Ереме́ё 10 - Библия - Пэ Балтитко Романи чиб (Романэс) 2019

И΄долы и Чачуно́ Дэвэ́л

¹ Шунэ́н лав, саво́ Рай Дэвэ́л ракирэ́ла ту́кэ, Израилёскиро кхэр.

² Адя́кэ ракирэ́ла Рай Дэвэ́л: “На сыклён дромэнгэ, савэ́нца Наюды́тка на́цыи псирэ́на, и на замэрэн дара́тыр дыкхи́ пэ болыбны́тка ґертыка́ (знаме́нии), со́стыр замэрэна Наюды́тка на́цыи.

³ Пал-дова́ со далэ́ манушы́тка стату́ты нисо́ нанэ мол. Акэ, екх ману́ш вычингирэла кашт дро вэш, скаминдарискирэ васта́ обкэрэна лэс товэрэса.

⁴ Ёнэ гожакирэна лэс сувнака́са и рупэ́са, ёнэ прикэрэна лэс гвоздэнца (карфинэнца) и чоканэнца (млоткэнца), соб (кай) ёв тэ на роспхадёл пэ котэра́.

⁵ Далэ́ и́долы исын сы́рбы вычхиндло сты́лбо пэ фэ́лда, ёнэ на ракирэ́на, лэн лыджа́на, пал-дова́ со ёнэ на псирэ́на. На дар лэ́ндыр, пал-дова́ со ёнэ на могинэ́на тэ кэрэ́н вари-сави́ биба́хт (чорипэ́н), адя́кэ-паць ёнэ на кэрэ́на ни саво́ лачхипэ́н.”

⁶ Нанэ ние́кх, кон исын кадасаво́, саво́ Ту сан, Раё Дэ́вла! Ту сан баро́ и Тыро́ лав исын баро́ пир Тыро́ зоралыпэ́н.

⁷ Ци исын вари-кон, саво́ на дарэ́ла Ту́тыр, манушэ́нгирэ Крали́стыр? Пал-дова́ со чачипэ́н исын дро дова́, соб (кай) тэ дарэ́н Ту́тыр; пал-дова́ со машки́р сарэ́ годэ́ манушэ́ндэ дрэ манушы́тка на́цыи, и сарэ́ лэ́нгирэ кралипэна́ нанэ ние́кх, саво́ тэ явэ́л кадасаво́, сыр Ту сан, Раё Дэ́вла!

⁸ Ёнэ исын со кэ екх бигодякирэ и дылынинька, лэ́нгиро сыклякирибэ́н исын чхучо́, соб (кай) тэ дэн паты́в каштэнгэ.

⁹ Руп, савэ́стыр исын чикадэ чарэ́, яндлэ́ Таршыностыр, сувнака́й Уфазостыр, сарэ́ ёнэ исын бутя́ мастероскирэ пир сувнака́й: голубово и пурпурно урибэ́н исын пэ кадалэ́ и́долы: ёнэ исын джиндлэ́-манушэ́нгирэ бутя́.

¹⁰ Нэ Рай Дэвэ́л исын чачуно́ Дэвэ́л: Ёв исын джидо́ Дэвэ́л и Кра́ли пэ сарэ́ ве́ки. Лэ́скирэ холя́тыр издрала пхув и манушы́тка на́цыи на дэ́на ра́да тэ вырикирэн, сыр Ёв холясо́ла зоралэ́с.

¹¹ Тумэ́, мануша́лэ, пхэнэ́н лэ́нгэ: “Дэвлорэ́, со тумэ́ндэ исын, на кэрдэ́ болыбэ́н и пхув, ёнэ хасёна пхувья́тыр и тэл болыбна́стыр.”

¹² Ёв создыя́ пхув Пэ́скирэ зорья́са, и Ёв чхудя́ свэ́то Пэ́скирэ годыпнаса, и Ёв роздиньдькирдя (ростырдыя) болыбэ́н Пэ́скирэ годя́са.

¹³ Ке́ли Ёв пхэнэ́ла Пэ́скирэ заня́са, тэды пэ болыбэ́н шуминэна паня́: и Ёв кэрэ́ла адя́кэ, со о́блоки пане́са ґаздэ́напэ ягорэндыр пэ пхув; ёв кэрэ́ла блискави́цы машки́р брышы́нд, и ёв лыджа́ла анги́л балва́л Лэ́скирэ кучонэ́-пиральендыр.

¹⁴ Кажно ману́ш ячэ́ла буро [дылыно́-р.с.] биджиныбнаскиро, кажно сувнакэнгиро мастеро явэ́ла ладжакирдо́ вычхудэ́ идолостыр, пал-дова́ со дава́ биладо идоло исын хохано́, и нанэ ду́хо (фа́но) дрэ лэ́стэ.

¹⁵ Саро́ дава́ исын чхучипэн (пустота), буты́ пэ сабэн, ёнэ хасёна, ке́ли Рай Дэвэ́л явэ́ла тэ сэндякирэ́л.

¹⁶ Яковоскири до́ля нанэ кадасави сыр лэ́нгири, пал-дова́, со Ёв, Кон создыя́ саро́, и Кон выкэдыя́ Израилё сыр Лэ́скиро миштыпэ́н, исын болыбна́скирэ-янголэ́нгиро Рай Дэвэ́л и дава́ исын Лэ́скиро лав.

¹⁷ Кэдэн криг пэ́скирэ клунки пхувья́тыр, конэ́с вэ́рги обкрэнжындлэ (заухтылдэ) дро Ерусалимо.

¹⁸ Адя́кэ ракирэ́ла Рай Дэвэ́л: “Акэ, Мэ чхурдава манушэ́н дро дава́ уляго (пора), савэ́ дживэ́на пэ дая́ пхув, и лэ́нгэ явэ́ла бари траш (дар), соб (кай) тэ ухтылэ́н (латхэ́н) лэн.

¹⁹ Бида ма́нгэ, пал-дова́ со биба́хт дукхавэла ман, миро (фра́нсо/рана) исын дукхано. Нэ мэ, Ереме́ё, пхэндём пэ́скэ: “Куч, миро ило́ пхарьёла, и мэ вырикирава дава́.

²⁰ Мири́ ша́тра исын зарады, и сарэ́ мирэ́ шэлэ исын роскушнэ. Мирэ́ чхаворэ́ гинэ́ дур ма́ндыр, и ёнэ ада́й буты́р нанэ. Нанэ ние́кх, соб (кай) нэвэ́стыр тэ роздиньдькирэл (росчхувэл) мири́ ша́тра, и тэ прикэрэл пологи.

²¹ Пал-дова́ со чхупна́рья [пастыри-р.с.] ячнэ́ пхарэ́-илытка, и ёнэ на родынэ Рас-Дэвлэ́с, палдава́ ёнэ на кэрдэ́ годэс, и саро́ лэ́нгиро ґурто исын росчхурдыно.

²² Шунэ́н зан, сави́ дыя́ звесь: “Акэ, джа́ла баро́ ґлумо годлэнца паш-ратитконэ́ (севернонэ) рига́тыр, соб (кай) тэ чхучакирэл фо́рья дрэ Юдэ́я, и тэ кэрэ́л адя́кэ, соб (кай) одо́й шакалы тэ дживэ́н.

²³ Мэ джино́м, Раё Дэвлалэ, со ману́ш на дэ́ла ра́да тэ хулаинэ́л пэ́скирэ судьбаса (джиибнаса), и нанэ кадасаво́ ману́ш, саво́ псирэ́ла и саво́ рикирэ́ла зор пэ дова́, карик ґэра́ лыджа́на лэс.

²⁴ Раё Дэ́вла, пирисыклякир ман кэ дукха́ пир чачипэ́н, нэ на пир Пэ́скиро холякирибэ́н, соб (кай) тэ на явэ́л саро́ ма́нгэ.

²⁵ Вычхув Пэ́скиро холякирибэ́н пэ Наюдытконэ́ манушэ́ндэ, савэ́ на джинэ́на Тут, и пэ ро́ды, савэ́ на прикхарэна Тыро́ лав; пал-дова́ со ёнэ хасякирдэ́ Яково́с, ёнэ дукхадэ лэс, и ёнэ домардэ́ лэс. Ёнэ кэрдэ́ лэ́скирэ кхэрэ́стыр чхучо́ штэ́то.