Čysly 31 - Библия - Пэ Балтитко Романи чиб (Романэс) 2019

Сэ́ндо пэ Мадианитяндэ

¹ И пхэндя́ Рай Дэвэ́л Мойза́скэ, ракири́:

² “Отха палэ Мадианитянэнгэ пал Израилёскирэ чхавэ́ндэ, и пало́ (после) дова́ отджаса кэ тырэ́ мануша́.”

³ И пхэндя́ Мо́йза манушэ́нгэ: “Скэдэ́н пэ́стыр манушэ́н пэ марибэ́н, соб (кай) ёнэ тэ джа́н пэ Мадианитянэндэ, тэ кэрэ́н сэ́ндо Ра́скиро-Дэвлэ́скиро пэ Мадианитянэндэ;

⁴ пир тысёнцо родыцо́стыр, кажнонэ́ Израилёскирэ родыцэндыр бичхавэн пэ марибэ́н.

⁵ И сыс выкэдыно Израилёскирэ тысёнцэндыр, пир тысёнцо родыцо́стыр, дэшуду́й тысёнцы скэдынэ́ манушэ́н пэ марибэ́н.

⁶ И бичхадя́ лэн Мо́йза пэ марибэ́н, пир тысёнцо родыцо́стыр, лэн и Финеесос, рашаскирэ Елизароскирэ чхавэ́с пэ марибэ́н, и дрэ лэ́скиро васт сыс свэ́нта кхорэ́ (сасу́ды) и ро́ги (трубы) ваш сигнало.

⁷ И гинэ́ марибна́са пэ Мадианитянэндэ, сыр припхэндя́ Рай Дэвэ́л Мойза́скэ, и домардэ́ сарэ́ муршэ́н;

⁸ и кхэтанэ́ лэ́нгирэ замардэнца ёнэ мулякикирдэ Мадиамоскирэ кралье́н: Евиёс, Рекемас, Цурас, Хурас и Ревас, панджэ́ Мадиамоскирэ кралье́н, и Валаамос, Веороскирэ чхавэ́с, замардэ́ куртала́са;

⁹ а Мадиамоскирэ джувле́н и лэ́нгирэ чхавэ́н лынэ́ дро пле́но, и сарэ́ лэ́нгирэ кхэритконэ́ мурдалэ́н (ското), и сарэ́ лэ́нгирэ ста́ды и саро́ лэ́нгиро маёнко лынэ́ дро дорэсыбэ́н,

¹⁰ и сарэ́ лэ́нгирэ фо́рья и сарэ́ лэ́нгирэ форицы схачкирдэ́ яга́са;

¹¹ и лынэ́ саро́, со закэдынэ и саро́ барвалыпэ́н, манушэ́стыр кэ кхэри́тка мурдала́ (ското);

Рисибэн Марибнастыр

¹² и яндлэ́ пленонэн и дорэсыбэ́н и саро́, со закэдынэ кэ Мо́йза и кэ раша́й Елиза́ро и кэ Израилёскирэ-чхавэ́нгиро скэдыибэ́н, кэ ста́но, пэ Моавитоскирэ лошчыны (равнины), со исын пашы́л Иорда́но проти Ерихо́но.

¹³ И выгинэ́ Мо́йза, и раша́й Елиза́ро, и сарэ́ тхага́рья скэдыибна́стыр тэ пирилэн лэн станостыр.

¹⁴ И холя́сыя Мо́йза пэ халадэ́нгирэ барыдырэндэ, тысёнцэнгирэ барыдырэндэ и шэлэнгирэ барыдырэндэ, савэ́ явнэ́ марибнастыр,

¹⁵ и пхэндя́ лэ́нгэ Мо́йза: “Ваш со тумэ́ мэкнэ́ джидэн сарэ́н джувле́н?

¹⁶ Акэ, ёнэ, пир Валаамоскиро годыпэ́н, сыс ваш Израилёскирэ чхавэ́нгэ лыджаибнаса тэ отджан Ра́стыр-Дэвлэ́стыр пир Фегоростэ, пал со и хасякирибэн сыс дро Ра́скирэ-Дэвлэ́скиро скэдыибэ́н;

¹⁷ и адя́кэ замарэ́н сарэ́н чхаворэ́н, и сарэ́н джувле́н, савэ́ уджиндлэ́ муршэ́с пэ ромэскиро чхуибэ́н, замарэ́н (мулякирэ́н);

¹⁸ а сарэ́н патывалэ́ тырнэ джувле́н, савэ́ на уджиндлэ́ муршэскиро чхуибэ́н, ячкирэн ваш пэ́скэ;

¹⁹ и явэ́н пал ста́но эфта́ дывэса́; кажно (сва́ко), кон замарэла манушэ́с и лэ́лапэ пал замардэстэ, тэ жужакирэлпэ пэ три́то дывэ́с и пэ эфта́то дывэ́с, тумэ́ и тумарэ́ мануша́ дро пле́но;

²⁰ и сарэ́ урибэна́, и сарэ́ цыпитка ризы, и саро́, со исын кэрдо́ бузненгирэ вылна́тыр, и сарэ́ каштунэ кхорэ́ (сасу́ды) выжужакирэн.”

²¹ И пхэндя́ раша́й Елиза́ро халадэнгэ, савэ́ псирдэ́ пэ марибэ́н: “Ѓа́да, исын Законоскиро упхэныбэ́н, саво́ припхэндя́ Рай Дэвэ́л Мойза́скэ:

²² Сувнака́й, руп, харко́ма (медь), састы́р, муслови (волыво) и молови (свинцо),

²³ и саро́, со проджа́ла пир яг, пролыджан пир яг, соб (кай) ёв тэ выжужакирэлпэ, а апри́ч дава́ жужакирибнаскирэ пане́са тумэ́ сан бангэ́ (мусинэна) тэ выжужакирэн; саро́, со на проджа́ла пир яг, пролыджан пир пани́;

²⁴ и тумарэ́ урибэна́ выморэн пэ эфта́то дывэ́с, и выжужакирэнпэ, и пало́ дава́ заджа́н дро ста́но.”

О Мо́йза Роскэрэла Чордо Дорэсыбэ́н

²⁵ И пхэндя́ Рай Дэвэ́л Мойза́скэ, ракири́:

²⁶ “Пиригин чордо дорэсыбэ́н, саво́ лынэ́ дро пле́но, манушэ́стыр кэ кхэри́тко мурда́л, ту и раша́й Елиза́ро [Елеазаро-р.с.] и барыдыра́ скэдыибна́стыр;

²⁷ и роскэрэн чордо дорэсыбэ́н пэ дуй паша́ машки́р манушэ́ндэ, савэ́ мардэ́пэ, псирдэ́ пэ марибэ́н, и машки́р саро́ скэдыибэ́н;

²⁸ и халадэндыр, савэ́ псирдэ́ пэ марибэ́н, лэ дань Ра́скэ-Дэвлэ́скэ, пир екх ди панджэшэлэндыр, манушэ́ндыр и барэ́ кхэритконэ́ мурдалэ́ндыр (ското́стыр), и ослэндыр и тыкнэ́ кхэритконэ́ мурдалэ́ндыр;

²⁹ лэ дава́ лэ́нгирэ пашатыр и отдэ́ раша́скэ Елизароскэ дрэ свэ́нто отдыибэ́н ґаздыпнаса Ра́скэ-Дэвлэ́скэ;

³⁰ и Израилёскирэ чхавэ́нгирэ пашатыр лэ пир екхэ манушэ́стэ (ме́ра) пандждэшэ манушэ́ндыр, барэ́ мурдалэ́ндыр, пир екх шэро́ ослэндыр и тыкнэ́ кхэритконэ́ мурдалэ́ндыр, и отдэ́ дава́ Левитэ́нгэ, савэ́ дынаринэна пашы́л Ра́скирэ-Дэвлэ́скири ша́тра.”

³¹ И кэрдэ́ Мо́йза и Елиза́ро, раша́й, сыр припхэндя́ Рай Дэвэ́л Мойза́скэ.

³² И сыс чордо дорэсыбэ́н, саво́ яця́пэ дорэсыбнастыр, со закэдынэ манушэ, савэ́ сыс пэ марибэ́н: тыкнэ́ кхэри́тка мурдала́ шовшэла́ эфтадэша́ пандж тысёнцы,

³³ барэ́ кхэри́тка мурдала́ эфтадэша́ дуй тысёнцы,

³⁴ ослэн шовдэша́ екх тысёнцо,

³⁵ манушэ́н, джувле́н, савэ́ на джиндлэ́ муршэскиро чхуибэ́н, сарэнгирэ дия́ сыс трия́нда дуй тысёнцы.

³⁶ Паш бажын манушэ́нгири, савэ́ псирдэ́ пэ марибэ́н, пир розгиныбэн сыс: тыкнэ́ кхэритконэ́ мурдалэ́н триншэла́ трия́нда эфта́ тысёнцы панджшэла́,

³⁷ и дань Ра́скэ-Дэвлэ́скэ тыкнэ́ кхэритконэ́ мурдалэ́ндыр сыс шовшэла́ эфтадэша́ пандж;

³⁸ барэ́ кхэритконэ́ мурдалэ́н трия́нда шов тысёнцы, и лэ́ндыр дань Ра́скэ-Дэвлэ́скэ эфтадэша́ дуй;

³⁹ ослэн трия́нда тысёнцы панджшэла́, и лэ́ндыр дань Ра́скэ-Дэвлэ́скэ шовдэша́ екх;

⁴⁰ манушэ́н дэшушов тысёнцы, и лэ́ндыр дань Ра́скэ-Дэвлэ́скэ трия́нда дуй дия́.

⁴¹ И отдыя́ Мо́йза дань, свэ́нто отдыибэ́н Ѓаздыпнаса Ра́скэ-Дэвлэ́скэ, раша́скэ Елизароскэ, сыр припхэндя́ Рай Дэвэ́л Мойза́скэ.

⁴² И Израилёскирэ-чхавэ́нгирэ пашатыр, саво́ роскэрдя́ Мо́йза манушэ́ндыр, савэ́ сыс пэ марибэ́н;

⁴³ паш, сави́ сыс пэ скэдыибна́скири бажын: тыкнэ́ кхэри́тка мурдала́ сыс триншэла́ трияндаэфта тысёнцы панджшэла́,

⁴⁴ барэ́ кхэри́тка мурдала́ сыс трия́нда шов тысёнцы,

⁴⁵ ослэн трия́нда тысёнцы панджшэла́,

⁴⁶ манушэ́н дэшушов тысёнцы.

⁴⁷ Израилёскирэ-чхавэ́нгирэ пашатыр Мо́йза лыя́ екх пандждэштона паш манушэ́ндыр и кхэритконэ́ мурдалэ́ндыр, и отдыя́ дава́ Левитэ́нгэ, савэ́ дынаринэ́нас (служынэ́нас) пашы́л Ра́скирэ-Дэвлэ́скири ша́тра, сыр припхэндя́ Рай Дэвэ́л Мойза́скэ.

⁴⁸ И явнэ́ кэ Мо́йза тысёнцэнгирэ барыдыра́ пэ халадэ́ндэ, тысёнцэнгирэ барыдыра́ и шэлэнгирэ барыдыра́,

⁴⁹ и пхэндлэ́ Мойза́скэ: “Тырэ́ писха́рья пиригиндлэ халадэ́н, савэ́н амэ́нгэ отдынэ́, и на гия́ криг ние́кх амэ́ндыр [лэ́ндыр–р.с];

⁵⁰ и ґа́да, амэ яндям [янаса-ю.о.] свэ́нто дыибэ́н Ра́скэ-Дэвлэ́скэ, кон со дорэсця́ сувнакунэ́ дарэндыр: зандирорья (ланцужки), вастытка (корэ), ангрустя́, чэня и кулоны тэ жужакирас дия́ амарэ́ анги́л Растэ-Дэвлэ́стэ.”

⁵¹ И лынэ́ лэ́ндыр Мо́йза и раша́й Елиза́ро сувнака́й дрэ сарэ́ далэ́ дро́га предметы;

⁵² и сыс саро́ сувнака́й, саво́ яндлэ́ дрэ свэ́нто дыибэ́н ґаздыпнаса Ра́скэ-Дэвлэ́скэ, дэшушов тысёнцы эфташэла́ пандждэша́ шэ́кели, тысёнцэнгирэ барыдырэндыр и шэлэнгирэ барыдырэндыр.

⁵³ Халадэ́ чордэ, кажно (сва́ко) ваш пэ́скэ.

⁵⁴ И лынэ́ Мо́йза и раша́й Елиза́ро сувнака́й тысёнцэнгирэ барыдырэндыр и шэлэнгирэ барыдырэндыр, и яндлэ́ лэс дрэ скэдыибна́скири ша́тра, дро рипирибэ́н Израилёскирэ-чхавэ́нгиро, анги́л Растэ-Дэвлэ́стэ.