Džiibén 46 - Библия - Пэ Балтитко Романи чиб (Романэс) 2019

Яково́скиро Традыпэн Кэ Еги́пто

¹ И гия́ Израилё (Яково) сарэ́са, со лэ́стэ сыс, и явдя́ дрэ Вирса́вия, и яндя́ свэ́нто дыибэ́н (жэ́ртва) Дэвлэ́скэ пэ́скирэ дадэ́скирэ Исаакоскирэскэ.

² И пхэндя́ Дэвэ́л Израилёскэ раты́ дро суно́: “Я́кове! Якове!” Ёв пхэндя́: “Ѓа́да, мэ сом.”

³ О Дэвэ́л пхэндя́: “Мэ, сом Дэвэ́л, тырэ́ дадэ́скиро Дэвэ́л; на дар, джа́ дро Еги́пто, пал-дова́ со Мэ созда́ва ту́тыр бари манушы́тко нацыя,

⁴ Мэ джа́ва ту́са дро Еги́пто, Мэ и лыджа́ва тут палэ. О Ёза пэ́скирэ вастэ́са учхакирэ́ла тырэ́ якха́.”

⁵ Яково гия́ Вирсавиятыр; и лыджинэ́ Израилёскирэ чхавэ́ Яково́с, пэ́скирэ дадэ́с, и пэ́скирэ биятэ́н, и пэ́скирэ ромне́н пэ марибны́тка вурдэна́, савэ́ бичхадя́ фарао́но, соб (кай) тэ янэ́н лэс.

⁶ Ёнэ лынэ́ пэ́скирэ кхэритконэ́ мурдалэ́н (ското) и пэ́скиро миштыпэ́н, саво́ сыс лэ́ндэ пэ Ханаано́скири пхув, и явнэ́ дро Еги́пто, – Яково и саро́ лэ́скиро ро́до лэ́са.

⁷ Пэскирэн чхавэ́н и ўнукэн пэ́са, пэскирэн чхае́н и ўнучкэн, и саро́ пэ́скиро ро́до яндя́ ёв пэ́са дро Еги́пто.

⁸ Ѓа́да, сыс Израилёскирэ-чхавэ́нгирэ лава́, савэ́ явнэ́ дро Еги́пто: Яково и лэ́скирэ чхавэ́. Яково́скиро англатуно́ чхаво́ сыс Рувимо.

⁹ Рувимо́скирэ чхавэ́ сыс: Ханохо и Фалу, Хецроно и Харми.

¹⁰ Симеоноскирэ чхавэ́ сыс: Иемуило и Иамино (Ямино), и Огадо, Иахино, и Цохаро, и Са́уло, Хананеянкакиро чхаво́.

¹¹ Левиёскирэ чхавэ́ сыс: Гирсоно, Каафо и Мерари.

¹² Юда́скирэ чхавэ́ сыс: Иро и Онано, и Шэла́, и Фаре́со, и Заро; нэ Иро и Онано мынэ́ пэ Ханаано́скири пхув. Фаресоскирэ чхавэ́ сыс: Есромо и Хамуло.

¹³ Исахароскирэ чхавэ́ сыс: Фола и Фува, Ио́во и Шымроно.

¹⁴ Завулоноскирэ чхавэ́ сыс: Середо и Елоно, Иахлеило (Яхлеило).

¹⁵ Адалэ́ сыс Лиякирэ чхавэ́, савэ́н ёй бияндя́ Яково́скэ дрэ Месопотамия, и лэ́скирэ чхаса Динаса. Сарэ́н лэ́скирэ чхавэ́н и чхае́н сыс трия́нда трин мануша́.

¹⁶ Гадо́скирэ чхавэ́ сыс: Цыфионо и Хаги, Шуни и Эцбоно, Ери, Ароди и Арели.

¹⁷ Асироскирэ чхавэ́ сыс: Имна, Ишва, Ишви, Бриа, и Серах, лэ́нгири пхэн. Брияскирэ чхавэ́: Хеверо и Малхиило.

¹⁸ Дава́ сыс Зельфакирэ чхавэ́, савья́ Лава́но дыя́ Лиякэ, пэ́скирэ чхакэ; ёй бияндя́ лэн Яково́скэ дэшушов дия́.

¹⁹ Рахилякирэ чхавэ́, Яково́скирэ ромнякирэ сыс: Ёза (Иосифо) и Вениамино.

²⁰ И бия́ндынэ Ёзастэ пэ Египто́скири пхув Мана́сия и Ефре́мо, савэ́н бияндя́ лэ́скэ Асенефа́, Потифароскири чхай, Илиопольсконэ-жрецоскири.

²¹ Вениамино́скирэ чхавэ́ сыс: Бэ́ла и Бехе́ро, и Ашбе́ло; Гера́ и Наама́но, Эхии́ и Ро́шо, Мупи́мо и Хупи́мо, и А́рдо.

²² Адалэ́ сыс Рахилякирэ чхавэ́, савэ́ бия́ндынэ Яковостыр, саро́ пэ саро́ дэшуштар дия́.

²³ Даноскиро чхаво́ сыс: Хушымо.

²⁴ Нефалимоскирэ чхавэ́ сыс: Иахцэило (Яхцэило) и Гуни, и Иецэро, и Шыле́мо.

²⁵ Адалэ́ сыс Валакирэ чхавэ́: савья́ дыя́ Лава́но пэ́скирэ чхакэ Рахилякэ; ёй бияндя́ лэн Яково́скэ сарэ́н эфта́ манушэ́н.

²⁶ Сарэ́н манушэ́н, савэ́ явнэ́ Яковоса дро Еги́пто, савэ́ выгинэ́ лэ́скирэ трушулэндыр (чреслэндыр), апри́ч чхавэ́ндэ Яково́скирэ ромне́ндыр, сыс сарэ́н шовдэша́ шов дия́.

²⁷ Ёза́скирэ чхавэ́, савэ́ бия́ндынэ лэ́стыр дро Еги́пто, сыс дуй дия́. Сарэ́н Яково́скирэ кхэрэ́скирэ манушэ́н, савэ́ явнэ́ дрэ Еги́пто, сыс эфтадэша́.

О Яково Лыя́ тэ Дживэ́л кэ Гесемо

²⁸ О Яково бичхадя́ Юдас анги́л пэ́стэ кэ Ёза, соб (кай) ёв тэ сыкавэ́л дром дро Гесе́мо. И явнэ́ ёнэ пэ Гесемоскири пхув.

²⁹ О Ёза дыя́ андрэ́ пэ́скиро марибны́тко вурдэ́н, и традыя́ муял (пэ стреч) Израилёскэ, пэ́скирэ дадэ́скэ, дро Гесе́мо, и, дыкхця́ лэс, пыя́ лэ́скэ пэ мэн, и ґара́ (длу́гэс) рондя́ лэ́стэ пэ мэн.

³⁰ И пхэндя́ Израилё Ёза́скэ: “Мэрава мэ акана́, дыкхи́ тыро́ муй, пал-дова́ со ту сан джидо́.”

³¹ И пхэндя́ Ёза пэ́скирэ пшалэ́нгэ и пэ́скирэ-дадэ́скирэ кхэрэ́скэ: “Мэ джа́ва, и пхэна́ва фараоно́скэ: ‘Мирэ́-дад пша́ла и мирэ́-дадэ́скиро кхэр, савэ́ сыс пэ Ханаано́скири пхув, явнэ́ кэ мэ’.

³² Адалэ́ мануша́ исын бакрэ́нгирэ чхупна́рья, пал-дова́ со ёнэ залэнапэ кхэритконэ́ мурдалэ́нца; тыкно́ и баро́ пэ́скиро ското, и саро́, со лэ́ндэ сыс, яндлэ́ ёнэ.”

³³ Ко́ли фарао́но кхарэ́ла тумэн и пхэнэ́ла: ‘Саво́ тумаро́ залыибэн (заёмка)?’

³⁴ то тумэ́ пхэнэ́н: ‘Амэ, тырэ́ писха́рья сам тэрнэ́ бэршэ́ндыр и кэ (жы́ко) дава́ часо, дыкхасас амэ пал кхэритконэ́ мурдалэ́ндэ, и амэ, и амарэ́ дада́, соб (кай) тумэ́ тэ мэкэ́н тэ дживэ́н пэ Гесемоскири пхув.” Пал-дова́ со ваш Египтянэнгэ исын магирипэ́н кажно ману́ш, саво́ сыс чхупна́ри (пастухо) бакрэнгиро.