Ekliesiastos 7 - Библия - Пэ Балтитко Романи чиб (Романэс) 2019

Ду́мы пал Джиибэ́н

¹ Лачхо́ лав исын фэды́р кучонэ́ драбэстыр тэ кхосэн, и мэрибнаскиро дывэ́с исын фэды́р дывэсэ́стыр, ке́ли вари-кон бияндёла.

² Дава́ исын фэды́р тэ джас дро кхэр, кай ровэна пал мулэстэ, сыр тэ джас дро кхэр, кай свэнкинэна, пал-дова́ со дава́ исын ко́нцо (яго́ро), со ужакирэ́ла сарэ́ манушэ́н, и джидэ́ манушэ́скэ трэй дава́ тэ прилэл кэ ило́.

³ Ту́га исын фэды́р сабнастыр, пал-дова́ со, ко́ли муй исын смэнтно (скучно), тэды ило́ ячэ́лапэ фэды́р.

⁴ Годэ́-манушэ́скиро ило́ исын дро кхэр, кай ровэна пал мулэстэ, нэ дылыниньконэнгиро ило́ исын дро кхэр, кай радынэ́напэ сабнаса.

⁵ Дава́ исын фэды́р ваш манушэ́скэ тэ шунэ́н, ко́ли годэ́ мануша́ сыкавэ́на банг ту́кэ, сыр тэ шунэ́с дылыниньконэнгири гилы́.

⁶ Пал-дова́ со дылыниньконэнгиро сабэн исын фэды́р сыр пхусадытка хру́сты, со пхарадёна дрэ яг тэл пири́. Дава́ исын адя́кэ-паць харныпэ́н.

⁷ Чачо́, ко́ли годо́ ману́ш притасавэла явирэ манушэ́с, тэды ёв дылнёла, и почастунко (подарко) [мыто-ю.о.] хасякирэ́ла манушэ́скиро ило́.

⁸ Ко́нцо (яго́ро) исын фэды́р англыпна́стыр дро кажно рэ́ндо, а ману́ш, саво́ зрикирэла пэ́скиро ду́хо (фа́но) исын фэды́р кодолэстыр, кон исын пхутькирдо дро ду́хо (фа́но).

⁹ На холясов сы́гэс дро тыро́ ило́, пал-дова́ со дылынинько ману́ш рикирэ́ла холы́ дро колы́н.

¹⁰ На ра́кир: “Сыр дава́ исын, со вагэдыр (ґарэдыр) дывэса́ сыс фэды́р, сыр какана́?” Палдова́ со дава́ нанэ годо́ пхучибэн.

¹¹ Годыпэ́н исын адя́кэ-паць лачхо́ сыр миштыпэ́н, и кофитко (полезно) ваш одолэ́нгэ, кон дыкхэ́ла кхам.

¹² И годыпэ́н, адя́кэ-паць и ловэ́ затэрдёна пал манушэ́стэ, нэ джиныбэ́н исын фэды́р дро дова́, со годыпэ́н дэ́ла джиибэ́н одолэ́скэ, конэ́стэ ёв исын.

¹³ Придыкхпэ кэ дова́, со Дэвэ́л кэрдя́: кон сашты́ тэ кэрэ́л ровно дова́ предмето, со Дэвэ́л кэрдя́ банго́.

¹⁴ Ке́ли тырэ́ дывэса́ исын миштэ, ра́дынпэ зоралэ́с, нэ ке́ли дывэса́ исын фуй, тэды обдумин екх: Дэвэ́л чхудя́ екх пал явирэ́стэ, соб (кай) дро ко́нцо (яго́ро) ману́ш тэ на джинэ́л, со явэ́ла пал лэ́стэ.

¹⁵ Мэ дыкхцём сарэ́ далэ́ начачипэна дрэ мирэ́ харныпнаскирэ дывэса́: чачуно́ ману́ш, кон хасёла пэ́скирэ чачипна́са, и бибахтало́ ману́ш, кон дживэ́ла ґара́ (длэнгэс) пэ́скирэ бибахталэ́ рэндэ́нца.

¹⁶ На яв чачуно́ буты́р мератыр; на яв годо́ буты́р мератыр: ваш со ту́кэ тэ хасякирэс пэс? На яв дылынинько буты́р мератыр, ваш со ту́кэ тэ мэрэс анги́л уляго (пора)?

¹⁷ Дава́ исын лачхэ́с, соб (кай) ту тэ рикирэспэ кэ екх, и адя́кэ-паць, соб (кай) ту тэ дурьякирэс тыро́ васт явирэстыр: пал-дова́ со кон дарэ́ла Дэвлэ́стыр, одова́ явэ́ла тэ лэл ко́фо дуендыр котэрэндыр.

¹⁸ Годыпэ́н зорьякирэла годэ́ манушэ́с, и ёв исын барэды́р дэшэ форо́скирэ барыдырэндыр.

¹⁹ И ние́кх нанэ чачунэ́ манушэ́с пэ пхув, кон кэрэ́ла лачхипэ́н и кон на кэрэ́ла грэ́хи.

²⁰ Адя́кэ-паць и на прилэ́ илэ́са сарэ́ лава́, со мануша́ пхэнэ́на, соб (кай) ту тэ на шунэ́с тырэ́ дынари́с тэ кошэл тут.

²¹ Пал-дова́ со адя́кэ-паць и тыро́ ило́ бут мо́лы джиндя́, сыр ту адя́кэ-паць косцян явирэ́н.

²² Саро́ дава́ мэ спробиндём пир миро годыпэ́н, и мэ пхэндём: “Мэ ява́ва годо́”, нэ дава́ сыс дура́л ма́ндыр.

²³ Саро́, соб (кай) тэ на явэ́л, исын дура́л и древа́н хор, кон сашты́ тэ уґалёл дава́?

²⁴ Мэ рискирдём пэ́скиро ило́, соб (кай) тэ джина́в, тэ розґалёвав, и тэ выродав годыпэ́н и причына, со́скэ саро́ адя́кэ кэрэ́лапэ?

²⁵ И тэ уджинав, сави́ биба́хт лыджа́ла дылныпэ́н, и дурэды́р бигодыпэн, и тэды ману́ш сы́рбы зджа́ла годятыр.

²⁶ И мэ латхём (ластём), со джувлы́ исын киркэдыр мэрибна́стыр, савьятэ ило́ исын сы́рбы фэлы́, ци кхуды́ (сеть), савьятэ васта́ исын сы́рбы зандирья́ (цэ́пи) пэ ґэра́. Нэ ману́ш кон кэрэ́ла, сыр исын лачхо́ Дэвлэ́скэ, зракхэ́лапэ ла́тыр, нэ грэхи́тко ману́ш явэ́ла лыно́ дрэ ла́кирэ фэля́.

²⁷ Дыкх! Сэ мэ латхём”, – пхэндя́ Сыклякирибна́скиро пал Дэвлэ́стэ, – сыр мэ дочхувава екх чачипэ́н кэ яви́р, соб (кай) тэ уґалёвав, со́скэ саро́ дава́ кэрэ́лапэ.

²⁸ Со ишчо (инкэ́) миро ило́ родэ́ла, нэ со мэ нашты́ тэ латхав, дава́ исын: машки́р барэ́ манушэ́ндэ мэ латхём екхэ муршэ́с, нэ мэ на латхём ни екха джувля́ машки́р кадалэ́ сарэ́ндэ.

²⁹ Дыкх! Со мэ латхём: Дэвэ́л создыя́ манушэ́с дэвлытконэса; нэ мануша́ латхнэ́ яви́р и бут со придуминдлэ пэ́скэ.