Ekliesiastos 1 - Библия - Пэ Балтитко Романи чиб (Романэс) 2019

Джиибэ́н исын Ивья́

¹ Еклесиастоскирэ Давидо́скирэ–чхавэ́скирэ лава́, Ерусалимо́скирэ крали́скирэ, кон сыклякирдя́ пал Дэвлэ́стэ.

² “Харныпэ́н (суе́та) харныпнастыр”, – ракирэ́ла Еклесиасто (Сыклякирибна́скиро) пал Дэвлэ́стэ-харныпэ́н харныпнастыр. Саро́ исын харныпэ́н.”

³ Саво́ ко́фо (льґота) исын манушэ́скэ сарэ́ лэ́скирэ пхарэ́ бутя́тыр, со ёв кэрэ́ла буты́ пхарэ́с тэл кхам.

⁴ Екх ро́до джа́ла пэ́скэ, и яви́р ро́до явэ́ла, нэ пхув ячэ́лапэ пэ сарэ́ ве́ки.

⁵ Кхам уштэ́ла, и кхам джа́ла тэлэ́, и сы́гэс рисёла кэ дова́ штэ́то, каты́р ёв уштыя́.

⁶ Балва́л пхурдэла кэ паш-дывэсы́тко (таты) риг, и ёй рисёла пэ паш-рати́тко (шылалы) риг: балва́л усады (сак) обрисёла трусця́л, и ёй рисёла палэ пэ пэ́скирэ круги.

⁷ Сарэ́ рэ́ки (лэня́) тхадэна дро мо́рё (дэрья́в), нэ мо́рё (дэрья́в) усае́кх нанэ пхэрдо́: кэ долэ́ штэ́ты, карик рэ́ки (лэня́) тхадэна, и одотхы́р рэкакирэ (лэнякирэ) паня́ рисёна, соб (кай) нэвэ́стыр тэ тхадэн.

⁸ Саро́, со исын дро свэ́то (лот), исын пхарэ́ бутя́тыр: ние́кх ману́ш нашты́ тэ выпхэнэл саро́. Якх исын на чалы дыкхибнастыр, и кан исын на пхэрдо́ шуныбнастыр.

⁹ Дова́, со сыс, явэ́ла нэвэ́стыр; и дова́, со кэрдя́пэ, явэ́ла нэвэ́стыр тэ кэрэ́лпэ: и нанэ нисо́ нэво́ тэл кхам.

¹⁰ Ци исын вари-со, пал со сашты́ тэ пхэнэ́с: “Дыкх, ци дава́ исын нэво́?” Дава́ сыс дрэ ґаратунэ́ бэрша́, со сыс анги́л амэ́ндэ.

¹¹ Ние́кх ману́ш на рипирэла дова́, со сыс анги́л лэ́стэ, ние́кх, кон ишчо (инкэ́) явэ́ла, на явэ́ла тэ рипирэл пал дова́, со ишчо (инкэ́) явэ́ла анги́л.

Со Джинэ́ла Дэвлэ́скиро Сыклякирибна́скиро

¹² Мэ, Еклесиасто, Дэвлэ́скиро сыклякирибна́скиро, со́мас кра́ли пэ Израилё дро Ерусалимо.

¹³ Мэ рискирдём пэ́скиро ило́ тэ родав, и тэ розґалёвав годыпнаса саро́, со кэрэ́лапэ тэл болыбэ́н: дасаво пхаро́ задыибэн Дэвэ́л дыя́ манушэ́нгирэ чхавэ́нгэ, соб (кай) ёнэ далэ́са тэ залэнпэ пхарэ́с.

¹⁴ Мэ дыкхцём сарэ́ бутя́, со кэрэ́напэ тэл кхам, и, акэ – саро́ исын ивья́ и традэлапэ балваляса.

¹⁵ Со исын банго́, нашты́ тэ явэ́л маму́й (прямэс); и дова́, со нанэ, нашты́ тэ гинэс.

¹⁶ Мэ пхэндём пэ́скирэ илэскэ: “Дыкх! Мэ яцём барэ́ манушэ́са и яцём годэдыр сарэ́ манушэ́ндыр, кон сыс анги́л ма́ндэ дро Ерусалимо. Ма́ндэ исын баро́ годыпэ́н и джиныбэ́н.”

¹⁷ И мэ рискирдём пэ́скиро ило́ тэ джина́в буты́р пал годыпэ́н; со исын бигодякирибэн и дылныпэ́н. Мэ ґалыём анги́л, со дава́ исын адя́кэ-паць, сы́рбы тэ традэспэ пал балва́л.

¹⁸ Пал-дова́ со, кай исын баро́ годыпэ́н, одо́й исын баро́ калыпэ́н пэ ило́ и кон прибарьякирэла джиныбэ́н, кодолэскиро ду́хо (фа́но) буты́р пэрэ́ла.