Čysly 3 - Библия - Пэ Балтитко Романи чиб (Романэс) 2019

Аароно́скирэ Чхавэ́

¹ Ѓа́да, исын Мойза́скиро и Аароноскиро ро́до, ке́ли ракирдя́ Рай Дэвэ́л Мойза́скэ пэ бэ́рга Синаё,

² и, акэ, исын Аароно́скирэ-чхавэ́нгирэ лава́: англатуно́ (пэ́рво) Надаво, Авиудо, Елиза́ро и Ифамаро;

³ акэ, исын Аароно́скирэ-чхавэ́нгирэ лава́, раша́нгирэ, савэ́н помакхнэ, савэ́н ёв (Ааро́но) высвэнцындя, соб (кай) ёнэ тэ кэрэ́н буты́ сыр рашая́;

⁴ нэ Надаво и Авиудо мынэ́ анги́л Растэ-Дэвлэ́стэ, ке́ли ёнэ яндлэ́ явирэ-манушэ́нгири яг анги́л Растэ-Дэвлэ́стэ пэ Синаёскири чхучи́ пхув, чхавэ́н лэ́ндэ на сыс; и ячнэ́пэ рашанца Елиза́ро и Ифамаро пашы́л пэ́скирэ дадэ́стэ Аароностэ.

Леви́ты Кэрэ́на Буты́ дрэ Ша́тра

⁵ И пхэндя́ Рай Дэвэ́л Мойза́скэ дасавэ́ лава́:

⁶ “Ян Левиёскиро ро́дыцо (чанг), и чхув лэс раша́са анги́л Аароностэ, соб (кай) ёнэ тэ дынаринэ́н (тэ служынэн) лэ́скэ;

⁷ и мэк ёнэ тэ явэ́н пэ стрэ́га пал лэ́стэ, и пэ стрэ́га пал саро́ скэдыибэ́н пашы́л ша́тра скэдыибна́скири, соб (кай) ёнэ тэ лыджа́н буты́ пашы́л ша́тра;

⁸ и мэк ёнэ тэ ракхэ́н сарэ́ приборы скэдыибнаскирэ шатратыр, и явэ́на пэ стрэ́га пал Израилёскирэ чхавэ́ндэ, соб (кай) тэ лыджа́н буты́ пашы́л ша́тра.

⁹ Отдэ́ Левитэ́н Аароно́скэ и лэ́скирэ чхавэ́нгэ сарэ́са: мэк тэ явэ́н ёнэ отдынэ́ лэ́скэ Израилёскирэ чхавэ́ндыр;

¹⁰ Аароно́с и лэ́скирэ чхавэ́н чхув тэ кэрэ́н буты́, соб (кай) ёнэ тэ дыкхэ́н пэ́скири рашаскири буты́; а ко́ли подджа́ла яви́р ману́ш, одова́ ману́ш явэ́ла отдыно́ мэрибна́скэ.”

¹¹ И пхэндя́ Рай Дэвэ́л Мойза́скэ, ракири́:

¹² “Ѓа́да, Мэ лыём Левитэ́н Израилёскирэ чхавэ́ндыр заме́ст (пэ штэ́то) сарэ́ англатунэндэ (пэрвонэндэ), саво́ выджа́ла лочовя́тыр (лоностыр) машки́р Израилёскирэ чхавэ́ндэ, Леви́ты исын бангэ́ тэ явэ́н Мирэ́;

¹³ пал-дова́ со сарэ́ англатунэ́ чхаворэ́ – Мирэ́; дро дова́ дывэ́с, ке́ли Мэ хасякирдём сарэ́н англатунэн бияторэн пэ Египто́скири пхув, Мэ высвэнцякирдём Пэ́скэ сарэ́н англатунэн Израилёскирэ манушэ́стыр кэ кхэри́тка мурдала́ (ското); ёнэ исын бангэ́ тэ явэ́н Мирэ́. Мэ сом Рай Дэвэ́л.”

¹⁴ И пхэндя́ Рай Дэвэ́л Мойза́скэ пэ Синаёскири чхучи́ пхув дасавэ́ лава́:

Пиригиныбэ́н Левитэнгиро

¹⁵ “Пиригин Левиёскирэ чхавэ́н пир лэ́нгирэ чэ́карья (семействы), пир лэ́нгирэ ро́ды; гин сарэ́н муршэ́н екхэ чхонэстыр и пхурэды́р.”

¹⁶ И пиригиндя лэн Мо́йза пир Ра́скирэ-Дэвлэ́скиро лав, сыр сыс припхэндло.

¹⁷ И ґа́да, исын Левиёскирэ чхавэ́ пир лэ́нгирэ лава́: Гирсоно, Каафо и Мерари.

¹⁸ И, акэ, исын Гирсоноскирэ-чхавэ́нгирэ лава́ пир лэ́нгирэ ро́ды: Ливнё и Шымеё.

¹⁹ И Каафоскирэ чхавэ́ пир лэ́нгирэ ро́ды: Амрамо и Ицгаро, Хевро́но и Узиило.

²⁰ И Мерарискирэ чхавэ́ пир лэ́нгирэ ро́ды: Махли и Муша. Ѓа́да, исын Левиёскиро ро́до пир лэ́нгирэ чэ́карья.

²¹ Гирсоностыр джа́ла ро́до Ливнискиро и ро́до Шымеяскиро: дава́ исын Гирсоноскиро ро́до.

²² Пиригиндлэ сыс сарэ́ мурша́, екхэ чхонэстыр и пхурэды́р, лэн сыс эфта́ тысёнцы панджшэла́.

²³ Гирсоноскирэ ро́ды бангэ́ сыс тэ тэрдён стано́са (табороса) палэ ша́тра пэ западо;

²⁴ барыдыро́ пэ Гирсоноскирэ-чхавэ́нгиро, лэ́нгирэ-дадэнгири стрэч (поколениё) сыс Елиасафо, Лаелоскиро чхаво́.

²⁵ Гирсоноскирэ чхавэ́нгэ допатялапэ скэдыибна́скири ша́тра тэ ракхэ́н, и ла́киро учхакирибэн (полого), и скэдыибна́скири шы́рма пэ загибэн, дрэ ша́тра,

²⁶ и пэ грэ́да (дво́ро) и двороскирэ-загиибнаскири шы́рма, сави́ исын трусця́л (кругом) ски́ния и алта́рё, и ла́кирэ шэлэ, сарэ́нца лэ́нгирэ приборэнца.

²⁷ Каафостыр сыс ро́до Амрамоскиро и ро́до Ицгараскиро, Хевроноскиро ро́до, и Узиилоскиро ро́до: далэ́ исын Каафоскирэ ро́ды.

²⁸ Пир гиныбэ́н сарэ́ муршэ́н екхэ чхонэстыр и пхурэды́р, сыс охто́ тысёнцы шовшэла́, савэ́ ракхнэ свэ́нто штэ́то.

²⁹ Каафоскирэ-чхавэ́нгирэ ро́ды сыс бангэ́ тэ чхувэ́н пэ́скиро ста́но пэ паш-дывэсы́тко (южно) шатракири риг;

³⁰ о барыдыро́ Каафоскирэ родо́стыр сыс о Елцафано, Узиилоскиро чхаво́;

³¹ Лэ́нгэ сыс дыно́ тэ ракхэ́н ковчэго, сками́нд, момолы́тко (свети́льнико), алта́рё, свэ́нта кхорэ́ (сасу́ды), савэ́нца сыс трэй лэ́нгэ тэ дынаринэ́н (тэ служынэн), и шы́рма сарэ́ ла́кирэ приборэнца.

³² Шэрало́ барыдыро́ пэ Левитэ́нгирэ барыдырэндэ сыс о Елиза́ро, Аароно́скирэ-рашаскиро чхаво́; тэл лэ́скиро ракхибэн сыс одолэ́, савэ́нгэ сыс допатяндло тэ ракхэ́н свэ́нто штэ́то.

³³ Мераристыр сыс Махлискиро ро́до и Мушискиро ро́до: дава́ сыс Мерарискиро ро́до;

³⁴ пиригиндлэ сарэ́н муршэ́н, екхэ чхонэстыр и пхурэды́р – шов тысёнцы дуйшэла́;

³⁵ о барыдыро́ Мерарискирэ-дадэ́нгиро родо́стыр сыс о Цуриило, Авихаилоскиро чхаво́; ёнэ сыс бангэ́ тэ чхувэ́н пэ́скиро ста́но пэ паш-рати́тко (северно) риг шатратыр;

³⁶ Мерарискирэ чхавэ́нгэ допатянас тэ ракхэ́н шатракирэ бэльки (брусы) и ла́кирэ баландиня́ (шосты), и ла́кирэ сты́лбы, и ла́кирэ тэл ґэра́ прэдки и сарэ́ ла́кирэ приборы сарэ́ лэ́нгирэ кэрибнаса,

³⁷ и сты́лбы пэ грэ́да (дво́ро) сарэ́ ригэ́ндыр и лэ́нгирэ прэдки (основы), и лэ́нгирэ килорэ и лэ́нгирэ шэлэ.

³⁸ Англатунэ́ рига́тыр дрэ ша́тра, кэ васто́ко анги́л скэдыибна́скири ша́тра, сави́ сыс рисии, кай ґаздэ́лапэ кхам, сыс бангэ́ тэ чхувэ́н ста́но (таборо (лод)) Мо́йза и Ааро́но и лэ́скирэ чхавэ́, савэ́нгэ сыс допатяндыно тэ ракхэ́н свэ́нто штэ́то пал Израилёскирэ чхавэ́ндэ; а ко́ли вари-кон подджа́ла явирэ манушэ́ндыр (саво́ на Аароностыр), явэ́ла отдыно́ мэрибна́скэ.

³⁹ Сарэ́н гиндлэн Левитэ́н, савэ́н пиригиндлэ Мо́йза и Ааро́но пир припхэныбэ́н Ра́стыр-Дэвлэ́стыр, пир лэ́нгирэ ро́ды, сарэ́н муршэ́н, екхэ чхонэстыр и пхурэды́р, сыс биш тэ дуй тысёнцы.

Леви́ты Дынэ́ Дэвлэ́скэ

⁴⁰ И пхэндя́ Рай Дэвэ́л Мойза́скэ: “Пиригин сарэ́н англатунэн чхаворэ́н Израилёскирэ чхавэ́ндыр екхэ чхонэстыр и пхурэды́р, и пиригин лэн пир лава́;

⁴¹ и лэ Левитэ́н ваш Ма́нгэ, – Мэ сом Рай Дэвэ́л, – и заме́ст (пэ штэ́то) сарэ́ндэ англатунэндэ Израилёскирэ чхавэ́ндыр, а Левитэ́нгирэ кхэритконэ́ мурдалэ́н заме́ст (пэ штэ́то) саро́ пэрвонэ́-бияныпнытко мурдалэнгиро кхэритконэ́ Израилёскирэ чхавэ́ндыр.”

⁴² И пиригиндя Мо́йза, сыр припхэндя́ лэ́скэ Рай Дэвэ́л, сарэ́н Израилёскирэ чхавэ́нгирэ англатунэ́ чхаворэ́н;

⁴³ и сыс сарэ́ англатунэ́ чхаворэ́н, пир лавэнгиро гиныбэ́н, екхэ чхонэстыр и пхурэды́р биш тэ дуй тысёнцы дуйшэла́ эфтадэша́ трин.

⁴⁴ И пхэндя́ Рай Дэвэ́л Мойза́скэ дасавэ́ лава́:

⁴⁵ “Лэ Левитэ́н заме́ст сарэ́н англатунэн чхаворэ́н Израилёскирэ чхавэ́ндыр, и Левитэ́нгирэ кхэритконэ́ мурдалэ́н (ското) заме́ст лэ́нгирэ кхэритконэ́ мурдалэ́ндэ; мэк Леви́ты тэ явэ́н Мирэ́. Мэ сом Рай Дэвэ́л.

⁴⁶ А дро выкиныбэ́н пал дуйшэла́ эфтадэша́ тринэндэ, савэ́ ячнэ́пэ буты́р Левитэ́нгирэ гиныбнастыр, Израилёскирэ англатунэ́ чхаворэндыр,

⁴⁷ то лэ пэ пандж шэ́кели пал манушэ́стэ, пир свэ́нто шэ́келё лэ, биш геры дро шэ́келё,

⁴⁸ и отдэ́ дава́ руп Аароно́скэ и лэ́скирэ чхавэ́нгэ, дро выкиныбэ́н пал лишнёнэ (савэ́ ячнэ́пэ) манушэ́ндэ.”

⁴⁹ И лыя́ Мо́йза выкиныбнаскиро руп пал лишнёнэ манушэ́ндэ, савэ́н запарудэ Леви́ты,

⁵⁰ Израилёскирэ англатунэ́ чхаворэндыр ёв лыя́ руп тысёнцо (бар) трин шэла́ шовдэша́ пандж шэ́кели, пир свэ́нто шэ́келё,

⁵¹ и отдыя́ о Мо́йза выкиныбнаскиро руп Аароно́скэ и лэ́скирэ чхавэ́нгэ пир Ра́скирэ-Дэвлэ́скиро лав, сыр припхэндя́ Рай Дэвэ́л Мойза́скэ.