Džiibén 9 - Библия - Пэ Балтитко Романи чиб (Романэс) 2019

¹ И Дэвэ́л бахтякирдя́ Ноёс и лэ́скирэ чхавэ́н, и пхэндя́ лэ́нгэ: “Тэ бияндён чхаворэ́ тумэ́ндэ и тэ явэ́н тумэн буты́р, и тэ пхэрдякирэн тумэ́ пхув.

² Мэк тэ дарэ́н и тэ трашадён тумэ́ндыр сарэ́ пхувитка рискирибна́скирэ мурдала́ (зве́ри), и сарэ́ болыбна́скирэ чирикля́, саро́, со псирэ́ла пир пхув, и сарэ́ морёскирэ (дэрьявэ́скирэ) мачхэ́; отдынэ́ ёнэ дрэ тумарэ́ васта́.

³ Саро́, со псирэ́ла и дживэ́ла, явэ́ла тумэ́нгэ дро хабэ́н; сыр чар Мэ да́ва саро́ тумэ́нгэ.

⁴ На хан джиды лоч (плоть), ратэ́са на хан.

⁵ Мэ, ґалён, пхучавапэ пал и тумаро́ рат, дро саво́ исын тумаро́ джиибэ́н, Мэ пхучавапэ кажнонэ́ рискирибна́скирэ мурдалэстыр (зверёстыр), адя́кэ-паць Мэ пхучавапэ манушэ́скиро ди манушэ́скирэ вастэ́стыр, лэ́скирэ-пшалэ́скирэ вастэ́стыр.

⁶ Кон прочхувэла манушэ́скиро рат, кодолэскиро рат прочхувэлапэ явирэ манушэ́скирэ вастэ́са: пал-дова́ со ману́ш сыс создыно́ пир Дэвлэ́скири патри́н (о́бразо).

⁷ И тэ бияндён чхаворэ́ тумэ́ндэ и тэ ячэн тумэн буты́р, и тэ розджанпэ тумэ́ пир пхув, и тэ явэ́н тумэн буты́р пэ ла́тэ.”

⁸ И пхэндя́ Дэвэ́л Ноёскэ и лэ́скирэ чхавэ́нгэ лэ́са:

⁹ “А́кэ, Мэ чхува́ва Миро заве́то тумэ́нца и тумарэ́ родоса коригэды́р (позжэды́р) тумэ́ндыр.

¹⁰ И кажнонэ́ джидэ́ де́са, саво́ исын тумэ́нца, чирикленца и кхэритконэ́ мурдалэса (скотоса), и сарэ́ рискирибна́скирэ мурдалэ́нца (зверенца) пэ пхув, савэ́ исын тумэ́ндэ, сарэ́нца, кон выгия́ ковчэгостыр, кажнонэ́ мурдалэса (жывотнонэса), саво́ исын пэ пхув.

¹¹ Мэ чхува́ва Миро завето тумэ́нца, со буты́р на явэ́ла хасякирдо кажно лоч панитконэ зачхуибнаса (потопоса), и на явэ́ла буты́р панитко зачхуибэн пэ хасибэ́н пхувьякэ.”

¹² И пхэндя́ Дэвэ́л: “Ѓа́да, исын шпэ́ра (знако) пал завето, саво́ Мэ чхува́ва машки́р Ма́ндэ и машки́р тумэ́ндэ, и машки́р кажно джидо́ ди, саво́ тэ явэ́л тумэ́нца, дро тумаро́ ро́до пэ саро́ ве́ко.

¹³ Мэ сыкава́ва Мири́ банги (радуга) дрэ о́блоки, соб (кай) ёй тэ явэ́л шпэраса пал завето машки́р Ма́ндэ и машки́р пхув.

¹⁴ И явэ́ла, ке́ли Мэ яна́ва о́блоко пэ пхув, тэды пэ о́блоко явэ́ла банги;

¹⁵ и Мэ ла́ва тэ рипирав Миро заве́то, саво́ исын машки́р Ма́ндэ и машки́р тумэ́ндэ, и машки́р кажнонэ́ джидэ́ де́са дрэ кажно лоч (плоть), пани́ буты́р на явэ́ла сыр потопо тэ хасякирэ́л кажно лоч.

¹⁶ И явэ́ла банги (радуга) пэ о́блоко, и Мэ дыкха́ва ла, и рипирава заве́то пэ саро́ ве́ко машки́р Дэвлэ́стэ и машки́р кажно джидо́ ди дрэ кажно лоч, сави́ исын пэ пхув.”

¹⁷ И пхэндя́ Дэвэ́л Ноёскэ: “Ѓа́да, исын ґерты́к (знаме́ниё) пал заве́то, саво́ Мэ чхудём машки́р Ма́ндэ и машки́р кажно лоч, сави́ исын пэ пхув.”

Ноё и Лэ́скирэ Чхавэ́

¹⁸ Ноёскирэ чхавэ́, савэ́ выгинэ́ ковчэгостыр сыс: Симо, Хамо и Иафе́то. Хамо сыс Ханааноскиро дад.

¹⁹ Кадалэ́ трин сыс Ноёскирэ чхавэ́, и лэ́ндыр ячнэ́ мануша́ тэ розджанпэ пир сари́ пхув.

²⁰ Ноё яця́ тэ ганавэл пхув, и почхудя винаградо (дракх).

²¹ И выпия ёв мол (вино), и матия, и сыс нанго пашто́ дрэ пэ́скири ша́тра.

²² И дыкхця́ Хамо, Ханааноскиро дад, пэ́скирэ-дадэ́скиро нангипэ́н, и ке́ли выгия́, роспхэндя́ дуенгэ пэ́скирэ пшалэ́нгэ.

²³ Симо и Иафе́то лынэ́ и́ди, и чхудэ́ ла пэ пэ́скирэ псикэ́, гинэ́ палалэса, и лэ́нгирэ-дадэ́скиро нангипэ́н чхакирдэ; лэ́нгирэ муя́ сыс пирискирдэ палэ, и ёнэ лэ́нгирэ-дадэ́скиро нангипэ́н на дыкхнэ́.

²⁴ И просутяпэ Ноё пэ́скирэ моля́тыр (виностыр), и уджиндя́, со кэрдя́ пэ лэ́стэ лэ́скиро тыкнэды́р чхаво́;

²⁵ И пхэндя́ ёв: “Тэ явэ́л прокошно́ Ханаано, писхарье́нгиро-дына́ри ёв явэ́ла пэ́скирэ пшалэ́нгэ.”

²⁶ И пхэндя́ ёв: “Тэ явэ́л бахтякирдо́ Рай Дэвэ́л, Дэвэ́л Симоскиро, Ханаано тэ явэ́л писхариса лэ́скэ.

²⁷ Мэк тэ барьякирэл Дэвэ́л Иафетос; и мэк ёв тэ лэл тэ дживэ́л пэ Симоноскирэ ша́тры; Ханаано явэ́ла лэ́скэ писхариса.”

²⁸ И Ноё дживдя́ пало́ пане́скиро зачхуибэн (потопо) трин шэла́ пандждэша́ бэрш.

²⁹ И саро́ пэ саро́ ада́кицы дывэса́ сыс Ноёскирэ: еняшэла пандждэша́ бэрш; и ёв мыя́.