра́ дро Ерусалимо и пал кральенгирэ кхэра́, со исын дрэ Юдэ́я, савэ́ пхагирэна пир дова́, соб (кай) тэ явэ́н марибны́тка валы лэ́ндыр и курта́ла ваш марибэ́н:

⁵ кадалэ́ Юды Ерусалимо́стыр явнэ́ тэ марэ́нпэ Халдее́нца, соб (кай) тэ пхэрдякирэн кхэра́ трупэнца манушэ́ндыр, конэ́с Мэ мулякирава дрэ Мири́ холы́, и дро Миро холякирибэ́н пал сари́ лэ́нгири биба́хт, пал со Мэ отрисиём далэ́ форо́стыр.

⁶ Акэ, Мэ причхувава састякирибнытко шмата (пластырё) и Мэ выдрабакирава лэн, и Мэ састякирава лэн, и Мэ сыкава́ва лэ́нгэ бут мо́лы рама́нё и патяибэ́н.

⁷ И Мэ кэра́ва адя́кэ, со рисёна палэ эмануша дро пле́но Юдэя́тыр и Израилёстыр, и Мэ пирикэрава долэ́ штэ́ты, сыр ёнэ сыс ґарэдыр (ґара́).

⁸ И Мэ выжужакирава лэн сарэ́ лэ́нгирэ чорипна́стыр, савэ́са ёнэ кэрдэ́ грэ́хи проти Ма́ндэ, и Мэ отмэка́ва саро́ чорипэ́н лэ́нгиро, савэ́са ёнэ кэрдэ́ грэ́хи проти Ма́ндэ, и савэ́нца ёнэ пхагирдэ́ [парудэ-р.с.] Миро Зако́но.

⁹ Тэ́ньци лав ‘Ерусалимо’ явэ́ла тэ радынэл манушэ́н, ёнэ явэ́на тэ шарэ́н лэс, и тэ дэн паты́в анги́л сарэ́ Наюдытконэ́ нацыендэ пир пхув, савэ́ явэ́на тэ шунэ́н пал саро́ лачхипэ́н, со Мэ кэрдём лэ́нгэ: и ёнэ явэ́на тэ дарэ́н, и тэ издран сарэ́ лачхипнастыр и сарэ́ миштыпна́стыр, со Мэ кэра́ва далэ́ фороскэ.”

¹⁰ Адя́кэ ракирэ́ла Рай Дэвэ́л: “Ададывэ́с нэвэ́стыр явэ́ла тэ шунэлпэ пэ дава́ штэ́то, пал саво́ тумэ́ ракирэ́на: ‘Дава́ штэ́то исын чхучо́, ни мануша́, ни кхэри́тка мурдала́’ – дрэ Юдэя́кирэ фо́рья, пэ Ерусалимо́скирэ пэ вули́цы (га́сы) исын чхучо́, ни мануша́, ни саво́ джиибна́скиро, ни кхэри́тко мурда́л,

¹¹ явэ́ла нэвэ́стыр зан радыма́са, явэ́ла весёло (багаибнытко) зан, явэ́ла зан тэрнэскири и зан тэрнякири, зан одолэ́ манушэ́нгири, савэ́ пхэнэ́на: ‘Парикирэ́н болыбна́скирэ-янголэ́нгиро Ра́скэ-Дэвлэ́скэ, пал-дова́ со Рай Дэвэ́л исын лачхо́, пал-дова́ со Лэ́скири ла́ска (тангипэ́н) ячэ́лапэ пэ сарэ́ ве́ки’, – и зан кодолэнгири, савэ́ янэ́на свэ́нта дыибэна́ парикирибнаса кэ Ра́скирэ-Дэвлэ́скири Кхангири́. Пал-дова́ со Мэ рискира́ва [дава́-р.с.] лачхипэ́н пленонэнгэ далэ́ пхувья́тыр, сыр сыс англэды́р,” – ракирэ́ла Рай Дэвэ́л.

¹² Акэ, со ракирэ́ла Рай Дэвэ́л, болыбна́скирэ-янголэ́нгиро: “Пэ дава́ штэ́то, саво́ исын чхучо́, и пэ саво́ нанэ ни мануша́, ни кхэри́тка мурдала́, – дрэ сарэ́ далэ́ – штэтоскирэ фо́рья, явэ́ла нэвэ́стыр (нэвэ́с) джиибнытко штэ́то чхупнарьенгэ (пастыре́нгэ), пир савэ́ ёнэ явэ́на тэ ракхэ́н пэ́скирэ ґурты.

¹³ Дрэ фо́рья бэргитка, дрэ фо́рья пэ до́ло, и дрэ фо́рья паш-дывэсытка (южна), пэ пхув Веньяминоскири, и пэ штэ́ты трусця́л Ерусалимо, и дрэ фо́рья Юдэя́кирэ, ґурты явэ́на тэ джа́н пэ́скэ нэвэ́стыр тэл манушэ́скиро васт, саво́ гинэ́ла лэн, – ракирэ́ла Рай Дэвэ́л.

¹⁴ ‘Акэ, явэ́на дывэса́,” – ракирэ́ла Рай Дэвэ́л, – “со Мэ саро́ кэра́ва пир лачхо́ лав, саво́ Мэ пхэндём пал кхэр Израилёскиро, пал кхэр Юда́скиро:

¹⁵ ‘дрэ долэ́ дывэса́ и дро дова́ часо Мэ кэра́ва адя́кэ, со чачипнаскири Рандь [Отбарипэн-р.с.] выбарьёла Давидо́скэ, и Ёв явэ́ла тэ сэндякирэ́л и тэ кэрэ́л пир чачипэ́н пэ пхув.

¹⁶ Дрэ долэ́ дывэса́ Юда зракхэ́лапэ, и Ерусалимо явэ́ла тэ дживэ́л би дара́киро. Акэ, исын лав, савэ́са ёв явэ́ла тэ кхарэлпэ: ‘Рай Дэвэ́л – амаро́ чачипэ́н.

¹⁷ Пал-дова́ со, акэ, со ракирэ́ла Рай Дэвэ́л: “Э Давидо́стэ ўса́ды / сак (всегда) явэ́ла ману́ш тэ бэшэ́л пэ троно Давидо́скирэ кхэрэ́стыр,

¹⁸ и явэ́на рашая́ Левитэ́нгирэ родо́стыр; явэ́ла тэ ухтылэл манушэ́н тэ хачкирэ́н свэ́нто яныбэ́н анги́л Ма́ндэ, тэ росхачкирэн марэскирэ яныбэна́, и тэ янэ́н лэн кажно дывэ́с.”

Дэвлэ́скиро Заве́то пэ Сарэ́ Ве́ки

¹⁹ Дава́ лав сыс Ра́стыр-Дэвлэ́стыр кэ Ереме́ё, и пхэндя́:

²⁰ “Адя́кэ ракирэ́ла Рай Дэвэ́л: ‘Ко́ли тумэ́ дэ́на ра́да тэ пхагирэн Миро заве́то пал дывэ́с, и Миро заве́то пал рат адя́кэ, соб (кай) тэ на явэ́л дывэ́с и рат дро пэ́скиро часо,

²¹ то тэды могинэ́ла (сашты́) адя́кэ-паць тэ явэ́л пхагирдо́ Миро заве́то Давидоса, Мирэ́ писхариса, ко́ли тэ на явэ́л чхаво́ лэ́стэ тэ кралинэ́л пэ лэ́скиро троно, и адя́кэ-паць Левитэнца, рашанца, Мирэ́ помогипнаскирэнца.

²² Сыр нашты́ тэ гинэс сарэ́ чэргэня́ пэ болыбэ́н, ци прахинки морёскирэ (дэрьявэ́скирэ), адя́кэ Мэ барьякирава ро́до Давидо́скиро, Мирэ́ чхавэ́скиро, и ро́до Левитэнгиро, савэ́ помогинэна Ма́нгэ.”

²³ И ишчо (инкэ́) сыс лав Ра́стыр-Дэвлэ́стыр кэ Ереме́ё, и пхэндя́:

²⁴ ‘Адя́кэ ракирэ́ла Рай Дэвэ́л: ‘Ци ґалыян ту дова́, со адалэ́ мануша́ ракирэ́на: ‘Ци далэ́ дуй кхэри́тка ро́ды (пле́ми): Юда́скиро и Израилёскиро дурьякирдя Рай Дэвэ́л Пэ́стыр, савэ́ Ёв выкэдыя́ Пэ́скэ?’ Палдава́ ёнэ лынэ́ тэ дыкхэ́н вучипна́стыр пэ Мирэ́ манушэ́ндэ сы́рбы ёнэ акана́ на гинэ́на лэн буты́р сыр нацыя.’

²⁵ ‘Адя́кэ ракирэ́ла Рай Дэвэ́л: ‘Ко́ли Мэ на кэрдём бы заве́то пал пхув и пхэныбэ́н, и, ко́ли тэ на явэ́л Миро заве́то пал дывэ́с и рат,

²⁶ то тэды Мэ дурьякирава бы криг Пэ́стыр кхэри́тко ро́до (пле́мё) Яково́скиро и кхэри́тко ро́до Давидо́скиро, Мирэ́ писхарискиро адя́кэ, соб (кай) тэ на лав буты́р лэ́скирэ кхэритконэ́ родо́стыр тхэмэ́скирэ барыдырэ́н пэ ро́до Авраамо́скиро, Исако́скиро и Яково́скиро. Пал-дова́ со Мэ яна́ва палэ лэн плено́стыр и Мэ сыкава́ва тангипэ́н (ла́ска) пэ лэ́ндэ.’”