Ереме́ё 16 - Библия - Пэ Балтитко Романи чиб (Романэс) 2019

Рай-Дэвэ́л Ракирэ́ла Еремеёскэ Сыр тэ Дживэ́л

¹ И сыс пхэндло́ Ра́скирэ-Дэвлэ́скиро лав кэ мэ:

² “На лэ пэ́скэ ромня́, мэк тэ на явэ́н ту́тэ ни чхавэ́ – ни чхая́ пэ дава́ штэ́то.

³ Мэ пхэна́ва ту́кэ пал чхавэ́ндэ и чхае́ндэ, савэ́ бияндёна пэ дова́ штэ́то; и пал дае́ндэ, савэ́ биянэна лэн, и пал дадэндэ, савэ́ндыр ёнэ бияндёна:

⁴ ёнэ мэрэ́на дукханэ мэрибна́стыр, нико́н на явэ́ла тэ обровэл лэн: ние́кх лэ́ндыр на явэ́ла гарадо́, нэ ёнэ явэ́на сыр гнэё пэ пхув. Ёнэ хасёна куртала́тыр и бокхалыпнастыр, и лэ́нгирэ тру́пы явэ́на сы́рбы хабэ́н болыбнытконэ чирикленгэ и рискирибна́скирэ мурдалэ́нгэ (зверенгэ) пэ пхув.

⁵ Палдава́ Мэ адя́кэ пхэна́ва ту́кэ: на заджа́ дро кхэр, кай тугинэна роибнаса, адя́кэ-паць на джа́ тэ обровэс мулэн, ци на тангинэ кхэтанэ́ лэ́нца; пал-дова́ со Мэ отлава Миро рама́нё кадалэ́ манушэ́ндыр, Мэ ишчо (инкэ́) пхэна́ва ту́кэ, – и дро́го лачхипэ́н и лачхэ́-илы́ткима (тангипэ́н).

⁶ Сыр барэ́, адя́кэ-паць и тыкнэ́ мэрэ́на пэ дая́ пхув. Лэн на явэ́на тэ гаравэн, адя́кэ-паць и нико́н на явэ́ла тэ обровэл лэн; ци тэ чхинэл пэс, ци тэ обчхинэл бала́ пал лэ́ндэ.

⁷ Нико́н на явэ́ла тэ пхагирэл маро́ ваш лэ́нгэ дрэ смэнтныма тугитко, ци тэ подрикирэ́л дро ду́хо (фа́но) пал мулэ́ндэ, и нико́н на дэ́ла тахта́й лэ́нгэ тэ выпье́н, соб (кай) тэ раманякирэл (штылякирэл) лэ́нгиро ило́ пал дадэ́стэ ци пал датэ.

⁸ И на джа́ дро кхэр, кай ёнэ свэнкинэна, и на бэш лэ́нца тэ хас, тэ пьес.

⁹ Палдава́ адя́кэ ракира́ва Мэ, болыбна́скирэ-янголэ́нгиро Рай Дэвэ́л, Израилёскиро Дэвэ́л: ‘Акэ, Мэ кэра́ва адя́кэ, со анги́л тырэ́ якха́ дрэ тырэ́ дывэса́ на явэ́на шундлэ́ радымакирэ и сабнытка заня́, тэрнэскирэ и тэрнякирэ заня́.’

¹⁰ И явэ́ла адя́кэ: ке́ли ту роспхэнэса сарэ́ далэ́ лава́ одолэ́ манушэ́нгэ, тэ́ньчи ёнэ пхэнэ́на ту́кэ: ‘Пал со дава́ выпхэндя Рай Дэвэ́л сари́ дая́ бари биба́хт (би́да) пэ амэ́ндэ? Дро со исын амаро́ чорипэ́н? Ци саво́ грэ́хо амэ кэрдя́м проти Растэ-Дэвлэ́стэ, амарэ́ Дэвлэ́стэ?’

¹¹ Тэ́ньци ту пхэнэ́са лэ́нгэ: ‘Пал-дова́ со тумарэ́ дада́ ячкирдэ́ Ман, – дава́ Мэ, Рай Дэвэ́л, ракира́ва: ёнэ гинэ́ пал явирэ дэвлорэндэ и ишчо (инкэ́) тумэ́ дынэ́ паты́в лэ́нгэ, и тумэ́ ячкирдэ́ Ман, и на рикирдэ Миро Зако́но.

¹² И тумэ́ кэрдэ́ фуеды́р тумарэ́ дадэндыр, и со кажно (сва́ко) тумэ́ндыр дживэ́ла пир пэ́скиро пхаро́ и бибахтало́ ило́ адя́кэ, со тумэ́ на причхудэ кан кэ Мэ [соб (кай) тэ на шунэ́н Ман-р.с.].

¹³ Палдава́ Мэ вычхурдава тумэн далэ́ пхувья́тыр пэ пхув, со тумэ́ на джинэ́на, и сави́ на джиндлэ́ тумарэ́ дада́, кай тумэ́ явэ́на тэ дынаринэ́н явирэ дэвлорэ́нгэ дывэ́с и рат: пал-дова́ со Ма́ндыр на явэ́ла ни саво́ тангипэ́н (жалима) тумэ́нгэ.’

Дэвэ́л ґаздэ́ла Палэ Израилё!

¹⁴ “Палдава́, акэ, явэ́на дывэса́, – дава́ Мэ, Рай Дэвэ́л, ракира́ва, – со на явэ́на буты́р тэ ракирэ́н: ‘Тэ дживэ́л Рай Дэвэ́л, Саво́ яндя́ Израилёскирэ чхавэ́н Египто́скирэ пхувья́тыр’;

¹⁵ нэ явэ́на тэ ракирэ́н: ‘Тэ дживэ́л Рай Дэвэ́л, Саво́ яндя́ Израилёскирэ чхавэ́н паш-ратитконэ́ (севернонэ) пхувья́тыр, и, сарэ́ пхувьендыр, карик Ёв вытрадыя́ лэн. ‘Пал-дова́ со Мэ яна́ва палэ лэн пэ пхув, сави́ Мэ дыём лэ́нгирэ дадэ́нгэ.

¹⁶ “Акэ, Мэ бичхава́ва пэ лэ́ндэ бут мачхибнарье́н, – дава́ Мэ, Рай Дэвэ́л, ракира́ва, – и ёнэ явэ́на тэ ухтылэ́н (тэ старэн) лэн, а тэ́ньчи Мэ бичхава́ва пэ лэ́ндэ бут карэдынитконэн (охотникэн), и ёнэ традэ́на криг лэн кажнонэ́ бэрга́тыр, и кажнонэ́ бэргицэндыр и шчэлендыр дрэ скалы.

¹⁷ Пал-дова́ со Мирэ́ якха́ исын пэ сарэ́ лэ́нгирэ дрома́; ёнэ на гаравэнапэ Мирэ́ мо́стыр, и лэ́нгиро чорипэ́н нанэ гарадо́ Мирэ́ якхэ́ндыр.

¹⁸ Нэ анги́л Мэ отплэскирава пал лэ́нгиро чорипэ́н и лэ́нгиро грэ́хо дуй мо́лы, пал-дова́ со ёнэ магирдэ́ Мири́ пхув трупэнца джунгалэ́ (брыдконэ) идолэндыр, савэ́нца ёнэ пхэрдякирдэ Миро миштыпэ́н.”

Еремеёскири Па́тери (Моли́тва)

¹⁹ Раё Дэ́вла! Ту сан миро зоралыпэ́н и мири́ тва́рдыма, и пал Ту́тэ Мэ гарадёвава дрэ трашанэ (даракунэ) дывэса́, кэ Ту явэ́на бут мануша́ сарэ́ ягорэндыр (краендыр) пэ пхув и пхэнэ́на: “Амарэ́ дада́, чачэс, дорэснэ́ (долынэ) мэкно́ миштыпэ́н, саво́ исын хохано́ и хартытко (никчэмно), и лэ́стыр нанэ ни саво́ лачхипэ́н.

²⁰ Ци могинэ́ла (сашты́) ману́ш кокоро́ тэ кэрэ́л дэвлорэ́, савэ́ исын на дэвэла́ сарэ́са?”

²¹ Палдава́, акэ, Мэ кэра́ва адя́кэ, соб (кай) ёнэ тэ джинэ́н Миро васт и Миро зоралыпэ́н, и ёнэ явэ́на тэ джинэ́н, со Миро лав исын Рай Дэвэ́л.”