Эфесянэнгэ 3 - Библия - Пэ Балтитко Романи чиб (Романэс) 2019

Павли́скири Буты́ ваш Наюдэ́нгэ

¹ Ваш дава́ мэ, Па́вли, сом Исусо́скиро Христосо́скиро ману́ш дро штарибэ́н ваш тумэ́нгэ, Наюдэ́нгэ.

² Ко́ли тумэ́ шундлэ́ пал Дэвлэ́скирэ-бахтякирибнаскири буты́, сави́ сыс дыны́ ма́нгэ ваш тумэ́нгэ, сыр кхэритконэ́ барыдырэ́скэ,

³ пал-дова́ со ма́нгэ отчхакирдяпэ чораханыбэн, пал со мэ англэды́р чхиндём на́бут тумэ́нгэ,

⁴ тэды, ке́ли тумэ́ явэ́на тэ гинэн дава́, тумэ́ могинэ́нас тэ ґалён, со мэ джина́в Христосо́скирэ чораханыбэна,

⁵ савэ́ на сыс англэды́р джиндлэ́ ни екхэ́ манушытконэ́ родо́скэ адя́кэ, сыр ёнэ какана́ исын отчхакирдэ Лэ́скирэ Свэнтонэ́ Апостолэнгэ и пророкэнгэ пир Свэ́нто Ду́хо (Фа́но),

⁶ соб (кай) и Наюдэ́нгэ тэ явэ́н кхэтанэ́ Юдэнца дро Дэвлэ́скиро бахтякирибэ́н и, соб (кай) ёнэ тэ ячэн пашэ́нца екхэ масэ́ндыр, адя́кэ-паць и дыно́ лав отлыджалапэ лэ́нгэ, саво́ сыс дыно́ дро Исусо́стэ Христосо́стэ пир бахталы́ зан.

⁷ И мэ яцём дына́ри (служы́телё) ваш дая́ бахталы́ зан пир Дэвлэ́скиро бахтякирибэ́н, саво́ сыс дыно́ ма́нгэ Лэ́скирэ зорья́са.

⁸ Ма́нгэ, кон исын най тыкнэды́р сарэ́ дэвлытконэндыр, сыс дыно́ дава́ бахтякирибэ́н тэ роспхэнав Наюдэ́нгэ пал Христосо́скиро барвалыпэ́н, саво́ ние́кхвар на хасёла.

⁹ И тэ роспхэнав сарэ́нгэ, пал дава́ чорахано кэрибэн, саво́ сыс чхакирдо векэндыр дрэ Дэвлэ́стэ, Саво́ саро́ кэрдя́ пир Исусо́стэ Христосо́стэ.

¹⁰ Соб (кай) какана́ тэ явэ́л джиндлы пир Кхангири́ барыдырэ́нгэ и хула́нгэ дро Болыбна́скиро Раё бари Дэвлэ́скири годы́,

¹¹ адя́кэ, сыр Дэвэ́л задуминдя англэды́р свэто́скирэ создыибнастыр, саво́ Ёв создыя́ дрэ Исусо́стэ Христосо́стэ, амарэ́ Растэ-Дэвлэ́стэ,

¹² дро екхипэ́н Савэ́са амэ́ндэ исын муршыпэн и наде́я тэ явас пашылэды́р кэ Дэвэ́л пир патяибэ́н дрэ Лэ́стэ.

¹³ Палдава́ мэ манга́ва тумэн, тэ на пэрэ́н илэ́са пал мирэ́ пхарипэна пал тумэ́ндэ, савэ́ исын ваш тумари́ сла́ва.

Христосо́скири Ла́ска

¹⁴ Ваш дава́ мэ и сом тэрдо́ пэ чанга́ анги́л амарэ́ Ра́скирэ-Дэвлэ́скирэ, Исусо́скирэ Христосо́скирэ Дадэ́стэ,

¹⁵ Савэ́стыр кажно ро́до дро Болыбна́скиро Раё и пэ пхув дорэсэ́ла пэ́скиро лав,

¹⁶ мэк тэ дэл Дэвэ́л тумэ́нгэ пир Лэ́скирэ-славакиро барвалыпэ́н, тэ ячэн зоралэды́р Лэ́скирэ Духо́скирэ зорья́са дрэ андратунэ́ манушэ́стэ,

¹⁷ соб (кай) тэ дживэ́л Христо́со пир патяибэ́н дрэ тумарэ́ илэ, и соб (кай) тумэ́ тэ явэ́н зоралэ́ дрэ паты́в екх кэ екх,

¹⁸ и соб (кай) тумэ́ могиндлэ́ тэ уджинэ́н сарэ́ свэнтонэ́нца, со дасаво исын буґлыпэ́н и длэнгипэ́н, и хорипэ́н, и вучипэ́н,

¹⁹ и тэ ґалён, со исын барэды́р сарэ́стыр пэ свэ́то Христососкири ла́ска ваш дова́, соб (кай) Дэвэ́л тэ явэ́л сарэ́ пэ́скирэ пхэрдыпнаса дро тумаро́ джиибэ́н.

²⁰ Нэ Одолэ́скэ, Конэ́скири зор исын дрэ амэ́ндэ, и сави́ могинэ́ла тэ кэрэ́л бутэды́р долэ́стыр, пал со амэ мангаса, ци амэ думинаса,

²¹ тэ явэ́л Лэ́скэ сла́ва дрэ Кхангири́ и дрэ Исусо́стэ Христосо́стэ сарэ́ родэ́нгэ дрэ сарэ́ ве́ки. Ами́нь.