Čysly 20 - Библия - Пэ Балтитко Романи чиб (Романэс) 2019

Мо́йза Дыяпэ Дукха́ кэ Кадесо

¹ И явнэ́ Израилёскирэ чхавэ́, саро́ скэдыибэ́н, пэ чхучи́ пхув Син дро пэ́рво чхон, и тэрдинэ́ мануша́ дро Кадесо, и одо́й мыя́ Мариам, и одо́й ла гарадэ́.

² И на сыс пани́ ваш манушэ́нгэ, и скэдынэ́пэ ёнэ пэ Мойзастэ и Аароностэ;

³ и мануша́ лынэ́ холя́са тэ жалинэнпэ пэ Мойзастэ и пхэндлэ́: “Ко́ли фэ́ни (екх) тэ мэрас тэды и амэ, ке́ли мынэ́ амарэ́ пша́ла франсэндыр анги́л Растэ-Дэвлэ́стэ!

⁴ со́скэ тумэ́ яндлэ́ Ра́скирэ-Дэвлэ́скиро скэдыибэ́н пэ дая́ чхучи́ пхув, соб (кай) тэ мэрас ада́й амэ́нгэ и амарэ́ кхэритконэ́ мурдалэскэ (скотоскэ)?

⁵ И ваш со тумэ́ вылыджинэ́ амэн Египто́стыр, соб (кай) тэ янэ́н амэн пэ дава́ чхучо́ штэ́то, кай нашты́ зя́рки тэ почхувэс дрэ пхув, нанэ инжыро, ни винаградо (дракх), ни гранатытка пхаба́, и адя́кэ-паць нанэ пани́ ваш пибэ́н?”

⁶ И гия́ Мо́йза и Ааро́но манушэ́ндыр кэ загиибэ́н дрэ скэдыибна́скири ша́тра, и пынэ́ пэ пэ́скирэ муя́, и явдя́ лэ́нгэ Ра́скирэ-Дэвлэ́скири сла́ва.

⁷ И пхэндя́ Рай Дэвэ́л Мойза́скэ, ракири́:

⁸ “Лэ дэсто́ кхенингоскиро (жэзло) и скэ́дэ манушэ́н, ту и Ааро́но, тыро́ пшал, и пхэнэ́н дрэ лэ́нгирэ якха́ бэргакэ, и ёй дэ́ла пэ́стыр пани́: и адя́кэ ту кэрэ́са лэ́нгэ пани́ бэрга́тыр, и панякирэса манушэ́н и лэ́нгирэ кхэритконэ́ мурдалэ́н.”

⁹ И лыя́ Мо́йза кхенингоскиро дэсто́ Ра́скирэ-Дэвлэ́скирэ мо́стыр, сыр Ёв припхэндя́ лэ́скэ.

¹⁰ И скэдынэ́ Мо́йза и Ааро́но манушэ́н кэ бэ́рга, и пхэндя́ ёв лэ́нгэ: “Шунэ́н, мануша́лэ, савэ́ на кандэ́на, нау́што амэ́нгэ далэ́ бэрга́тыр тэ дорэсэс ваш тумэ́нгэ пани́?”

¹¹ И ґаздыя́ Мо́йза пэ́скиро васт и пэкадя́ дрэ бэ́рга пэ́скирэ кхенингоскирэ дэстэса дуй мо́лы, и тхадыя зорья́са бут пани́, и пинэ́ мануша́ и лэ́нгирэ кхэри́тка мурдала́.

¹² И пхэндя́ Рай Дэвэ́л Мойза́скэ и Аароно́скэ: “Пал дова́, со тумэ́ на патяндынэ́ Ма́нгэ, соб (кай) тэ сыкавав Мири́ свэнтыма анги́л якха́ Израилёскирэ чхавэ́нгирэ, тумэ́ на залыджана адалэ́ манушэ́н пэ пхув, сави́ Мэ да́ва лэ́нгэ.”

¹³ Дава́ сыс пани́ Меривакиро, пашы́л сави́ загинэ́ дрэ чинга́рд Израилёскирэ чхавэ́ Ра́са-Дэвлэ́са, и Ёв сыкадя́ лэ́нгэ Пэ́скири свэнтыма.

¹⁴ И бичхадя́ Мо́йза Кадесостыр манушэ́н кэ Едомоскиро кра́ли тэ пхэнэ́н: “Адя́кэ ракирэ́ла тыро́ пшал, Израилё: ту джинэ́са саро́ пхарипэ́н, саво́ пыя́ пэ амэ́ндэ;

¹⁵ дада́ амарэ́ пиригинэ́ дро Еги́пто, и амэ дживдям кэ Еги́пто баро́ часо, и фуес кэрдэ́ Египтя́ни амэ́нгэ и амарэ́ дадэ́нгэ;

¹⁶ и дыям го́дла мангипнаса кэ Рай Дэвэ́л, и шундя́ Ёв амари́ зан (глос), и бичхадя́ Янголо́с, и Ёв вылыджия́ амэн Египто́стыр; и ґа́да, амэ сом дро Кадесо, фо́ро пашы́л тыро́ яго́ро (краё).

¹⁷ Амэ мангаса тэ мэкэс амэн тэ проджас пир тыри́ пхув: амэ на джа́са пир фэ́лды и на пир винаградники, и амэ на ява́са тэ пьяс пани́ тырэ́ ґанынгэндыр; нэ джа́са крали́скирэ дромэ́са, на рискираса ни пэ право (чачо́), ни пэ ле́во (зэ́рво) риг, пака пириджаса ме́жы пэ тыри́ пхув.”

¹⁸ Нэ Эдо́мо пхэндя́ лэ́скэ: “На джа́ пир мири́ пхув, а то мэ куртала́са (мечоса) выджава пэ ту́тэ.”

¹⁹ И пхэндлэ́ гил лэ́скэ Израилёскирэ чхавэ́: “Амэ джа́са барэ́ дромэ́са, и, ко́ли ява́са тэ пьяс тыро́ пани́, мэ и мирэ́ кхэри́тка мурдала́ (миро́ ското), тэды мэ ява́ва тэ плэскирав пал лэ́стэ; екхэ ґэрэ́нца мирэнца проджава, со ничи́ на мол.”

²⁰ Нэ ёв пхэндя́: “Ту на проджаса.” И выгия́ пэ лэ́стэ о Эдо́мо бутэ́ манушэ́нца и зоралэ́ вастэ́са.

²¹ И адя́кэ на закамдя́ Эдо́мо тэ дэл во́ля Израилёскэ тэ проджал пир лэ́скири пхув, и Израилё гия́ дрэ риг лэ́стыр.

Ааро́но Мэрэ́ла

²² И гинэ́ криг Израилёскирэ чхавэ́ Кадесостыр, и явнэ́ сарэ́ мануша́ кэ бэ́рга Ор.

²³ И пхэндя́ Рай Дэвэ́л Мойза́скэ и Аароно́скэ пэ бэ́рга Ор, пашы́л яго́ро Эдомоскирэ-пхувья́тыр:

²⁴ “Мэк тэ причхувэлпэ Ааро́но кэ пэ́скирэ мануша́; пал-дова́ со ёв на заджа́ла пэ пхув, сави́ Мэ да́ва Израилёскирэ чхавэ́нгэ, пал-дова́, со тумэ́ на шундлэ́ Миро припхэныбэ́н пашы́л Меривакиро пани́;

²⁵ и лэ Аароно́с и Елизарос, лэ́скирэ чхавэ́с, и залыджа лэн пэ бэ́рга Ор;

²⁶ и лэ Аароностыр лэ́скиро урибэ́н и ури дрэ лэ́стэ Елизарос, лэ́скирэ чхавэ́с, и мэк Ааро́но тэ отджал и ёв мэрэ́ла одо́й.”

²⁷ И кэрдя́ Мо́йза адя́кэ, сыр припхэндя́ Рай Дэвэ́л. Гинэ́ ёнэ пэ бэ́рга Оро анги́л сарэ́ манушэ́нгирэ якха́,

²⁸ и злыя́ Мо́йза Аароностыр лэ́скиро урибэ́н, и уридя дрэ лэ́стэ Елизарос, лэ́скирэ чхавэ́с. И мыя́ одо́й Ааро́но пэ бэрга́киро вучипэ́н. А Мо́йза и Елиза́ро гинэ́ тэлэ́ бэрга́тыр.

²⁹ И дыкхнэ́ сарэ́ мануша́, со Ааро́но мыя́, и обровэнас Аароно́с саро́ Израилёскиро кхэр трия́нда дывэса́.