Ереме́ё 13 - Библия - Пэ Балтитко Романи чиб (Романэс) 2019

Пал ґандладытко (Льняно) Кусты́к

¹ Адя́кэ пхэндя́ ма́нгэ Рай Дэвэ́л: “Джа́ и кин пэ́скэ кусты́к ґандладэстыр (лёностыр), и причху́в ла пашы́л пэ́скиро трушу́л (маса́); нэ на бол ла дрэ пани́.

² И мэ, Ереме́ё, киндём дасави́ кусты́к пир Ра́скирэ-Дэвлэ́скиро лав и причхудём ла пашы́л пэ́скиро трушу́л.

³ И явдя́ кэ мэ Ра́скирэ-Дэвлэ́скиро лав яви́р мо́ло, и пхэндя́:

⁴ “Лэ кусты́к, со ту киндян, сави́ исын пэ тыро́ трушу́л, ґаздэпэ и джа́ кэ Ефрато и гарав кусты́к одо́й дрэ хорипэ́н машки́р скалы.”

⁵ Адя́кэ мэ гиём и гарадём пашы́л Ефрато [Евфрато-р.с.], сыр Рай Дэвэ́л припхэндя́ ма́нгэ.

⁶ И сыс адя́кэ, сыр прогинэ́ (накхлэ) бут дывэса́, то Рай Дэвэ́л пхэндя́ ма́нгэ: “Ѓаздэпэ (ушты́) и джа́ кэ Евфрато, и лэ одотхы́р кусты́к, сави́ Мэ припхэндём тэ гаравэс ту́кэ одо́й.

⁷ Тэ́ньци мэ гиём кэ Евфрато и ґанадём, и мэ вылыём кусты́к долэ́ штэто́стыр, кай мэ гарадём ла; и, ґа́да, кусты́к яця́ налачхи. Ла́тыр на сыс ужэ ни саво́ лачхипэ́н.

⁸ И явдя́ кэ мэ Ра́скирэ-Дэвлэ́скиро лав, и пхэндя́:

⁹ “Адя́кэ пхэндя́ Рай Дэвэ́л: ‘Пир дова́ Мэ хасякира́ва Юдэя́киро пхутькирибэ́н, и адя́кэ-паць Ерусалимоскиро зорало́ (баро́) пхутькирибэ́н.

¹⁰ Кадалэ́ бибахталэ́ мануша́ отпхэндлэпэ тэ шунэ́н Мирэ́ лава́, ёнэ дживэ́на пир пэ́скирэ пхарэ́ илэ, и ёнэ псирэ́на тэ кэрэ́н паты́в явирэ дэвлорэ́нгэ и тэ дынаринэ́н лэ́нгэ, и лэ́нца явэ́ла дова́, со кэрдя́пэ далэ́ кустыкаса.

¹¹ Пал-дова́ со сыр кусты́к ухтылэлапэ зоралэ́с (исын пашто́) кэ пэ манушэ́скиро трушу́л, адя́кэ-паць Мэ кэрдём, соб (кай) саро́ Израилёскиро кхэр и саро́ Юдэя́киро кхэр тэ ухтылэнпэ зоралэ́с кэ Мэ, соб (кай) ёнэ могинэ́нас тэ явэ́л Мирэ́ мануша́, Миро лав тэ шарэ́н и тэ барьякирэ́н Ман; нэ ёнэ на шундлэ́.

Пал Пхуранэ́ Гонэ́

¹² “И ту, Ереме́ё, пхэн лэ́нгэ дава́ лав: ‘Адя́кэ ракирэ́ла Рай Дэвэ́л, Дэвэ́л Израилёскиро: ‘Кажно гоно́ пхэрдякирэна моляса (виноса).’’ Ёнэ пхэнэ́на ту́кэ: ‘Ци амэ на джина́са, со кажно гоно́ пхэрдякирэна моляса’?

¹³ Нэ ту пхэнэ́са лэ́нгэ: ‘Адя́кэ ракирэ́ла Рай Дэвэ́л: “Акэ Мэ матякирава сарэ́ манушэ́н, кон дживэ́ла пэ кодоя пхув, и кралье́н, савэ́ исын бэштэ́ пэ Давидо́скиро троно, и раша́н, и сарэ́ пророкэ́н, и сарэ́ манушэ́н, кон дживэ́ла кэ Ерусалимо.

¹⁴ И Мэ чикавава (пэкавава) лэн екх пир екхэ́стэ, сыр дадэн, адя́кэ-паць и чхавэ́н кхэтанэ́, – ракирэ́ла Рай Дэвэ́л, – и Мэ на ява́ва лачхэ́-илэ́скиро кэ ёнэ, и Мэ на ява́ва тэ тангинав (тэ жалинав) лэн, и Ма́ндыр на явэ́ла тангипэ́н (ла́ска) лэ́нгэ, а Мэ хасякира́ва лэн.’”

Бида пэ Израилё

¹⁵ Шунэ́н тумэ́, и причхувэ́н кан, на пхутён (на барьякирэ́н пэс), пал-дова́ со адя́кэ пхэндя́ Рай Дэвэ́л.

¹⁶ Барьякирэ́н (славинэ́н) Рас-Дэвлэ́с, тумарэ́ Дэвлэ́с, анги́л дова́, сыр Ёв янэ́ла калыпэ́н (цёмныма), и анги́л дова́, сыр тумарэ́ ґэра́ обштавэнапэ (обстэмпинэнапэ) пир бэ́рги дрэ паш-калыпэ́н! И тумэ́ явэ́на тэ родэ́н дуд (свэ́то), нэ Ёв рискирэ́ла лэс дрэ мэрибнытко зэр (тень), и Ёв пирикэрэла лэс дрэ хор калыпэ́н.

¹⁷ Нэ ко́ли тумэ́ на явэ́на тэ кандэ́н дава́, то тэды мэ, Ереме́ё, ява́ва тэ ровав дрэ гарадэ́ штэ́ты пал тумаро́ пхутькирибэ́н, и мирэ́ якха́ явэ́на тэ ровэ́н киркэс, пал-дова́ со Ра́скирэ-Дэвлэ́скиро ґурто лыджино криг дрэ наволя (пле́но).

¹⁸ ‘На явэ́н пхутькирдэ́, бэшэ́н тэлэды́р; пал-дова́ со пыя́ крали́тко стадык тумарэ́ славатыр, сави́ сыс пэ тумарэ́ шэрэ́’, – пхэндя́ Рай Дэвэ́л тэ пхэна́в крали́скэ и крали́скирэ да́кэ.

¹⁹ Фо́рья пэ паш-дывэсы́тко (южно) риг явэ́на запхандлэ и на явэ́ла нико́н тэ псиравэл (отпхандэл) лэн; сари́ Юдэ́я лыджа́на криг дро пле́но, сарэ́ Юдэя́кирэ манушэ́н залыджана дро пле́но.

²⁰ Ѓаздэн тумарэ́ якха́ и дыкхэ́н, со джа́ла пэ тумэ́ндэ паш-ратитконэ́ (севернонэ) рига́тыр. Кай тыро́ ґурто, шука́р ґурто, саво́ сыс дыно́ ту́кэ?

²¹ Со тумэ́ пхэнэ́на, ке́ли Рай Дэвэ́л явэ́ла кэ тумэ́, пир-дова́ со тумэ́ сыклякирдэ́ лэн, соб (кай) ёнэ тэ явэ́н шэралэ́ тхага́рья пэ тумэ́ндэ? Ци на ухтылэна (на́доси) тут дукханэ туги сы́рбы джувля́, сави́ исын банги тэ биянэ́л?

²² И ко́ли тумэ́ пхучэна (пхэнэ́на) дро пэ́скиро ило́: ‘Со́скэ дава́ саро́ пыя́ пэ ма́ндэ?’ Пал тумаро́ баро́ чорипэ́н, савэ́ отчхакирдэ тумарэ́ и́ди пэ ладж, и пал дова́, со тырэ́ кхурья (пе́нты) ячнэ́ нангэ?

²³ Ци могинэ́ла (сашты́) Эфиопо тэ парувэл пэ́скири цы́па, ци сашты́ леопардо тэ парувэл пэ́скирэ петьмы (пятны)? Тэды, ци могинэ́на тумэ́ адя́кэ-паць тэ кэрэ́н лачхипэ́н, савэ́ присыклынэ тэ кэрэ́н биба́хт?

²⁴ ‘Палдава́ Мэ росчхурдава лэн сы́рбы пхусакирэ тетивы [пра́хо-р.с.], савэ́ розлыджала балва́л чхучэ́ прахэндыр’, – ракирэ́ла Рай Дэвэ́л.

²⁵ Дава́ исын тумари́ до́ля, бажын, сави́ Мэ выкэдыём (дыём) тумэ́нгэ, пал-дова́ со тумэ́ бистырдэ Ман и зоралэ́с допатяндынэ дро хохаибэ́н.

²⁶ Палдава́ Мэ адя́кэ-паць рискира́ва тумарэ́ труюня (поди) пэ муй, и тумари́ ладж явэ́ла бицялы.

²⁷ Мэ дыкхцём тумаро́ биладжаипэ́н, и дова́, сыр тумэ́ грымитиндлэ, сыр тумэ́ традэнаспэ пал чужонэ́ дэвлорэндэ пэ бэ́ргицы и пэ фэ́лды, долэ́ джунгалэ́ рэ́нды. Бида пэ тумэ́ндэ, мануша́ Израилёстыр! Нау́што тумэ́ на явэ́на жужэ́? Ци ґара́ тумэ́ ишчо (инкэ́) адя́кэ явэ́на?’”