Čysly 11 - Библия - Пэ Балтитко Романи чиб (Романэс) 2019

Мануша́ Жалинэнапэ пал Хабэ́н

¹ Мануша́ лынэ́ дро саро́ шуныбэ́н тэ жалинэнпэ Ра́скэ-Дэвлэ́скэ; и Рай Дэвэ́л шундя́, и росхачия Лэ́скири холы́, и захачи́я пэ лэ́ндэ Раскири-Дэвлэ́скири яг, и лыя́ Ёв тэ хасякирэ́л станоскиро яго́ро (краё).

² И лынэ́ тэ дэн го́дла мануша́ Мойза́скэ; и помангдяпэ Мо́йза Ра́скэ-Дэвлэ́скэ, и штылыя яг.

³ И дынэ́ лав далэ́ штэтоскэ: Тавера, пал-дова́ со одо́й захачи́я пэ лэ́ндэ Ра́скирэ-Дэвлэ́скири яг.

⁴ Мануша́, савэ́ явнэ́ явирэ рига́тыр, машки́р лэ́ндэ лынэ́ тэ латхэ́н ла́ска пэ ґара́ (пэ длу́гэс); лэ́нца и Израилёскирэ чхавэ́ сыс бэштэ́ и рондлэ́, и ракирдэ́: “Кон чалякирэла пхэрдэ́с амэн масэса?

⁵ Амэ рипираса мачхэ́, савэ́ амэ хаям дро Еги́пто ивья́ (дармэс) и гурки (бобирки), и дыни, и пурум, и пурум-пореё и сырь (чэсноко);

⁶ а акана́ ди амаро́ нашавэла зор, ничи́ нанэ, екх манна дрэ амарэ́ якха́.”

⁷ Манна сыс дасави́-паць сыр кориандрытко семё, видоса сыр бдолахо;

⁸ мануша́ псирдэ́ и скэдэнас ла, и мелиндлэ дрэ жэрновы бэлэдин ци курдэ (толкиндлэ) дрэ ступа, и кэрадэ дрэ кака́ви (котло), и кэрдэ́ ла́тыр марикля; пир смако ёй сыс дасави́-паць, сыр мариклы елеёса.

⁹ И ке́ли пахлын (роса) зджа́ла пэ ста́но раты́, тэды зджа́ла пэ лэ́стэ и манна.

¹⁰ О Мо́йза шундя́, со мануша́ ровэнас дрэ пэ́скирэ чэ́карья (семействы), кажно (сва́ко) пашы́л пэ́скирэ шатракирэ вудара́; и зоралэ́с захачи́я Ра́скирэ-Дэвлэ́скири холы́, и смэнтно сыс ваш Мойза́скэ.

¹¹ И пхэндя́ Мо́йза Ра́скэ-Дэвлэ́скэ: “Ваш со Ту мэнчынэса Тырэ́ писхари́с? И со́скэ мэ на латхём тангипэ́н анги́л Тырэ́ якха́, со Ту чхудя́н пэ ма́ндэ саро́ адалэ́-манушэ́нгиро пхарипэ́н?

¹² Нау́што мэ лыджавас сарэ́ адалэ́ манушэ́н дро миро пэр, и нау́што мэ бияндём лэн, со Ту ракирэ́са ма́нгэ: ‘Лы́джа лэн пэ тырэ́ васта́, сыр нянька лыджа́ла биято́с (тыкнэмасэс)’, пэ пхув, сави́ Ту совлахаса пхэндя́н тэ дэс лэ́нгирэ дадэ́нгэ?

¹³ каты́р ма́нгэ тэ лав мас, соб (кай) тэ дав сарэ́ адалэ́ манушэ́нгэ? Пал-дова́ со ёнэ ровэна анги́л ма́ндэ и ракирэ́на: ‘Дэ амэ́нгэ тэ хас мас.’

¹⁴ Мэ екхджино́ нашты́ (на могинав) тэ лыджав сарэ́н адалэ́ манушэ́н; пал-дова́ со ёнэ сыс пхарэ́ ваш ма́нгэ,

¹⁵ ке́ли Ту адя́кэ кэрэ́са ма́нца, тэды фэды́р мулякир ман, ко́ли мэ латхём тангипэ́н (жалима) анги́л Тырэ́ якха́, соб (кай) ма́нгэ тэ на дыкха́в миро хасибэ́н.”

Эфтадэша́ Пхурыдыра́

¹⁶ И пхэндя́ Рай Дэвэ́л Мойза́скэ: “Скэ́дэ Ма́нгэ эфтадэша́ муршэ́н Израилёскирэ пхурыдырэндыр, савэ́н ту джинэ́са, со (кай) ёнэ исын пхурыдыра́ и лэ́скирэ дыкхибнаскирэ, и лэ лэн кэ скэдыибна́скири ша́тра, соб (кай) ёнэ тэ ячэн одо́й ту́са.

¹⁷ Мэ зджава, и Мэ ява́ва тэ ракира́в одо́й ту́са, и Мэ ла́ва Духо́стыр, саво́ исын пэ ту́тэ, и чхува́ва Лэс пэ лэ́ндэ, соб (кай) ёнэ тэ лыджа́н ту́са манушэ́нгиро пхарипэ́н, а соб (кай) ту на екхджино́ тэ лыджас.

¹⁸ Манушэ́нгэ пхэн: ‘Выжужакирэнпэ кэ атасятуно дывэ́с, и явэ́на тэ хан мас; адя́кэ сыр тумэ́ рондлэ́ анги́л Ра́скирэ-Дэвлэ́скиро шуныбэ́н и ракирдэ́, кон чалякирэла пхэрдэ́с амэн масэса?’ Миштэ́с амэ́нгэ сыс дро Еги́пто, – тэды и дэ́ла тумэ́нгэ Рай Дэвэ́л мас, и тумэ́ явэ́на тэ хан:

¹⁹ на екх дывэ́с тумэ́ явэ́на тэ хан, на дуй дывэса́, на пандж дывэса́, и на дэш дывэса́ и на биш дывэса́,

²⁰ нэ саро́ чхон, пака ёв лэ́ла тэ джал тумарэ́ накхэстыр и ячэ́ла ваш тумэ́нгэ джунгало́ (брыдко), пал-дова́ со тумэ́ бидыкхнэ Рас-Дэвлэ́с, Саво́ сыс машки́р тумэ́ндэ, и рондлэ́ анги́л Лэ́стэ, ракири́: “Ваш со трэиндя́ сыс амэ́нгэ тэ выджас Египто́стыр?”

²¹ И пхэндя́ Мо́йза Ра́скэ-Дэвлэ́скэ: “Шовшэла́ тысёнцы сарэ́н адалэ́ манушэ́н, машки́р савэ́ндэ и мэ сом; а Ту ракирэ́са: “Мэ да́ва лэ́нгэ мас, и явэ́на тэ хан саро́ чхон!”

²² Ци тэ зачхинэс сарэ́н бакрэ́н и гурувэ́н, соб (кай) лэ́нгэ тэ ухтылэл (тэ явэ́л до́си)? Ци сарэ́ морёскирэ (дэрьявэ́скирэ) мачхэ́ скэдэ́напэ, соб (кай) тэ чалякирэн лэн?”

²³ И пхэндя́ Рай Дэвэ́л Мойза́скэ: “Нау́што Ра́скирэ-Дэвлэ́скиро васт яця́ кротко (тыкно́)? Акана́ ту дыкхэ́са, ци кэрэ́лапэ лав Миро кэ Ту, ци над?”

²⁴ Мо́йза выгия́ и пхэндя́ манушэ́нгэ Ра́скирэ-Дэвлэ́скирэ лава́, и скэдыя́ эфтадэшэ муршэ́н пхурыдырэ манушэ́ндыр, и чхудя́ лэн пашы́л ша́тра.

²⁵ И згия Рай Дэвэ́л дро о́блоко, и ракирдя́ лэ́са, и лыя́ Духо́стыр (Фаностыр), Саво́ сыс пэ лэ́стэ и дыя́ Лэс эфтадашэ пхурыдырэнгэ. И ке́ли мэкця́ пэ лэ́ндэ Ду́хо (Фа́но), то нэ ёнэ лынэ́ тэ ангилпхэнэн (тэ пророчынэн), нэ коригэды́р (позжэ) на пириячнэ.

²⁶ Дуй мурша́ ячнэ́пэ дро ста́но, екхэскиро лав сыс Елдадо, а явирэскиро лав сыс Модадо; нэ пэ лэ́ндэ сыс Ду́хо (Фа́но), и, со ёнэ ангилпхэнэнас дро ста́но [ёнэ сыс зачхиндлэ́ (записындлэ) нэ ёнэ на гинэ́ дрэ ша́тра шатратыр ёнэ ангилпхэнэнас дро ста́но-ю.о.]

²⁷ И припрастандыя тэрно́ ману́ш и роспхэндя́ Мойза́скэ, и пхэндя́: “Елдадо и Модадо ангилпхэнэна.”

²⁸ Дро отпхэныбэ́н пэ дава́ Ису́со (Ёхошуа́), Навиноскиро чхаво́, Мойза́скиро тэрно́ помогибнаскиро, екх савэ́с ёв выкэдыя́, пхэндя́: “Раё миро, Мо́йза! Припхэн лэ́нгэ тэ на кэрэ́н.”

²⁹ Нэ Мо́йза пхэндя́ лэ́скэ: “Ци на зэвлынэса ту пал ма́ндэ? Нэ, ко́ли б сарэ́ машки́р Ра́скирэ-Дэвлэ́скирэ манушэ́ндэ тэ явэ́н проро́ки, то Рай Дэвэ́л бичхавэлас Пэ́скиро Ду́хо (Фа́но) пэ лэ́ндэ!”

³⁰ И рисия́ Мо́йза дро ста́но, ёв и Израилёскирэ пхурыдыра́ (годэпхурэ́).

Рай Дэвэ́л Бичхавэ́ла Перепёлэн

³¹ И ґаздыя́пэ балва́л Ра́стыр-Дэвлэ́стыр, и яндя́ морёстыр (дэрьявэстыр) перепёлэн, и росчхурдыя лэн пашы́л ста́но (таборо (лод)), пэ екхэ-дывэсэскиро дром пир екх риг и пэ екхэ-дывэсэскиро дром пир яви́р риг пашы́л ста́но, пэ дуй куня́ (локти) вучэды́р пхувья́тыр.

³² И тэрдинэ́ мануша́, и саро́ дова́ дывэ́с, и сари́ рат, и саро́ яви́р дывэ́с скэдынэ́ перепёлэн; и кон на́бут скэдыя́, одова́ скэдыя́ дэш хомеры; и росчхудэ лэн ваш пэ́скэ пашы́л ста́но.

³³ Мас сыс дрэ лэ́нгирэ данда́ и на сыс схано, сыр Ра́скирэ-Дэвлэ́скири холы́ росхачия пэ манушэ́ндэ, то дыя́ ка́ра Рай Дэвэ́л манушэ́нгэ древа́н барэ́ франсэнца.

³⁴ И дынэ́ лав долэ́ штэтоскэ: Киброт-Гатаава, пал-дова́ со одо́й гарадэ́ манушэ́н, савэ́ сыс бокхалэ́ кэ хабэ́н.

³⁵ Киброт-Гатааватыр гинэ́ мануша́ дро Асирофо и тэрдинэ́ кэ Асирофо.