Ереме́ё 2 - Библия - Пэ Балтитко Романи чиб (Романэс) 2019

Дэвэ́л Пэкэлапэ (Думинэ́ла) пал Израилё

¹ И сыс кэ мэ, Ра́скирэ-Дэвлэ́скиро лав, и пхэндя́:

² “Джа́ и пхэн ясвэ́нца дрэ манушэ́нгирэ [чхакирэ-р.с.] кана́ Ерусалимо́стыр, пхэни́: ‘Адя́кэ ракирэ́ла Рай Дэвэ́л: ‘Мэ рипирава тут, Израилё, савэ́ лачхэ́ сыс тырэ́ мануша́ тэрнал, тумари́ паты́в, со сыс сы́рбы тэрнэндэ анги́л совэ́л, сыр тумэ́ гинэ́ пал Ма́ндэ пэ чхучэ́ прахи, пэ пхув, со на чхудэ́ гива́ ишчо (инкэ́).

³ Ту, Израиле, са́нас свэ́нто Ма́ндэ, ту са́нас пэ́рво барьякирдо́ (пло́до) Мирэ́ умалотостыр. Мэ пхарэ́с сэндякирдём сарэ́н, кон дукхавэлас тут, мэ бичхававас би́да пэ лэ́ндэ,’’” – пхэндя́ Рай Дэвэ́л.

Израилёскирэ-Манушэ́нгиро Грэ́хо, со Кэрдэ́ Лэ́нгирэ Дада́

⁴ Шунэ́н Ра́скирэ-Дэвлэ́скиро лав тумэ́, кхэр Яково́скиро, и сарэ́ сэм΄и (ирья́) [кхэра́-р.с.] Израилёскирэ кхэрэ́стыр!

⁵ Адя́кэ ракирэ́ла Рай Дэвэ́л: ‘Саво́ чорипэ́н тумарэ́ дада́ латхнэ́ дрэ Ма́ндэ, со ёнэ дуринэ Ма́ндыр, со ёнэ гинэ́ пал хартытка и́долы, и со ёнэ кокорэ́ ячнэ́ хартытка (суетна)?

⁶ И на пхэндлэ́ ёнэ: “Кай исын Рай Дэвэ́л, Кон лыджия́ криг амэн Египто́скирэ пхувья́тыр, Кон лыджия́ амэн пирда́л чхучэ́ пхувья́, пирда́л чхучэ́ прахи, пирда́л ґанбиня́, пирда́л шутькирды пхув, кай исын зэр (тень) сы́рбы мэрибна́стыр, пирда́л пхув, пэ сави́ ние́кх на прогия́, и нико́н на дживдя́.”

⁷ И Мэ яндём тумэн пэ барвалы пхув, соб (кай) тумэ́ тэ хан ла́кирэ барьякирдэ́ (пло́ды), и ла́киро миштыпэ́н, нэ сыр тумэ́ загинэ́ пэ дая́ пхув, тумэ́ магирдэ́ кадая́ пхув, и тумэ́ магирдэ́ Миро миштыпэ́н.

⁸ Э рашая́ на пхэндлэ́: ‘Кай исын Рай Дэвэ́л?’, – кодолэ́, кон рикирэ́ла зор пэ Зако́но, ёнэ на джиндлэ́ Ман: пастыри адя́кэ-паць кэрдэ́ чорипэ́н Ма́нгэ, и проро́ки ангилпхэнэнас Валаалоскирэ лавэ́са, и ёнэ псирдэ́ пал и́долы, савэ́ндыр на сыс ни саво́ лачхипэ́н лэ́нгэ.

⁹ Палдава́ Мэ ява́ва буты́р тэ сэндякирав тумэн’, – ракирэ́ла Рай Дэвэ́л, – “Мэ ява́ва тэ сэндякирав тумарэ́-чхаворэнгирэ чхаворэ́н.

¹⁰ Джа́н пал Хитимоскирэ островы, бичхавэн манушэ́н пэ Кидаро и обдуминэн миштэ́с, ци сыс вари-со кадасаво́, сыр кэрдэ́ мануша́:

¹¹ соб (кай) манушы́тко нацыя тэ парувэл пэ́скирэ дэвлэн, мэк ёнэ и на сыс дэвэла́? Нэ Мирэ́ мануша́ парудэ лэ́нгири сла́ва (Дэвлэ́скиро Барипэ́н) пэ и́долы, савэ́ндыр на сыс нисаво́ лачхипэ́н.

¹² Дивинэнпэ зоралэ́с, болыбэ́н кадалэстыр, и тринскирэнпэ’, – пхэндя́ Рай Дэвэ́л.

¹³ Пал-дова́ со мирэ́ мануша́ кэрдэ́ чорипэ́н дуй мо́лы: ёнэ ячкирдэ́ Ман, Кон исын джидэ́-панескири ґанингори и ёнэ выганадэ пэ́скэ вэндариня (сажалки), пхагирдэ́ лэн, со на могинэ́на тэ рикирэ́н пани́.

¹⁴ Со Израилёскирэ мануша́ ячнэ́ дынарье́нца? Ци со ёнэ исын кхэри́тка писха́рья? Со́скэ лэс вэ́рги обчорэна?

¹⁵ Тэрнэ́ шчэра́ (левы) рыкинэна пэ Израилё и ёнэ брилинэна; ёнэ кэрдэ́ Израилёстыр чхучи́ (пусто) пхув; лэ́скирэ фо́рья хачкирдэ́ и нико́н на дживэ́ла одо́й.

¹⁶ И адя́кэ-паць тэрнэ́ мануша́ Тафнатыр и Мемфисостыр пхагирдэ́ тырэ́-шэрэскири крали́тко стадык.

¹⁷ Ци на яндян ту кокоро́, Израиле, саро́ дава́ пэ пэ́стэ, сыр ту ячкирдян Ман, Рас-Дэвлэ́с, Дэвлэ́с, ке́ли Мэ лыджиём тут дромэ́са.

¹⁸ И акана́, ваш со ту́кэ, Израиле, трэй тэ кэрэ́с дром кэ Еги́пто и тэ пьес Сихороскирэ (Нилостыр) паня́, ци тэ кэрэ́с дром кэ Асирия; и тэ пьес ла́кирэ рэка́тыр (лэня́тыр).

¹⁹ Фуипэ́н, со ту кэрдя́н, пирисыклякирэла тут, и тыро́ отпхэныбэ́н Ма́ндыр бангякирэла тут: палдава́ джа́ и дыкх, сыр кирко и биба́хт ту́кэ, со ту ячкирдян Ман, Рас-Дэвлэ́с, и со ту́тэ нанэ дар анги́л Ма́ндэ”, – пхэндя́ Рай Дэвэ́л, Рай Дэвэ́л болыбна́скирэ-янголэ́нгиро.

²⁰ ‘Пал-дова́ со Мэ ґара́ пхагирдём ґа́мо тырэ́ мэнятыр, Мэ роскусцём Тырэ́ пэнты, и ту пхэндя́н: ‘Мэ на ява́ва тэ кэра́в чорипэ́н: нэ ту тэл кажно бэ́ргица и тэл кажно зэлэно дрэ́во ту дэ́са паты́в идолэ́нгэ, сы́рбы налачхи джувлы́.

²¹ И Мэ почхудём тут дрэ пхув сыр лачхэ́-родоскиро винаградо, лачхэ́-семёскирэ зяркатыр: сыр да ту пирикэрдянпэ дрэ хасибны́тко (верутно) отбарипэн диконэ винаградостыр анги́л Ма́ндэ.

²² Палдава́, мэк ту и тэ выморэспэ акана́ содаса, и тэ лэс бут сапуни, сароекх тыро́ чорипэ́н сыкадо анги́л Ма́ндэ,’ – пхэндя́ Рай Дэвэ́л, Рай Дэвэ́л.

²³ Сыр да ту могиндян тэ пхэнэ́с: ‘Мэ на сом магирдо́, мэ на гиём пал Ваалостэ’? Дыкх, со ту кэрдя́н пэ до́ло: ту сан сы́рбы чвытко верблюдиха (дромадариха), сави́ уса́ парувэла пэ́скирэ дрома́;

²⁴ ту сан сы́рбы хрустэнгири ослица, со присыклёла кэ чхучи́ пхув, со сунгэла кэ пэ балва́л [глытынэла фа́но-р.с.] ваш пэ́скиро тырдыпэ́н? Кон дэ́ла ра́да тэ обрикирэл ла, сыр ёй исын насвалы пал ослэндэ? Сарэ́, кон родэ́ла ла, латхэ́ла ла би-пхарипнаскиро дро ла́киро чхон.

²⁵ Пририкир, Израиле, пэ́скирэ ґэра́, соб (кай) ёнэ тэ на явэ́н дукхадэ, и пэ́скиро кирло, соб (кай) ёв тэ на явэ́л трушало (пиришутькирдо). Нэ ту пхэндя́н: ‘Над, со́стыр тэ ужакирав лачхипэ́н. Над! Пал-дова́ со ма́нгэ кэрдэ́пэ (покамлэпэ) чу́жа дэвлорэ́ и мэ джа́ва пал лэ́ндэ.

²⁶ Сыр чор, савэ́с ладжакирдэ́, сыр ухтылдэ́ лэс, ада́кицы ладжакирдэ́ пэс тумэ́, – мануша́ Израилёстыр: тумарэ́ кра́лья, тумарэ́ тхага́рья, и тумарэ́ рашая́, и тумарэ́ проро́ки,

²⁷ савэ́ пхэнэ́на каштэскэ: ‘Ту сан миро дад’, – барэскэ: ‘Ту яндян ман пэ свэ́то! ‘Тумарэ́ мануша́ рисинэ́ думэса кэ Мэ, а на мо́са: нэ сыр явэ́ла пхаро́, тэды ёнэ пхэнэ́на: ‘Ушты́ и зра́кх амэн.’

²⁸ Нэ кай исын тумарэ́ дэвлорэ́, со тумэ́ кэрдэ́ ваш пэ́скэ? Мэк ёнэ тэ уштэ́н, и мэк ёнэ тэ зракхэн тумэн, сыр исын пхаро́ тумэ́нгэ! Пал-дова́ со ту́тэ, Юдэ́я, исын ада́кицы дэвлорэ́, кицы́ исын фо́рья!

²⁹ Со́скэ тумэ́ явэ́на тэ чингардэнпэ Ма́нца? Сарэ́ тумэ́ кэрдэ́ грэ́хо проти Ма́ндэ!’ – пхэндя́ Рай Дэвэ́л.

³⁰ Ивья́ (напра́снэс) мулякирдём Мэ тумарэ́ чхаворэ́н, ёнэ на прилынэ́ дова́, пал со мэ пирисыклякирдём лэн. Тумэ́ кокорэ́ зачингирдэ куртала́са пэ́скирэ пророкэ́н, сы́рбы шчэр (ле́во), со похала саро́.

³¹ О, Израилёскиро ро́до! Шунэ́н мирэ́ лава́ Ра́стыр-Дэвлэ́стыр! Ци со́мас Мэ сы́рбы пэ чхучи́ пхув Израилёскэ? Ци сы́рбы калы (тёмно) пхув? Со́скэ тэды Мирэ́ мануша́ ракирэ́на: ‘Амэ кокорэ́ сам рая пэ́скэ! Амэ буты́р на ява́са кэ Ту!’

³² Ци могинэ́ла чхай тэ бистрэл ла́кири шукарни вя́нка (шука́р укэдыибэн)? Ци тэрны́ тэ бистрэл ла́киро шукарно урибэ́н? Нэ Мирэ́ мануша́ бистрэнас Ман ада́кицы бут дывэса́, со нашты́ тэ погинас.

³³ Сыр тумэ́ шукарьякирэна (хоханэ́с подкэрэна) пэ́скири манера, соб (кай) тэ латхэ́н камибэн? Палдава́ тумэ́ аж высыклякирдэ пэ́скирэ манерэнгэ самонэ бэдонэ джувле́н.

³⁴ Адя́кэ-паць мануша́ латхнэ́ пэ труюны (пэ подя) рат, со бибангипнаскирэ мануша́ прочхудэ: ‘Мэ на латхём дава́, чораханэ́с родыи, нэ адя́кэ упра́л саро́ бицяло́.’

³⁵ Нэ тумэ́ ишчо (инкэ́) ракирэ́на: ‘Пал-дова́ со амэ на сам бангэ́, Лэ́скири холы́ рисёла ригаса амэ́ндыр!’ Дыкхэ́н жа! Мэ ява́ва тэ лыджав чинга́рд (тэ сэндинавпэ) тумэ́нца, пал-дова́ со тумэ́ пхэндлэ́: ‘Амэ на кэрдя́м грэ́хо.’

³⁶ Со́скэ тумэ́ древа́н бут псирэ́на чхучэс, и парувэна тумарэ́ дрома́? Тумэ́ явэ́на ладжакирдэ́ дро Еги́пто, адя́кэ-паць сыр тумэ́ са́нас ладжакирдэ́ дрэ Асирия.

³⁷ Нэ тумэ́ джа́на криг Египто́стыр, и тумарэ́ васта́ явэ́на пэ тумарэ́ шэрэ́: пал-дова́ со Мэ, Рай Дэвэ́л, на прилыём дова́, кэ со тумарэ́ илэ рисинэ́, и дава́ на удэлапэ кэ тумаро́ миштыпэ́н.”