Ekliesiastos 3 - Библия - Пэ Балтитко Романи чиб (Романэс) 2019

Исын Часо Ваш Саро́

¹ Ваш саро́, со кэрэ́лапэ дро дава́ свэ́то (лот), исын пэ́скиро уляго (пора), и исын часо (цы́ро) кажнонэ́ рэндоскэ тэл кхам;

² и часо тэ обкошэн дова́, со исын почхудо; часо тэ бияндён, и часо тэ мэрэ́н; тэ почхувэн дрэ пхув,

³ часо тэ мулякирэ́н, и часо тэ састякирэн; часо тэ пхагирэн тэлэ́, и часо тэ ґаздэ́н кхэр;

⁴ часо тэ тугинэн зоралэ́с, и часо тэ кхэлэн; часо тэ ровэ́н, и часо тэ санпэ;

⁵ часо тэ облэн, и часо тэ обрикирэнпэ облыибнастыр; часо тэ чхурдэ́н криг бара́: и часо тэ укэдэн бара́;

⁶ часо тэ родэ́н, и часо тэ нашавэн; часо тэ ракхэ́н, и часо тэ чхурдэ́н криг;

⁷ часо тэ рискирэ́н, и часо тэ сывэн; часо тэ явэ́н штыл, и часо тэ ракирэ́н;

⁸ часо ваш марибэ́н, и часо ваш рама́нё (миро); часо тэ сыкавэ́н паты́в, и часо зоралэ́с тэ бидыкхэн.

⁹ Саво́ ко́фо исын бутярнэскэ далэ́стыр, пашы́л со ёв кэрдя́ буты́ пхарэ́с.

¹⁰ Мэ дыкхцём намило пхари́ буты́, со Дэвэ́л дыя́ манушэ́нгирэ чхавэ́нгэ тэ кэрэ́н пхарэ́с.

¹¹ Ёв кэрдя́ саро́ шука́р дро пэ́скиро часо, адя́кэ-паць Ёв дыя́ джиныбэ́н пал свэ́то (лот) дрэ лэ́нгирэ илэ; нэ сароекх ману́ш нашты́ тэ ґалёл дова́ кэрибэн, со Дэвэ́л кэрэ́ла англыпна́стыр кэ ко́нцо (кэ яго́ро).

¹² Мэ джино́м, со нисо́ нанэ фэды́р ваш лэ́нгэ, сыр тэ радынэ́нпэ зоралэ́с тэ кэрэ́н лачхипэ́н дро лэ́нгиро джиибэ́н;

¹³ и адя́кэ-паць, соб (кай) ману́ш тэ хал, и тэ пьел, и тэ радынэ́лпэ зоралэ́с лачхипнастыр сарэ́ лэ́скирэ бутя́тыр-дава́ исын тала́но Дэвлэ́стыр.

¹⁴ Мэ джино́м со, соб (каи) Дэвэ́л тэ на кэрэ́л, дава́ явэ́ла пэ сарэ́ ве́ки. Нисо́ нашты́ тэ дочхувэс кэ дова́, и нисо́ нашты́ тэ отлэс далэ́стыр. Дэвэ́л джинэ́ла тэ кэрэ́л адя́кэ, соб (кай) амэ тэ дарас анги́л Лэ́стэ.

¹⁵ Дава́, со исын, ужэ сыс ґарым-ґара́, и дова́, со явэ́ла, тэж ужэ сыс, и Дэвэ́л янэ́ла палэ дова́, со сыс.

¹⁶ Адя́кэ-паць мэ дыкхцём тэл кхам: одо́й, кай сэндытко штэ́то, одо́й исыс фуипэ́н. И одо́й, кай штэ́то ваш чачипэ́н, одо́й сыс биба́хт.

¹⁷ Мэ пхэндём дро миро ило́: “Дэвэ́л явэ́ла тэ сэндякирэ́л чачуно́ и фуе́ манушэ́н, пал-дова́ со одо́й явэ́ла часо ваш кажно выкэдыибэн и ваш кажно буты́.”

¹⁸ Мэ пхэндём дро миро ило́: “Адя́кэ исын манушэ́нгирэ чхавэ́нца, со Дэвэ́л спробинэла лэн, соб (кай) ёнэ могинэ́нас тэ дыкхэ́н, со ёнэ исын сы́рбы мурдала́ (жывотна).

¹⁹ Пал-дова́ со, со кэрэ́лапэ манушэ́нгирэ чхавэ́нца, адя́кэ-паць кэрэ́лапэ мурдалэ́нца: екх до́ля: сыр екх мэрэ́ла, адя́кэ-паць яви́р мулёла.

²⁰ Сарэ́ джа́на дро екх штэ́то: сарэ́ исын прахостыр, и сарэ́ рисёна дро пра́хо.

²¹ Кон джинэ́ла, ци манушэ́нгирэ-чхавэ́нгиро ду́хо (фа́но) джа́ла упрэ́? И ци мурдалэнгиро ду́хо (фа́но), ци ёв джа́ла дрэ пхув?

²² И мэ дыкхцём, со нисо́ нанэ фэды́р, сыр манушэ́скэ тэ радынэ́лпэ зоралэ́с лэ́скиро бутендыр, пал-дова́ со дава́ исын лэ́скири до́ля, нэ кон янэ́ла лэс тэ дыкхэ́л, со явэ́ла пал лэ́стэ?