Čysly 28 - Библия - Пэ Балтитко Романи чиб (Романэс) 2019

Сыр тэ Янэ́н Свэ́нто Дыибэ́н

¹ И пхэндя́ Рай Дэвэ́л Мойза́скэ, ракири́:

² “Припхэн Израилёскирэ чхавэ́нгэ и пхэн лэ́нгэ: ‘Дыкхэ́н, соб (кай) Миро яныбэ́н, маро́ Миро сыр свэ́нто яныбэ́н Ма́нгэ, дро гудло́ тхув Ма́нгэ, тэ янэ́н Ма́нгэ дро пэ́скиро часо.’”

³ И пхэн лэ́нгэ: “Дава́ исын свэ́нто яныбэ́н ваш яг, сави́ тумэ́ сан бангэ́ тэ янэ́н Ра́скэ Дэвлэ́скэ: дуй бакрэ́ екхэ-бэршы́тка би дошакирэ пэ дывэ́с, дро цэ́ло схачкирибэ́н кажно дывэ́с.

⁴ Екхэ бакрэ́с ян ранкоса (злокоса), а явирэ бакрэ́с ян бэльвэле́;

⁵ и дро маруно́ яныбэ́н ян дэ́што паш ефа пшэничнонэ яржэстыр, перемешындло екхэ штартонэ гинаса вымардэ елеёстыр;

⁶ дава́-цэ́ло схачкирибэ́н пэ кажно дывэ́с, саво́ кэрдо́ сыс пашы́л бэ́рга Синаё, дро гудло́ тхув, свэ́нто яныбэ́н Ра́скэ-Дэвлэ́скэ;

⁷ и ваш тхадуно свэ́нто дыибэ́н пашы́л ла́тэ тэ явэ́л екх шта́рто гино пэ екхэ бакрэстэ: пэ свэ́нто штэ́то кэр вычхуибэн, мол (вино) Ра́скэ-Дэвлэ́скэ.

⁸ Явирэ́с бакрэ́с бэльвэле́, дасавэ́ марунэ яныбнаса, сыр злокостыр (ранкостыр), и дасавэ́ вычхуибнаса пашы́л лэ́стэ ян лэс дрэ свэ́нто яныбэ́н, дро гудло́ тхув, лачхо́ Ра́скэ-Дэвлэ́скэ.

Саватытко (Суботытко) Свэ́нто Дыибэ́н

⁹ А дро са́вато (субо́та) янэ́н дуе́н екхэ-бэршытконэн бакрэ́н би дошакиро, и ваш маруно́ дыибэ́н янэ́н дуй-дэшэнгирэ паша́ эфатыр пшэничнонэ яржэстыр, пиримешындло елеёса и вычхуибэн пашы́л лэ́стэ:

¹⁰ дава́-саватоскиро цэ́ло схачкирибэ́н дро кажно са́вато, буты́р кажнонэ́-дывэсэскирэ цэлонэ́ схачкирибнастыр и вычхуибэн пашы́л лэ́стэ.

¹¹ И дро нэво́ чхон тумаро́, янэ́н цэ́ло схачкирибэ́н Ра́скэ-Дэвлэ́скэ: барэ́ кхэритконэ́ мурдалэстыр (ското́стыр) дуе́н тэрнэн гуруворэ́н, екхэ́с бакрэ́с и эфта́ екхэ-бэршытконэн бакрэ́н би дошакиро,

Яныбэна́ дро Кажно Чхон

¹² и трин дэшта паша́ эфатыр пшэничнонэ яржэстыр, пиримешындло елеёса, дро маруно́ яныбэ́н пэ екхэ́стэ гурувэстэ, и дуй дэшта паша́ эфатыр пшеничнонэ яржэстыр, перемешандло елеёса, дро маруно́ яныбэ́н пэ бакрэстэ,

¹³ и пир дэ́што паш эфатыр пшэничнонэ яржэстыр, перемешындло елеёса, дро маруно́ яныбэ́н пэ кажнонэ́ бакрэстэ; дава́-цэ́ло схачкирибэ́н, гудло́ тхув, свэ́нто яныбэ́н, лачхо́ Ра́скэ-Дэвлэ́скэ;

¹⁴ и вычхуибэн кхэтанэ́ лэ́нца банго́ тэ явэ́л паш гино мол (вино) пэ гуруворэстэ, екх три́то паш гиностыр пэ бакрэстэ, и екх шта́рто паш гиностыр пэ бакрэстэ; дава́-цэ́ло схачкирибэ́н дро кажно нэво́ чхон дрэ сарэ́ бэршы́тка чхона́.

¹⁵ И екхэ́с бузнэ́с янэ́н Ра́скэ-Дэвлэ́скэ дрэ свэ́нто яныбэ́н пал грэ́хо: буты́р цэлонэ́ схачкирибнастыр, со пэ кажно дывэ́с тумэ́ сан бангэ́ тэ янэ́н лэс вычхуибнаса лэскирэса.

Яныбэ́н пэ Патради́

¹⁶ Дро пэ́рво чхон, пэ дэшуштарто чхонэ́скиро дывэ́с-Патради́ Ра́скирэ-Дэвлэ́скири.

¹⁷ И пэ дэшупанджто дывэ́с далэ́-чхонэ́скиро тэ явэ́л свэ́нко; эфта́ (битринэ́нгиро дэш) дывэса́ ёнэ исын бангэ́ тэ хан опресноки.

¹⁸ Пэ пэ́рво дывэ́с мэк тэ явэ́л тумэ́ндэ свэ́нто скэдыибэ́н, нисави́ буты́ тэ на кэрэ́н;

¹⁹ и янэ́н свэ́нто яныбэ́н, цэ́ло схачкирибэ́н Ра́скэ-Дэвлэ́скэ: барэ́ кхэритконэ́ мурдалэстыр (ското́стыр) дуе гурувэ́н, екхэ бакрэ́с и эфта́ екхэ-бэршытконэ бакрэ́н; би дошакиро бангэ́ ёнэ тэ явэ́н тумэ́ндэ.

²⁰ И кхэтанэ́ лэ́нца дро маруно́ яныбэ́н янэ́н пшэнично яржо́, пиримешиндло елеёса, трин дэшта паша́ эфатыр пэ кажнонэ́ гурувэстэ, и дуй дэшта паша́ эфатыр пэ бакрэстэ,

²¹ и пир дэ́што паш эфатыр ян пэ кажнонэ́стэ эфта́ бакрэ́ндыр,

²² и екхэ бузнэ́с дро свэ́нто дыибэ́н Ра́скэ-Дэвлэ́скэ пал грэ́хо, ваш жужакирибэн тумаро́;

²³ апри́ч цэ́ло схачкирибэ́н пэ ра́нко (пэ зло́ко), саво́ исын цэ́ло схачкирибэ́н кажнонэ́ дывэсэскиро.

²⁴ Адя́кэ янэ́н и дро кажно эфта́ дывэсэ́ндыр, дава́ исын маро́, свэ́нто дыибэ́н, гудло́ тхув, лачхо́ Ра́скэ-Дэвлэ́скэ; апри́ч кажнонэ́-дывэсэскиро цэ́ло схачкирибэ́н и лэ́скирэ вычхуибнастыр, трэй тэ янэ́н дава́.

²⁵ И пэ эфта́то дывэ́с мэк тэ явэ́л тумэ́ндэ свэ́нто скэдыибэ́н; на кэрэ́н нисави́ буты́.

Яныбэ́н пэ Свэ́нки Куркитка

²⁶ И дро дывэ́с, ке́ли янэ́на пэ́рва барьякирдэ́ (пло́ды) и ке́ли янэ́на Ра́скэ-Дэвлэ́скэ нэво́ маруно́ яныбэ́н дрэ эфтангирья (седмицы) тумарэ́, мэк тэ явэ́л тумэ́ндэ свэ́нто скэдыибэ́н; нисави́ буты́ тэ на кэрэ́н;

²⁷ и янэ́н цэ́ло схачкирибэ́н дро гудло́ тхув Ра́скэ-Дэвлэ́скэ: кхэритконэ́ мурдалэстыр (барэ́ ското́стыр) дуе́н гуруворэ́н, екхэ бакрэ́с и эфта́ екхэ-бэршытконэ бакрэ́н,

²⁸ и ваш лэ́нгэ дро маруно́ яныбэ́н пшэнично яржо́, перемешындло елеёса, трин дэшта паша́ эфатыр пэ кажнонэ́ гуруворэстэ, дуй дэшта паша́ эфатыр пэ бакрэстэ,

²⁹ и пир дэ́што паш эфатыр пэ кажнонэ́стэ эфта́ бакрэ́ндыр,

³⁰ и екхэ бакрэ́с дрэ свэ́нто дыибэ́н Ра́скэ-Дэвлэ́скэ пал грэ́хо, ваш жужакирибэн тумаро́;

³¹ Апри́ч кажнонэ́-дывэсытконэскиро цэ́ло схачкирибэ́н и маруно́ яныбэ́н ваш лэ́нгэ, янэ́н дава́ Ма́нгэ лэ́нгирэ вычхуибнаса: би дошакиро ёнэ исын бангэ́ тэ явэ́н ёнэ тумэ́ндэ.