Ереме́ё 12 - Библия - Пэ Балтитко Романи чиб (Романэс) 2019

Ереме́ё Пхучэла Ра́стыр-Дэвлэ́стыр

¹ Чачуно́ сан Ту, Рай Дэвэ́л, ко́ли мэ ява́ва тэ лыджав миро рэ́ндо Ту́са, мэк мэ тэ ракира́в пал Тыро́ чачипэ́н. Со́скэ да злыднитконэ манушэ́нгэ удэлапэ кэ миштыпэ́н? Со́скэ исын куч одолэ́нгэ, савэ́ исын бикиибнарья [нахрата-р.с.]?

² Ту чхудя́н дрэ пхув лэн, лэ́нгирэ ґэрорья баринэ: ёнэ барьёна буты́р, чачо́, и ёнэ дэ́на пхаба́: Ту сан лэ́ндэ пэ чиб, нэ Ту сан дура́л лэ́нгирэ годендыр (илэндыр).

³ Нэ Ту, Раё Дэ́вла джинэ́са ман: Ту дыкхця́н ман и Ту спробиндян миро ило́ кэ Ту. Тырдэ криг лэн сыр бакрэ́н тэ зачхинэн, и чхув дрэ риг лэн ваш дывэ́с тэ зачхинэн лэн.

⁴ Сыр ґара́ (длу́гэс) пхув явэ́ла тэ тугинэл, и чхарья пэ фэ́лда тэ шутён? Мурдала́ и чирикля́ хасинэ́ пал адалэ́ злыдня (фуе́) манушэ́ндэ, савэ́ дживэ́на одо́й, пал-дова́ со ёнэ ракирэ́на: “Дэвэ́л на дыкхэ́ла амаро́ ко́нцо (яго́ро).”

Рай Дэвэ́л Отпхэнэ́ла Еремеёскэ

⁵ Рай Дэвэ́л отпхэндя́: “Ко́ли ту, Ереме́ё, прастандыян псирибнаскирэнца, и ёнэ кхинякирдэ тут, сыр тэды ту явэ́са тэ спробинэс зорья грэнца? И ко́ли пэ пхув, кай исын рама́нё (миро) ту са́нас бидарипнаскиро, тэ́ньчи со ту явэ́са тэ кэрэ́с, сыр ґаздэ́напэ панинга́ дро Иорда́но?

⁶ Пал-дова́ со ровно (адя́кэ-паць) и тырэ́ пша́ла, и тырэ́-дадэ́скиро кхэр, адя́кэ-паць и ёнэ обгинэпэ ту́са сыр бикиибнаскирья (бикиныбнарья), мэк ёнэ и дэ́на го́дла яври́ пал ту́тэ. На патя лэ́нгэ, мэк и ракирэ́на ёнэ лачхинька лава́ ту́кэ.

⁷ Мэ мэкцём Миро кхэр, Израилё, Мэ чхурдыём Миро миштыпэ́н, Мэ отдыём Мирэ́ дрогонэ́ манушэ́с дрэ васта́ вэргэ́нгэ.

⁸ Миро миштыпэ́н – Мирэ́ мануша́, ячнэ́ сыр шчэр (ле́во) дро вэш, ёнэ ґаздынэ́ пэ́скири зан пэ Ма́ндэ, палдава́ Мэ нашты́ тэ дыкха́в пэ лэ́ндэ.

⁹ Миро миштыпэ́н яця́ сыр чириклы, савья́ сашты́ тэ розрискирэс, рискирибна́скирэ чирикля́ кружынэнапэ (крэнжынэнапэ) тэ пэрэ́н пэ ла́тэ. Джа́н, скэдэ́нпэ, сарэ́ мурдала́ пэ фэ́лда, янэ́н лэн тэ хан.

¹⁰ Бут шэралэ́ чхупна́рья хасякирдэ́ Мири́ винаґрадытко бар, ёнэ выштакирдэ (вытопчындлэ) Мирэ́-фэлдакири паш ґэрэ́нца, ёнэ кэрдэ́ Мирэ́ ґожонэ пашатыр (пашэстыр) биманушэнгири чхучи́ пхув!

¹¹ Ёнэ кэрдэ́ ла́тыр замэкно биманушэнгиро штэ́то; саро́, со исын замэкно, зоралэ́с тугинэла анги́л Ма́ндэ: сари́ пхув исын замэкны, пал-дова́ со нанэ нико́н, соб (кай) тэ чхувэ́л дава́ пэ ило́ пэ́скэ.

¹² Мижэх чора явэ́на пэ вучэ́ штэ́ты пир чхучэ́ прахи, пал-дова́ со Мэ, Рай Дэвэ́л, бичхава́ва курта́ла екхэ ягоро́стыр пэ пхув кэ яви́р; со на явэ́ла рама́нё ни екхэ джидэ́ дескэ.

¹³ Ёнэ чхудэ́ дрэ пхув гив, нэ ёнэ счхиндлэ пхусадытка хру́сты, ёнэ кхинякирдэ пэс кэ дукха́, и лэ́нгэ на удэлапэ кэ миштыпэ́н. Ладжан дасавэ́ тумарэ́ чорорэ́ умалотостыр, пал-дова́ со явэ́ла бари холы́ Ра́стыр-Дэвлэ́стыр.

¹⁴ Адя́кэ ракирэ́ла Рай-Дэвэ́л пэ сарэ́ бибахталэ́ Израилёскирэ суседэндэ (котарьендэ): “Савэ хасякирэна пхув, сави́ Мэ сыр миштыпэ́н дыём манушэ́нгэ Израилёстыр. Акэ, Мэ рискира́ва яври́ лэн Израилёскирэ пхувья́тыр и Мэ вырискирава Юда́скиро кхэр лэ́ндыр.

¹⁵ И явэ́ла адя́кэ: пало́ (после) саро́ дава́, сыр Мэ вырискирава лэн, Мэ рисёва́ва палэ, и тэды Мэ потангинава (пожалинава) лэн, и Мэ яна́ва палэ лэн – кажнонэс кэ пэ́скиро миштыпэ́н, и кажнонэс кэ пэ́скири пхув.

¹⁶ И явэ́ла адя́кэ: ко́ли ёнэ, сусе́ды (кота́рья) миштэ́с высыклёна тэ псирэ́н пир дрома́ Мирэ́-манушэ́нгирэ тэ совлахан Мирэ́ лавэ́са: “Тэ явэ́л джидо́ Рай Дэвэ́л”, адя́кэ-паць сыр ёнэ сыклякирдэ́ Мирэ́ манушэ́н тэ совлахан Ваалоса, тэды ёнэ ячэ́напэ машкира́л Мирэ́ манушэ́ндэ.

¹⁷ Нэ ко́ли ёнэ на явэ́на тэ кандэ́н, тэды Мэ выкушава лэн криг и Мэ хасякира́ва кадалэ́ манушэ́н”, – пхэндя́ Рай Дэвэ́л.