Čysly 12 - Библия - Пэ Балтитко Романи чиб (Романэс) 2019

Ка́ра пэ Аароностэ и Мириаматэ

¹ И выпхэндлэ холы́ Мариам и Ааро́но Мойза́скэ пал ромня́тэ Ефиоплянкатэ, савья́ ёв лыя́, пал-дова́ ёв лыя́ пал пэ́стэ Ефиоплянка,

² и пхэндлэ́: “Ци екхэ́скэ Мойза́скэ ракирдя́ Рай Дэвэ́л? Ци на ракирдя́ Ёв и амэ́нгэ?”, – и шундя́ дава́ Рай Дэвэ́л.

³ Мо́йза сыс ману́ш ковлэдыр (смиренэдыр) сарэ́ манушэ́ндыр пэ пхув.

⁴ И пхэндя́ Рай Дэвэ́л наужакирдэс Мойза́скэ и Аароно́скэ и Мариамакэ: “Выджа́н тумэ́ тринджинэ кэ скэдыибна́скири ша́тра.” И выгинэ́ сарэ́ тринджинэ.

⁵ И згия Рай Дэвэ́л дро облокоскиро сты́лбо, и тэрдия́ пашы́л скиниякиро загиибэ́н, и кхардя́ Аароно́с и Мариам, и выгинэ́ ёнэ дуйджинэ́.

⁶ И пхэндя́: “Шунэ́н Мирэ́ лава́: ко́ли тэ явэ́л тумэ́ндэ Ра́скирэ-Дэвлэ́скиро проро́ко, тэды Мэ отчхакиравапэ лэ́скэ дрэ дыкхибэ́н, и дро суно́ Мэ ракиравас лэ́са;

⁷ нэ на адя́кэ, сыр Мирэ́ писхари́скэ Мойза́скэ, ёв исын чачуно́ пир саро́ Миро кхэр:

⁸ уштэ́нца кэ ушта́ Мэ ракира́ва лэ́са, и дыкхно (бицялэс), а на дро цямло пхэныбэ́н, и патри́н (о́бразо) Ра́скирэ-Дэвлэ́скири ёв дыкхэ́ла; сыр тумэ́ на дара́ндынэ тэ выракирэн Мирэ́ писхари́скэ Мойза́скэ?”

⁹ И росхачия Ра́скирэ-Дэвлэ́скири холы́ пэ лэ́ндэ, и Ёв отгия́.

¹⁰ И о́блоко отгия́ шатратыр, и ґа́да, э Мариам учхакирдяпэ проказаса сыр ивэса. О Ааро́но подыкхця́ пэ Мариаматэ, и ґа́да, ёй сыс дрэ прока́за.

¹¹ И пхэндя́ Ааро́но Мойза́скэ: “Миро Раё! На гин амэ́нгэ дро грэ́хо, со амэ кэрдя́м дылныпэ́н и кэрдя́м грэ́хо;

¹² на домэк, соб (кай) ёй тэ явэ́л, сыр муло́ бияндло (тыкномас): савэ́стэ, ке́ли ёв выджа́ла пэ́скрэ да́кирэ лочовя́тыр, то паш маса́ кирнынэ.”

¹³ И задыя го́дла Мо́йза кэ Рай Дэвэ́л: “Раё Дэ́вла! Састякир ла!”

¹⁴ И пхэндя́ Рай Дэвэ́л Мойза́скэ: “Ко́ли ла́киро дад чунгардэлас ла́кэ дро муй, тэды со, ци на трэиндя́ ла́кэ тэ ладжал эфта́ дывэса́? И адя́кэ мэк тэ явэ́л ёй выбичхады пэ эфта́ дывэса́ пал ста́но, а тэ́ньчи (после) нэвэ́стыр тэ рисёл.”

¹⁵ И сыс Мариам выбичхады пал ста́но эфта́ дывэса́ и мануша́ на джа́нас дро дром, кэ дава́ часо, пака рисия́ э Мариам.