Ekliesiastos 10 - Библия - Пэ Балтитко Романи чиб (Романэс) 2019

¹ Мулэ́ матля (мухи) дошакирэна аптекароскиро драб тэ кхосэн адя́кэ, со дава́ куч драб лэ́ла тэ кхандэл кирныпнаса;

² адя́кэ-паць и екх тыкно́ дылныпэ́н кэрэ́ла патывалэ́ манушэ́са, кон исын годо́ и савэ́с яви́р мануша́ кутякирэна.

³ И дава́ адя́кэ-паць исын: ке́ли дылынинько ману́ш джа́ла вари-савэ́ дроморэса; лэ́скэ сароекх на ухтылэ́ла (на́доси) годыпэ́н, и ёв сыкавэ́ла кажнонэ́ манушэ́скэ, со ёв исын дылынинько.

⁴ Ко́ли тхэмэ́скирэ-барыдырэскиро ду́хо (фа́но) ґаздэ́лапэ проти ту́тэ, на ячкив (на ячав) пэ́скиро штэ́то, пал-дова́ со рама́нё (миро) барыдырэ́са чхакирэла штылэ́с барэ́ грэ́хи.

⁵ Дава́ исын биба́хт, со мэ дыкхцём тэл кхам, сыр тхэмэскиро барыдыро́ дэ́лапэ дукха́.

⁶ Дылныпэ́н чхувэ́лапэ анги́л барэ́ патыва́са; барвалэ́ мануша́ исын бэштэ́ пэ тэлатунэ́ штэ́ты.

⁷ Мэ дыкхцём дынарье́н пэ грэ́ндэ, и крали́скирэ чхавэ́н, савэ́ псирэ́на пэзал пир пхув сыр дына́рья.

⁸ Кон ґанавэла ґанби́н, одова́ пэрэ́ла дрэ ла́тэ, и кон пхагирэ́ла тэлэ́ тыно, одолэ́с сап дандырэла.

⁹ Кон выпхагирэла бара́, одолэ́с бар могинэ́ла тэ пэкавэл палэ; кон пхаравэла кашта́, одолэ́с кашт могинэ́ла тэ дукхавэл.

¹⁰ Ко́ли товэр исын тэмпо, и ко́ли кон на востринэла чхиныбнытко (лезвиё), то манушэ́скэ трэй буты́р тэ причхувэл зор. Фэды́р годыпнаса тэ думинэс пал дава́ анги́л.

¹¹ Ко́ли сап дандырэла манушэ́с анги́л, сыр тэ заракирэс лэс, тэды укротителё ужэ на трэй.

¹² Лава́ годэ́-манушэ́нгирэ уштэндыр исын бахталыпэ́н, нэ дылыниньконэскирэ ушта́ сы́рбы накхавэна лэс кокорэс.

¹³ Лэ́скиро муй лэ́ла тэ ракирэ́л нагодэ лава́, нэ дро ко́нцо (дро яго́ро) ёв ракирэ́ла сы́рбы бишэрэскиро.

¹⁴ И ракирэ́ла бут лава́ дылынинько, нэ ние́кх ману́ш на джинэ́ла, со явэ́ла анги́л, кон могинэ́ла тэ пхэнэ́л лэ́скэ?

¹⁵ Дылынинька мануша́ кхинякирэна пэс пхарэ́ бутяса адя́кэ, со ёнэ на джинэ́на, сыр тэ джа́н пэ фо́ро.

¹⁶ Бида ту́кэ, пхув, ко́ли тыро́ кра́ли исын тэрнэ́-бэршэнгиро и, ке́ли тырэ́ тхага́рья (кня́зи) [крали́скирэ чхавэ́-ю.о.] ха́на тася́рлэс (ра́нэс).

¹⁷ Бахталы́ ту сан, пхув, ко́ли тыро́ кра́ли исын барэ́-рангирэ родо́стыр и тырэ́ тхага́рья (кня́зи) ха́на тэды, ке́ли трэй ваш зоралыпэ́н, а на ваш матыбэн.

¹⁸ Пал древа́н кирнэ-масэнгирэ васта́ кхэрэ́скиро каркасо пэрэ́ла, и пир чучэ васта́ кхэр тхадэ́ла.

¹⁹ Хабэ́н исын кэрдо́, соб (кай) тэ санпэ, и мол розрадынэла джиибэ́н, пэ пал ловэ́ сашты́ тэ лэс саро́ дава́.

²⁰ На прокош крали́с аж и дрэ годы́, на прокош барвалэн дрэ шту́ба, кай совэса; пал-дова́ со чириклы дро фа́но (воздухо) могинэ́ла тэ лыджа́л тыро́ лав [зан-ю.о.], и вурняибнытко пхакэнца создыибэн (крылато) пхэнэ́ла пал дава́ рэ́ндо.