Čysly 34 - Библия - Пэ Балтитко Романи чиб (Романэс) 2019

Ме́жы пэ Ханаано́скири Пхув

¹ И пхэндя́ Рай Дэвэ́л Мойза́скэ, ракири́:

² “Дэ упхэныбэ́н Израилёскирэ чхавэ́нгэ и пхэн лэ́нгэ: ‘Ке́ли тумэ́ заджа́на пэ Ханаано́скири пхув, тэды, ґа́да, исын пхув, сави́ доячэлапэ тумэ́нгэ сыр мэкно́ миштыпэ́н, Ханаано́скири пхув ла́кирэ межэнца:

³ паш-дывэсы́тко (южно) ригакиро яго́ро (ме́жа) явэ́ла тумэ́ндэ чхучэ́ пхувья́тыр Син, пашы́л Эдо́мо, и джа́ла тумэ́ндэ паш-дывэсы́тко ме́жа Лондэ-морёскиро (дэрьявэ́скиро) ягоро́стыр,

⁴ и джа́ла ме́жа пэ паш-дывэ́с кэ Акравимоскирэ вучипэна́ и джа́ла пир Син, и явэ́на ла́кирэ выгиибэна пэ паш-дывэ́с кэ Кадес-Варна, одотхы́р джа́ла кэ Гацар-Адаро и джа́ла пир Ацмоно.

⁵ Ацмоностыр джа́ла ме́жа кэ Египто́скиро панитко тхадыпэн, и явэ́на ла́кирэ выгиибэна кэ мо́рё (дэрья́в);

⁶ а западнонэ межаса явэ́ла тумэ́ндэ баро́ мо́рё (дэрья́в): дава́ явэ́ла тумэ́ндэ ме́жа кэ западо (пал-панитко риг);

⁷ кэ паш-рат явэ́ла тумэ́ндэ ме́жа: барэ́ морёстыр (дэрьявэстыр) пролыджан ла кэ бэ́рга Ор,

⁸ бэрга́тыр Ор пролыджан ме́жа кэ Емафо, и явэ́на ригакирэ выгиибэна кэ Цэдадо;

⁹ одотхы́р джа́ла ме́жа кэ Цыфроно, и ла́кирэ-межакирэ выгиибэна явэ́на кэ Гацар-Энано: дая́ явэ́ла тумэ́ндэ паш-рати́тко ме́жа;

¹⁰ васточно ме́жа пролыджан пэ́скэ Гацар-Энаностыр кэ Шэфамо,

¹¹ Шэфамостыр джа́ла ме́жа кэ Рибло, Аиноскирэ-васточнонэ рига́тыр, пало́ дава́ джа́ла ме́жа и касынэлапэ морёскирэ (дэрьявэ́скирэ) брэги васточнонэ рига́тыр Кинерефоскирэ;

¹² и джа́ла ме́жа кэ Иорда́но, и явэ́на выгиибэна ла́кирэ кэ Лондо мо́рё (дэрья́в). Дая́ пхув явэ́ла тумари́ пир ла́кирэ ме́жы сарэ́ ригэ́ндыр.

Лыджаибна́скирэ тэ Роздэн Пхув

¹³ И дыя́ припхэныбэ́н Мо́йза Израилёскирэ чхавэ́нгэ, и пхэндя́: “Ѓа́да, исын пхув, сави́ тумэ́ роздэна сыр мэкно́ миштыпэ́н пир жре́биё пир ме́ра, пал сави́ дыя́ лав Рай Дэвэ́л тэ дэл еня́ (биекхэ́скиро дэш) родыцэнгэ и пашэ́ родыцо́скэ;

¹⁴ пал-дова́ со Рувимо́скирэ-чхавэ́нгиро ро́дыцо пир лэ́нгирэ чэ́карья (семействы), и Гадо́скирэ-чхавэ́нгиро ро́дыцо пир лэ́нгирэ чэ́карья (семействы), и Манасияскири паш ро́дыцо, дорэснэ́ пэ́скири ме́ра мэкнэ́ миштыпна́стыр;

¹⁵ дуй ро́дыцы и паш ро́дыцо дорэснэ́ пэ́скири ме́ра мэкнэ́ миштыпна́стыр пал Иорда́но проти Ерихо́но кэ васто́ко.

¹⁶ И пхэндя́ Рай Дэвэ́л Мойза́скэ дасавэ́ лава́:

¹⁷ “Ѓа́да, исын муршэнгирэ лава́, савэ́ явэ́на тэ роздэн тумэ́нгэ пхув: раша́й Елиза́ро (Елеазаро) и Ису́со (Ёхошуа́), Навиноскиро чхаво́;

¹⁸ и лэн пир екхэ тхагаристэ (князёстэ) родыцо́стыр ваш пхувья́киро роздыибэн.

¹⁹ И ґа́да, исын далэ́ муршэнгирэ (тхагарьенгирэ) лава́: ваш ро́дыцо Юда́скиро о Халево, Ефонияскиро чхаво́;

²⁰ ваш Симеоноскирэ-чхавэ́нгиро ро́дыцо о Самуи́ло, Амиудоскиро чхаво́;

²¹ ваш Вениаминоскиро ро́дыцо о Елидадо, Кислоноскиро чхаво́;

²² ваш Дано́скирэ-чхавэ́нгиро ро́дыцо тхага́ри о Буки, Еглиёскиро чхаво́;

²³ ваш Иосифо́скирэ чхавэ́нгэ, ваш Манасия́скирэ-чхавэ́нгиро ро́дыцо о тхага́ри Ханиило, Ефодоскиро чхаво́;

²⁴ ваш Ефремо́скирэ-чхавэ́нгиро ро́дыцо тхага́ри о Кемуило, Шифтаноскиро чхаво́;

²⁵ ваш Завулоноскирэ-чхавэ́нгиро ро́дыцо тхага́ри о Елицафано, Фарнакоскиро чхаво́;

²⁶ ваш Исахароскирэ-чхавэ́нгиро ро́дыцо тхага́ри о Фалтиило, Азаноскиро чхаво́;

²⁷ ваш Асироскирэ-чхавэ́нгиро ро́дыцо тхага́ри о Ахиудо, Шеломияскиро чхаво́;

²⁸ ваш Нефалимоскирэ-чхавэ́нгиро ро́дыцо тхага́ри о Педаило, Амиудоскиро чхаво́.”

²⁹ Акэ, исын одолэ́, савэ́нгэ припхэндя́ Рай Дэвэ́л тэ роздэн пхувья́кири ме́ра мэкнэ́ миштыпна́стыр Израилёскирэ чхавэ́нгэ пэ Ханаано́скири пхув.