Čysly 21 - Библия - Пэ Балтитко Романи чиб (Романэс) 2019

Э Юды Пиризорьякирдэ Арадас

¹ Ке́ли Ханааноскиро кра́ли о Арада, саво́ дживдя́ кэ паш-дывэсы́тко риг (юго), шундя́, со Израилё джа́ла дромэ́са Афаримостыр, то тэрдия́ пэ марибэ́н Израильтянэнца и вари-кицы́ лэ́ндыр лыя́ дро пле́но.

² И дыя́ Израилё совэ́л Ра́скэ-Дэвлэ́скэ, и пхэндя́: “Ко́ли отдэса адалэ́ манушэ́н дрэ мирэ́ васта́, то розмарава кэ руи́ны лэ́нгирэ фо́рья.”

³ И Рай Дэвэ́л шундя́ Израилёскири зан и отдыя́ Хананеен дрэ лэ́скирэ васта́, и ёв розмардя́ кэ руи́ны лэ́нгирэ фо́рья, и дыя́ лав долэ́ штэтоскэ: Хорма.

Харкуно Сап

⁴ Бэрга́тыр Ор гинэ́ ёнэ Лолэ́-морёскирэ (дэрьявэ́скирэ) дромэ́са, соб (кай) тэ обджан Эдомоскири пхув,

⁵ и ракирдэ́ мануша́ проти Растэ-Дэвлэ́стэ и про́ти Мойзастэ: “Со́скэ тумэ́ вылыджинэ́ амэн Египто́стыр, соб (кай) тэ мэрас амэ́нгэ пэ чхучи́ пхув, пал-дова́ со ада́й нанэ ни маро́, ни пани́, и амарэ́ дескэ яця́ джунгало́ (збрыдиндя) дава́ на́лачхо хабэ́н.”

⁶ И бичхадя́ Рай Дэвэ́л пэ манушэ́ндэ мижэх сапэн, савэ́ дукхавэнас манушэ́н, и мынэ́ бут мануша́ Израилёскирэ чхавэ́ндыр.

⁷ И явнэ́ мануша́ кэ Мо́йза и пхэндлэ́: “Кэрдя́м амэ грэ́хо, со ракирдям проти Растэ-Дэвлэ́стэ и пэ ту́тэ; помангпэ Ра́скэ-Дэвлэ́скэ, соб (кай), Ёв тэ отлыджал амэ́ндыр сапэн.” И мангдя́пэ Мо́йза пал манушэ́ндэ.

⁸ И пхэндя́ Рай Дэвэ́л Мойза́скэ: “Кэр пэ́скэ сапэс и чхув лэс пэ вучо́ кило, и ману́ш, савэ́с дандырэлас сап, дыкхи́ пэ лэ́стэ, ячэ́лапэ джидо́.”

⁹ И кэрдя́ Мо́йза харкунэ́ сапэс и чхудя́ лэс пэ вучо́ кило, и сыс адя́кэ: и ке́ли сап дандырэлас манушэ́с, ёв, дыкхи́, пэ харкунэ́ сапэстэ, ячэ́лапэ джидо́.

¹⁰ И гинэ́ Израилёскирэ чхавэ́, и тэрдинэ́ кэ Вамофо [Овото-ю.о.];

¹¹ И гинэ́ Вамофостыр, и тэрдинэ́ дро Ийе-Аваримо, пэ чхучи́ пхув, со исын проти Моа́во, кэ риг, кай уштэ́ла кхам (васто́ко).

¹² Одотхы́р гинэ́ ёнэ, и тэрдинэ́ пэ до́ло Заредо.

¹³ Гии одотхы́р, тэрдинэ́ ёнэ пэ доя́ Арноноскири паш пэ чхучи́ пхув, пир сави́ тхадэ́ла русло палэ ме́жа Амореёскири, пал-дова́ со Арноно исын пэ ме́жа Моавоскири, машки́р Моа́во и Амореё.

¹⁴ Палдава́ и пхэндло́ дрэ лылвари́ пал брани (марибэна) Ра́скирэ-Дэвлэ́скирэ.

¹⁵ “Одотхы́р гинэ́ кэ Вагебо пэ Суфа и Арноноскирэ сыгна рэкицы, и склоны, пир савэ́ рэкицы вытхадэна, савэ́ бандёна кэ Шебет-Аро и тхадэна кэ Моавоскиро яго́ро (краё).”

¹⁶ Одотхы́р гинэ́ ёнэ кэ Беэр, дава́ исын ґаны́нг, пал сави́ Рай Дэвэ́л пхэндя́ Мойза́скэ: “Скэ́дэ манушэ́н, и Мэ да́ва лэ́нгэ пани́.”

¹⁷ Тэды Израилё забагандя дая́ гилы́: “Пхэрдякирпэ, ґаны́нг, бага́н лэ́скэ;

¹⁸ ґаны́нг, сави́ выґанадэ тхага́рья, выґанадэ манушэ́нгирэ шэралэ́ пир упхэныбэ́н жэзлоскиро пэ́скирэ дэстэнца.” Чхучэ́ пхувья́тыр гинэ́ ёнэ дрэ Матана.

¹⁹ Матанатыр дро Нагалиило, Нагалиилостыр дро Вамофо,

²⁰ Вамофостыр дро Гаё, саво́ сыс пэ Моавоскири лошчы́на, пэ Фасгакирэ-бэрга́киро вучипэ́н, саво́ сыс рискирдо мо́са кэ чхучи́ пхув.

Израилё Пиризорьякирдя Сигонос

²¹ И бичхадя́ Израилё манушэ́н кэ Сигоно, Амореенгиро кра́ли, соб (кай) тэ пхэнэ́н:

²² “Дэ во́ля ма́нгэ тэ проджав тыри́ пхув, амэ на ява́са тэ заджас пэ фэ́лды и винаградники, амэ на ява́са тэ пьяс пани́ тырэ́ ґанынгэндыр, а джа́са крали́скирэ дромэ́са, пака проджаса тыро́ тхэм.”

²³ Нэ Сигоно на мэкця́ Израилё тэ джал пир лэ́скиро тхэм; и скэдыя́ Сигоно сарэ́н пэ́скирэ манушэ́н, и выгия́ пэ Израилё пэ чхучи́ пхув, и догия́ кэ Яацо, и мардя́пэ Израилёса.

²⁴ И домардя́ лэс Израилё куртала́са, и лыя́ пэ́скэ лэ́скири пхув Арноностыр кэ Явоко (Иавоко), кэ Амонитянэнгиро тхэм, пал-дова́ со зор сыс пэ Амонитянэнгирэ-тхэмэскири ме́жа.

²⁵ И лыя́ Израилё сарэ́ далэ́ фо́рья, и дживдя́ Израилё дрэ сарэ́ Амонитянэнгирэ фо́рья, кэ Есево́но и дрэ сарэ́ гава́, савэ́ сыс тэл лэ́скири зор;

²⁶ пал-дова́ со Есево́но сыс Сигоноскиро фо́ро, Аморее́нгирэ-крали́скиро, и ёв мардя́пэ, пэрвонэ́ Моавитоскирэ крали́са, саво́ сыс анги́л лэ́стэ, и лыя́ лэ́скирэ вастэ́стыр сари́ лэ́скири пхув кэ Арноно.

²⁷ Палдава́ ракирэ́на мануша́, савэ́ багана: “Джа́н дро Есево́но, мэк тэ кэрэ́н и тэ зорьякирэн фо́ро Сигоно”;

²⁸ пал-дова́ со яг выгия́ Есевоностыр, бари яг Сигоноскирэ форо́стыр, и хая Ар-Моа́во и тхагарьен, савэ́ рикирдэ Арноноскирэ вучипэна́.

²⁹ Бида ту́кэ, Моа́во! Хасинэ́ тумэ́, Хамососкирэ мануша́! Нашнэ лэ́скирэ чхавэ́, и лэ́скирэ чхае́н лыя́ Амореенгиро кра́ли Сигоно дро пле́но;

³⁰ амэ домардям лэн марибнытконэ́ бустенца (стрелэнца); хасия́ Есево́но кэ Дивоно, амэ чхучакирдям (спустошындям) лэн кэ Нофа, сави́ исын на́дур Медеватыр.

³¹ И дживдя́ Израилё пэ Амореенгири пхув.

³² И бичхадя́ Мо́йза тэ выдыкхэн Иазеро (Язеро), и лынэ́ гава́, савэ́ сыс тэл лэ́нгири зор, и ёнэ традынэ криг Амореен, савэ́ сыс дрэ лэ́ндэ.

Израилё Домардя́ Огос

³³ И рисинэ́, и гинэ́ кэ Васа́но. И выгия́ пэ лэ́ндэ Ого, Васаноскиро кра́ли, кокоро́ и сарэ́ лэ́скирэ мануша́, пэ марибэ́н кэ Едрея.

³⁴ И пхэндя́ Рай Дэвэ́л Мойза́скэ: “На дар лэ́стыр, пал-дава́ со Мэ отда́ва лэс и сарэ́ лэ́скирэ манушэ́н и сари́ лэ́скири пхув дрэ тырэ́ васта́, и ту кэрэ́са лэ́са, сыр ту кэрдя́н Сигоноса, Аморее́нгирэ крали́са, саво́ дживдя́ кэ Есево́но.”

³⁵ И домардэ́ ёнэ лэс и лэ́скирэ чхавэ́н и сарэ́ лэ́скирэ манушэ́н, адя́кэ со ние́кх на яця́пэ, и залынэ лэ́скири пхув.