Ереме́ё 3 - Библия - Пэ Балтитко Романи чиб (Романэс) 2019

Ереме́ё Кхарэ́ла Израилё тэ Рисёл кэ Дэвэ́л

¹ Ишчо ракирэ́на ёнэ: ‘Ко́ли ману́ш розджалапэ пэ́скирэ ромня́са, и ёй джа́ла криг лэ́стыр и ёй ячэ́ла ромны́ явирэ манушэ́скэ, ци сашты́, соб (кай) ёй тэ рисёл палэ кэ ёв? Ци на явэ́ла кодоя пхув хор магирды? Нэ тумэ́, мануша́ Израилёстыр, камлэ́ бут явирэ дэвлорэ́ сы́рбы налачхи джувлы́, нэ сароекх (усае́кх) рисёв кэ Мэ’, – ракирэ́ла Рай Дэвэ́л.

² Ѓаздэн пэ́скирэ якха́ пэ вучэ́ биманушэнгирэ штэ́ты и Дыкхэ́н акана́, кай тумэ́ сыкадэ паты́в явирэ дэвлорэ́нгэ. Пашэ дрома́ тумэ́ са́нас бэштэ́ ваш лэ́нгэ, сы́рбы о Арабо пэ чхучи́ пхув, и тумэ́ магирдэ́ пэ́скири пхув налачхэ́ камибнаса и фуипнаса.

³ Палдава́ панинга́ сыс пририкирдэ, и на сыс вэснакирэ брышында и тумэ́ндэ чиката ячнэ́ сы́рбы налачхэ́ джувля́тэ, нэ тумэ́ на прилынэ́ ладжакирибэн.

⁴ Ци явэ́на тумэ́ тэ кхарэ́н ясвэ́нца Ман: ‘Миро Да́до! Ту сан Лыджаибнаскиро амарэ́ тэрныпнастыр?

⁵ Ци ячэсапэ Ту холямо́ пэ сарэ́ ве́ки? Ци явэ́са Ту тэ рикирэс холы́ кэ са́мо ко́нцо (кэ яго́ро)?’ Дыкхэ́н, тумэ́ пхэндлэ́ дава́, нэ тумэ́ кэрдэ́ чорипэ́н ада́кицы бут, кицы́ тумэ́ фэ́ни могиндлэ́!”

Ереме́ё йсын Бичхадо́ Яви́р Мо́ло кэ Мануша́ Израилёстыр, Савэ Дуринэ Дэвлэ́стыр

⁶ И пхэндя́ Рай Дэвэ́л ма́нгэ, Еремеёскэ, дрэ дывэса́, ке́ли Иосия (Ёсия) сыс кра́ли: ‘Ци дыкхця́н ту, со кэрдя́ чхай Израилёскири, сави́ отгия́ патяибнастыр? Ла́кирэ мануша́ псирэнас тэл кажно вучи́ бэ́рга, и кажно зэлэно дрэ́во и ёнэ сыкадэ паты́в кэ яви́р дэвлорэ́ сы́рбы налачхи джувлы́.

⁷ И пало́ дова́, сыр Израилё кэрдя́ саро́ дава́, Мэ пхэндём: “Рисёв кэ Мэ.” Нэ ёв на рисия́. И лэ́скири здыибнаскири пхэн Юдэ́я дыкхця́ дава́.

⁸ И дыкхця́ Юдэ́я дава́, ке́ли пир причына, со Израилё отгия́ патяибнастыр и лэ́скирэ мануша́ уса́ сыкавэнас камибэн кэ яви́р дэвлорэ́ сы́рбы налачхи джувлы́, то Мэ бичхадём Израилёскирэ манушэ́н криг Пэ́стыр, и дыём лэ́скэ розгиныбнытко лыл (фода), нэ лэ́скири здыибнаскири пхэн Юдэ́я на дарандыя, нэ ёй гия́ и ёй адя́кэ-паць сыкадя́ паты́в кэ яви́р дэвлорэ́.

⁹ И сыс адя́кэ, со Юдэ́я магирдя пхув пэ́скирэ нахратонэ камибнаса, и ёй дэ́лас паты́в барэнгэ и каштэнгэ.

¹⁰ Нэ усае́кх (сароекх) Израилёскири здыибнаскири пхэн Юдэ́я на рисия́ кэ Мэ сарэ́ илэ́стыр, нэ ёй фэ́ни пэфроми (пэмисни), – пхэндя́ Рай Дэвэ́л.

¹¹ Тэ́ньци пхэндя́ Рай Дэвэ́л ма́нгэ, Еремеёскэ: “Израиле, саво́ отгия́ патяибнастыр, сыкадя́ пэс чачунэдыр, сыр здыибнаскири Юдэ́я.

¹² Джа́ и роспхэн (обзанякир) сарэ́нгэ далэ́ лава́ одо́й кэ паш-ратякири (шылалы) риг, кон исын одо́й дро пле́но, и пхэн: ‘Рисёв, отгиибнытко Израиле!’ -ракирэ́ла Рай Дэвэ́л, – ‘Мэ на ява́ва тэ дыкха́в холямэс пэ ту́тэ, пал-дова́ со Мэ сом лачхэ́-де́скиро и Мэ на ява́ва тэ рикирав холы́ пэ сарэ́ ве́ки.

¹³ Фэ́ни (екх) приґалёв пэ́скири банг, со ту пхагирдян Ра́скирэ-Дэвлэ́скиро, Дэвлэ́скиро Зако́но, и ту чхурдэсапэ екхэ рига́тыр пэ яви́р анги́л чужонэ́ дэвлорэндэ, тэл кажно зэлэно дрэ́во, и со ту на шундя́н Мири́ зан’, – пхэндя́ Рай Дэвэ́л.

¹⁴ “Рисён тумэ́, отгиибнытка чхавэ́”, – пхэндя́ Рай Дэвэ́л, – пал-дова́ со Мэ сом тумаро́ Хула́й. Мэ ла́ва екхэ́с кажнонэ́ форо́стыр, и дуе́н кажнонэ́ сэмёстыр (родо́стыр), и Мэ яна́ва тумэн пэ Сио́но.

¹⁵ И Мэ да́ва тумэ́нгэ чхупнарьен [пастырен-р.с.] пир Миро ило́, савэ́ явэ́на тэ чалякирэн тумэн джиныбнаса, и ґалыибнаса.

¹⁶ И явэ́ла адя́кэ: ке́ли тумэ́ндэ бияндёна бут-бут мануша́ и явэ́на буты́р и буты́р мануша́ тумэ́ндэ, дро долэ́ дывэса́, – пхэндя́ Рай Дэвэ́л, – тумэ́ндэ на явэ́на тэ ракирэ́н буты́р: ковчэго (мохто́) Дэвлэ́скирэ Заветоса.’ Манушэ́ндэ на явэ́ла дава́ пэ годы́: ёнэ на явэ́на ни тэ рипирэ́н дава́, ни тэ явэ́н кэ ковчэго ни на подкэрэн лэс.

¹⁷ Дро дава́ часо (цы́ро) ёнэ явэ́на тэ кхарэ́н Ерусалимо Ра́скирэ-Дэвлэ́скиро троноса, и сарэ́ манушэ́нгирэ на́цыи кэдэнапэ кхэтанэ́ кэ Ерусалимо и буты́р на явэ́на тэ псирэ́н накандунэс пир лэ́нгирэ пхарэ́ илэ.

¹⁸ Дрэ долэ́ дывэса́ мануша́ Юдэя́кирэ кхэрэ́стыр явэ́на кэ Израилёскиро кхэр, и ёнэ явэ́на кхэтанэ́ тэ джа́н пхувья́тыр, со исын пэ паш-рати́тко (шылалы) риг кэ пхув, со Мэ дыём тумарэ́ дадэ́нгэ сыр мэкно́ миштыпэ́н.

¹⁹ И пхэндём Мэ, Рай Дэвэ́л: ‘Сыр Мэ прилава тумэн сыр Мирэ́ чхаворэ́н и Мэ да́ва тумэ́нгэ лачхи́ пхув, най шукарэдыр миштыпэ́н сарэ́ манушэ́нгирэ нацые́ндыр!’ – и ишчо (инкэ́) Мэ пхэндём: ‘Тэды тумэ́ явэ́на тэ кхарэ́н Ман ‘Амаро́ Дад’, и тумэ́ на отджана криг Ма́ндыр.

²⁰ Нэ ту, Израиле, сы́рбы напатяибнытко ромны́, сави́ дурьёла пэ́скирэ ромэстыр, адя́кэ-паць тырэ́ мануша́ мэкнэ́ Ман!

²¹ Шунэ́н заня́ пэ вучэ́ штэ́ты, сыр ровэна и мангэ́напэ Израилёскирэ чхаворэ́, пал-дова́ со ёнэ пиририскирдэ пэ́скирэ дрома́ дро джиибэ́н, и ёнэ бистырдэ Рас-Дэвлэ́с, пэ́скирэ Дэвлэ́с.

²² Рисён тумэ́, отгиибнытка чхаворалэ, и Мэ састякирава тумаро́ начачипэ́н. И ёнэ пхэндлэ́: ‘Акэ, амэ джа́са кэ Ту, пал-дова́ со Ту сан, Рай Дэвэ́л, амаро́ Дад.’

²³ Чачипэ́н, со амэ ивья́ патяндыям, со бэ́ргицы выракхэна амэн, со бутэ́-бэргэнгири зор подэла васт амэ́нгэ: чачипна́са Рай Дэвэ́л, амаро́ Дэвэ́л фэ́ни выракхэла амэн.

²⁴ Пал-дова́ со ладж, со кэрдэ́ амарэ́ дада́ тэрныпнастыр, похалас лэ́нгирэ-бакрэ́нгирэ ста́ды и тэды, лэ́нгирэ чхавэ́н и чхае́н.

²⁵ Амэ сам паштэ́ дрэ амари́ ладж, и амаро́ биладжаипэ́н чхакирдя амэн: пал-дова́ со амэ кэрдя́м грэ́хо проти Растэ-Дэвлэ́стэ, амарэ́ Дэвлэ́стэ: амэ и амарэ́ дада́, амарэ́ тырныпнастыр кэ ададывэ́с, и амэ на кандыям Ра́скирэ-Дэвлэ́скири, амарэ́-Дэвлэ́скири зан!”