Ереме́ё 1 - Библия - Пэ Балтитко Романи чиб (Романэс) 2019

¹ Далэ́ исын Еремеёскирэ лава́, кон сыс Хелкииноскиро [Хилкияскиро-ю.о.] чхаво́, раша́нгирэ родо́стыр, савэ́ сыс дрэ Анафофа пэ Вениаминоскири пхув.

² Лэ́скэ бичхадя́ Рай Дэвэ́л Пэ́скиро лав, дрэ дывэса́ Иосияскирэ (Ёсияскирэ), кон сыс Юдэя́киро кра́ли дро дэшутрито бэрш, сыр ёв сыс кра́ли.

³ Рай Дэвэ́л адя́кэ-паць бичхадя́ Лэ́скиро лав дрэ дывэса́ Иоакимоскирэ (Якимоскирэ), кон сыс Ёсиякиро чхаво́ и Юдэя́киро кра́ли кэ/ жы́ко/ дэшупэрво бэрш, сыр Сэдэки́я, Ёсияскиро чхаво́ сыс кра́ли пир Юдэ́я анги́л дова́, сыр дро па́нджто чхон Ерусалимо́скирэ манушэ́н лыджинэ́ дро пле́но.

Рай Дэвэ́л Выкхарэла Еремеёс тэ Ангилпхэнэл

⁴ И сыс кэ мэ, Еремеёскэ, лав Ра́стыр-Дэвлэ́стыр и пхэндя́:

⁵ “Анги́л дова́, сыр Мэ создыём тут дрэ да́кирэ маса́, Мэ выкэдыём тут. Анги́л дова́, сыр ту явдя́н пэ свэ́то, Мэ высвэнцындём тут. И Мэ чхудём тут сыр пророко́с ваш Наюдэ́нгэ.”

⁶ Тэды пхэндём мэ: “Ах! Дэ́вла! Раё Дэ́вла! Дыкх, мэ на джино́м тэ ракира́в, пал-дова́ со мэ сом бия́то.”

⁷ Нэ Рай Дэвэ́л пхэндя́ ма́нгэ: “На ра́кир: ‘Мэ сом бия́то’; – пал-дова́ со ту джа́са кэ сарэ́, кэ кон Мэ бичхава́ва тут, и со Мэ припхэнава ту́кэ, дова́ ту пхэнэ́са.

⁸ На дар лэ́ндыр, пал-дова́ со Мэ сом ту́са тэ ракхав тут”, – пхэндя́ Рай Дэвэ́л.

⁹ И тэ́ньчи ґаздыя́ анги́л Рай Дэвэ́л Лэ́скиро васт и чиладя́ миро муй. И пхэндя́ Рай Дэвэ́л ма́нгэ: “Акэ, мэ чхува́ва Мирэ́ лава́ дро тыро́ муй.

¹⁰ Дыкх! Мэ чхудём тут ададывэ́с сыр барыдырэ́с пэ манушы́тка на́цыи и пэ кралипэна́: тэ рискирэс криг корне́нца (рукхэ́нца), тэ пхагирэс кэ пхув, тэ розмарэс пэ котэра́, и тэ чхурдэс тэлэ́; тэ ґаздэс кхэра́, и тэ почхувэс гив дрэ пхув.”

Дуй Дыкхибэна

¹¹ И ишчо (инкэ́) сыс кэ мэ Ра́скирэ-Дэвлэ́скиро лав, и пхэндя́: “Ереме́ё, со дыкхэ́са ту?” И мэ пхэндём: “Мэ дыкха́ва рандь (вэтка) миндалитконэ дрэвостыр (каштэ́стыр).”

¹² Тэды пхэндя́ Рай Дэвэ́л ма́нгэ: “Ту миштэ́с дыкхэ́са. Мэ ракхава, соб (кай) миро лав тэ кэрэ́лпэ (сполнинэ́лпэ) дро чачипэ́н.”

¹³ И сыс кэ мэ Ра́скирэ-Дэвлэ́скиро лав яви́р мо́ло, и пхэндя́: “Со дыкхэ́са ту?” Мэ отпхэндём: “Мэ дыкха́ва кака́ви (котло), со кэрадёла, и со сы́рбы рисёла пэ паш-ратякири (северно) риг.

¹⁴ Тэ́ньци пхэндя́ Рай Дэвэ́л ма́нгэ: “Паш-ратякирэ рига́тыр явэ́ла би́да, пэ сарэ́ манушэ́ндэ пэ пхув.”

¹⁵ Пал-дова́ со, акэ, Мэ кхара́ва тэ явэ́н сарэ́ сэм΄и (ирья́), савэ́ исын дрэ кралипэна́ пэ паш-ратякири риг, – пхэндя́ Рай Дэвэ́л, – и ёнэ явэ́на тэ чхувэ́н кажно (сва́ко) пэ́скиро троно анги́л Ерусалимо́скири по́рта, и маму́й сарэ́ ва́нты, со исын трусця́л (кругом), и маму́й сарэ́ фо́рья, со исын дрэ Юдэ́я.

¹⁶ И Мэ выпхэнава Миро пхаро́-сэндякирибэн пэ лэ́ндэ пал саро́ лэ́нгиро фуипэ́н, пал-дова́ со ёнэ ячкирдэ́ Ман, и ёнэ тхувлякирдэ дро́га смо́лы явирэ дэвлорорэнгэ, и ёнэ дынэ́ паты́в идолэ́нгэ, со кэрдэ́ лэ́нгирэ васта́.

¹⁷ Палдава́, яв скэдыно́ и ушты́, и пхэн лэ́нгэ саро́, со Мэ припхэнава ту́кэ. На замэр дара́тыр лэ́нгирэ муендыр, соб (кай) Мэ тэ на запхагирав тыро́ ду́хо (фа́но) анги́л лэ́ндэ.

¹⁸ Пал-дова́ со Мэ, акэ, кэрдём ту́тыр сы́рбы зоралякирдо фо́ро, сы́рбы саструно сты́лбо, сы́рбы бронзытка ва́нты проти сари́ пхув, проти Юдэя́кирэ кралье́ндэ, проти тхагарьендэ, проти рашандэ, проти кадалэ́ пхувья́кирэ манушэ́ндэ.

¹⁹ И ёнэ явэ́на тэ марэ́нпэ ту́са, нэ ёнэ на пиризорькирэна тут, пал-дова́ со Мэ сом ту́са, – пхэндя́ Рай Дэвэ́л, – соб (кай) тэ ракхав тут.”