Дание́лё 10 - Библия - Пэ Балтитко Романи чиб (Романэс) 2019

Даниелёскиро Дыкхибэ́н пал Манушэ́стэ

¹ Пэ три́то бэрш о Кираскиро, Персытконэ Крали́скиро, сыс сыкадо чачипэ́н Даниелёскэ, савэ́с кхардэ́ пир лав Валтасаро; и чачуно́ сыс дава́ сыкадыипэн и древа́н зорало́. Ёв ґалыя́ дава́ чачипэ́н и уґалыя дыкхибэ́н.

² Дрэ кодолэ́ дывэса́ мэ со́мас, Дание́лё, дрэ ту́га ясвэ́нца трин эфтытка (седьмины) дывэса́.

³ Лачхо́ маро́ мэ на хавас; мас и мол (вино) на гинэ́ дрэ мирэ́ ушта́, и макхибнаса мэ на кхосавас ман кэ/жы́ко дова́, сыр пхэрдинэ (сполниндлэпэ) трин эфтытка дывэса́.

⁴ Пэ биш тэ шта́рто дывэ́с пэрвонэ́-чхонэ́скиро со́мас мэ пэ брэ́го барэ́-рэкакиро (лэнякиро) пашы́л Тигро,

⁵ и ґаздыём мэ мирэ́ якха́, и дыкхцём: акэ, екх мурш, уридо́ дро ґандладытко (лёнытко) урибэ́н, и кусты́к пэ лэ́стэ сыс сувнака́стыр Уфазостыр.

⁶ Э маса́ лэ́стэ – сыр куч бар топазо, о муй лэ́скиро – сыр о блискавицакиро дыкхибэ́н; лэ́скирэ якха́ – сыр хачкирдэ́ ягэнгирэ (факелы), васта́ лэ́скирэ и ґэра́ лэ́скирэ сыс сыр зяиндлы харко́ма (медь), и зан лэ́скирэ ракирибнаскири – сыр зан бутэ́-манушэ́нгири.

⁷ Фэ́ни (то́ка) мэ екхджино́, Даниеле, дыкха́вас дасаво дыкхибэ́н, э мануша́, савэ́ сыс ма́нца, на дыкхнэ́ дасаво дыкхибэ́н; нэ пыя́ пэ лэ́ндэ бари дар и ёнэ нашнэ́, соб (кай) тэ гаравэнпэ.

⁸ Палдава́ яцёмпэ мэ екхджино́, и дыкха́вас мэ да́ва баро́ дыкхибэ́н, нэ дрэ ма́ндэ на яця́пэ зор, мина пэ миро муй древа́н парудяпэ дара́тыр, на яця́пэ ма́ндэ нисаво́ састыпэн.

⁹ И шундём мэ зан лэ́скирэ лавэнгири; и фэ́ни шунавас мэ зан (глос) лэ́скирэ лавэнгири, сыр кашталуно дыёмпэ (замыём) мэ муял и со́мас пашто́ тэлэ́ мо́са кэ пхув.

¹⁰ Нэ акэ, чиладя́ ман о васт и чхудя́ ман пэ мрэ чанга́ и пэ бурныка (ладони) мрэ вастэнгирэ.

¹¹ И пхэндя́ ёв ма́нгэ: “Даниеле, мурш пир ило́! ‘Галёв лава́, савэ́ мэ пхэна́ва ту́кэ, ушты́ маму́й (ровнэс) пэ ґэра́ тырэ́; пал-дова́ со мэ сом бичхадо́ акана́ кэ ту.” Ко́ли ёв пхэндя́ ма́нгэ далэ́ лава́, то мэ уштыём, издрандой.

¹² Нэ ёв пхэндя́ ма́нгэ: “На андырша, Даниеле; пэрвонэ́ дывэсэ́стыр, сыр ту чхудя́н тыро́ ило́, соб (кай) тэ дорэсэс ґалыибэ́н, и тэ тэлякирэс пэс анги́л тырэ́ Дэвлэ́стэ, лава́ тырэ́ сыс шундлэ́, и мэ явавас пал тырэ́ лава́.

¹³ Нэ тхага́ри (князё) Персытконэ кралипнастыр тэрдёлас проти ма́ндэ биш тэ екх дывэса́; нэ, акэ, Миха, екх пэрвонэ́ тхагарьендыр, явдя́ тэ дэл васт ма́нгэ, и мэ яцёмпэ одо́й пашы́л Персытка кралье́ндэ.

¹⁴ Акана́ мэ явдём тэ пхэна́в джины́ (звесь) ту́кэ, саро́, со явэ́ла тырэ́ манушэ́нца дрэ дывэса́, со явэ́на анги́л, адя́кэ, сыр дыкхибэ́н сыкавэ́ла пэ дуратунэ́ дывэса́.”

¹⁵ Ке́ли ёв ракирэ́лас ма́нгэ дасавэ́ лава́, мэ пыём мо́са кэ пхув и яцём муто (немо).

¹⁶ Нэ, акэ, вари-кон, кон здэла (подджа́ла) пэ манушытконэ́ чхавэ́стэ, чиладя́ мирэ́ ушта́, и мэ откэрдём мирэ́ ушта́, лыём тэ ракира́в и пхэндём одолэ́скэ, со сыс тэрдо́ анги́л ма́ндэ: “Раё миро! Кадалэ́ дыкхибнастыр сарэ́ бидытка туги мирэ́ обрисинэ пэ ма́ндэ, и на яця́ мэндэ зор.

¹⁷ И сыр сашты́ тэ ракирэ́л о писха́ри кадасавэ́ мирэ́ ра́скиро, сыр мэ, Дание́лё, сыр ту сан? Пал-дова́ со адрал ма́ндэ нанэ зор, и пхурдыпэн (дыхиныбэн) замыя́ дрэ ма́ндэ.”

¹⁸ Тэ́ньци нэвэ́стыр чиладя́ ман одова́ джино, саво́ сыс дрэ патри́н (о́бразо) манушы́тко и састякирдя ман,

¹⁹ и пхэндя́: “На андарша, о мурш пир ило́! Рама́нё (миро) тэ явэ́л ту́кэ; лы́джа пэс муршканэ́с, яв муршкано́!” И ке́ли ёв ракирэ́лас ма́нца, мэ састиём и пхэндём: “Ра́кир, Раё миро; пал-дова́ со ту састякирдян ман.”

²⁰ И ёв пхэндя́: “Ци джинэ́са, палсо́ мэ явдём кэ ту? Акана́ мэ рисёва́ва, соб (кай) тэ маравпэ Персытконэ тхагариса; и ке́ли мэ выджава, то, акэ, явэ́ла Греки́тко (Балами́тко) тхага́ри.

²¹ Нэ анги́л мэ пхэна́ва ту́кэ, со исын чхиндло́ дро чачуно́ чхиныбэ́н. И нанэ нико́н, кон подрикирэлас бы ман дрэ дова́, апри́ч Михастэ, тумарэ́ тхагаристэ.”