Čysly 29 - Библия - Пэ Балтитко Романи чиб (Романэс) 2019

Яныбэ́н пэ Свэ́нки Рогоскирэ (Трубакирэ)

¹ И дро эфта́то чхон, пэ пэ́рво-чхонэ́скиро дывэ́с, мэк тэ явэ́л тумэ́ндэ свэ́нто скэдыибэ́н; на кэрэ́н нисави́ буты́; мэк тэ явэ́л дава́ тумэ́ндэ радымакиро дывэ́с рогоскирэ зникоса (трубакирэ звукоса).

² И янэ́н цэ́ло схачкирибэ́н дрэ гудло́ тхув, лачхо́ Ра́скэ-Дэвлэ́скэ: екхэ гуруво́рэс, екхэ бакрэ́с, эфта́ екхэ-бэршытконэ бакрэ́н, би дошакирэн,

³ и ваш лэ́нгэ дро маруно́ яныбэ́н тэ явэ́л пшэнично яржо́, перемешындло елеёса, трин дэшта паша́ эфатыр пэ гуруворэстэ, дуй дэшта паша́ эфатыр пэ бакрэстэ,

⁴ и екх дэ́што паш эфатыр пэ кажнонэ́стэ эфта́ бакрэ́ндыр,

⁵ и екхэ́с бузнэ́с (козлос) дрэ свэ́нто дыибэ́н Ра́скэ-Дэвлэ́скэ пал грэ́хо, ваш жужакирибэн тумаро́,

⁶ апри́ч нэвонэ́-чхонэскирэ цэ́ло схачкирибнэн и лэ́скиро марунэ яныбэ́н, и апри́ч цэ́ло схачкирибэ́н пэ кажно дывэ́с и лэ́скиро маруно́ яныбэ́н, и лэ́нгиро вычхуибэн, пир упхэныбэ́н, дро гудло́ тхув, лачхо́ Ра́скэ-Дэвлэ́скэ.

Яныбэ́н пэ Постоскиро Дывэ́с

⁷ И пэ дэ́што дывэ́с далэ́ эфта́-чхонэ́скиро, мэк тэ явэ́л тумэ́ндэ свэ́нто скэдыибэ́н. Чхувэ́н пэс тэлэды́р дрэ тумарэ́ илэ, и нисаво́ рэ́ндо тэ на кэрэ́н;

⁸ и янэ́н цэ́ло схачкирибэ́н Ра́скэ-Дэвлэ́скэ дро гудло́ тхув: екхэ гуруво́рэс, екхэ бакрэ́с, эфта́ екхэ-бэршытконэн бакрэ́н; би дошакирэн, бангэ́ ёнэ тэ явэ́н тумэ́ндэ;

⁹ и ваш лэ́нгэ дро маруно́ яныбэ́н пшэнично яржо́, перемешындло елеёса, трин дэшта паша́ эфатыр пэ гуруворэстэ, дуй дэшта паша́ эфатыр пэ бакрэстэ,

¹⁰ и пир дэ́што паш эфатыр пэ кажнонэ́стэ эфтанэ бакрэ́ндыр,

¹¹ и екхэ бузнэ́с (козлос) дрэ свэ́нто дыибэ́н Ра́скэ-Дэвлэ́скэ пал грэ́хо, апри́ч свэнтонэ́ яныбнастыр Ра́скэ-Дэвлэ́скэ пал грэ́хо, саво́ янэ́на пэ жужакирибнаскиро дывэ́с, и апри́ч кажнонэ́-дывэсэскирэ цэ́ло схачкирибэ́н и лэ́скиро маруно́ яныбэ́н, и лэ́скиро вычхуибэн.

Яныбэ́н пэ Свэ́нко Шатрэнгиро

¹² И пэ дэшупанджто дывэ́с эфта́-чхонэ́скиро мэк тэ явэ́л тумэ́ндэ свэ́нто скэдыибэ́н; нисави́ буты́ тэ на кэрэ́н, и свэнкинэн Ра́скирэ-Дэвлэ́скиро свэ́нко эфта́ дывэса́;

¹³ и янэ́н цэ́ло схачкирибэ́н, свэ́нто яныбэ́н, гудло́ тхув, лачхо́ Ра́скэ-Дэвлэ́скэ: дэшутрин гуруворэ́н, дуе́н бакрэ́н, дэшуштар екхэ-бэршытконэн бакрэ́н; би дошакирэн, мэк тэ явэ́н ёнэ;

¹⁴ и ваш лэ́нгэ дро маруно́ яныбэ́н пшэнично яржо́, перемешындло елеёса, трин дэшта паша́ эфатыр пэ кажнонэ́стэ дэшутринэндыр гуруворэндыр, дуй дэшта паша́ эфатыр пэ кажнонэ́ дуендыр бакрэ́ндыр,

¹⁵ и пир дэ́што паш эфатыр пэ кажнонэ́стэ дэшуштарэндыр бакрэ́ндыр,

¹⁶ и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсытконэ́ цэлонэ́ схачкирибнастыр и лэ́скирэ марунэ яныбнастыр и лэ́скирэ вычхуибнастыр.

¹⁷ И пэ яви́р дывэ́с дэшуду́й гуруворэ́н, дуе́н бакрэ́н дэшуштар екхэ-бэршытконэ бакрорэ́н, би дошакирэн,

¹⁸ и ваш лэ́нгэ маруно́ яныбэ́н и вычхуибэн ваш гуруворэнгэ, бакрэнгэ и бакрорэнгэ, пир лэ́нгиро гиныбэ́н, пир упхэныбэ́н,

¹⁹ и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дэвэсытконэ цэлонэ́ схачкирибнастыр и марунэ яныбнастыр и лэ́нгирэ вычхуибнастыр.

²⁰ И пэ три́то дывэ́с дэшуекх гуруворэ́н, дуе́н бакрэ́н, дэшуштар екхэ-бэршытконэ бакрорэ́н, би дошакирэн,

²¹ и ваш лэ́нгэ маруно́ яныбэ́н и вычхуибэн ваш гуруворэнгэ, бакрэ́н и бакрорэ́н, пир лэ́нгиро гиныбэ́н, пир упхэныбэ́н,

²² и екхэ бузнэ́с (козлос) дро свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсытконэ́ цэлонэ́ схачкирибнастыр и марунэ яныбнастыр и лэ́скирэ вычхуибнастыр.

²³ И пэ шта́рто дывэ́с дэш гуруворэ́н, дуе бакрэ́н, дэшуштар екхэ-бэршытконэн бакрорэ́н, би дошакирэн,

²⁴ и ваш лэ́нгэ маруно́ яныбэ́н и вычхуибэн ваш гуруворэнгэ, бакрэ́н и тэрнэ́ бакрорэ́н, пир лэ́нгиро гиныбэ́н, пир упхэныбэ́н,

²⁵ И екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсэскиро цэлонэ́ схачкирибнастыр и марунэ яныбнастыр и лэ́скирэ вычхуибнастыр.

²⁶ И пэ па́нджто дывэ́с еня́ (биекхэ́скиро дэш) гуруворэ́н, дуе бакрэ́н, дэшуштар екхэ-бэршытконэ бакрорэ́н, би дошакирэн,

²⁷ и ваш лэ́нгэ маруно́ яныбэ́н и вычхуибэн ваш гуруворэнгэ, бакрэнгэ и бакрорэнгэ, пир лэ́нгиро гиныбэ́н, пир упхэныбэ́н,

²⁸ и екхэ бузнэ дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсытконэ́ цэлонэ́ схачкирибнастыр и марунэ яныбнастыр и лэ́скирэ вычхуибнастыр.

²⁹ И пэ шо́вто дывэ́с охто́ гуруворэ́н, дуе бакрэ́н, дэшуштар екхэ-бэршытконэн бакрорэ́н, би дошакирэн,

³⁰ и ваш лэ́нгэ маруно́ яныбэ́н и вычхуибэн ваш гуруворэнгэ, бакрэнгэ и бакрорэнгэ, пир лэ́нгиро гиныбэ́н, пир упхэныбэ́н,

³¹ и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, апри́ч кажнонэ́-дывэсытконэ́ цэ́ло схачкирибэ́н и лэ́скиро маруно́ яныбэ́н, и лэ́скиро вычхуибэн.

³² И пэ эфта́то дывэ́с эфта́ гуруворэ́н, дуе́н бакрэ́н, дэшуштар екхэ-бэршытконэн бакрорэ́н би дошакирэн,

³³ и ваш лэ́нгэ маруно́ яныбэ́н и вычхуибэн ваш гуруворэнгэ, бакрэнгэ и бакрорэнгэ, пир лэ́нгиро гиныбэ́н, пир упхэныбэ́н,

³⁴ и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, упрэдыр кажнонэ́-дывэсытконэ́ цэлонэ́ схачкирибнастыр и марунэ яныбнастыр и лэ́скирэ вычхуибнастыр.

³⁵ Пэ охто́то дывэ́с тумэ́ндэ мэк тэ явэ́л свэ́нто скэдыибэ́н. На кэрэ́н нисави́ буты́.

³⁶ И янэ́н цэ́ло схачкирибэ́н, свэ́нто дыибэ́н, гудло́ тхув, лачхо́ Ра́скэ-Дэвлэ́скэ; екхэ гуруво́рэс, екхэ бакрэ́с, эфта́ екхэ-бэршытконэн бакрорэ́н, би дошакирэн;

³⁷ и кхэтанэ́ лэ́нца маруно́ яныбэ́н и почхуибэн ваш гуруворэскэ, бакрэскэ и бакрорэнгэ пир лэ́нгиро гиныбэ́н, пир упхэныбэ́н,

³⁸ и екхэ бузнэ́с дрэ свэ́нто дыибэ́н Ра́скэ-Дэвлэ́скэ пал грэ́хо, апри́ч кажнонэ́-дывэсытконэ́ цэ́ло схачкирибнэн и лэ́скиро маруно́ яныбэ́н, и лэ́нгиро вычхуибэн.

³⁹ Янэ́н дава́ Ра́скэ-Дэвлэ́скэ дрэ тумарэ́ свэ́нки, упрэдыр долэндыр, со тумэ́ англэды́р яндлэ́, пир совэ́л, ци пир ило́, сарэ́ цэлонэ́ схачкирибнэндыр тумарэ́ и марунэ тумарэ́ яныбнастыр, и тумарэ́ вычхуибнастыр и мирнонэ свэнтонэ́ дыибна́стыр.”