Ekliesiastos 2 - Библия - Пэ Балтитко Романи чиб (Романэс) 2019

Джиибэ́н ваш Ра́дыма исын Ивья́

¹ Мэ пхэндём дро пэ́скиро ило́: “Яв! Мэ спробинава тут радымакирэ сабнаса, палдава́ яв лошало (весёло) пхэрдэ́с. Нэ, акэ, дава́ исын адя́кэ-паць харныпэ́н.

² Мэ пхэндём пал сабэн: “Бигодякирибэн!” И пал ра́дыма сабнаса: “Со дава́ дэ́ла?”

³ Мэ розґалёвавас пэ́скирэ илэ́са, сыр тэ лошакирав (тэ усладинав) мирэ́ маса́ моляса (виноса), нэ, соб (кай) миро ило́ тэ ячэ́л годэдыр, и адя́кэ-паць тэ рикиравпэ кэ дылныпэ́н пэ ада́кицы, кицы́ трэй, соб (кай) тэ дыкха́в, саво́ лачхипэ́н исын ваш манушэ́нгирэ чхавэ́нгэ тэ кэрэ́н тэл болыбэ́н дрэ сарэ́ дывэса́ дро лэ́нгиро джиибэ́н.

⁴ Мэ кэрдём пэ́скэ барэ́ бутя́, мэ ґаздыём пэ́скэ кхэра́, и мэ зачхудём пэ́скэ винагра́днико (дракхин).

⁵ Мэ кэрдём пэ́скэ унты (сады) и парки, и мэ зачхудём сарэ́-сортэнгирэ фруктытка кашта́ (дрэвы).

⁶ Мэ кэрдём пэ́скэ сажалки (вэндэриня́), савэ́ндыр мэ почхувава пане́са рошча (вэлади́н), кай кашта́ (дрэвы) барьёна.

⁷ Мэ киндём пэ́скэ дынарье́н и дынарицэн, и сыс ма́ндэ дына́рья, кон бия́ндыя дро миро кхэр. Чачо́, ма́ндэ адя́кэ-паць исыс бут ґурты и бакрэ́нгирэ ста́ды; бутэды́р сарэ́ндыр, савэ́ сыс дро Ерусалимо анги́л ма́ндэ.

⁸ Мэ скэдыём адя́кэ-паць руп и сувнака́й, и древа́н выкэдынэ́ кучипэна (сокровишчы) кральендыр и пхувья́кирэ ригэ́ндыр. Ма́ндэ сыс багаибнаскирэ и багаибнаскирья-дова́, со древа́н радынэла манушэ́нгирэ чхавэ́н, и сарэ́ башаибнаскирэ струме́нты.

⁹ И мэ яцём баро́ и пирибариём сарэ́н, кон сыс анги́л ма́ндэ дро Ерусалимо. Саро́ миро годыпэ́н адя́кэ-паць яця́пэ ма́нца.

¹⁰ И саро́, соб (кай) мирэ́ якха́ зоралэ́с тэ притырдэнпэ, мэ на рикирдём дрэ риг пэ́стыр: мэ на дыёмпэ палэ мирэ́ илэ́са кажнонэ́ радыма́тыр, пал-дова́ со миро ило́ древа́н радындяпэ мирэ́ пхарэ́ бутя́тыр, и дава́ исын мири́ бажын сарэ́ мирэ́ пхарэ́ бутя́тыр.

¹¹ Тэ́ньци мэ подыкхцём пэ сарэ́ бутя́, со мирэ́ васта́ кэрдэ́, и пэ сари́ пхари́ буты́, со мэ кэрдём пхарэ́с, и, чачо́, саро́ исын харныпэ́н и, сыр тэ традэспэ пал балва́л. На сыс ко́фо тэл кхам.

¹² И мэ рискирдём годы́ кэ дава́-паць годыпэ́н, бигодякирибэн и дылныпэ́н: хачы, со ману́ш явэ́ла кра́ли, сашты́ тэ кэрэ́л пал крали́стэ, исын какана́? Ци екх дова́, со ужэ сыс кэрдо́?

¹³ И мэ дыкхцём, со годыпэ́н исын фэды́р дылныпнастыр, со дуд (свэ́то) исын фэды́р калыпна́стыр (цямлыпнастыр).

¹⁴ Годэ́ манушэ́стэ якха́ исын дро лэ́скиро шэро́, нэ дылынинько псирэ́ла дро цямлыпэ́н; нэ мэ адя́кэ-паць кокоро́ ґалыём хор, со екх ко́нцо (яго́ро) ужакирэ́ла и екхэ́с, и явирэ́с.

¹⁵ Мэ пхэндём дро пэ́скиро ило́: “Сыр дава́ кэрэ́лапэ дылыниньконэса, дава́ адя́кэ-паць явэ́ла тэ кэрэ́лпэ и ма́нца, и, со́скэ тэды мэ сом годо́?” Тэ́ньци мэ пхэндём дро пэ́скиро ило́, со саро́ дава́ адя́кэ-паць исын харныпэ́н.

¹⁶ Пал-дова́ со мануша́ на явэ́на тэ рипирэ́н годэс пэ сарэ́ ве́ки, сыр и дылыниньконэс; пал-дова́ со саро́ ужэ бистрэна дрэ бэрша́, со явэ́на. И сыр дава́ исын, со годо́ ману́ш мэрэ́ла адя́кэ-паць, сыр и дылынинько?

¹⁷ И мэ лыём зоралэ́с тэ на дав чол (тэ на цэнинав) джиибэ́н. Пал-дова́ со буты́, со сыс кэрды тэл кхам, пхарьякирдя миро ило́; пал-дова́ со саро́ исын харныпэ́н и сы́рбы тэ традэспэ пал балва́л.

¹⁸ И мэ лыём зоралэ́с тэ на дав чол сарэ́ мирэ́ пхарэ́ бутякэ, со мэ кэрдём пхарэ́с тэл кхам, пал-дова́ со мэ ж ячкирава манушэ́скэ, кон явэ́ла пал ма́ндэ.

¹⁹ И кон джинэ́ла, ци ёв явэ́ла годо́ ци дылынинько? Нэ ёв жа явэ́ла тэ хулаинэ́л пэ мири́ сари́ пхари́ буты́, со мэ кэрдём буты́ пхарэ́с, и дро со мэ сыкадём пэ́скиро годыпэ́н тэл кхам. Дава́ исын адя́кэ-паць харныпэ́н.

²⁰ Тэ́ньци мэ рискирдём пэ́скиро ило́ и лыём тэ отпхэнавпэ сарэ́ пхарэ́ бутя́тыр, со мэ кэрдём буты́ пхарэ́с тэл кхам.

²¹ Исын ману́ш, кон кэрдя́ буты́ пхарэ́с годыпнаса, джиныбнаса и кэрдя́, и ёв ячкирэ́ла пэ́скиро миштыпэ́н манушэ́скэ, саво́ на кэрдя́ буты́ пхарэ́с пашы́л лэ́стэ. Дава́ исын адя́кэ-паць харныпэ́н и бари биба́хт.

²² Со ж манушэ́скэ явэ́ла сарэ́ лэ́скирэ пхарэ́ бутя́тыр и илэ́скирэ тугатыр, ке́ли ёв кэрдя́ буты́ пхарэ́с тэл кхам.

²³ Пал-дова́ со сарэ́ лэ́скирэ дывэса́ исын дукханэ, и сарэ́ лэ́скирэ бутендыр исын ту́га пэ ило́, аж дро рат лэ́скиро ило́ на откхинёла. Дава́ исын адя́кэ-паць харныпэ́н.

²⁴ Нанэ нисо́ фэды́р ваш манушэ́скэ, соб (кай) ёв тэ хал, и тэ пьел, и, соб (кай) лэ́скиро ило́ тэ радынэ́лпэ зоралэ́с лэ́скирэ бутя́тыр. Дава́ исын адя́кэ-паць, мэ ґалыём, Дэвлэ́скирэ вастэ́стыр.

²⁵ Пал-дова́ со, кон сашты́ тэ хал, ци кон сашты́ тэ радынэ́лпэ буты́р би Лэ́скиро?

²⁶ Дэвэ́л дэ́ла годыпэ́н, и джиныбэ́н, и ра́дыма одолэ́ манушэ́скэ, кон исын лачхо́ ваш Лэ́скэ; нэ Ёв дэ́ла буты́ и грэхитконэ́ манушэ́скэ, тэ скэдэл и тэ чхувэ́л кхэтанэ́, соб (кай) ёв могинэлас тэ отдэ́л кодолэ́скэ, саво́ исын лачхо́ ваш Дэвлэ́скэ. Дава́ исын адя́кэ-паць харныпэ́н и, сы́рбы тэ традэспэ пал балва́л.