Džiibén 37 - Библия - Пэ Балтитко Романи чиб (Романэс) 2019

Ёза́скэ Джа́ла Суно́ Пал Лэ́скиро Барипэ́н

¹ Яково дживдя́ пэ Ханаано́скири пхув пэ́скирэ дадэ́скири, кай ёв сыс чу́жо ману́ш.

² Ѓа́да, исын Яково́скиро джиибэ́н. Ёза́скэ (Иосифоскэ) сыс дэшуэфта бэрш, ёв ракхця́ гурты кхэритконэ́ мурдалэ́нца кхэтанэ́ пшалэ́нца, пэ́скирэ дадэ́скирэ ромне́нгирэ, Валакирэ и Зельфакирэ чхавэ́нца. И роспхэнэлас Ёза (Иосифо) налачхи мавлы́н (малва) пал лэ́ндэ лэ́скирэ дадэ́скэ.

³ Израилёскэ Ёза сыс пир ило́ буты́р сарэ́ндыр пэ́скирэ чхавэ́ндыр, пал-дова́ со ёв сыс лэ́скирэ пхурипнаскиро чхаво́, – и ёв кэрдя́ лэ́скэ цвятытко урибэ́н.

⁴ И дыкхнэ́ лэ́скирэ пша́ла, со лэ́нгиро дад ґаздэ́ла лэс буты́р лэ́скирэ сарэ́ндыр пшалэ́ндыр; и лынэ́ тэ на дыкхэ́н пэ лэ́стэ ласкаса, и на могиндлэ́ тэ ракирэ́н лэ́са илыткэс.

⁵ И дыкхця́ (дыя́) Ёза сунэ́, и роспхэндя́ лэс пэ́скирэ пшалэ́нгэ; и ёнэ буты́р лынэ́ лэс тэ на вырикирэн.

⁶ Ёв пхэндя́ лэ́нгэ: “Шунэ́н суно́, саво́ мэ дыкхцём:

⁷ Ѓа́да, амэ машкира́л фэ́лда пхандаса ґарбы (снопы); и ґа́да, миро ґарбо уштыя́, и тэрдия́ маму́й (ровнэс); и ґа́да, тумарэ́ ґарбы тэрдинэ́ пашы́л, и клониндлэпэ мирэ́скэ ґарбоскэ.”

⁸ И пхэндлэ́ лэ́скирэ пша́ла лэ́скэ: “Нау́што ту явэ́са ту хулаинэс амэ́нца? Ци нау́што ту, чачэс, явэ́са тэ раинэс пэ амэ́ндэ?” И бутэды́р лынэ́ тэ на вырикирэн лэс пал лэ́скирэ сунэ́ и лава́.

⁹ И дыкхця́ ёв яви́р сунэ́, и роспхэндя́ лэс пэ́скирэ пшалэ́нгэ, ракири́: “Ѓа́да, мэ дыкхцём ишчо (инкэ́) суно́: ґа́да, кхам, и чхон, и дэшуе́кх чэргэня́ клонинэнапэ ма́нгэ.”

¹⁰ И ёв роспхэндя́ пэ́скирэ дадэ́скэ и пшалэ́нгэ; и косця лэс лэ́скиро дад, и пхэндя́ лэ́скэ: “Со да за сунэ́, савэ́ ту дыкхця́н? Нау́што мэ, и тыри́ дай, и тырэ́ пша́ла ява́са тэ кэра́с шэрэ́са ту́кэ кэ пхув?”

¹¹ Пшалэ лэ́скирэ дэ́нас якхало лэ́скэ, а лэ́скиро дад зарипирдя дава́ лав.

Пша́ла Бикнэна Ёзас

¹² Лэ́скирэ пша́ла гинэ́ тэ ракхэ́н ґурты кхэритконэ́ мурдалэ́нца, пэ́скирэ дадэ́скирэ дро Сихемо.

¹³ И пхэндя́ Израилё Ёза́скэ: “Ци на чаравэна пша́ла тырэ́ дро Сихемо? Джа́, мэ бичхава́ва тут кэ ёнэ.” Ёв отпхэндя́ лэ́скэ: “Ѓа́да, мэ сом.”

¹⁴ И пхэндя́ лэ́скэ: “Джа́, подыкх, ци састэ исын тырэ́ пша́ла, и ци сарэ́ кхэри́тка мурдала́ (ското) исын, и ян отпхэныбэ́н ма́нгэ.” И бичхадя́ лэс Хевроноскирэ долостыр; и ёв явдя́ дро Сихемо.

¹⁵ И латхя́ лэс вари-саво́ ману́ш, псири пэ фэ́лда, и пхуця́ лэ́стыр одова́ ману́ш, ракири́: “Со ту родэса?”

¹⁶ Ёв пхэндя́: “Мэ родава мирэ́ пшалэ́н; пхэн ма́нгэ, кай ёнэ чаравэна пэ́скирэ ґурты?

¹⁷ И одова́ ману́ш пхэндя́: “Ёнэ гинэ́ адатхы́р, пал-дова́ со мэ шундём, сыр ёнэ ракирдэ́: ‘Явэ́н дро Дофано.’ И гия́ Ёза пал пэ́скирэ пшалэ́ндэ, и латхя́ лэн дро Дофано.

¹⁸ И дыкхнэ́ лэс ёнэ дура́л, англэды́р сыр ёв подги́я кэ ёнэ, и лынэ́ тэ думинэн фуипэ́н пэ лэ́стэ, соб (кай) тэ замарэ́н лэс.

¹⁹ И пхэндлэ́ екх екхэ́скэ: “Ѓа́да, джа́ла одова́, саво́ дыкхэ́ла сунэ́!

²⁰ Явэ́н, акана́, и замараса лэс, и чхурдаса лэс дрэ вари-сави́ ґанби́н (рово/хохо́й), и пхэна́са, со рискирибна́скиро мурда́л (зверё) хая лэс; и дыкхаса, со явэ́ла лэ́скирэ сунэндыр.”

²¹ И шундя́ дава́ Рувимо, и зракхця́ лэс лэ́нгирэ вастэ́ндыр, пхэни́: “На мулякираса лэс.”

²² И пхэндя́ лэ́нгэ Рувимо: “На прочхувэн рат, а чхурдэ́н лэс дрэ ґанби́н (рово/хохо́й), сави́ исын пэ чхучи́ пхув, а васта́ на чхувэ́н пэ лэ́стэ.” Дава́ ракирдя́ ёв, соб (кай) тэ зракхэ́л лэс лэ́нгирэ вастэ́ндыр и тэ рискирэ́л лэс кэ лэ́скиро дад.

²³ Ке́ли Ёза явдя́ кэ пэ́скирэ пша́ла, ёнэ тырдынэ криг Ёзастыр лэ́скиро урибэ́н, цвятытко псикитко (накидка), сави́ сыс пэ лэ́стэ,

²⁴ и лынэ́ лэс и чхурдынэ́ дрэ ґанби́н; дая́ ґанби́н сыс чхучи́, пани́ дрэ ла́тэ на сыс.

²⁵ И ёнэ бэшнэ́ тэ хан маро́, и, дыкхнэ́, ґа́да, джа́лас Галаадостыр каравано Измаильтянэнгиро, лэ́нгирэ верблюды лыджа́нас стиракса (ароматы), бальзамо и ладано: джа́нас ёнэ тэ лыджа́н дава́ дро Еги́пто.

²⁶ Юда пхэндя́ пэ́скирэ пшалэ́нгэ: “Саво́ лачхипэ́н явэ́ла, ко́ли амэ замараса амарэ́ пшалэ́с и гараваса лэ́скиро рат?

²⁷ Явэ́н, бикнаса лэс Измаильтянэнгэ, а амарэ́ васта́ мэк тэ на явэ́н пэ лэ́стэ; пал-дова́ со ёв исын амаро́ пшал, лоч (плоть) амари́.” Пша́ла лэс кандынэ́.

²⁸ Тэ́ньци, ке́ли джа́нас Мадиамоскирэ ку́пцы (тылга́рья), ёнэ тырдынэ Ёзас яври́ ґанбинятыр, ґаздынэ́ лэс и бикиндлэ Ёзас Измаильтянэнгэ пал биш рупувэ́; а ёнэ лыджинэ́ Ёзас дро Еги́пто.

²⁹ Рувимо нэвэ́стыр явдя́ кэ ґанби́н; и ґа́да, нанэ Ёзас дрэ ґанби́н. И роскостя ёв пэ́скирэ и́ди,

³⁰ и рисия́ кэ пэ́скирэ пша́ла, и пхэндя́: “Тэрнэ́-бэршэнгирэс нанэ, а мэ карик кэравапэ?”

³¹ И лынэ́ Ёзаскири и́дя, и замардэ́ бузнэ́с (козлос), и макхнэ и́дя ратэ́са;

³² и почхудэ и цвятытко псикитко, и яндлэ́ кэ пэ́скиро дад, и пхэндлэ́: “Амэ латхям дава́; подыкх, ци тырэскирэ-чхавэскири дая́ и́дя, ци над.”

³³ Ёв ґалыя́ ла, и пхэндя́: “Дая́ исын и́дя мирэ́ чхавэскири, яну́ро (хишчно зве́рё) хая лэс; чачо́, Ёза сыс рискирдо пэ котэра́.”

³⁴ И роскостя Яково пэ́скирэ и́ди, и чхудя́ балытко гоно́ праскаса пэ пэ́скирэ пашварэ, и обровэлас ёв бут дывэса́ пэ́скирэ чхавэ́с.

³⁵ И скэдынэ́пэ сарэ́ лэ́скирэ чхавэ́ и чхая́, соб (кай) тэ штылякирэн лэс; нэ ёв на камдя́, соб (кай) тэ подрикирэн лэс, и пхэндя́: “Обровибнаса джа́ва мэ кэ миро чхаво́ дро лю́но (пэ дова́ свэ́то).” Адя́кэ ровэлас лэ́скиро дад пал лэ́стэ.

³⁶ Мадианитяни бикиндлэ лэс дро Еги́пто Потифароскэ, фараоно́скирэ барыдырэ́скэ, саво́ сыс рай пэ стрэгарье́ндэ (стражникэндэ).