Эфесянэнгэ 5 - Библия - Пэ Балтитко Романи чиб (Романэс) 2019

Дживэ́н дро Дуд

¹ И палдава́ причхувэ́н зор тэ кэрэ́н, сыр Дэвэ́л кэрэ́ла, сыр чхавэ́, савэ́ исын Лэ́скэ древа́н дро́га,

² дживэ́н дрэ паты́в кэ яви́р мануша́, сыр и Христо́со сыкадя́ паты́в амэ́нгэ и отдыя́ Пэс пал амэ́ндэ, сыр гудло́ кхандыпэн и свэ́нто дыибэ́н, саво́ исын лачхо́ Дэвлэ́скэ.

³ Нэ биладжаипэ́н, ци яви́р вари-саво́ магирипэ́н, ци бокхалыпэн, мэк кадалэскэ тэ на явэ́л штэ́то машки́р тумэ́ндэ, сыр исын машки́р свэнтонэ́ндэ;

⁴ и адя́кэ-паць бэды́тка лава́ и чхучо́ ракирибэ́н и дылыно́ сабэн на джа́ла ваш тумэ́нгэ, фэды́р отдэ́н пэ́скиро часо тэ парикирэ́н Дэвлэ́скэ.

⁵ Джинэ́н дова́, со ни екх биладжаипна́ри, ци магирдо́, ци бокхало́ кэ яви́р фуй рэ́нды (де́лы), саво́ исын сы́рбы идоло́скиро дына́ри (слуга), лэ́стэ на явэ́ла паш дро Христосо́скиро Дэвлэ́скиро кралипэ́н.

⁶ Мэк нико́н тэ на хохавэ́л тумэн чхучэ́ (пустонэ) лавэ́нца, пал дава́ явэ́ла Дэвлэ́скири холы́ пэ чхавэ́ндэ, савэ́ на кандэ́на.

⁷ На явэ́н кхэтанэ́ адасавэ́ манушэ́нца;

Псирэ́н дро Дуд

⁸ Вари-ке́ли тумэ́ са́нас дро калыпэ́н (тёмныма), а какана́ тумэ́ сан дуд дрэ Растэ-Дэвлэ́стэ: дживэ́н сыр дудэ́скирэ (свэто́скирэ) чхавэ́,

⁹ пал-дова́ со Духоскиро барьякирдо́ (пло́до) исын дро кажно лачхипэ́н, чачипэ́н и патяибэ́н,

¹⁰ уджинэ́н, со трэй Дэвлэ́скэ;

¹¹ соб (кай) тэ на явэ́л тумэ́ндэ нисо́ кхэтанэ́ дрэ чхучэ́ калэ́ (тёмна) рэ́нды, нэ фэды́р сыкавэ́н банг,

¹² пал-дова́ со, со адасавэ́ мануша́ кэрэ́на чораханэ́с, ладжаво-исын тэ ракирас.

¹³ Нэ саро́ дава́ явэ́ла дыцьло анги́л дуд (свэ́то), пал-дова́ со дуд сыкавэ́ла саро́, со исын дыцьло.

¹⁴ Палдава́ исын пхэндло́: “Ушты́, кон исын суто́, и отджидёв, и явэ́ла тэ свэнцынэл ту́кэ Христо́со.”

¹⁵ И палдава́ ракхэ́н лачхэ́с, дживэ́н на сыр бигодякирэ, нэ сыр годьварэ́ мануша́.

¹⁶ Ракхэ́н часо (цы́ро), пал-дава́ со далэ́ дывэса́ исын хоханэ́.

¹⁷ И на явэ́н дылынэ́, а фэды́р причхувэ́н зор тэ ґалён, со Дэвэ́л ужакирэ́ла амэ́ндыр.

¹⁸ И на пьен кэ матыбэн мол, савья́тыр джа́ла на́лачхо джиибэ́н, нэ фэды́р пхэрдякирэн пэс Духо́са,

¹⁹ сыклякирэ́н екх екхэ́с псалмэнца, бахталэ́ лавэ́нца и Дэвлытконэ́ гиленца, бага́н и славинэ́н Рас-Дэвлэ́с сарэ́ илэ́стыр,

²⁰ усады (сак) парикирэ́н пал саро́ Дэвлэ́скэ и Дадэ́скэ, ваш амарэ́ Ра́скирэ-Дэвлэ́скирэ, Исусо́скиро Христосо́скиро лав,

²¹ кандэ́н екх екхэ́с пир дар анги́л Дэвлэ́стэ.

Ромня́ и Рома́

²² Джувлялэ, кандэ́н пэскирэн ромэн сыр Рас-Дэвлэ́с,

²³ пал-дова́ со ром исын хула́й ромнякэ, сыр и Христо́со исын Кхангирья́киро хула́й. Ёв исын Зракхибнари ваш Кхангири́ пир маса́ дро ду́хо (фа́но).

²⁴ Нэ, сыр Кхангири́ кандэ́ла Христосо́с, адя́кэ-паць и ромненгэ трэй тэ кандэ́н дро саро́ пэ́скирэ ромэн.

²⁵ Мурша́лэ, сыкавэ́н паты́в пэ́скирэ ромне́нгэ адя́кэ, сыр Христо́со сыкадя́ паты́в Кхангирьякэ и отдыя́ Пэс пэ мэрибэ́н пал ла́тэ,

²⁶ соб (кай) тэ кэрэ́л Кхангири́ свэнтонаса, тэ выжужакирэл ла пане́са и Дэвлэ́скирэ лавэ́са,

²⁷ соб (кай) Лэ́скэ тэ чхувэ́л анги́л Пэ́стэ Кхангири́ дро славно гожыма, дрэ сави́ нанэ ни саво́ макхипэн, ни сави́ дош, а соб (кай) ёй тэ явэ́л свэ́нто и бидошэнгири.

²⁸ Адя́кэ-паць и рома́ исын бангэ́ тэ сыкавэ́н паты́в пэскирэн ромне́нгэ сыр пэ́скирэ масэ́нгэ: конэ́скэ исын дро́го пэ́скири ромны́, кодолэ́ манушэ́скэ исын дро́го кокоро́ ёв.

²⁹ Пал-дова́ со ниекхэскэ ние́кхвар на сыс джунгало́ (брытко) ваш пэ́скири лоч (плоть), нэ ёв чаравэла и татькирэла лэс сыр и Христо́со Кхангири́:

³⁰ пал-дова́ со амэ сам паша́ Лэ́скирэ масэ́ндыр; амэ сам Лэ́скирэ лоча́тыр и Лэ́скирэ кокалэндыр.

³¹ “Палдава́ мэкэ́ла ману́ш пэ́скирэ дадэ́с и да, и явэ́ла тэ дживэ́л пэ́скирэ ромня́са, и ёнэ дуй явэ́на сы́рбы екх лоч.”

³² Кадава́ гарадо́ чачипэ́н Свэнтонэ́ Чхиныбна́стыр исын баро́; мэ ракира́ва, со дава́ адя́кэ-паць отлыджалапэ кэ Христо́со, сыр и кэ Кхангири́.

³³ Нэ и адя́кэ-паць мэк кажно амэ́ндыр тэ сыкавэ́л паты́в пэ́скирэ ромня́кэ, сыр кокоро́ пэ́скэ; и мэк джувлы́ тэ дарэл пэ́скирэ ромэстыр.