Čysly 1 - Библия - Пэ Балтитко Романи чиб (Романэс) 2019

Пэ́рво Пиригиныбэ́н пир Израиле

¹ И пхэндя́ Рай Дэвэ́л Мойза́скэ пэ Синаёскири чхучи́ пхув, дрэ скэдыибна́скири ски́ния, пэ пэ́рво дывэ́с явирэ-чхонэ́скиро, дро яви́р бэрш пир лэ́нгиро выгиибэн Египто́скирэ пхувья́тыр, ракири́:

² “Пиригинэн саро́ кхэтаныбэн (обшчына) Израилёскирэ чхавэ́ндыр пир лэ́нгирэ ро́ды лэ́нгирэ чэ́карья (семействы) [пир лэ́нгирэ-дадэнги́рэ кхэра́-ю.о.], пир лава́, кицы́ исын сарэ́ муршэ́н пир шэрэ́.

³ Бишэ́ бэршэ́ндыр и пхурэды́р, сарэ́н, кон сыс дрэ зор дро Израилё ваш марибэ́н, пир лэ́нгирэ отря́ды пиригинэн лэн – ту и Ааро́но.

⁴ Тумэ́нца трэй, соб (кай) тэ явэ́л екх ману́ш тэ явэ́н кажнонэ́ родыцо́стыр пир екхэ манушэ́стэ, саво́ дро пэ́скирэ-дадэ́скиро ро́до исын шэрало́.

⁵ И, акэ, исын муршэнгирэ лава́, савэ́ явэ́на тумэ́нца: Рувимостыр Елицуро, Шэдэураскиро чхаво́;

⁶ Симеоностыр (Семёностыр) Шелумиило, Цуришадаёскиро чхаво́;

⁷ Юдастыр Наасо́но, Аминадаво́скиро чхаво́;

⁸ Исахаростыр Нафанаило, Цуароскиро чхаво́;

⁹ Завулоностыр Елиано, Хелоноскиро чхаво́;

¹⁰ Иосифо́скирэ (Ёза́скирэ) чхавэ́ндыр: Ефремостыр Елишамо, Амиудоскиро чхаво́; Манасиястыр Гамалиило, Педацуроскиро чхаво́;

¹¹ Вениаминостыр Авидано, Гидеониякиро чхаво́;

¹² Даностыр Ахиэзеро, Амишадаескиро чхаво́;

¹³ Асиростыр Пагиило, Охраноскиро чхаво́;

¹⁴ Гадостыр Елиасафо, Регуиласкиро чхаво́;

¹⁵ Нефалимостыр Ахиро, Енаноскиро чхаво́.”

¹⁶ Дава́ исын выкэдынэ́ мурша́ кхэтаныбнастыр, барыдыра́ пэ́скирэ-дадэнги́рэ родыцэндыр (чангэндыр), Израилёскирэ-тысёнцэнгирэ шэралэ́.

¹⁷ И лыя́ Мо́йза и Ааро́но адалэн муршэ́н, савэ́н кхардэ́ пир лав.

¹⁸ И скэдынэ́ ёнэ саро́ скэдыибэ́н пэ пэ́рво дывэ́с явирэ-чхонэ́скиро. И пирипхэндлэ ёнэ пэ́скиро бияныпнаскиро ро́до, пир лэ́нгирэ ро́ды, пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р пир шэрэ́,

¹⁹ сыр ракирдя́ Рай Дэвэ́л Мойза́скэ. И кэрдя́ ёв лэ́нгэ пиригиныбэ́н пэ Синаёскири чхучи́ пхув.

²⁰ И сыс Рувимо́скирэ чхавэ́н, саво́ сыс Израилёскиро англатуно́ (пэ́рво), пир лэ́нгирэ ро́ды, пир лэ́нгирэ кхэри́тка ро́ды, пир лэ́нгирэ-дадэ́скирэ чэ́карья (семействы), пир лавэнгиро гиныбэ́н, пир шэрэ́, сарэ́н муршэ́н, бишэ́ бэршэ́ндыр и пхурэды́р, сарэ́н, конэ́стэ сыс зор тэ джал пэ марибэ́н,

²¹ пиригиндло сыс дрэ Рувимоскиро ро́дыцо (чанг) штардэша́ шов тысёнцы панджшэла́.

²² Симеоноскирэ чхавэ́н пир лэ́нгирэ ро́ды, пир лэ́нгирэ ро́дыцы, пир лэ́нгирэ чэ́карья (семействы), пир лавэнгиро гиныбэ́н, пир шэрэ́, сарэ́н муршэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

²³ пиригиндло сыс дрэ Симеоноскири ро́дыцо пандждэша́ еня́ тысёнцы триншэла́.

²⁴ Гадо́скирэ чхавэ́н пир лэ́нгирэ ро́ды, пир лэ́нгирэ кхэри́тка ро́ды (пле́ми), пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

²⁵ пиригиндло сыс дрэ Гадоскиро ро́дыцо (чанг) штардэша́ пандж тысёнцы шовшэла́ пандждэша́.

²⁶ Юда́скирэ чхавэ́н пир лэ́нгирэ ро́ды, пир лэ́нгирэ кхэри́тка ро́ды (пле́ми), пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́, кон сыс дрэ зор тэ джал пэ марибэ́н,

²⁷ пиригиндло сыс дрэ Юда́скиро ро́дыцо эфтадэша́ штар тысёнцы шовшэла́.

²⁸ Исахароскирэ чхавэ́н пир лэ́нгирэ ро́ды, пир лэ́нгирэ кхэри́тка ро́ды (пле́ми), пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

²⁹ пиригиндло сыс дрэ Исахароскиро ро́дыцо пандждэша́ штар тысёнцы штаршэла́.

³⁰ Завулоноскирэ чхавэ́н пир лэ́нгирэ ро́ды, кхэри́тка ро́ды (пле́ми), пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

³¹ пиригиндло сыс дрэ Завулоноскиро ро́дыцо (чанг) пандждэша́ эфта́ (битринэнсиро дэш) тысёнцы штаршэла́.

³² Иосифо́скирэ (Ёза́скирэ) чхавэ́н, Ефремо́скирэ чхавэ́н пир лэ́нгирэ ро́ды, пир лэ́нгирэ кхэри́тка ро́ды (пле́ми), пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

³³ пиригиндло сыс дрэ Ефремоскиро ро́дыцо штардэша́ тысёнцы панджшэла́.

³⁴ Манасия́скирэ чхавэ́н пир лэ́нгирэ ро́ды, пир лэ́нгирэ кхэри́тка ро́ды (пле́ми), пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

³⁵ пиригиндло сыс дрэ Манасия́скиро ро́дыцо (чанг) трия́нда дуй тысёнцы дуйшэла́.

³⁶ Вениамино́скирэ чхавэ́н пир лэ́нгирэ ро́ды, пир лэ́нгирэ кхэри́тка ро́ды (пле́ми), пир лэ́нгири чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

³⁷ пиригиндло сыс дрэ Вениаминоскиро ро́дыцо трия́нда пандж тысёнцы штаршэла́.

³⁸ Дано́скирэ чхавэ́н пир лэ́нгирэ ро́ды, пир лэ́нгирэ кхэри́тка ро́ды (пле́ми), пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

³⁹ пиригиндло сыс дрэ Даноскиро ро́дыцо шовдэша́ дуй тысёнцы эфташэла́.

⁴⁰ Асироскирэ чхавэ́н пир лэ́нгирэ ро́ды, пир лэ́нгирэ кхэри́тка ро́ды (пле́ми), пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

⁴¹ пиригиндло сыс дрэ Асироскиро ро́дыцо штардэша́ екх тысёнцо панджшэла́.

⁴² Нефалимоскирэ чхавэ́н пир лэ́нгирэ ро́ды, пир лэ́нгирэ кхэри́тка ро́ды (пле́ми), пир лэ́нгирэ чэ́карья (семействы), пир лавэнгиро гиныбэ́н, бишэ́ бэршэ́ндыр и пхурэды́р, сарэ́н, кон сыс дрэ зор тэ джал пэ марибэ́н,

⁴³ пиригиндло сыс дрэ Нефалимоскиро ро́дыцо (чанг) панджэша трин тысёнцы штаршэла́.

⁴⁴ Акэ, исын мануша́, савэ́ загинэ́ дрэ пиригиныбэ́н, савэ́н пиригиндлэ Мо́йза и Ааро́но и Израилёскирэ барыдыра́ – дэшуду́й мануша́, пэ екхэ манушэ́стэ кхэритконэ́ родо́стыр (племёстыр).

⁴⁵ И сыс сарэ́н, савэ́ загинэ́ дро пиригиныбэ́н, Израилёскирэ чхавэ́н, пир лэ́нгирэ чэ́карья (сэм΄и (ирья́)), бишэ́ бэршэ́ндыр и пхурэды́р, сарэ́, кон сыс дрэ зор тэ джал пэ марибэ́н дро Израилё,

⁴⁶ и сыс сарэ́н, савэ́ загинэ́ дро пиригиныбэ́н шовшэла́ трин тысёнцы панджшэла́ пандждэша́.

⁴⁷ А Леви́ты пир лэ́нгирэ-дадэнги́рэ стрэ́чы (поколении) на сыс пиригиндлэ машки́р лэ́ндэ.”

⁴⁸ И пхэндя́ Рай Дэвэ́л Мойза́скэ дасавэ́ лава́:

⁴⁹ “Екх Левиёскирэ ро́дыцы на залыджа дро пиригиныбэ́н, и на гин лэн кхэтанэ́ Израилёскирэ чхавэ́нца;

⁵⁰ нэ допатя Левитэ́нгэ ша́тра досыкаибна́са и саро́, со трэй ваш ла́кэ, со исын пашы́л ла́тэ; мэк ёнэ тэ лыджа́н ша́тра досыкаибна́са и саро́, со трэй ваш ла́кэ, и тэ дынаринэ́н (тэ служынэн) пашы́л ла́тэ, и пашы́л ша́тра мэк тэ чхувэ́н пэ́скиро ста́но;

⁵¹ и ке́ли явэ́ла трэй тэ пирилыджас ша́тра, мэк Леви́ты тэ ґаздэ́н ла; и ке́ли явэ́ла трэй тэ чхувэ́н ша́тра, мэк Леви́ты тэ чхувэ́н ла; а ко́ли подджа́ла вари-кон явирэ манушэ́ндыр, явэ́ла отдыно́ пэ мэрибэ́н.

⁵² Израилёскирэ чхавэ́ исын бангэ́ кажно тэ тэрдёл дро пэ́скиро ста́но и кажно пашы́л пэ́скиро сцяго (знамя), пир пэ́скирэ отря́ды;

⁵³ а Леви́ты сыс бангэ́ тэ чхувэ́н ста́но пашы́л ша́тра досыкаибна́са, соб (кай) тэ на явэ́л холы́ пэ Израилёскирэ-чхавэ́нгиро кхэтаныбэн, и явэ́на тэ тэрдён Леви́ты пэ стрэ́га пашы́л ша́тра досыкаибна́са.”

⁵⁴ И кэрдэ́ Израилёскирэ чхавэ́, сыр припхэндя́ Рай Дэвэ́л Мойза́скэ, адя́кэ ёнэ и кэрдэ́.