Эфесянэнгэ 2 - Библия - Пэ Балтитко Романи чиб (Романэс) 2019

Мэрибна́стыр кэ Джиибэ́н

¹ И тумэн, савэ́ са́нас мулэ́ пал тумарэ́ налачхэ́ рэ́нды и грэ́хи,

² дрэ савэ́ тумэ́ англэды́р адя́кэ дживдэ́, пир дава́ свэтоскиро ве́ко, пир кхенингоскиро упхэныбэ́н, саво́ сыс хула́й дро фа́но (воздухо), пир ду́хо (фа́но), саво́ хулаинэла сарэ́нца, кон на кандэ́ла Дэвлэ́с:

³ амэ адя́кэ-паць сарэ́ вари-ке́ли и са́мас кадасавэ́ и дживдям пир на́лачхо лочакиро (плотякиро) тырдыпэ́н и кэрдя́м дова́, со амэ́нгэ подпхэнэла на́лачхо камибэн и со явэ́ла пэ годы́, и амэ са́мас пир бияныпэ́н сы́рбы чхавэ́, пэ конэ́стэ пэрэ́ла Дэвлэ́скири холы́, сыр и яви́р мануша́:

⁴ нэ Дэвэ́л, Саво́ исын барвало́ тангипнаса, и Саво́ пир бари Пэ́скири ла́ска, савья́са Ёв притырдыя амэн,

⁵ амэн, савэ́ сыс мулэ́ пал амарэ́ налачхэ́ рэ́нды, Ёв отджидякирдя́ дро екхипэ́н Христосо́са, пир бахтякирибэ́н, савэ́са тумэ́ сан зракхнэ́,

⁶ и Ёв отджидякирдя́ амэн пир амаро́ екхипэ́н Христосо́са и дыя́ амэ́нгэ штэ́то дро Болыбна́скиро Раё Исусо́са Христосо́са,

⁷ соб (кай) тэ сыкавэ́л дрэ ве́ки, савэ́ анги́л явэ́на, най барэды́р барвалыпэ́н Пэ́скирэ бахтякирибнастыр пир тангипэ́н кэ амэ дрэ Христосо́стэ Исусо́стэ.

⁸ Палдава́ со тумэ́ сан зракхнэ́ бахталыпнаса пир патяибэ́н, и дава́ исын на долэ́стыр, со тумэ́ причхувэна зор, дава́ тумэ́нгэ исын дыно́ Дэвлэ́стыр;

⁹ зракхибэ́н дэ́ла Дэвэ́л на пал рэ́нды (де́лы), пал-дова́, соб (кай) нико́н тэ на могинэл тэ шарэлпэ.

¹⁰ Пал-дова́ со амэ сам кадасавэ́, савэ́нца Дэвэ́л создыя́ амэн дро амаро́ екхипэ́н Исусо́са Христосо́са ваш дова́, соб (кай) амэ тэ кэра́с лачхэ́ рэ́нды, савэ́ Дэвэ́л ґарэдыр выкэдыя́ ваш амэ́нгэ.

¹¹ Палдава́ рипирэ́н, со тумэ́ пир бияныпэ́н сан На́юды, савэ́н кхардэ́ наобчхиндлэнца одолэ́, савэ́ исын обчхиндлэ́ манушытконэ́ обчхиныбнаса, саво́ кэрэ́лапэ вастэ́нца;

¹² тумэ́ и са́нас дро дова́ часо би Христосо́скиро, тумэ́ на са́нас кхэтанэ́ Израилёскирэ манушэ́нца, тумэ́ндэ на сыс паш дро Завето, тумэ́ндэ на сыс лачхо́ ужакирибэ́н, тумэ́ са́нас би Дэвлэ́скиро дро свэ́то:

¹³ нэ какана́ тумэ́ сан дро екхипэ́н Христосо́са Исусо́са, тумэ́, савэ́ ґарэдыр са́нас дур, ячнэ́ пашы́л, пир Христосо́скиро Рат, саво́ сыс прочхудо пал тумэ́ндэ.

¹⁴ Пал-дова́ со Ёв исын амаро́ рама́нё (миро), Саво́ кэрдя́ дуендыр екх и роскэдыя ва́нта, сави́ сыс тэрды машкира́л амэ́ндэ.

¹⁵ И Ёв Пэ́скирэ мэрибнаса пэ трушу́л парудя Законо́скирэ упхэныбэна́ сыклякирибнаса ваш дова́, соб (кай) дуендыр тэ кэрэ́л дрэ Кокорэ́ Пэ́стэ екхэ нэвонэ́ манушэ́с, и далэ́са тэ янэл манушэ́нгэ рама́нё (миро),

¹⁶ соб (кай) дуе́н (Юдэ́н и Наюдэн) дро екх маса́ тэ примиринэл Дэвлэ́са пир трушу́л, хасякири кажно вэргима пэ Лэ́стэ,

¹⁷ и ке́ли Христо́со явдя́, Ёв роспхэндя́ бахталы́ зан (звесь) пал рама́нё (миро) сарэ́нгэ тумэ́нгэ, на дыкхи́ пэ дова́, кон сыс Лэ́стыр дур ци пашы́л,

¹⁸ пал-дова́ со пир Лэ́стэ амэ Юды и На́юды сам домэкнэ дро екх Ду́хо (Фа́но) кэ Дад.

¹⁹ Палдава́ тумэ́ на сан буты́р чу́жа, и тумэ́ на сан мануша́, савэ́ на ґара́ явнэ́, нэ тумэ́ сан пал екх Свэнтонэ́ манушэ́нца, и тумэ́ сан екх Дэвлэ́скири сэ́м΄я(ири́),

²⁰ савэ́н чхудэ́ пэ Апостолэнгиро и пророкэнгиро сыклякирибэ́н, и савэ́ндэ Кокоро́ Ису́со Христо́со исын вэнглытко бар ваш дава́ фунда́менто,

²¹ Саво́ сы́рбы рикирла саро́ кхэр кхэтанэ́, барьёла дрэ свэ́нто кхангири́ Ра́скирэ-Дэвлэ́скири,

²² дро екхипэ́н Лэ́са и тумэ́ явэ́на кхэтанэ́ явирэнца тэ дживэ́н дро Дэвлэ́скиро Кхэр пир Свэ́нто Ду́хо (Фа́но).