Дание́лё 11 - Библия - Пэ Балтитко Романи чиб (Романэс) 2019

¹ Адя́кэ мэ пэрвонэ́ бэршэстыр Мидиякирэ Дариёс яцём мэ тэ зорьякирав лэс и тэ подрикирав лэс.

² Акана́ пхэна́ва ту́кэ чачипэ́н: акэ, ишчо (инкэ́) трин кра́лья ґаздэ́напэ дрэ Персия; пало́ дова́ шта́рто кра́ли пиризорьякирэла сарэ́н барэ́ барвалыпнаса, и, ке́ли зорьякирэла пэс пэ́скирэ барвалыпнаса, то тэды ёв ґаздэ́ла сарэ́н проти Греки́тко (Балами́тко) кралипэ́н.

³ Пало́ лэ́ндэ ґаздэ́лапэ о кра́ли древа́н зоралыпнаскиро, саво́ явэ́ла тэ хулаинэ́л барэ́ райканыпнаса и лэ́ла тэ кэрэ́л пир пэ́скири во́ля.

⁴ Нэ ке́ли ёв уштэ́ла, то кралипэ́н лэ́скиро роспэрэлапэ и роскэрэлапэ пэ штар болыбны́тка балваля, никонэ́скэ лэскрэ сэмэнца́кэ на пириджала дова́ кралипэ́н, и кадасавэ́ зорья́са, савья́са ёв хулаинэлас; хасёла кралипэ́н лэ́скиро и дорэсэлапэ явирэ́нгэ, апри́ч кодолэндэ.

Пал Кралье́ндэ пэ Паш-Дывэсы́тко и Паш-Рати́тко Рига́

⁵ Зорьякирэлапэ кра́ли паш-дывэсытконэ́ (южнонэ) рига́тыр и адя́кэ-паць екх тхага́ри лэ́скиро, саво́ пиризорьякирэла лэс и лэ́ла тэ хулаинэ́л, и явэ́ла лэ́стэ древа́н баро́ райканыпэн. Лэ́скирэ-райканыпнаскиро тхагарипэн явэ́ла баро́.

⁶ Нэ пир вари-кицы́ бэрша́ ёнэ явэ́на кучэдыр екх екхэ́са, и чхай паш-дывэсытконэ́ крали́скири явэ́ла кэ кра́ли паш-ратитконэ́ рига́тыр, соб (кай) ёнэ тэ явэ́н дрэ екх годы́; нэ ёй на вырикирэ́ла зор дрэ пэ́скирэ васта́, и на вытэрдёла ла́киро ро́до, нэ ёй явэ́ла выдыны тэ мэрэ́л, адя́кэ и пашатунэ́ ла́кирэ, и одолэ́, кон барьякирдя ла, и кодолэ́, кон ла́кэ дыя́ зор дро кодолэ́ часы.

⁷ Нэ ґаздэ́лапэ екх рандь (вэтка) ла́кирэ рукхэстыр (корнёстыр) пэ ла́киро штэ́то и явэ́ла тэ марэ́лпэ халадэнца и ёв заджа́ла дро тва́рдыма/диз (крепость) паш-ратитконэ́ крали́скиро, и пэ ла́киро штэ́то лэ́ла тэ кэрэ́л андрэ́ лэ́ндэ, и ёв лэ́ла бари зор.

⁸ Ишчо ёв лэ́ла дро пле́но кэ Еги́пто и лэ́нгирэ дэвэла́, вычхудэ́ лэ́нгирэ муенца, а лэ́нгирэ кучонэ́ кхорэнца, сувнакунэ́ и рупувэнца, и ёв, и пэ вари-кицы́ бэрш ёв явэ́ла тэ тэрдёл вучэды́р паш-ратитконэ́ крали́стыр.

⁹ Тэ́ньци адава́-паць кра́ли и явэ́ла пэ паш-рати́тко (северно) тхэм, нэ ёв рисёла пэ лэ́скири пхув.

¹⁰ И лэ́на марды́тко (оружыё) чхавэ́ лэ́скирэ и скэдэ́на бут халадэ́н, и екх лэ́ндыр сы́гэс явэ́ла, пхэрдякирэла саро́ и проджа́ла, и тэ́ньчи, рисии, лэ́ла тэ марэ́лпэ лэ́са паш-ратитконэ́ крали́са пашы́л лэ́скири тва́рдыма.

¹¹ И росхолясола сарэ́са паш-дывэсы́тко (южно) кра́ли, и выджа́ла тэ марэ́лпэ лэ́са, паш-ратитконэ́ крали́са, саво́ вычхувэла баро́ халадыбэ́н, нэ отдыно́ явэ́ла дава́ халадыбэ́н дрэ лэ́скирэ (вэргоскирэ) васта́.

¹² И ке́ли лыджа́на халадыбэ́н, то крали́скиро ило́ ґаздэ́лапэ; ёв тэлякирэла бут тысёнцы, нэ ёв зоралэды́р кодолэстыр на явэ́ла.

¹³ Пал-дова́ со паш-рати́тко (южно) кра́ли рисёла и тэрдякирэла тэ марэ́лпэ э халадэ́н бутыдыр, сыр сыс лэ́стэ, и пир вари-кицы́ бэрша́ сыго явэ́ла барэ́ халадыбнаса и барэ́ барвалыпнаса.

¹⁴ Дрэ кодолэ́ дывэса́ бутджинэ ґаздэ́напэ пэ крали́стэ паш-дывэсытконэстэ, и нахрата (нахальна) мануша́ тырэ́ народо́стыр, Даниеле, ґаздэ́напэ, соб (кай) тэ кэрдёл чачипна́са, нэ ёнэ пэрэ́на.

¹⁵ И явэ́ла паш-рати́тко кра́ли, и ґаздэ́ла вало пхувья́тыр и халадыбэ́н лэ́скиро лэ́ла зоралякирдо фо́ро, а ни паш-дывэсытка зорья на вытэрдёна, ни выкэдыно халадыбэ́н лэ́скиро; на ухтылэ́ла зор тэ тэрдёл проти.

¹⁶ И кодова́, кон выджа́ла кэ ёв, кэ паш-рати́тко кра́ли, лэскрэ волятыр, и нико́н на вытэрдёла анги́л лэ́стэ. Ёв тэрдёла табороса пэ Славу́тно Пхув, и ёй, сари́ пхув, дорэсэ́ла чорипэ́н лэскрэ вастэ́стыр.

¹⁷ И кадава́ кра́ли (паш-рати́тко) закамэ́ла тэ выджа́л сарэ́ зорьенца пэ́скирэ кралипнастыр, и лэ́скирэ чачипнаскирэнца, и кэрэ́ла дава́. И чхае́н лэ́скирэ джувленгирьен отдэ́ла лэ́скэ (крали́скэ паш-дывэсытконэскэ), соб (кай) тэ хасякирэ́л лэн, нэ дасави́ дума на рисёла чачипна́са, и на явэ́ла лэ́скэ ко́фо одолэ́стыр.

¹⁸ Пало́ дова́ ёв обрискирэла пэ́скиро муй кэ пхувья́ пашыл море (дэрьяв)-кэ островы (джипа́-р.с.) и лэ́ла пэ́скэ бут лэн; нэ вари-саво́ тхага́ри чхувэ́ла ко́нцо пэ лэ́нгири ладж, и ишчо (инкэ́) пэ́скири ладж чхувэ́ла пэ лэ́стэ, крали́стэ, паш-ратитконэстэ.

¹⁹ Тэ́ньци ёв дэ́лапэ пэ́скирэ мо́са кэ тва́рдыми пэ пэ́скири пхув; нэ ёв обштавэлапэ, пэрэ́ла и на явэ́ла лэс буты́р.

²⁰ Пэ лэ́скиро штэ́то явэ́ла вари-кон, кон бичхавэ́ла мытарис/мыта-скэдыибнаскирэс, тэ джал дурэды́р пир славу́тно кралипэ́н; нэ и ёв палэ ада́кицы дывэса́ хасёла, и на мижэхипнастыр, и на марибнастыр.

²¹ И ґаздэ́лапэ пэ лэ́скиро штэ́то о бэдо (понижэно) ману́ш, и на дэ́на лэ́скэ паты́в крали́тко, нэ ёв явэ́ла бигодлякирэс и фрэнтымаса ёв залэла кралипэ́н.

²² Халадыбэна явэ́на тасадэ сы́рбы потопоса и пхарадэ анги́л лэ́стэ, и о кокоро́ тхага́ри завето́скиро, явэ́ла ростасадо.

²³ И долэ́ дывэсэ́стыр, сыр кэрэ́на доракирибэ́н лэ́са, и ёв ґаздэ́лапэ, лэ́ла зор набутэ манушэ́нца.

²⁴ И заджа́ла ёв дре раманёна (мирна) и барвалэ́ штэ́ты дро тхэм, Еги́пто, и ёв кэрэ́ла дасаво, со на кэрэ́нас лэскрэ дада́ и дадэнги́рэ-дада́ лэ́скирэ: дорэсыбэ́н/ чордо миштыпэ́н и барвалыпэ́н явэ́ла ёв тэ роздэл пэскирэнгэ, ёв лэ́ла тэ придуминэл пэ́скирэ планы и пэ тва́рдыми, нэ фэ́ни (то́ка) пэ набаро́ часо.

²⁵ Тэ́ньци ёв джангавэла пэ́скири зор и ду́хо (фа́но) пэ́скиро бутджинэнца халадэнца проти крали́стэ паш-дывэсэ́стыр, и о кра́ли паш-дывэсы́тко выджа́ла пэ марибэ́н ишчо (инкэ́) бутэды́р зоралэ́ халадыбнаса, ёв на тэрдёла проти, пал-дова́ со проти лэ́стэ явэ́ла придуминдло хохаибэ́н.

²⁶ И кодолэ́, кон лэ́са хая, закамэна тэ хасякирэ́н лэс, и халадыбэ́н лэ́скиро ростхадэлапэ, и пэрэ́на бут замардэ́ халадэ́.

²⁷ Дуйджинэндэ адалэ́ кралье́ндэ пэ ило́ явэ́ла хохаибэ́н, и пало́ екх сками́нд ёнэ лэ́на тэ хохавэн, ракири́, нэ на явэ́ла ко́фо, пал-дова́ со ко́нцо (яго́ро) отчхувэлапэ пэ часо.

²⁸ И дэ́лапэ ёв (кра́ли) пэ пэ́скири пхув (паш-рати́тко) барэ́ барвалыпнаса и лэ́скирэ илэ́са проти свэ́нто завето, и ёв кэрэ́ла дош, сыр ёв выкэдыя́, и ёв рисёла, кай исын лэ́скири пхув.

Чорипэ́н Крали́скиро Паш-Ратятыр (Северостыр)

²⁹ Дро упхэндло́/гиндло часо рисёла ёв кэ паш-рат (юго); нэ дава́ дро яго́ро (дро ко́нцо) на явэ́ла псирибэн дасаво, сыр сыс англэды́р.

³⁰ Пал-дова́ со дро екх часо явэ́на пэ лэ́стэ па́рмы (корабли) Китимостыр; и ёв пэрэ́ла духо́са, и рисёла палэ и ёв кэрэ́ла, сыр ёв придуминдя и нэвэ́стыр (нэвэ́с) джа́ла, доракирэлпэ кодолэнца, кон отгия́ Свэнтонэ́ Заветостыр.

³¹ И халадыбэна, со ёв бичхавэ́ла, магирэна Свэ́нто Штэ́то дрэ Кхангири́ и тва́рдыма, и тэрдякирэна кажнонэ́-дывэсытка свэ́нта дыибэна́ (жэртвы), и янэ́на далэ́са джунгалыпэ́н чхучипнастыр (пустотатыр).

³² Кодолэ́н, кон кэрэ́ла бипатывалэс проти Завето, ёв прикхарэла кэ пэ гудлэ́ лавэ́нца; нэ э мануша́, кон гинэ́ла Дэвлэ́с, лэ́на зор и явэ́на тэ кэрэ́н, сыр трэй.

³³ Нэ годьварэ́ мануша́ манушытконэ́ нацыятыр (народо́стыр) дэ́на годы́ бутэнгэ, на дыкхи́ пэ дова́, со ёнэ явэ́на тэ страдынэн ада́кицы дывэса́ ягатыр и куртала́тыр, плено́стыр и миштыпнытконэ чорибнастыр.

³⁴ Ке́ли лэ́на тэ хан лэн дукха́, то явэ́ла лэ́нгэ вари-саво́ подрикирибэ́н, бутджинэ кхэтанякирэнапэ лэ́нца, нэ пэфроми (наилыткэс).

³⁵ Латхэнапэ доша вари-савэ́ и годьварэндэ, соб (кай) тэ спробинэн лэн тэ жужакирэн и тэ парнякирэн кэ дывеса дро ко́нцо (яго́ро); пал-дова́ со ишчо (инкэ́) исын часо кэ упхэндло́ сроко.

³⁶ И явэ́ла тэ кэрэ́л о кра́ли (паш-рати́тко) пир пэ́скири во́ля, и ґаздэ́лапэ кэ вучипэ́н и барьякирэ́ла пэс вучэды́р кажнонэ́ Дэвлэ́стыр, и пал Дэвлэ́стэ дэвлыканэстэ ёв лэ́ла тэ ракирэ́л калэ́ лава́, и явэ́ла тэ удэлпэ лэ́скэ, пака кэрдёлапэ холы́: пал-дова́ со сыс припхэндло, одова́ кэрэ́лапэ.

³⁷ И пал дэвлэндэ пэ́скрэ дадэнги́рэ ёв на подуминэла, ни пал дова́, со исын пэ ило́ джувленгиро, ни хай дэвлыпнаскэ нисавэскэ ёв на дэ́ла паты́в; пал-дова́ со ёв фэ́ни (то́ка) пэс ґаздэ́ла вучэды́р сарэ́ндыр.

³⁸ Нэ дэвлэскэ, саво́ дыкхэ́ла пал тва́рдыми (диза́) пиро́ штэ́то лэ́скиро, ёв явэ́ла тэ дэл паты́в, и кодолэ́ дэвлэс, савэ́с на джиндлэ́ лэ́скирэ дада́, ёв лэ́ла тэ дэл паты́в сувнака́са и рупэ́са и куч барэ́нца, и разнонэ дрогонэ́ дарэнца,

³⁹ и чхувэ́ла ёв зоралы́ тва́рдыма/диз (крепость) чужонэ́ дэвлэса: нэ кодолэ́, савэ́ пригалёна лэс, одолэ́нгэ ёв дэ́ла зор пэ бутэндэ, и ёв роздэла пхув сыр мазу́ри (награда).

О Кра́ли Паш-Ратятыр Пиризорьякирэла

⁴⁰ Пэ ко́нцо (яго́ро) дывэсэнгиро явэ́ла тэ марэ́лпэ лэ́са о кра́ли паш-дывэсэ́стыр (югостыр), и о кра́ли паш-рати́тко чхурдэлапэ сыр рискирибнаскири балва́л (вихро) пэ лэ́стэ марибнытконэ́ вурдэнэнца, уклистэнца (всадникэнца) и бутэ́ пармэнца (корабленца), и ёв пэрэ́ла пэ далэ́ тхэма, пхэрдякирэла лэн, и проджа́ла пир лэ́ндэ.

⁴¹ И заджа́ла адя́кэ-паць ёв пэ Славу́тно Пхув, и бут тхэма (страны) пэрэ́на и зракхэнапэ лэ́скирэ вастэ́стыр фэ́ни (то́ка) Эдо́мо, Моа́во и барэды́р паш Амонэнгирэн чхавэнгири.

⁴² И тырдэла ёв васт лэ́скиро пэ яви́р тхэма; на зракхэ́лапэ и Египто́скири пхув.

⁴³ И залэла ёв пираля́ сувнака́са и рупэ́са и явирэ кучипнэнца Египто́стыр; э Ливиитка и Ефиопиитка джа́на пал лэ́стэ.

⁴⁴ Нэ малвы (нэвипэна́) вастокоскирэ и паш-ратитконэ́ рига́тыр страхакирэна лэс, выджа́ла ёв барэ́ мижэхипнаса, соб (кай) тэ замарэ́л и тэ вымарэл сарэ́са бутэн.

⁴⁵ И чхувэ́ла ёв кралитка ша́тры пэ́скирэ фелатинятыр машки́р мо́рё (дэрья́в) и славу́тно свэ́нто бэ́рга; явэ́ла ёв кэ пэ́скиро ко́нцо (яго́ро) и нико́н на подэла васт лэ́скэ.