Ереме́ё 26 - Библия - Пэ Балтитко Романи чиб (Романэс) 2019

Еремеёс Зракхэна Мэрибнастыр

¹ Дро са́мо англыпэ́н (начало), ке́ли кралиндя Иоакимо, чхаво́ Иосия́скиро, кра́ли пир Юдэ́я, явдя́ дасаво лав Ра́стыр-Дэвлэ́стыр ма́нгэ, Еремеёскэ, пхэни́:

² “Адя́кэ ракирэ́ла Рай Дэвэ́л: ‘Тэрдёв пэ грэ́да (дво́ро) Кхангирья́кири Ра́скирэ-Дэвлэ́скири и пхэн сарэ́ форьенгэ Юдэя́тыр, со явэ́на тэ дэн паты́в дрэ Кхангири́ Ра́скирэ-Дэвлэ́скири, сарэ́ лава́, со Мэ припхэнава ту́кэ тэ пхэнэ́с лэ́нгэ: На гарав ани е́кх лав.

³ Кажно лэ́ндыр, хай, явэ́ла тэ кандэл и тэ рискирэ́л пэ́скирэ бибахталэ́ дромэ́стыр, соб (кай) Мэ тэ обрискирав (тэ отпарував) Пэс чорипна́стыр, саво́ Мэ думинава тэ кэра́в лэ́нгэ пал фуипэ́н, со ёнэ кэрэ́на.’”

⁴ И ту пхэнэ́са лэ́нгэ: ‘Адя́кэ ракирэ́ла Рай Дэвэ́л: ‘Ко́ли тумэ́ на кандэ́на Ман, соб (кай) тэ псирэ́н пир Миро Зако́но, саво́ Мэ дыём тумэ́нгэ;

⁵ соб (кай) тэ причхувэ́н кан кэ Мирэ́ дынарьенгирэ, Мирэ́ пророкэ́нгирэ лава́, савэ́н Мэ бичхадём кэ тумэ́, пэ зло́ко (ра́нко) Мэ бичхававас, нэ тумэ́ на причхудэ кан;

⁶ тэды Мэ кэра́ва далэ́ Кхангирья́тыр яви́р Сило́мо (Шыло), и Мэ кэра́ва адя́кэ, со пэ лэ́стэ явэ́на тэ кэрэ́н прокошыбэна (арманя) сарэ́ Наюды́тка на́цыи пэ пхув.’”

⁷ И сарэ́ рашая́, и проро́ки, и сарэ́ мануша́ шундлэ́, сыр Ереме́ё ракирэ́лас далэ́ лава́ дрэ Кхангири́ Ра́скирэ-Дэвлэ́скири.

⁸ И яця́ адя́кэ: ке́ли Ереме́ё кончындя (пирияця́) тэ ракирэ́л саро́, со Рай Дэвэ́л припхэндя́ лэ́скэ тэ пхэнэ́л сарэ́ манушэ́нгэ, тэды рашая́, и проро́ки, и сарэ́ яви́р мануша́ ухтылдэ́ лэс, ракири́: “Ту, чачэс, мэрэ́са [банго́ тэ мэрэс-р.с.]!

⁹ Со́скэ ту ангилпхэнэса Ра́скирэ-Дэвлэ́скирэ лавэ́стыр, ракири́: ‘Дава́ кхэр явэ́ла сы́рбы Сило́мо (Шыло), и дава́ фо́ро явэ́ла чхучо́, би манушэ́нгиро?’” И сарэ́ мануша́ скэдынэ́пэ проти Еремеёстэ дрэ Кхангири́ Ра́скирэ-Дэвлэ́скири.

¹⁰ Ке́ли тхага́рья Юдэя́кирэ шундлэ́ сарэ́ кадалэ́ лава́, ёнэ гинэ́ Крали́скирэ кхэрэ́стыр кэ Кхангири́ Ра́скирэ-Дэвлэ́скири, и ёнэ бэшнэ́ кэ загиибэ́н дрэ нэви́ по́рта дрэ Кхангири́ Ра́скирэ-Дэвлэ́скири.”

¹¹ И рашая́, и проро́ки пхэндлэ́ тхагарьенгэ, и сарэ́ манушэ́нгэ, ракири́: “Адава́ ману́ш домардяпэ (мол) тэ мэрэ́л! Пир дова́, со ёв ангилпхэнэлас проти дава́ фо́ро, сыр тумэ́ шундлэ́ пэ́скирэ канэнца.”

¹² Тэ́ньци пхэндя́ Ереме́ё сарэ́ тхагарьенгэ и сарэ́ манушэ́нгэ, пхэни́: “Рай Дэвэ́л бичхадя́ ман тэ ангилпхэнав проти дава́ Кхэр и проти дава́ фо́ро сарэ́ лавэ́нца, со тумэ́ шундлэ́.

¹³ Акэ, палдава́ парувэн кэ фэды́р тумарэ́ дрома́, и дова́, со тумэ́ кэрэ́на, и кандэ́н зан Раскири-Дэвлэ́скири, тумарэ́ Дэвлэ́скири, тэды Рай Дэвэ́л потангинэла (пожалинэла) пал доя́ биба́хт, со Ёв выпхэндя пэ тумэ́ндэ.

¹⁴ Нэ со пал ма́ндэ, ґа́да, Мэ сом дрэ тумарэ́ васта́; кэрэ́н ма́нца дова́, со здэлапэ (сыкавэлапэ) тумэ́нгэ чачунэ́с и лачхэ́с.

¹⁵ Нэ тумэ́ джинэ́н чачэс, со ко́ли тумэ́ мулякирэна ман, тумэ́ джинэ́н, со тумэ́ лэ́на бибангипнаскиро рат пэ пэ́стэ, пэ дава́ фо́ро, и пэ лэ́скирэ манушэ́ндэ; пал-дова́ со, чачунэ́с, Рай Дэвэ́л бичхадя́ ман тэ пхэна́в сарэ́ далэ́ лава́ дрэ тумарэ́ кана́.”

¹⁶ И тхага́рья и сарэ́ мануша́ пхэндлэ́ рашангэ и пророкэнгэ: “Дава́ ману́ш на домардяпэ (намол) тэ мэрэ́л; пал-дова́ со ёв пхэндя́ амэ́нгэ Ра́скирэ-Дэвлэ́скирэ лавэ́стыр, амарэ́ Дэвлэ́стыр.”

¹⁷ Тэ́ньци вари-савэ́ пхурыдыра́ пэ пхув ґаздынэ́пэ и пхэндлэ́ сарэ́ манушэ́нгэ, савэ́ скэдынэ́пэ, пхэни́:

¹⁸ “Михай Морашостыр ангилпхэнэлас дро дывэ́с, ке́ли о Езэки́я сыс кра́ли пир Юдэ́я, и пхэндя́ сарэ́ манушэ́нгэ Юдэя́тыр, ракири́: ‘Адя́кэ ракирэ́ла болыбна́скирэ-янголэ́нгиро Рай Дэвэ́л: “Сио́но явэ́ла пхарадо сыр пхув плуґостыр (пхарадятыр), Ерусалимо́стыр ячэ́напэ руи́ны [бара́-р.с.], И бэ́рга, кай исын Кхангири́, явэ́ла сыр бэ́ргица машки́р вэш.

¹⁹ Ци Езэки́я, кра́ли Юдэя́киро, и сари́ Юдэ́я мулякирдэ́ лэс? Ци со ёв, Езэки́я, на дарэлас и на родэлас Дэвлэ́скири ла́ска. И Рай Дэвэ́л потангиндя (пожалиндя) пал биба́хт, со Ёв выпхэндя пэ лэ́ндэ. Нэ амэ кэра́са баро́ чорипэ́н проти амарэ́ дия́.”

²⁰ Дыкхэ́н, сыс адя́кэ-паць екх ману́ш, саво́ ангилпхэнэлас Ра́скирэ-Дэвлэ́скирэ лавэ́са, о Урия, чхаво́ Шэмаяскиро Кирьят-Ярмостыр, кон ангилпхэнэлас проти дава́ фо́ро и проти дая́ пхув дасавэ́-самонэ лавэ́нца, со Ереме́ё.

²¹ И ке́ли кра́ли Иоакимо, и сарэ́ лэ́скирэ зормануша, и сарэ́ тхага́рья шундлэ́ лэ́скирэ лава́, тэды кра́ли родыя, сыр тэ мулякирэ́л лэс. Нэ сыр Урия шундя́ дава́, ёв дарандыя, и ёв насця и гия́ кэ Еги́пто.

²² Тэды кра́ли Иоакимо бичхадя́ манушэ́н кэ Еги́пто: Елнатанос, чхавэ́с Ахбороскирэс, и явирэ манушэ́н лэ́са кэ Еги́пто,

²³ савэ́ лыджинэ́ пэ́са Урияс Египто́стыр, и яндлэ́ лэс кэ кра́ли Иоакимо; и ёв мулякирдя́ лэс куртала́са и чхурдыя́ яври́ лэ́скиро тру́по дрэ маґилы, кай сыс нарайканэ (чорорэ́) мануша́.

²⁴ Нэ сароекх (усае́кх) Ахикамоскиро васт, чхавэ́скирэ Шафаноскиро, сыс пал Еремеёстэ, соб (кай) тэ на отдэ́н лэс дрэ васта́ манушэ́нгэ тэ замарэ́н лэс.