Ереме́ё 18 - Библия - Пэ Балтитко Романи чиб (Романэс) 2019

Пирьенгиро и Ѓлэя (Горшэчнико и Глина)

¹ Ѓа́да, исын лав, саво́ пхэндя́ Рай Дэвэ́л ма́нгэ, Еремеёскэ:

² “Ушты́ и джа́ кэ пирьенгиро кхэр, и одо́й Мэ кэра́ва адя́кэ, со ту шунэса Мирэ́ лава́.”

³ И мэ гиём кэ пирьенгиро кхэр, и, акэ, ёв кэрэ́лас буты́ пэ пирьенгири рота.

⁴ И пири́, сави́ ёв кэрдя́ ґлэятыр (глинатыр), пхарадыя дрэ лэ́скирэ васта́, и ёв кэрдя́ яви́р пири́, сави́ здэласпэ миштэ́с пирьенгирэскэ тэ кэрэ́л.

⁵ Тэ́ньци явдя́ Ра́скирэ-Дэвлэ́скиро лав кэ мэ:

⁶ “О, Израилёскиро кхэр. Ци нашты́ Ма́нгэ тэ кэра́в адя́кэ-паць тумэ́нца, сыр кадалэ́ пирьенгирэса?” – ракирэ́ла Рай Дэвэ́л. “Дыкх, сыр исын ґлэя дрэ пирье́нгирэ васта́, и адя́кэ-паць тумэ́ сан дро Миро васт, тумэ́ – Израилёскиро кхэр!

⁷ Акэ, пэ якха́, ке́ли Мэ ракира́ва пал манушы́тко нацыя, и пал кралипэ́н, со Мэ вырискирава лэн, со Мэ пхагирава лэн, со Мэ хасякира́ва лэн,

⁸ нэ ко́ли дая́ манушы́тко нацыя рисёла пэ́скирэ чорипна́стыр, тэды Мэ отчхувава биба́хт, сави́ Мэ думиндём тэ янав пэ лэ́ндэ.

⁹ И, акэ, пэ якха́, ке́ли Мэ ракира́ва пал манушы́тко нацыя, и пал кралипэ́н, со Мэ ґазда́ва лэн, со Мэ зоралякирава лэн,

¹⁰ Нэ ко́ли ёнэ явэ́на тэ кэрэ́н чорипэ́н анги́л Мирэ́ якха́, и ёнэ на пришунэнапэ кэ Мири́ зан, то тэды Мэ отпарувава (пожалинава) лачхипэ́н, пал саво́ Мэ пхэндём, со Мэ да́ва лэ́нгэ.

¹¹ И палдава́ акана́ пхэн манушэ́нгэ Юдэя́тыр и Ерусалимо́скирэ джиибнарье́нгэ: ‘Адя́кэ ракирэ́ла Рай Дэвэ́л: ‘Акэ Мэ акана́ скэда́ва (подкэрава) фуипэ́н тумэ́нгэ, и Мэ придуминава плано пэ тумэ́ндэ: ‘Рисён фэды́р акана́ кажно (сва́ко) тумэ́ндыр, тумарэ́ бибахталэ́ дромэ́стыр, фэдырьякирэн тумарэ́ дрома́ и дова́, со тумэ́ кэрэ́на’”

Мануша́ на Прилэ́на Дэвлэ́скиро Лав

¹² Нэ кадалэ́ мануша́ пхэнэ́на: ‘Адалэстыр на явэ́ла ни саво́ лачхипэ́н! Палдава́ амэ ява́са тэ джива́с пир амарэ́ планы, и, кажно (сва́ко) амэ́ндыр, явэ́ла тэ дживэ́л пир пэ́скиро пхаро́ и бибахтало́ ило́.’”

¹³ Палдава́, адя́кэ ракирэ́ла Рай Дэвэ́л: “Пхуч акана́ Наюдэндыр: ‘Кон шундя́ дасавэ́ налачхипэна? Израилёскири патывалы́ джувлы́ кэрдя́ древа́н на́лачхо (трашано) рэ́ндо.

¹⁴ Ци мэкэ́ла ив дро Лива́но пэ́скирэ-бэргакири ска́ла? Ци могинэ́на тэ вышутён шылалэ паня́, со тхадэна дур явирэ штэтэ́ндыр?

¹⁵ Нэ Мирэ́ мануша́ мэкнэ́ Ман: ёнэ хачкирэна дрогонэ́-смолакиро тхув идолэ́нгэ, савэ́ намол ничы́, и ёнэ кэрдэ́ адя́кэ, со ёнэ обштадэпэ пэ пэ́скирэ дрома́, ёнэ мэкнэ́ ґаратунэ́ дроморэ, соб (кай) тэ псирэ́н наджиндлэ дроморэнца, а на откэрдэ буґлэ дромэ́са,

¹⁶ соб (кай) тэ кэрэ́н пэ́скирэ пхувья́тыр ди́во трашаса, тэ кэрэ́н штэ́то ўса́ды (сак) тэ санпэ манушэ́нгэ адя́кэ, со кажно (сва́ко) ману́ш, саво́ проджа́ла пашы́л, явэ́ла ухтылдо дивоса, и ёв кунякирэла (качынэла) шэрэ́са.

¹⁷ Мэ росчхурдава лэн сы́рбы васточнонэ балваляса анги́л вэргостэ, и Мэ рисёва́ва думэса кэ ёнэ, а на мо́са дро дова́ дывэ́с, сыр явэ́ла бари би́да.”

Зракирибэ́н Пэ Еремеёстэ

¹⁸ Тэ́ньци ёнэ пхэндлэ́: “Явэ́н, придуминаса вари-саво́ плано пэ Еремеёстэ; пал-дова́ со Зако́но на отпэрэла рашастыр ци годо́ лав манушэ́ндыр ци лав пророкостыр. Явэ́н, замараса чиба́са лэс, и мэк нико́н амэ́ндыр тэ на пришунэлпэ кэ лэ́скирэ лава́.”

¹⁹ Раё Дэ́вла! Пришунпэ кэ мэ, и шун лава́, со ракирэ́на кодолэ́, савэ́ чингардэнэпэ ма́нца!

²⁰ Ци отдэна палэ фуипнаса пал лачхипэ́н? Палдова́ со ёнэ выґанадэ ґанби́н (яма) ваш миро ди. Ри́пир, сыр мэ со́мас тэрдо́ анги́л Ту́тэ тэ ракира́в лачхипэ́н пал лэ́ндэ, соб (кай) Ту тэ рискирэс криг Пэ́скири бари холы́ лэ́ндыр.

²¹ Палдава́ отдэ́ лэ́нгирэ чхаворэ́н пэ бокхалыпэн, и мэк лэ́нгирэ чхаворэ́н пэ курталакири зор, и мэк лэ́нгирэ джувле́ндэ тэ на явэ́н чхаворэ́, и мэк ёнэ тэ явэ́н пивля (удовы), и мэк лэ́нгирэ мурша́ тэ явэ́н мулякирдэ́, и мэк лэ́нгирэ тэрнэ́ манушэ́н тэ хасякирэ́л курта́ла пэ мэрибэ́н.

²² Мэк го́дла тэ шунэлпэ лэ́нгирэ кхэрэ́стыр, ке́ли Ту екха́тыр янэса полко рулдэн (марибнытконэн) пэ лэ́ндэ; пал-дова́ со ёнэ выґанадэ ґанби́н тэ ухтылэ́н (лэн) ман, и ёнэ тэ гарадэ́ фэля́ (чхудэ́ чораханэ́с) пэ мирэ́ ґэра́.

²³ И Ту, Раё Дэ́вла, джинэ́са саро́ лэ́нгиро зракирибэ́н, соб (кай) тэ мулякирэ́н ман. На отмэк лэ́нгэ лэ́нгиро чорипэ́н, на кхос криг лэ́нгиро грэ́хо Тырэ́ якхэ́ндыр, нэ мэк ёнэ тэ пэрэ́н анги́л Ту́тэ, роскэдэпэ лэ́нца, сыр Ту холясоса пэ лэ́ндэ.’”