Ереме́ё 14 - Библия - Пэ Балтитко Романи чиб (Романэс) 2019

Курта́ла, Бари Бокх, и Баро́ Шукипэн

¹ Ра́скирэ-Дэвлэ́скиро лав, саво́ явдя́ кэ Ереме́ё пал баро́ шукипэн:

² “Юдэ́я тугинэла зоралэ́с, и ла́кири по́рта роспыяпэ, ёй калыя кэ пхув; и Ерусалимо́скири го́дла ґаздыя́пэ.

³ Лэ́нгирэ лачхэ́-родоскирэ рая [упратунэ-р.с.] бичхавэна пэ́скирэ кхэритконэ́ дынарье́н пал пани́: ёнэ джа́на кэ панитка ґанбиня́, нэ ёнэ на латхэ́на пани́; ёнэ рисёна палэ чхучэ́ пирье́нца: ёнэ исын ладжакирдэ́, ёнэ исын запхагирдэ дрэ годы́, и ёнэ учхакирдэ пэ́скирэ шэрэ́.

⁴ Пал-дова́ со пхув пхарадыя, сыр на сыс брышы́нд пэ пхув, пхувьявирэ-бутярнэ́ исын ладжакирдэ́, ёнэ учхакирдэ пэ́скирэ шэрэ́.

⁵ Пал-дова́ со мирга (лань) адя́кэ-паць биянэ́ла пэ фэ́лда, и ёй мэкэ́ла пэ́скирэ тыкнэн, пал-дова́ со нанэ чар.

⁶ И буса (дика) ослы (мега́рья) исын тэрдэ́ пэ вучэ́ штэ́ты, ёнэ сунгэна балва́л сыр шакалы: лэ́нгирэ якха́ пынэ́ (калынэ), пал-дова́ со нанэ чар.

⁷ ‘Раё Дэ́вла! Мэк амаро́ чорипэ́н тэ допхэнэл пэ амэ́ндэ, кэр вари-со Тырэ́ лавэ́стыр; пал-дова́ со амэ бут отпыям Ту́тыр – амэ кэрдя́м грэ́хи проти Ту́тэ.

⁸ О, Ту сан одова́, Конэ́стыр Израилё ужакирэ́ла лачхипэ́н [зракхибэ́н-р.с.], Ту сан амаро́ Зракхибнари (Зракхибнаскиро) дрэ пхарэ́ дывэса́! Со́скэ Ту сан сы́рбы чу́жо ману́ш пэ амари́ пхув, ци сы́рбы традыпнаскиро (путнико), саво́ рисия́ пэ риг, соб (кай) тэ ячэ́лпэ пэ екх рат?

⁹ Со́скэ Ту сан сы́рбы ману́ш, саво́ дивинэлапэ трашаса, сы́рбы зорало́ мурш, саво́ нашты́ (на могинэ́ла) тэ зракхэ́л? Нэ Ту, Раё-Дэ́вла, сан машки́р амэ́ндэ, и амэ кхараса Тыро́ лав: на мэк амэн.’

¹⁰ Адя́кэ пхэндя́ Рай Дэвэ́л пал кадалэ́ манушэ́ндэ: “Ёнэ адя́кэ покамлэ тэ псирэ́н, со ёнэ на обрикирэнас пэ́скирэ ґэра́; и Рай Дэвэ́л на радынэ́лапэ лэ́ндыр: Ёв рипирэла лэ́нгиро чорипэ́н и Ёв явэ́ла тэ сэндякирэ́л лэн пал лэ́нгирэ грэ́хи.”

¹¹ И Рай Дэвэ́л пхэндя́ ма́нгэ: “На мангпэ Ма́нгэ пал кадалэ́ манушэ́ндэ ваш лэ́нгиро лачхипэ́н.

¹² Ке́ли ёнэ явэ́на тэ постынэн, Мэ на ява́ва тэ шунав лэ́нгири го́дла; и ке́ли ёнэ янэ́на цэ́ла хачкирибэна, и свэ́нта дыибэна́ гивэстыр, Мэ на прилава лэн: пал-дова́ со Мэ хасякира́ва лэн куртала́са, барэ́ бокхаса и франсэнца.”

¹³ Нэ мэ пхэндём: “О, Раё Дэ́вла, Дэвлалэ! Ѓа́да, проро́ки ракирэ́на лэ́нгэ: ‘Тумэ́ на дыкхэ́на курта́ла, ни бари бокх, пал-дова́ со Ту дэ́са чачуно́ рама́нё пэ дава́ штэ́то.

¹⁴ И пхэндя́ Рай Дэвэ́л ма́нгэ: “Проро́ки ангилпхэнэна хохаибэ́н Мирэ́ лавэ́стыр; Мэ на бичхадём лэн, и Мэ на припхэндём лэ́нгэ, и Мэ на пхэндём лэ́нгэ: ёнэ ангилпхэнэна тумэ́нгэ хохано́ дыкхибэ́н (суныбэн), и чхучэ́ чары; дова́, со на мол ничы́, и хохаибэ́н, со джа́ла лэ́нгирэ илэндыр.

¹⁵ Палдава́ адя́кэ ракирэ́ла Рай Дэвэ́л пал пророкэ́ндэ, савэ́ ангилпхэнэна Лэ́скирэ лавэ́стыр, савэ́н Ёв на бичхадя́, и савэ́ ракирна: ‘Курта́ла и бари бокх на явэ́на пэ кадая́ пхув’: Кадалэ́ проро́ки хасёна куртала́тыр и барэ́ бокха́тыр!

¹⁶ И мануша́, конэ́скэ ёнэ явэ́на тэ ангилпхэнэн, явэ́на чхурдынэ́ яври́ пэ Ерусалимо́скирэ вули́цы (га́сы), пал-дова́ со явэ́ла бари бокх и курта́ла; и одо́й на явэ́ла нико́н тэ гаравэл лэн, ци лэ́нгирэ ромне́н, ци лэ́нгирэ чхавэ́н, ци лэ́нгирэ чхае́н, и Мэ вычхувава лэ́нгиро фуипэ́н пэ лэ́ндэ.

¹⁷ И ту, Ереме́ё, пхэнэ́са дава́ лав лэ́нгэ: мэк тэ тхадэн ясва Мирэ́ якхэ́ндыр рат и дывэ́с, и ёнэ на пириячэна, пал-дова́ со патывалы́ тэрны́ джувлы́, Мирэ́-манушэ́нгири чхай, исын зоралэ́с дукхады пхарэ́ пэкаибнаса.

¹⁸ Ко́ли Мэ джа́ва пэ фэ́лда, акэ, исын паштэ́ мануша́, савэ́н курта́ла мулякирдя́! И ко́ли Мэ джа́ва андрэ́ фо́ро, акэ, исын мануша́, савэ́ нашавэна зор кэ мэрибэ́н барэ́ бокха́тыр! Пал-дова́ со дуйджинэ́: и проро́ко, и раша́й псирэ́на пир пхув, со ёнэ кокорэ́ на джинэ́на палсо́.’”

Мануша́ Мангэна Рас-Дэвлэ́с пал Ла́ска

¹⁹ Раё Дэ́вла! Ци сарэ́са Ту отпхэндямпэ Юдэя́тыр? Ци Тырэ́ дескэ яця́ джунгало́ Сионо́стыр? Со́скэ Ту адя́кэ пэкадян амэн, со нанэ састякирибэн амэ́нгэ? Амэ родаса рама́нё, нэ нанэ лачхипэ́н, часо тэ састякираспэ, и, акэ, екх трашаибэ́н (дар).

²⁰ Раё Дэ́вла! Амэ приджинаса амаро́ фуипэ́н, и чорипэ́н, со кэрдэ́ амарэ́ дада́; пал-дова́ со амэ кэрдя́м грэ́хо проти Ту́тэ.

²¹ На дурьёв амэ́ндыр ваш Тыро́ лав, на тыкнякир паты́в Тырэ́-славакирэ троноскэ, Ерусалимоскэ, ри́пир Пэ́скиро завето, со Ту дыя́н амэ́нгэ и на пхагир лэс.

²² Ци исын машки́р Наюды́тка и́долы одолэ́, савэ́ дэ́на брышы́нд? Ци могинэ́ла (сашты́) кокоро́ болыбэ́н тэ дэл барэ́ панинга́? Ци дава́ нанэ Рай Дэвэ́л, амаро́ Дэвэ́л? Палдава́ амэ ява́са тэ ужакирас Тут, пал-дова́ со Ту кэрдя́н саро́ дава́.