Ереме́ё 23 - Библия - Пэ Балтитко Романи чиб (Романэс) 2019

Чачуны́ Рандь

¹ “Бида чхупнарьенгэ (пастыренгэ), савэ́ мулякирэна и росчхурдэна (рострадэна) бакрэ́н Мирэ́ чаритконэ пхувья́тыр!” – ракирэ́ла Рай Дэвэ́л.

² Палдава́ адя́кэ ракирэ́ла Рай Дэвэ́л, Израилёскиро Дэвэ́л пал чхупнарьендэ (пастырендэ), кон чалякирэла Лэ́скирэ манушэ́н: “Тумэ́ росчхурдынэ (рострадынэ) Миро гурто и традынэ лэн криг, и тумэ́ на дыкхнэ́ пал лэ́ндэ. Акэ, Мэ ява́ва тэ сэндякирав тумэн пал биба́хт (тумарэ́ фуй рэ́нды), со тумэ́ кэрдэ́”, – ракирэ́ла Рай Дэвэ́л.

³ “Нэ Мэ скэда́ва отячибэн (одолэ́н, кон яця́пэ) Мирэ́ ґуртостыр сарэ́ тхэмэндыр, кэ савэ́ Мэ протрадыём лэн, и Мэ яна́ва лэн палэ пэ лэ́нгирэ чаритка пхувья́, и лэ́ндэ явэ́на бут чхаворэ́, и лэн явэ́ла бут.

⁴ И Мэ чхува́ва чхупнарьен пэ лэ́ндэ, и ёнэ явэ́на тэ чалякирэн лэн; и ёнэ на явэ́на тэ дарэ́н буты́р, и ёнэ на явэ́на запхагирдэ дро ду́хо (фа́но), и нико́н на хасёла лэ́ндыр”, – ракирэ́ла Рай Дэвэ́л.

⁵ “Акэ, явэ́на дывэса́”, – ракирэ́ла Рай Дэвэ́л, – ке́ли Мэ чхува́ва упрэ́ нэвэ́стыр Давидо́скэ Рандь (Отбарипэн) чачуны́, Крали́с, ёв явэ́ла тэ раинэл и тэ кэрэ́л саро́ годэс. Ёв явэ́ла тэ кэрэ́л чачуно́ сэ́ндо и пир чачипэ́н пэ пхув.

⁶ Дрэ долэ́ дывэса́ Юдэ́я явэ́ла зракхны, и Израилё явэ́ла тэ дживэ́л би дара́киро. Ёв явэ́ла тэ кхарэлпэ: ‘Рай Дэвэ́л исын амаро́ Чачипэ́н.’

⁷ “Палдава́, акэ, явэ́на дывэса́’, – ракирэ́ла Рай Дэвэ́л – со буты́р на явэ́на тэ ракирэ́н: ‘Тэ явэ́л джидо́ Рай Дэвэ́л, Саво́ вылыджия́ Израилёскирэ чхавэ́н Египто́стыр;

⁸ нэ: ‘Тэ явэ́л джидо́ Рай Дэвэ́л, Саво́ вылыджия́ и яндя́ палэ ро́до Израилёскирэ кхэрэ́стыр паш-ратитконэ́ (севернонэ) рига́тыр, и сарэ́ тхэмэндыр, кэ савэ́ Мэ вытрадыём лэн. И ёнэ ячэ́напэ (явэ́на) тэ дживэ́н пэ лэ́нгири пхув.”

Хоханэ́ Проро́ки

⁹ Со пал пророкэ́ндэ: ‘Миро ило́ дрэ ма́ндэ пхарадёла, сарэ́ мирэ́ кокалы́ издрана. Мэ сом сы́рбы мато ману́ш, и сыр ману́ш, савэ́с мол (вино) пиризорьякирдя (матькирдя) анги́л Растэ-Дэвлэ́стэ, ваш свэ́нта лава́ Лэ́скирэ Свэнтоматыр.

¹⁰ Пал-дова́ со пхув исын пхэрды́ манушэ́нца, савэ́ камэ́на явирэ дэвлорэн, пал-дова́ со ёй зоралэ́с тугинэла (ровэла) прокошыбнастыр. Чаритка фэ́лды (пастбишчы) пэ чхучи́ пхув шутинэ; пал-дова́ со пророкэнгиро дром исын бибахтало́, и лэ́нгири зор исын дро начачипэ́н.

¹¹ Дуйджинэ́: и проро́ко, и раша́й исын бидывлытка: адя́кэ сыр и дро Миро кхэр Мэ латхём лэ́нгири злыднима”, – ракирэ́ла Рай Дэвэ́л.

¹² “Палдава́ лэ́нгиро дром явэ́ла ваш лэ́нгэ сыр слизко штэ́то дро калыпэ́н (цёмныма), лэн шпулэна (пихинэна) одо́й и ёнэ пэрэ́на одори́к. Мэ яна́ва биба́хт (бари би́да) – пэ лэ́ндэ дро бэрш, ке́ли Мэ ява́ва тэ сэндякирав лэн”, – ракирэ́ла Рай Дэвэ́л.

¹³ “Машкир пророкэ́ндэ дрэ Сама́рия Мэ дыкхцём дасаво бигодыпэн (дылныпэ́н): ёнэ ангилпхэнас Ваалоскирэ лавэ́са, и ёнэ кэрэ́нас адя́кэ, со Мирэ́ мануша́ Израилёскирэ, дынэпэ дукха́.

¹⁴ И Мэ дыкхцём трашанэ (даранэ) рэ́нды машки́р пророкэ́ндэ дро Израилё: ёнэ камэ́на явирэ дэвлорэ́ и ёнэ псирэ́на хохаибнаса. Ёнэ зоралякирэна одолэнгирэ васта́, кон кэрэ́ла биба́хт, соб (кай) нико́н тэ на рисёл криг пэ́скирэ злыдниматыр. Ёнэ ячнэ́ ваш Ма́нгэ сыр Содо́мо, и мануша́ лэ́скирэ сыр мануша́ дрэ Гомо́ра.”

¹⁵ Палдава́ адя́кэ ракирэ́ла янголэ́нгирэ-болыбна́скиро Рай Дэвэ́л пал пророкэ́ндэ: “Акэ Мэ ява́ва тэ чаравав лэн палыноса, и Мэ зачхувава лэн тэ пьен пани́ жэлучостыр, пир дова́, со Ерусалимо́скирэ пророкэндыр бидэвлыткима розгия́пэ пир сари́ пхув”

¹⁶ Адя́кэ ракирэ́ла янголэ́нгиро-болыбна́скиро Рай Дэвэ́л: “На причхувэ́н кан кэ лава́, со проро́ки ангилпхэнэна тумэ́нгэ. Ёнэ дылнякирэна тумэн; ёнэ ракирэ́на пал годэнгиро суно́, саво́ исын пэ ило́ лэ́ндэ, а на дова́, со Рай Дэвэ́л ракирэ́ла.

¹⁷ Ёнэ кажно мо́ло ракирэ́на одолэ́нгэ, савэ́ дыкхэ́на вучипна́стыр пэ Ма́ндэ: ‘Адя́кэ пхэндя́ Рай Дэвэ́л: ‘Тумэ́ндэ явэ́ла рама́нё.’ И ишчо (инкэ́) ёнэ ракирэ́на одолэ́нгэ, савэ́ псирэ́на пир пэ́скирэ пхарэ́ шэрэ́: ‘На явэ́ла биба́хт пэ тумэ́ндэ.’

¹⁸ Пал-дова́ со кон сыс тэрдо́ пэ скэдыибэ́н, кай Рай Дэвэ́л дэ́лас годы́, соб (кай) тэ ґалёл анги́л Лэ́скиро лав? Кон причхудя пэ́скиро кан кэ Лэ́скиро лав и шундя́ лэс?

¹⁹ Дыкхэ́н! Баро́ штормо Ра́стыр-Дэвлэ́стыр, Лэ́скирэ холякирибнастыр, явдя́ рискирибна́скиро штормо; ёв пэрэ́ла пэ фуе́-манушэ́нгиро шэро́.

²⁰ Ра́скирэ-Дэвлэ́скири холы́ на рисёла криг анги́л дова́, сыр Ёв кэрэ́ла саро́ дова́, со Ёв камдя́ тэ кэрэ́л: тумэ́ ґалёна дава́ дро ко́нцо (яго́ро) дывэсэнгиро (палатунэ́ дывэса́).

²¹ Мэ на бичхадём кадалэ́ пророкэ́н, нэ ёнэ праста́ндынэ пэ́скирэ лавэ́са. Мэ на ракирдём лэ́нгэ, нэ ёнэ ангилпхэндлэ.

²² Нэ ко́ли ёнэ тэ тэрдён пэ скэдыибэ́н, кай Рай Дэвэ́л дэ́лас годы́ и тэ кэрэ́н адя́кэ, соб (кай) Мирэ́ мануша́ тэ шунэ́н Мирэ́ лава́, соб (кай) тэ рискирэ́н лэн бибахталэ́ дромэ́стыр и фуипнастыр, со ёнэ кэрдэ́.

²³ ‘Ци сом Мэ Дэвэ́л, Саво́ исын фэ́ни (то́ка) пашы́л? Ци на сом Мэ Дэвэ́л, Саво́ исын дура́л?’ – ракирэ́ла Рай Дэвэ́л.

²⁴ “Ци могинэ́ла (сашты́) ману́ш тэ гарадёл дрэ чораханэ штэ́ты, соб (кай) Мэ тэ на дыкха́в лэс?” – ракирэ́ла Рай Дэвэ́л. “Ци на сом Мэ пэ болыбэ́н и пэ пхув?” – ракирэ́ла Рай Дэвэ́л.

²⁵ Мэ шундём, со проро́ки ракирэ́на, кон ангилпхэнэла хоханэ́с Мирэ́ лавэ́стыр. Ёнэ ракирэ́на: “Мэ дыкхцём сунэ́! Мэ дыкхцём сунэ́!”

²⁶ Сыр ґара́ (длу́гэс) явэ́ла дава́ дро ило́ пророкэнгиро, савэ́ ангилпхэнэна хохаибэ́н лэ́нгирэ илэ́стыр?

²⁷ Савэ думинэ́на тэ кэрэ́н адя́кэ, соб (кай) Мирэ́ мануша́ тэ бистрэн Миро лав пал лэ́нгирэ сунэ́, савэ́ ёнэ роспхэнэна со кэ екх пэ́скирэ суседоскэ (котарискэ): адя́кэ-паць лэ́нгирэ дада́ бистырдэ Миро лав пал Ваалостэ.

²⁸ О проро́ко, савэ́стэ исын суно́, мэк ёв тэ роспхэнэл суно́, нэ кодова́, савэ́стэ исын Миро лав, мэк ёв тэ роспхэнэл Миро лав чачунэ́с. Саво́ исын кхэтаныпэн машки́р пхус и зя́рка?” – ракирэ́ла Рай Дэвэ́л.

²⁹ “Ци нанэ Миро лав сы́рбы яг, и сы́рбы чокано (млотко), саво́ пхагирэ́ла скалы пэ котэра́?”, – ракирэ́ла Рай Дэвэ́л.

³⁰ “Палдава́, акэ, Мэ сом проти пророкэ́ндэ – ракирэ́ла Рай Дэвэ́л, савэ́ чорэна Мирэ́ лава́, екх екхэстыр, лэ́нгирэ суседе́ндыр (котарьендыр).

³¹ Акэ, Мэ сом проти пророкэ́ндэ”, – ракирэ́ла Рай Дэвэ́л, савэ́ ракирэ́на пэ́скирэ чиба́са и пхэнэ́на: “Дава́ Ёв ракирэ́ла.”

³² “Акэ, Мэ сом проти лэ́ндэ, савэ́ ангилпхэнэна хоханэ́ сунэ́, – ракирэ́ла Рай Дэвэ́л, – савэ́ пирипхэнэна лэн манушэ́нгэ адя́кэ, со ёнэ дэнапэ дукха́ хохаибнастыр и лэ́нгирэ шарибнастыр. Нэ Мэ на бичхадём лэн, и Мэ на припхэндём лэ́нгэ тэ кэрэ́н, и ёнэ сарэ́са на янэ́на ни саво́ лачхипэ́н кадалэ́ манушэ́нгэ”, – ракирэ́ла Рай Дэвэ́л.

³³ “Палдава́, ке́ли адалэ́ мануша́, ци проро́ко, ци раша́й пхучэна ту́тыр, пхэни́: ‘Сави́ исын пхари́ звесь (зан) Ра́стыр-Дэвлэ́стыр?’ – тэды ту, Ереме́ё, пхэнэ́са лэ́нгэ: ‘Тумэ́ кокорэ́ сан пхари́ звесь (зан) Растэ-Дэвлэ́стэ адя́кэ, со Рай Дэвэ́л камэ́ла тэ отпхэнэлпэ тумэ́ндыр.’

³⁴ И ко́ли проро́ко, ци раша́й, ци мануша́ пхэнэ́на: ‘Дава́ исын пхарипэ́н Растэ-Дэвлэ́стэ.’ Мэ адя́кэ-паць и сэндякирава пхарэ́с кадалэ́ манушэ́с и лэ́скири сэ́м΄я (ири́).

³⁵ Палдава́ тумэ́, со кэ екх, ракирэ́н пэ́скирэ суседоскэ (котарискэ), и, со кэ екх, пэ́скирэ пшалэ́скэ: ‘Со отпхэндя́ Рай Дэвэ́л? Со пхэндя́ Рай Дэвэ́л?

³⁶ И тумэ́ на ракирэ́н буты́р: ‘Пхари́ звесь (зан) Ра́стыр-Дэвлэ́стыр, пал-дова́ со кажно адасаво́ лав манушэ́стэ явэ́ла пхари́ звесь (зан) ваш лэ́скэ, кон адя́кэ ракирэ́ла, пал-дова́ со тумэ́ пиририскирдэ лава́ джидэ́ Дэвлэ́скирэ, амарэ́ Ра́скирэ-Дэвлэ́скирэ, янголэ́нгирэ-болыбна́скирэ, амарэ́ Дэвлэ́скирэ.

³⁷ Адя́кэ, Ереме́ё, пхэн пророкоскэ: ‘Со отпхэндя́ Рай Дэвэ́л ту́кэ? Со пхэндя́ Рай Дэвэ́л ту́кэ?

³⁸ Нэ ко́ли ёнэ ишчо (инкэ́) пхэнэ́на: ‘Пхари́ звесь (зан) Ра́стыр-Дэвлэ́стыр’, тэды ту пхэн лэ́нгэ, со Мэ, Рай Дэвэ́л, адя́кэ ракира́ва: ‘Пал-дова́ со тумэ́ ракирэ́на’ пхари́ зан (звесь) Ра́стыр-Дэвлэ́стыр’, нэ Мэ бичхадём лав тумэ́нгэ тэ на ракирэ́н: ‘Пхари́ звесь (зан) Ра́стыр-Дэвлэ́стыр’,

³⁹ палдава́, акэ, Мэ адя́кэ-паць и бистрава тумэн, и Мэ мэкава тумэн сарэ́са, и фо́ро, Ерусалимо, саво́ Мэ дыём тумэ́нгэ и тумарэ́ дадэ́нгэ, и Мэ вычхурдава тумэн Мирэ́ мо́стыр.

⁴⁰ И Мэ яна́ва пэ тумэ́ндэ ве́чно бипатыв, ве́чно ладж адя́кэ, со дава́ на бистрэлапэ.”