Ekliesiastos 11 - Библия - Пэ Балтитко Романи чиб (Романэс) 2019

Харныпэ́н исын Пхарэ́ Бутя́тыр

¹ Дэ тыро́ маро́ бутэ́ манушэ́нгэ, пал-дова́ со ту дорэсэса да́ры палэ бут дывэса́.

² Роскэр, со исын ту́тэ, машки́р эфта́ (эфтанэ) манушэ́ндэ, ци адя́кэ-паць машки́р охто́ (бидуе́нгиро дэш) манушэ́ндэ, пал-дова́, со ту на джинэ́са, саво́ бэдыпэн явэ́ла пэ пхув.

³ Ко́ли о́блоки исын пхэрдэ́ брышындэса, тэды ёнэ чхувэ́на тэлэ́ паня́ пэ́стыр; и ко́ли кашт (дрэ́во) пэрэ́ла кэ паш-дывэсы́тко риг, ци кэ паш-рати́тко риг, тэды пэ штэ́то кашт пэрэ́ла, ёв явэ́ла тэ пасёл.

⁴ Кон дыкхэ́ла пэ балва́л, одова́ на явэ́ла тэ почхувэл зя́рка дрэ пхув, и кон дыкхэ́ла патыва́са пэ о́блоки, одова́ на явэ́ла тэ счхинэл гив.

⁵ Сыр ту на джинэ́са, савэ́ дромэ́са ду́хо (фа́но) джа́ла, и дова́, сыр тыкнэ́-масэнгирэ кокалкицы барьёна дрэ лэ́скирэ-да́киро пэр, адя́кэ-паць ту и на ґалёса Дэвлэ́скири буты́, Кон кэрэ́ла дава́ саро́.

⁶ Тасярлатунэ (раннёнэ) злокостыр почхув пэ́скири зя́рка дрэ пхув, нэ бэльвэлятыр на тангинэ (на жалин) тыро́ васт ваш буты́, пал-дова́ со ту на джинэ́са, со удэлапэ кэ миштыпэ́н, ци дава́ рэ́ндо, ци дова́ рэ́ндо, ци дуй далэ́ рэ́нды, явэ́на лачхэ́.

⁷ Какана́, дыкх. Дуд исын гудло́, и гожэс исын якхэнгэ тэ дыкхэ́н кхам;

⁸ нэ ко́ли ману́ш дживэ́ла бут бэрш, тэды мэк ёв тэ радынэ́лпэ зоралэ́с кажнонэ́ бэршэстыр, нэ мэк ёв и тэ рипирэл пал калэ́ дывэса́, пал-дова́, со ёнэ явэ́на бут: саро́, со явэ́ла, исын харныпэ́н.

Годэ́ Лава́ Тэрнэ́ Манушэ́нгэ

⁹ Ра́дынпэ (лошалёв), тэрно́ ману́ш, тырэ́ тэрныпнастыр, и мэк тыро́ ило́ тэ ґаздэл тыро́ ду́хо (фа́но) дрэ дывэса́, ке́ли ту сан тэрно́; и псир одо́й, кай тыро́ ило́ подпхэнэла, и одори́к, карик тырэ́ якха́ тырдэнапэ, нэ ту екх джин, со пал дава́ саро́ Дэвэ́л выкхарэла тут пэ сэ́ндо.

¹⁰ Тэ́ньци, на тугин дро пэ́скиро ило́, и чхув криг биба́хт тырэ́ масэ́ндыр [лочатыр-ю.о.], пал-дова́ со чхаворипэн и тэрныпэн исын харныпэ́н.