Ереме́ё 32 - Библия - Пэ Балтитко Романи чиб (Романэс) 2019

О Ереме́ё Кинэла Фэ́лда

¹ Лав, саво́ сыс кэ Ереме́ё Ра́стыр-Дэвлэ́стыр пэ дэ́што бэрш Сэдэкияскиро-крали́скиро дрэ Юдэ́я, дава́ сыс дэшуохтото бэрш, сыр о Навуходоносо́ро лыя́ тэ кралинэ́л.

² Дро долэ́ дывэса́ Вавилоно́скиро халадыбэ́н (армия) обчхудя́ трусця́л Ерусалимо и о Ереме́ё, проро́ко, сыс пхандло дрэ грэ́да (дво́ро) штарибнаскири, со сыс дро кхэр крали́скиро Юдэя́киро.

³ О Сэдэки́я, кра́ли Юдэя́киро, пхандя лэс дро штарибэ́н, ракири́: “Со́скэ ту ангилпхэнэса и ракирэ́са: ‘Адя́кэ ракирэ́ла Рай Дэвэ́л: ‘А́кэ, Мэ отда́ва дава́ фо́ро дро васт крали́скиро Вавилоно́скиро, и ёв лэ́ла лэс’;

⁴ и Сэдэки́я, кра́ли Юдэя́киро, на зракхэ́лапэ Халдее́нгирэ вастэ́ндыр, нэ ёв адя́кэ пэрэ́ла дро васт крали́скиро Вавилоно́скиро, и ёв явэ́ла тэ ракирэ́л лэ́са муял (муй пэ муй), и тэ дыкхэ́л лэс якх пэ якх;

⁵ тэ́ньчи Навуходоносо́ро лыджа́ла Сэдэкияс кэ Вавило́но, и одо́й ёв явэ́ла анги́л дава́, сыр Мэ ява́ва кэ ёв, – ракирэ́ла Рай Дэвэ́л; мэк тумэ́ рисёна и явэ́на тэ марэ́нпэ Халдее́нца, тумэ́нгэ на явэ́ла бахт.’

⁶ И пхэндя́ Ереме́ё: “Лав Ра́скирэ-Дэвлэ́скиро сыс кэ мэ дасаво:

⁷ Акэ, Анамеило (Ганамеило), Тырэ́-какэскиро Салумоскиро чхаво́, явэ́ла кэ ту, пхэни́: ‘Кин ма́ндыр фэ́лда, сави́ исын дро Анафофо, пал-дова́ со ту́тэ исын выкиныбнытко право тэ кинэс ла.’”

⁸ Тэ́ньци Анамеило, мирэ́-какэскиро чхаво́, явдя́ кэ мэ пэ грэ́да (дво́ро) штарибнаскири пир лав Ра́скирэ-Дэвлэ́скиро и пхэндя́ ма́нгэ: “Мэ мангав тут тэ кинэс фэ́лда, сави́ исын дро Анафофо, саво́ исын пэ Веньяминоскири пхув; пал-дова́ со выкиныбнытко право исын ту́тэ, и выкиныбэ́н тыро́; кин фэ́лда пэ́скэ.” Тэ́ньци мэ ґалыём, со дава́ сыс лав Ра́скирэ-Дэвлэ́скиро.

⁹ Адя́кэ мэ киндём фэ́лда Анамеилостыр, мирэ́-какэскирэ чхавэстыр, саво́ сыс дро Анафофо, и мэ отважындём лэ́скэ ловэ́ – эфтадэша́ (шэкэли) руп.

¹⁰ И мэ подчхиндём киныбнытко лыл и чхудём чэргэн (штампо) пэ лэ́стэ, лыём якхитконэн (свидетеле́н) и Мэ отважындём ловэ́ пэ ублады́тка (весы).

¹¹ И мэ лыём киныбнытко лыл дуенца папирьенца, пэ́рво лыл, кай сыс чэргэн чхуды́ пир зако́но и пир стату́то, и яви́р лыл би чэргэнякиро (би штэмпоскиро),

¹² и мэ дыём яви́р копия пэ киныбнытко лыл Варухоскэ, Нирияскирэ чхавэ́скэ, чхавэ́скэ Маасияскирэскэ анги́л Анамеилоскирэ якха́, мирэ́-какэскирэ чхавэ́скирэ и пэ якха́ якхиткэнгирэ, савэ́ подчхиндлэпэ пэ киныбнытко лыл анги́л сарэ́ Юдэ́ндэ, кон сыс бэштэ́ пэ грэ́да (дво́ро), кай стрэ́га сыс.

¹³ Тэ́ньци мэ припхэндём шылалэс Варухоскэ анги́л лэ́ндэ, пхэни́:

¹⁴ “Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: ‘Далэ́ лыла́ ваш киныбэн, дуй папирья: лэ екх, пэ сави́ исын киныбнытко лыл чэргэняса, и яви́р, пэ сави́ нанэ чэргэн, и чхув лэн дро кхоро́ ґлэятыр (глинатыр), соб (кай) ёнэ тэ пасён одо́й бут дывэса́.’

¹⁵ ‘Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: “Кхэра́, фэ́лды и винаградники явэ́на тэ кинэнпэ нэвэ́стыр (нэвэ́с) пэ дая́ пхув.”

Еремеёскири Па́тери (Моли́тва)

¹⁶ И пало́ дова́ (коригэды́р) мэ дыём киныбнытко лыл Варухоскэ (Барухоскэ), Нирияскирэ чхавэ́скэ, и мэ мангдёмпэ Ра́скэ-Дэвлэ́скэ, ракири́:

¹⁷ “О Раё Дэ́вла, Раё Дэвлалэ! Акэ, Ту создыян болыбэ́н и пхув Пэ́скирэ барэ́ зорья́са и Пэ́скирэ вытырдынэ псикэса, ваш Ту́кэ нисо́ нанэ пхаро́!

¹⁸ Ту сыкавэса тангипэ́н (ла́ска) бут э тысёнцэнгэ манушэ́нгэ, и Ту отдэса палэ Пэ́скирэ сэндоса чхавэ́нгэ пал чорипэ́н лэ́нгирэ-дадэ́нгиро пал лэ́ндэ. Дэ́вла! Ту сан баро́ и зоралыпнаскиро, Раё Дэ́вла, болыбна́скирэ-янголэ́нгиро, – акэ, исын Тыро́ лав!

¹⁹ Ту сан барэ́-годя́киро тэ дэс годы́ и зор тэ кэрэ́с рэ́нды. Тырэ́ якха́ откэрдэ пэ сарэ́ дрома́, савэ́нца чхавэ́ манушэ́нгирэ псирэ́на, соб (кай) тэ дэн кажнонэ́скэ (сваконэскэ) пир лэ́скиро дром, и пир барьякирдэ́ (пло́ды) лэ́скирэ кэрибнастыр/ рэндэ́ндыр.

²⁰ Ту кэрдя́н ґэртыка и ди́вы пэ пхув Египто́скири, и кэрэ́са кэ ададывэ́с и дро Израилё и машки́р явирэ манушэ́ндэ, и Ту кэрдя́н Пэ́скэ лав, саво́ ёв исын ададывэ́с.

²¹ И Ту вылыджиян манушэ́н Израилёскирэн Египто́скирэ пхувья́тыр пир знаме́нии (ґертыка́) и ди́вы Пэ́скирэ зоралэ́ вастэ́са и Пэ́скирэ выдиндзькирдэ псикэса и барэ́ трашаибнаса (дара́са).

²² Ту дыя́н пхув лэ́нгэ, пал сави́ Ту дыя́н совла́х лэ́нгирэ дадэ́нгэ тэ дэс ла-пхув, пир сави́ тхадэ́ла тхуд и авги́н.

²³ И ёнэ загинэ́ и ухтылдэ́ дая́ пхув, нэ ёнэ на кандынэ́ Тыри́ зан, и ёнэ на кэрдэ́ пир Тыро́ Зако́но. Ёнэ сарэ́са на кэрдэ́ нисо́ далэ́стыр, со Ту припхэндян лэ́нгэ тэ кэрэ́н. Палдава́ Ту и кэрдя́н адя́кэ, соб (кай) сари́ дая́ биба́хт тэ явэ́л пэ лэ́ндэ.

²⁴ ‘Акэ, исын вучэ́ валы пхувья́тыр, со вэ́рги дочхудэ! Ёнэ догинэ́ кэ фо́ро тэ лэн лэс, и фо́ро отдэлапэ дрэ васта́ Халдее́нгирэ, савэ́ марэнапэ тэ лэн фо́ро куртала́са, бокхаса и мэрибнытконэ франсэнца: со Ту пхэндя́н, Дэ́вла, дава́ выпхэрдякирэлапэ (сполнинэлапэ), и, акэ, Ту дыкхэ́са дава́.

²⁵ И на дыкхи́ пэ дава́, со фо́ро отдэлапэ дрэ васта́ Халдее́нгирэ, Ту, Раё Дэ́вла, Дэвлалэ, пхэндя́н ма́нгэ: “Кин пэ́скэ фэ́лда пал ловэ́ и лэ якхитконэн и кхар якхитконэн, пал-дова́ со дава́ фо́ро отдэлапэ дрэ васта́ Халдеенгирэ.”

Рай Дэвэ́л Отпхэнэ́ла

²⁶ И явдя́ кэ мэ, Еремеёскэ, лав Ра́стыр-Дэвлэ́стыр, ракири́:

²⁷ “Акэ, Мэ сом Рай Дэвэ́л, Дэвэ́л кажнонэ́ лочакэ (плотякэ): ци исын вари-со пхаро́, со нашты́ тэ кэра́в Ма́нгэ?”

²⁸ Палдава́, акэ, со, – ракирэ́ла Рай Дэвэ́л: “Акэ, Мэ да́ва дава́ фо́ро дро васт Халдеенгиро дро васт Навуходоносороскиро, крали́скэ, Вавилоноскирэскэ, и ёв лэ́ла дава́ фо́ро.

²⁹ И Халдеи, савэ́ марэ́нпэ проти дава́ фо́ро, явэ́на и захачкирэна дава́ фо́ро и схачкирэна лэс, и кхэра́, пэ савэнгирэ стрэхи Юды тхувалякирдэ дрогонэ́ смолэнца Ваалоскэ и кай ёнэ вычхувэнас тхадунэ свэ́нта дыибэна́ явирэ дэвлорэ́нгэ, соб (кай) тэ дэн яг Мирэ́ холякэ пэ лэ́ндэ.

³⁰ Э чхавэ́ Израилёскирэ и э чхавэ́ Юдэя́кирэ кэрдэ́ екх чорипэ́н анги́л Ма́ндэ тыкнал/ стэрнал (смолоду); чачо́, чхавэ́ Израилёскирэ, фэ́ни дэ́нас яг Мирэ́ холякэ пал бутя́, со кэрдэ́ лэ́нгирэ васта́’, – ракирэ́ла Рай Дэвэ́л.

³¹ ‘Долэ́ дывэсэ́стыр, ке́ли дава́ фо́ро сыс чхудо кэ ададывэ́с, ёв дэ́лас яг Мирэ́ холякэ и Мирэ́ холякирибнаскэ, со Мэ дурьякирдём далэ́-форо́скирэ манушэ́н Пэ́стыр,

³² пал саро́ чорипэ́н, со кэрдэ́ чхавэ́ Израилёстыр, и чхавэ́ Юдэя́тыр, со ёнэ дынэ́ яг Мирэ́ холякэ пэ лэ́ндэ: ёнэ, лэ́нгирэ кра́лья, лэ́нгирэ тхага́рья, лэ́нгирэ рашая́ и лэ́нгирэ проро́ки, мурша́ Юдэя́кирэ и джиибна́скирэ (жытели) Ерусалимо́скирэ.

³³ И ёнэ рисинэ́ кэ Мэ думэса, а на мо́са; мэк Мэ и сыклякирдём лэн тасярлунэ (раннёнэ нэ) злокостыр (ранкостыр) сыклякиравас Мэ лэн, нэ ёнэ на шундлэ́ (на камлэ́) тэ прилэ́н упхэныбэ́н.

³⁴ И ёнэ аж чхудэ́ пэ́скирэ джунгалэ́ (брыдка) и́долы дро Миро кхэр, савэ́скэ лав Миро сыс дыно́, соб (кай) тэ магирэ́н лэс.

³⁵ И ёнэ чхудэ́ вучэ́ штэ́ты Ваалоскэ пэ до́ло Еномоскирэ [Гиномоскирэ-ю.о.] чхавэ́нгиро, соб (кай) тэ лыджа́н пирда́л яг лэ́нгирэ чхавэ́н и чхае́н тэ дэн паты́в Молохоскэ: со Мэ припхэндём тэ на кэрэ́н лэ́нгэ, со на явдя́ Ма́нгэ пэ годы́, соб (кай) ёнэ тэ кэрэ́н далэ́ джунгалэ́ рэ́нды, соб (кай) мануша́ Юдэя́кирэ тэ кэрэ́н грэ́хо.”

Рай Дэвэ́л Дэ́ла Наде́я

³⁶ Акана́ палдава́ адя́кэ ракирэ́ла Рай Дэвэ́л, Израилёскиро Дэвэ́л, – “Пал дава́ фо́ро, со тумэ́ ракирэ́на: ‘Ёв явэ́ла отдыно́ дро васт крали́скэ Вавилоноскирэскэ куртала́са, и бокхаса и мэрибнытконэ франсэнца,’ –

³⁷ Акэ, Мэ ява́ва тэ кэдав лэн сарэ́ тхэмэндыр (странэндыр), кэ савэ́ Мэ традыём лэн дрэ Мири́ холы́, и дро Миро холякирибэ́н, и дро Мири́ хор холы́, и Мэ яна́ва палэ лэн пэ дава́ штэ́то, и Мэ да́ва лэ́нгэ тэ дживэ́н би дара́киро.

³⁸ И ёнэ явэ́на Мирэ́ мануша́, и Мэ ява́ва лэ́нгиро Дэвэ́л.

³⁹ И Мэ да́ва лэ́нгэ екх ило́, и екх дром, соб (кай) ёнэ тэ дарэ́н Ма́ндыр сарэ́ дывэса́: ваш лачхипэ́н пэ́скэ, и ваш лачхипэ́н лэ́нгирэ биятэнгэ, савэ́ явэ́на пал лэ́ндэ тэ дживэ́н.

⁴⁰ И Мэ счхувава ве́чно Завето лэ́нца, со Мэ на отрисёвава лэ́ндыр, соб (кай) тэ кэра́в лачхипэ́н лэ́нгэ, и Мэ чхува́ва Мири́ траш дрэ лэ́нгирэ илэ, соб (кай) ёнэ тэ на дурьен [отджан-р.с.] Ма́ндыр.

⁴¹ И Мэ ява́ва зоралэ́с тэ радынавпэ пал лэ́ндэ тэ кэра́в лачхипэ́н лэ́нгэ, и Мэ почхувава лэн пэ дая́ пхув сарэ́ Мирэ́ илэ́стыр и сарэ́ Мирэ́ дестыр.

⁴² Акэ, – со ракирэ́ла Рай Дэвэ́л: “Адя́кэ, сыр Мэ яндём пэ манушэ́ндэ сари́ дая́ бари би́да, адя́кэ-паць Мэ яна́ва саро́ лачхипэ́н ваш лэ́нгэ, пал саво́ Мэ дыём лав лэ́нгэ.

⁴³ И явэ́на тэ кинэнпэ фэ́лды пэ дая́ пхув, пал сави́ тумэ́ ракирэ́на: ‘Ёй исын чхучи́, би манушэ́нгиро, би мурдалэнгиро’, ёй исын отдыны дрэ васта́ Халдеенгирэ.”

⁴⁴ Э мануша́ явэ́на тэ кинэн фэ́лды пал ловэ́ (руп), и тэ подчхинэн лыла́ (брифы), и тэ чхувэ́н чэргэн пэ лэ́ндэ, и тэ лэн якхитконэн пэ пхув Веньяминоскири, и пэ штэ́ты, и со исын пашы́л Ерусалимо, и дрэ фо́рья Юдэя́кирэ, и дрэ фо́рья пэ бэ́рги, и дрэ фо́рья пэ тэлатунэ́ штэ́ты, и дрэ фо́рья паш-дывэсытка (южна), пал-дова́ со Мэ рискира́ва лэн плено́стыр”, – ракирэ́ла Рай Дэвэ́л.