Avakumo 1 - Библия - Пэ Балтитко Романи чиб (Романэс) 2019

¹ Англатуно́ дыкхибэ́н, саво́ проро́ко Авакумо дыкхця́.

О Проро́ко Пхучэла

² Кицы́, мэ ява́ва тэ кхарав Тут, Раё Дэ́вла, и Ту на шунэса, кицы́ мэ ява́ва тэ годлав Ту́кэ пал “нахратыма!” Нэ Ту на дэ́са васт тэ ракхэ́с амэн.

³ Со́скэ Ту дэ́са ма́нгэ тэ дыкха́в чорипэ́н, и кэрэ́са адя́кэ, соб (кай) мэ тэ дыкха́в мэ́ньки? Пал-дава́ со чорья и нахрата рэ́нды исын анги́л мирэ́ якха́, мануша́ кошэнапэ и чингардэнапэ.

⁴ Пир дова́ Зако́но яця́ бизорья́киро (нашадя зор), и нанэ чачуно́ сэ́ндо. Фуй ману́ш пиризорьякирэла чачунэ́ манушэ́с, а сэ́ндо рискирэна, сыр камэ́на.

О Рай Дэвэ́л Отпхэнэ́ла

⁵ “Дыкхэ́н машки́р народы, и придыкхэнпэ, и акэ – тумэ́ кэрэ́на барэ́ якха́!”, – ракирэ́ла Рай Дэвэ́л. Пал-дова́ со Мэ кэра́ва дасаво рэ́ндо дрэ тумарэ́ дывэса́, дро саво́ тумэ́ на явэ́на тэ патя́н, на дыкхи́ пэ дова́, со тумэ́нгэ роспхэнэна.

⁶ Пал-дова́ со Мэ, акэ, ґазда́ва Халдеен, кирки и сы́гно нацыя, сави́ кхарэ́лапэ (двигинэлапэ) пир пхувья́киро буґлыпэ́н, соб (кай) тэ заухтылэн джиибна́скирэ штэ́ты, савэ́ исын на лэ́нгирэ.

⁷ Ёнэ исын даракунэ и трашанэ мануша́: пхаро́ сэ́ндо кэрэ́ла лэ́нгири зор, лэ́ндыр кокорэндыр выджа́ла сэ́ндо.

⁸ Лэ́нгирэ граё исын сыгэды́р леопардэндыр и ёнэ исын холямэдыр бэльвэлитконэ рувэндыр. Лэ́нгирэ уклистэнгирэ халадэ́ традэ́на барипнаса; лэ́нгирэ грая явэ́на дурипнастыр; ёнэ праста́на сы́рбы вурняла о́рло (ки́до), саво́ сыгэды́р явэ́ла тэ хал дорэсыбэ́н.

⁹ Ёнэ сарэ́ явэ́на тэ одлэн нахратэс, мина пэ лэ́нгирэ муя́ рискирды пэ васто́ко, ёнэ скэдэ́на пленнонэн сы́рбы пра́хо.

¹⁰ Ёнэ сыкавэ́на бипатыв кэ кра́лья, ёнэ санапэ холямэс тхагарьендыр, ёнэ просана кажно тва́рдыма (диз), пал-дова́ со ёнэ чхувэ́на валы пхувья́тыр и заухтылэна лэн.

¹¹ Тэ́ньци лэ́нгиро ду́хо (фа́но) парудёла и ёнэ джа́на сыр балва́л, и ёнэ кэрэ́на чорипэ́н: лэ́нгиро зор ячэ́лапэ ваш лэ́нгэ сыр лэ́нгиро дэвлоро.

Проро́ко Пхучэлапэ Яви́р Мо́ло

¹² Ци на сан Ту векэндыр и пэ сарэ́ ве́ки, О, Раё Дэ́вла, миро Дэ́вла, миро Екх Свэ́нто, – амэ на мэраса. Ту, Раё Дэ́вла! Ту выкэдыян лэн, Халдеен, ваш пхаро́ сэ́ндо пэ амэ́ндэ. Э, Ска́ла! Ту дыя́н зор лэ́нгэ тэ пирисыклякирэн амэн.

¹³ Тырэ́ якха́ исын древа́н свэ́нта, соб (кай) тэ дыкхэ́н пэ дая́ биба́хт, и лэ́нгэ нашты́ тэ дыкхэ́н фуипэ́н. Со́скэ Ту дыкхэ́са кодолэ́н, савэ́ кэрэ́на злыдниткэс, и Ту на ракирэ́са нисо́, сыр бибахтало́ ману́ш хасякирэ́ла одолэ́с, саво́ исын чачунэдыр лэ́стыр?

¹⁴ Со́скэ Ту кэрэ́са адя́кэ, со мануша́ ячэ́напэ сыр морёскирэ (дэрьявэ́скирэ) мачхэ́, сыр цапня, пэ савэ́ндэ нанэ барыдыро́?

¹⁵ Ёнэ, Халдеи, старэна манушэ́н вэндкаса, ёнэ ухтылэна лэн дрэ лэ́нгири кхуды́ (сеть), и ёнэ скэдэ́на лэн дро лэ́нгиро неводо, палдава́ ёнэ древа́н радынэ́напэ, и ёнэ исын весе́ла (лошалэ́).

¹⁶ Палдава́ ёнэ янэ́на свэ́нта дыибэна́ лэ́нгирэ кхудякэ и ёнэ хачкирэна дро́га смо́лы лэ́нгирэ неводоскэ; пал-дова́ со кхудятыр лэ́нгири до́ля (паш) исын барвалы, и пэ лэ́нгиро сками́нд исын бут хабэна.

¹⁷ Ци явэ́на ёнэ ишчо (инкэ́) тэ чхучакирэн пэ́скири кхуды́, и дурэды́р тэ марэ́н (тэ мулякирэ́н) манушы́тка на́цыи би тангипнаскирэс?