Ekliesiastos 8 - Библия - Пэ Балтитко Романи чиб (Романэс) 2019

¹ Кон исын годо́ ману́ш? И кон джинэ́ла тэ роспхэнэл пал сарэ́ рэ́нды, сыр лэн трэй тэ кэрэ́н? Манушэ́скиро годыпэ́н зачхувэла лэ́скиро муй тэ зяинэл, и наковло лэ́скиро муй парудёла.

Кандэ́н Крали́с

² Мэ пхэна́ва: “Кандэ, со кра́ли припхэнэла тэ кэрэ́с ваш паты́в пал тыри́ совла́х Дэвлэ́скэ.”

³ На яв сы́гно тэ джас криг Лэ́скирэ якхэ́ндыр. На тэрдёв дрэ стонка пал бибахтало́ рэ́ндо, пал-дова́ со кра́ли кэрэ́ла дова́, со исын лачхо́ лэ́скэ,

⁴ пал-дова́ со крали́скиро лав исын зорало́, и кон сашты́ тэ пхэнэ́л лэ́скэ: “Со ту кэрэ́са?”

⁵ Кон рикирэ́лапэ кэ лэ́скиро припхэныбэ́н, кодолэ́скэ на явэ́ла биба́хт и годэ́-манушэ́скиро ило́ розґалёла часо (цы́ро) и дром, сыр трэй тэ кэрэ́л?

⁶ Пал-дова́ со ваш кажно рэ́ндо исын пэ́скиро часо и дром, сыр трэй тэ кэрэ́л? Бари би́да тасавэла манушэ́с;

⁷ пал-дова́ со ёв на джинэ́ла, со явэ́ла; кон могинэ́ла тэ пхэнэ́л лэ́скэ, ке́ли, и, сыр саро́ дава́ явэ́ла?

⁸ Ниекхэстэ нанэ зор пэ ду́хо (фа́но), соб (кай) ману́ш тэ рикирэ́л зоралэ́с ду́хо (фа́но), и ниекхэстэ нанэ зор дро дывэ́с, сыр мэрэ́на. Нашты́ нисыр и тэ отпхандэспэ марибнастыр проти мэрибэ́н, адя́кэ-паць и биба́хт на выракхэла одолэ́н, кон присыклынэ тэ кэрэ́н адя́кэ.

Фуй и Чачунэ́ Мануша́

⁹ Саро́ дава́ мэ дыкхцём и рискирдём пэ́скиро ило́ кэ кажно буты́, со кэрэ́лапэ тэл кхам: исын часо, ке́ли ману́ш рикирэ́ла зор пэ явирэ́стэ и дукхавэла лэс.

¹⁰ И мэ адя́кэ-паць дыкхцём, сыр гаравэнас фуе́ манушэ́н, савэ́ явэ́нас и джа́нас криг адя́кэ, сы́рбы ёнэ кэрэ́нас пир чачипэ́н, и, ке́ли мануша́ уджанас свэнтонэ́ штэто́стыр и, тэды ёнэ бистрэнас пал лэ́ндэ дро фо́ро, кай ёнэ кэрдэ́ биба́хт. Дава́ адя́кэ-паць исын харныпэ́н.

¹¹ Сыр сэ́ндо пэ одолэ́ндэ, кон кэрэ́на бибахталэ́ бутя́, насыгэс кэрэ́лапэ, адя́кэ-паць пал-дава́ манушэ́нгирэ-чхавэ́нгиро ило́ исын хор залымо, соб (кай) тэ кэрэ́л биба́хт.

¹² Мэк грэхи́тко ману́ш тэ кэрэ́л биба́хт шэл мо́лы и тэ дживэ́л ґара́, нэ мэ джино́м миштэ́с, со явэ́ла лачхэ́с одолэ́нгэ, кон дарэ́ла Дэвлэ́стыр, кон дарэ́ла анги́л Лэ́стэ.

¹³ Нэ на явэ́ла лачхэ́с фуе́ манушэ́нгэ, ци сы́рбы зэр (тенё) ёв на явэ́ла ґара́ тэ дживэ́л, пал-дова́ со ёв на дарэ́ла анги́л Дэвлэ́стэ.

¹⁴ Дава́ исын харныпэ́н, со кэрэ́лапэ пэ пхув: чачунэ́ манушэ́нца кэрэ́лапэ дова́, со треиндя тэ явэ́л фуе́ манушэ́нца пир лэ́нгири буты́; и исын фуй мануша́, конэса кэрэ́лапэ дова́, со трэиндя́ тэ явэ́л чачунэ́ манушэ́нгэ пир лэ́нгири буты́. Мэ пхэндём, со дава́ исын адя́кэ-паць харныпэ́н.

¹⁵ И мэ шардём, соб (кай) мануша́ тэ санпэ радыма́са, пал-дова́ со нисо́ нанэ фэды́р тэл кхам сыр тэ хан, тэ пьен, и тэ явэ́н радымакирэса, пал-дова́ со дава́ помогинэла лэ́скэ дрэ лэ́скири пхари́ буты́, со Дэвэ́л дыя́ лэ́скэ тэл кхам.

¹⁶ Ке́ли мэ рискирдём миро ило́ тэ уджинэл годыпэ́н, и тэ роздыкхэл намило пхари́ буты́, со кэрэ́лапэ пэ пхув: и адя́кэ-паць ние́кх ману́ш нанэ, соб (кай) тэ совэ́л ци дывэсэ́, ци раты́;

¹⁷ тэды мэ дыкхцём Дэвлэ́скири сари́ буты́, со ману́ш нашты́ тэ ґалёл сарэ́са, со кэрэ́лапэ тэл кхам. Мэк ману́ш и тэ кэрэ́л буты́ пхарэ́с, и тэ джинэ́л буты́р, нэ сароекх ёв на ґалёла сарэ́са; адя́кэ-паць, ко́ли годо́ ману́ш думинэ́ла, со ёв джинэ́ла дава́, нэ ёв нашты́ дава́ тэ ґалёл сарэ́са.