Эфесянэнгэ 4 - Библия - Пэ Балтитко Романи чиб (Романэс) 2019

Кхэтаныпэ́н пир Маса́ машки́р Патяибнаскирэ́ндэ

¹ Мэ, саво́ сом пхандло ману́ш пал Растэ – Дэвлэ́стэ, манга́ва тумэн тэ дживэ́н чачунэ́ (мольнонэ́) джиибнаса, савэ́са Дэвэ́л кхардя́ тумэн,

² тэ явэ́н тумэ́ штыл (тиха) и кандыпны́тка и ковлэ́-илы́тка, тэ отлыджанпэ екх кэ екх длугонэ вырикирибнаса и патыва́са,

³ тэ причхувэ́н зор тэ зракхэн екхипэ́н, саво́ Ду́хо (Фа́но) дэ́ла пир рама́нё (миро), со кхэтанякирэла тумэн.

⁴ Исын екх маса́ и екх Ду́хо (Фа́но), сыр исын и екх наде́я, кэ сави́ Дэвэ́л кхардя́ тумэн;

⁵ исын екх Рай Дэвэ́л, екх патяибэ́н, екх болдыипэн.

⁶ Исын екх Дэвэ́л и Дад сарэ́нгэ, Саво́ исын вучэды́р сарэ́ндыр и пир сарэ́ндэ и дрэ амэ́ндэ сарэ́ндэ.

⁷ Сарэ́нгэ амэ́нгэ сыс дыно́ бахтякирибэ́н ада́кицы, ци бут Христо́со Кокоро́ выкэдыя́ тэ дэл кажнонэ́скэ амэ́ндыр,

⁸ палдава́ Свэ́нто Чхиныбэ́н ракирэ́ла: “Ёв ґаздыя́пэ пэ вучыпэн, отмэкця́ пленонэн и дыя́ бахтякирибэ́н манушэ́нгэ”,

⁹ нэ дова́, со Ёв “ґаздыя́пэ”, нау́што значынэ́ла на дова́, со Ёв англэды́р гия́ тэлэ́ дрэ люноскирэ (адоскирэ)-пхувья́кирэ паша́.

¹⁰ Палдава́ Ёв, Саво́ гия́ тэлэ́, исын Одова́-Паць, Кон и ґаздыя́пэ вучэды́р сарэ́ Болыбна́скирэ Раёстыр, соб (кай) тэ пхэрдякирэл саро́;

¹¹ и Ёв чхудя́ вари-конэ́с Апостолэнца, вари-конэ́с пророкэнца, вари-конэ́с тэ роспхэнэ́н манушэ́нгэ бахталы́ зан, вари-конэ́с Дэвлытконэ́-манушэ́нгирэ ракхибнарье́нца и вари-конэ́с сыклякирибнаскирэ́нца,

¹² соб (кай) тэ фэдырьякирэн Дэвлытконэ́ манушэ́н тэ роспхэнэ́н Дэвлэ́скиро лав тэ зоралякирэн Кхангири́, Сави́ исын Христосо́скирэ-духо́скирэ маса́;

¹³ пака амэ сарэ́ ява́са дро екхипэ́н кэ екх патяибэ́н и амэ уджинаса Дэвлэ́скирэ Чхавэ́с, и амэ ячаса барэ́ (стала) мурша и доджаса кэ най сталэдыр (сама стала) Христосо́скирэ бэрша́;

¹⁴ ваш дова́, соб (кай) амэ тэ на явас буты́р сыр бияторэ́ (тыкнорэ́), савэ́ кунинэнапэ и могинэ́на тэ змарэнпэ чачунэ́ дромэ́стыр манушытконэ́ мэндрипнаса и хохаибнаса;

¹⁵ а соб (кай) амэ́нгэ тэ рикирас чачипэ́н дрэ паты́в екх кэ екх, пир саро́ тэ барьёвас тэ зджас (тэ подджас) пэ Христосо́стэ, Саво́ исын Хула́й пэ саро́:

¹⁶ Лэ́стыр сарэ́ Духо́скирэ маса́ (Кхангири́) исын спхандлэ́ и кхэтанякирдэ́ машки́р пэ́стэ джидэ́ спхандыпнаса и пир дова́, со сарэ́ паша́ подрикирэна екх екхэ́с и кажно паш кэрэ́ла пэ́скири буты́, и сарэ́ маса́ барьёна и ячэ́напэ зоралэды́р пир паты́в кэ яви́р мануша́.

Нэво́ Джиибэ́н дрэ Христосо́стэ

¹⁷ Палдава́ мэ ракира́ва, и манга́ва анги́л Растэ – Дэвлэ́стэ, соб (кай) буты́р тумэ́ тэ на кэрэ́н, сыр кэрэ́на на́цыи пир пэ́скири кро́тко годы́,

¹⁸ лэ́нгири годы́ калыя, ёнэ хасякирдэ́ Дэвлэ́скиро джиибэ́н пир пэ́скиро биладжаипэ́н и холынакиро ило́,

¹⁹ лэ́нгири годы́ кашталыя, ёнэ лынэ́ тэ залэнпэ нашукаронэ́ рэндэ́нца адя́кэ, со кэрэ́на кажно магирипэ́н бокхалыпнаса.

²⁰ Нэ тумэ́ на адя́кэ высыклынэ Христосостыр,

²¹ а тумэ́ шундлэ́ пал Лэ́стэ и гинэ́ пал Лэ́стэ, пал-дова́ со чачипэ́н исын дрэ Исусо́стэ Христосо́стэ.

²² Мэкэ́н пэ́скиро пхурано́ джиибэ́н и на поддэнпэ грэхо́скэ, кэ саво́ злыджала грэхи́тко тырдыпэ́н;

²³ нэ лэн тэ думинэн нэвонэ́-манушэ́скирэ-годя́са дро Ду́хо (Фа́но);

²⁴ и пирипарудён дрэ нэвонэ́ манушэ́стэ, савэ́с Дэвэ́л создыя́ пир Пэ́скиро дро патяибэ́н и свэ́нто чачипэ́н.

²⁵ Палдава́ мэкэ́н хохаибэ́н, кажно тумэ́ндыр тэ ракирэ́л чачипэ́н пэ́скирэ пашатунэ́скэ, пал-дова́ со амэ сам екхэ́ масэ́нгирэ паша́ екх екхэ́скэ.

²⁶ Ко́ли тумэ́ холясона, на кэрэ́н грэ́хо: на явэ́н холынакирэ саро́ дывэ́с,

²⁷ и на дэн штэ́то бэнгэ́скэ дро тумаро́ джиибэ́н.

²⁸ Кон чордя, мэк буты́р тэ на чорэл, нэ мэк фэды́р тэ кэрэ́л буты́, кэри пэ́скирэ вастэ́нца лачхипэ́н, соб (кай) тэ явэ́л со́стыр тэ дэл одолэ́ манушэ́нгэ, савэ́ исын чорорэ́.

²⁹ На ракирэ́н нисавэ кирнэ лава́, а екх лачхэ́ лава́, ваш подрикирибэ́н дро патяибэ́н, соб (кай) дава́ тэ янэл бахтякирибэ́н одолэ́нгэ, кон шунэ́ла.

³⁰ И на кэрэ́н фуипэ́н Дэвлэ́скирэ Свэнтонэ́ Духо́скэ, Саво́ чхудя́ чэргэнори́ пэ тумэ́ндэ дро выкиныбнаскиро дывэ́с.

³¹ Мэк кажно киркипэн, холы́, чинга́рд, и го́дла и налачхэ́ лава́ тэ отджан тумэ́ндыр кхэтанэ́ сарэ́ тумарэ́ фуипнаса.

³² Явэ́н лачхэ́ екх кэ екх, тангипны́тка (жалосна), примангэн екх екхэ́скэ, сыр и Дэвэ́л пир Христосо́стэ примангдя тумэ́нгэ.