Ереме́ё 24 - Библия - Пэ Балтитко Романи чиб (Романэс) 2019

Со Сыкавэна Дуй Кошы Инжыроса?

¹ О, Рай Дэвэ́л сыкадя́ ма́нгэ, и, акэ, дуй корзи́ны (кхудэ́) инжыроса чхудэ́ анги́л Ра́скирэ-Дэвлэ́скири Кхангири́. Дава́ сыс пало́ (после) дова́, кело Навуходоносо́ро, кра́ли Вавилоно́скиро, залыджия́ дро пле́но Ерусалимо́стыр Иехонияс, чхавэ́с Иохакимоскирэс, крали́с Юдэякирэс, и Юдэякирэн тхагарье́н, и спецэн дрэ вастытка бутя́ каштэса (кхэра́-кэрибнаскирэн), и пэталэнгирэн (ковале́н), и ёв яндя́ лэн дро Вавило́но.

² Екх кхудо (корзина) сыс древа́н лачхэ́ инжыроса сыр пэ́рва спе́ла му́ри, и яви́р кхудо сыс древа́н адасавэ́ налачхэ́ инжыроса, со лэ́скирэ му́ри сыс нашты́ тэ хас.

³ И пхуця́ ма́ндыр Рай Дэвэ́л: “Со дыкхэ́са ту, Ереме́ё?” И отпхэндём мэ: “Инжыритка му́ри.” Лачхэ́ му́ри исын древа́н лачхэ́, налачхэ́ му́ри исын дасавэ́ биба́хт, со лэн нашты́ тэ хас.”

⁴ Нэвэ́стыр (нэвэ́с) явдя́ кэ мэ лав Ра́скирэ-Дэвлэ́скиро, и пхэндя́:

⁵ ‘Адя́кэ ракирэ́ла Рай Дэвэ́л, Израилёскиро Дэвэ́л: “Сыр дава́ лачхо́ инжыро, адя́кэ и Мэ ява́ва тэ гинав пал лачхэндэ манушэ́ндэ, савэ́н залыджинэ дро пле́но Юдэя́тыр, конэ́с Мэ бичхадём криг далэ́ штэто́стыр пэ пхув Халдеенгири.

⁶ И Мэ ява́ва тэ дыкха́в пал лэ́ндэ ваш лэ́нгиро лачхипэ́н, и Мэ яна́ва палэ лэн пэ дая́ пхув, и Мэ ґазда́ва лэн, и Мэ на ява́ва тэ пхагирав (тэ тэлякирав) лэн кэ пхув, и Мэ на вырискирава лэн.

⁷ Тэ́ньци Мэ да́ва лэ́нгирэ илэскэ ла́ска тэ джинэ́л Ман, со Мэ сом Рай Дэвэ́л, и со ёнэ явэ́на Мирэ́ мануша́, и со Мэ ява́ва лэ́нгиро Дэвэ́л, пал-дова́ со ёнэ рисёна кэ Мэ сарэ́ илэ́стыр.

⁸ А со пал дова́ биба́хт инжыро, со лэс нашты́ тэ хас, шунэ́н: ‘Адя́кэ ракирэ́ла Рай Дэвэ́л: ‘Дасави́ биба́хт Мэ кэра́ва Сэдэкияскэ, крали́скэ Юдэя́тыр, и лэ́нгирэ тхагарье́нгэ, и манушэ́нгэ Ерусалимо́стыр, савэ́ ячнэ́пэ пэ дая́ пхув, и кодолэ́нгэ, савэ́ ячнэ́пэ пэ Египто́скири пхув.’

⁹ И Мэ здава лэн, соб (кай) лэн тэ традэ́н одори́к и палэ пир сарэ́ кралипэна́ пэ пхув пэ биба́хт, соб (кай) тэ обракирэн лэн сы́рбы припхэныбэ́н, соб (кай) тэ высан лэн сыр прокошыбэ́н (арман) пир сарэ́ штэ́ты, кэ савэ́ Мэ традыём лэн.

¹⁰ И Мэ бичхава́ва курта́ла пэ лэ́ндэ, бокх и фра́нсы адя́кэ ґара́ (длу́гэс), анги́л, сыр Мэ хасякира́ва лэн пхувья́тыр, сави́ Мэ дыём лэ́нгэ и лэ́нгирэ дадэ́нгэ.’”