Džiibén 5 - Библия - Пэ Балтитко Романи чиб (Романэс) 2019

Адамоскири Сэм΄я (Ири)

¹ Ѓа́да, исын пхэныбэ́н пал Адамоскиро ро́до: ке́ли Дэвэ́л создыя́ манушэ́с, Ёв создэлас лэс адя́кэ, соб (кай) ману́ш тэ зджал (тэ поджал) пэ Лэ́стэ.

² Муршэс и джувля́ создыя́, и бахтякирдя́ лэн дро дывэ́с, ке́ли создыя́ лэн и дыя́ лэ́нгэ лав ману́ш (Адамо).

³ Адамо дживдя́ шэл тэ трия́нда бэрш, и лэ́стыр бия́ндыя чхаво́, саво́ зджалас пэ лэ́стэ, и саво́ сыс пир лэ́скири патри́н (о́бразо) и дыя́ лэ́скэ лав: Сифо.

⁴ Ке́ли Адамостыр бия́ндыя чхаво́ Сифо, лэ́скэ сыс охтошэла (бидуешэлэнгиро бар) бэрш, и бия́ндынэ лэ́стыр чхавэ́ и чхая́.

⁵ Адамо дживдя́ еняшэла (бишэлэнгиро бар) трия́нда бэрш; и мыя́.

⁶ Ке́ли Сифоскэ сыс шэл тэ пандж бэрш, лэ́стыр бия́ндыя Еносо.

⁷ Ке́ли латхяпэ Еносо, Сифо дживдя́ охтошэла эфта́ (тринэнгиро дэш) бэрш и бия́ндынэ лэ́стыр чхавэ́ и чхая́.

⁸ Сифо дживдя́ еняшэла дэшуду́й бэрш; и ёв мыя́.

⁹ Ке́ли Енососкэ сыс енядэша бэрш, лэ́стыр бия́ндыя Каинано.

¹⁰ Ке́ли бия́ндыя Каинано, Еносо дживдя́ охтошэла дэшупандж бэрш, и бия́ндынэ лэ́стыр чхавэ́ и чхая́.

¹¹ Еносо дживдя́ еняшэла пандж бэрш; и ёв мыя́.

¹² Ке́ли Каинаноскэ сыс эфтадэша́ бэрш, лэ́стыр бия́ндыя Малэлэило (Махалаэлё).

¹³ Ке́ли латхяпэ Малелэило, Каинано дживдя́ охтошэла штардэша́ бэрш, и бия́ндынэ лэ́стыр чхая́ и чхавэ́.

¹⁴ Каинано дживдя́ еняшэла дэш бэрш; и ёв мыя́.

¹⁵ Ке́ли Малелэилоскэ сыс шовдэшапандж бэрш, лэ́стыр бия́ндыя Иаре́до (Яредо).

¹⁶ Пало́ (после) Иаредоскиро бияныпэ́н, Малелэило дживдя́ охтошэла трия́нда бэрш, и бия́ндынэ лэ́стэ чхая́ и чхавэ́.

¹⁷ Малелэило дживдя́ охтошэла енядэша пандж бэрш; и ёв мыя́.

¹⁸ Ке́ли Яредоскэ сыс шэл шовдэша́ дуй бэрш, лэ́стыр бия́ндыя Енохо.

¹⁹ Пало́ Енохоскиро бияныпэ́н, Яре́до дживдя́ охтошэла бэрш, и лэ́стыр бия́ндынэ чхавэ́ и чхая́.

²⁰ Яре́до дживдя́ еняшэла шовдэша́ дуй бэрш; и ёв мыя́.

²¹ Ке́ли Енохоскэ сыс шовдэша́ пандж бэрш, лэ́стыр бия́ндыя Мафусало.

²² Пало́ Мафусалоскиро бияныпэ́н Енохо дживдя́ анги́л Дэвлэ́стэ триншэла́ бэрш, и бия́ндынэ лэ́стыр чхавэ́ и чхая́.

²³ Енохо дживдя́ триншэла́ шовдэша́ пандж бэрш.

²⁴ И псирдя́ Енохо анги́л Дэвлэ́стэ; и на яця́ лэс, пал-дова́ со Дэвэ́л лыя́ лэс.

²⁵ Ке́ли Мафусалоскэ сыс шэл эфтадэша́ охто́ бэрш, лэ́стыр бия́ндыя Ламехо.

²⁶ Пало́ Ламехоскиро бияныпэ́н, Мафусало дживдя́ ишчо (инкэ́) эфта́ шэла́ охтодэша́ дуй бэрш, и лэ́стыр латхнэпэ чхавэ́ и чхая́.

²⁷ Мафусало дживдя́ еняшэла шовдэша́ еня́ бэрш; и ёв мыя́.

²⁸ Ке́ли Ламехоскэ сыс шэл охтодэша́ дуй бэрш, лэ́стыр бия́ндыя чхаво́.

²⁹ И кхардя́ лэс Ноё, и пхэндя́: “Ёв обрадынэла амэн дрэ буты́, амари́ и дрэ пхари́ амарэ́-вастэнгири буты́ сыр ява́са тэ обкэрас пхув, сави́ прокостя Дэвэ́л.”

³⁰ И сыс Ламехоскэ, ке́ли лэ́стыр бия́ндыя Ноё, панджшэла́ енядэша пандж бэрш, и бия́ндынэ лэ́стыр чхавэ́ и чхая́.

³¹ Ламе́хо дживдя́ эфта́ шэла́ эфтадэша́ эфта́ бэрш, и ёв мыя́.

³² Ке́ли Ноёскэ сыс панджшэла́ бэрш, лэ́стыр бия́ндынэ: Симо, Хамо и Иафето.