Apostolengiri Butý 7 - Библия - Пэ Балтитко Романи чиб (Романэс) 2019

Стехвано́скиро Ракирибэ́н

¹ Тэды пэ́рво раша́нгиро барыдыро́ пхуця́ Стехваностыр: “Ци саро́ дава́ исын чачипэ́н, дрэ со ёнэ тут бангякирэна?”

² И ёв отпхэндя́: “Пшала́лэ мирэ́, дадолэ! Вышунэн ман. Славу́тно Дэвэ́л сыкадыя́ амарэ́ дадэ́скэ Авраамо́скэ дрэ Месопатамия анги́л лэ́скиро пиритрадыпэн дро Харано,

³ и пхэндя́ лэ́скэ: ‘Мэк пэ́скири пхув и пэ́скиро ро́до, и джа́ дрэ доя́ риг, сави́ Мэ ту́кэ сыкава́ва’.

⁴ Тэды Авраа́мо мэкця́ Халдеенгири пхув и пиритрадыя дро Харано; коригэды́р, сыр лэ́скиро дад мыя́, Дэвэ́л пирикхардя лэс пэ дая́ пхув, пэ сави́ тумэ́ какана́ дживэ́на.

⁵ Ёв на дыя́ лэ́скэ мэкно́ миштыпэ́н ни пэ екх пиро́ (стопа) гэрьякиро барипнаса, нэ Ёв дыя́ лав лэ́скэ тэ дэл дая́ пхув сыр лэ́скири и со лэ́скирэ-чхавэ́нгирэ родо́скэ чхавэ́ явэ́на хулая́ пэ ада́я пхув, ке́ли дро дова́ часо Авраамостэ сарэ́са на сыс чхаворэ́н.

⁶ И ґа́да, Дэвэ́л пхэндя́ лэ́скэ: ‘Со лэ́скирэ-чхавэ́нгиро ро́до явэ́ла чу́жо пэ кодоя пхув и лэ́ндыр скэрэна писхарье́н и явэ́на тэ притасавэн штаршэла́ бэрш;

⁷ нэ Мэ, – пхэндя́ Дэвэ́л, – ява́ва тэ сэндякирав пхарэ́с одолэ́ – нацыякирэ манушэ́н, ваш конэ́скэ ёнэ явэ́на писха́рья; и палэ дава́ ёнэ выджа́на долэ́ пхувья́тыр и явэ́на тэ дынаринэ́н Ма́нгэ пэ дава́ штэ́то.

⁸ И Дэвэ́л кэрдя́ Завето Авраамоса тэ обчхинэнпэ; и адя́кэ Авраа́мо яця́ дадэ́са Исаако́скэ и ёв обчхиндя лэс пэ эфта́то дывэ́с; а Исаа́ко яця́ дадэ́са Яково́скэ, и Яково яця́ дадэ́са дэшудуенгэ патриархэнгэ.

⁹ И патриархи пир зэвлыныпэ́н бикиндлэ Ёзас сыр писхари́с дро Еги́пто; нэ Дэвэ́л сыс лэ́са,

¹⁰ и помогинэлас лэ́скэ дрэ сарэ́ лэ́скирэ пхарипэна, и дыя́ лэ́скэ годы́ и Фараоно́скирэ-Египто́скирэ крали́скири паты́в, саво́ и чхудя́ лэс балунитконэса пэ Еги́пто и пэ саро́ лэ́скиро кхэр.

¹¹ Нэ бокх пыя́ пэ сари́ Египто́скири и Ханаано́скири пхув, и сыс бари би́да; и амарэ́ дада́ на латхэнас пэ́скэ хабэ́н.

¹² Нэ ке́ли Яково шундя́ пал дова́, со дрэ Еги́пто исын маро́, ёв бичхадя́ одори́к екх мо́ло амарэ́ дадэн;

¹³ а ке́ли ёнэ явнэ́ яви́р мо́ло, Ёза (Иосифо) приґалыяпэ пэ́скирэ пшалэ́нгэ, и Фарао́но уджиндя́, савэ́ родо́стыр сыс Ёза.

¹⁴ Пало́ дава́ Ёза бичхадя́ пал пэскирэстэ дадэ́стэ Яковостэ и пал сари́ пэ́скири сэмэнцатэ, а сыс лэн эфтадэша́ панджджинэ.

¹⁵ Яково явдя́ дрэ Еги́пто, кай ёв мыя́ кокоро́ и адя́кэ-паць амарэ́ дада́;

¹⁶ и пирилыджинэ лэ́нгирэ тру́пы дро Сихемо и чхудэ́ дрэ копли́ца, сави́ киндя Авраа́мо дро Сихемо Еморэнгирэ чхавэ́ндыр пал руп.

¹⁷ Ке́ли лыя́ тэ подджа́л дава́ часо тэ кэрэ́лпэ пхэндло́ лав, пал саво́ дыя́ лав Дэвэ́л Авраамо́скэ, и Юды барьёнас дро Еги́пто и ячнэ́ бутыдыр,

¹⁸ пака яви́р кра́ли явдя́, саво́ на джиндя́ Ёзас.

¹⁹ Ёв хохаибнаса отлыджаласпэ кэ амарэ́ мануша́ и ёв на дэ́лас джиибэ́н амарэ́ дадэ́нгэ; ёв зачхувэлас лэн тэ вычхурдэн пэскирэн тыкнэ́ биятэ́н, соб (кай) одолэ́ тэ на дживэ́н.

²⁰ Дро дасаво часо бия́ндыя о Мо́йза (Моисеё), савэ́стэ сыс шукарипэ́н Дэвлэ́стыр, трин чхона́ лэс барьякирдэ́ дрэ лэ́скирэ-дадэ́скиро кхэр.

²¹ Нэ ке́ли лэс тыкниньконэс чхурдынэ́ яври́, Фараоноскири чхай и лыя́ лэс кэ пэ и барьякирдя лэс, сыр пэ́скирэс чхавэ́с.

²² И Мо́йза сыс сыклякирдо дро саро́ Египто́скиро годьварипэн, и ёв сыс зорало́ дрэ лава́ и пир рэ́нды.

²³ И ке́ли лэ́скэ яця́ штардэша́ бэрш, ёв закамдя́ тэ дыкхэ́н пэ́скирэ пшалэ́н, Израилёскирэ чхавэ́н;

²⁴ и, дыкхи́, сыр екхэ́скэ лэ́ндыр кэрдэ́ фуипэ́н, ёв затэрдия пал лэ́стэ и отхая палэ (отомстиндя) пал лэ́стэ, со пэкадя́ Египтянинос и замардя́ лэс.

²⁵ Ёв думиндя, со лэ́скирэ пша́ла ґалёна, со Дэвэ́л лэ́скирэ вастэ́са дэ́ла лэ́нгэ зракхибэ́н; нэ ёнэ на ґалынэ́.

²⁶ Ке́ли пэ яви́р дывэ́с ёв дыкхця́, сыр дуй Израильтя́ни чингардэпэ машки́р пэ́стэ, ёв камдя́ тэ раманякирэ́л (змиринэл) лэн, пхэни́ лэ́нгэ: “Тумэ́ сан пша́ла, палсо́ тумэ́ кэрэ́на фуипэ́н екх екхэ́скэ?

²⁷ Нэ екх лэ́ндыр шпулдя (пихниндя) Мойза́с дрэ риг и пхэндя́: “Кон чхудя́ тут сэндариса и ра́са пэ амэ́ндэ?”

²⁸ Ци на камэ́са ту тэ замарэс и ман адя́кэ-паць, сыр ту замардян атася́ Египтянинос?”

²⁹ Ке́ли Мо́йза шундя́ дава́ отпхэныбэ́н, ёв насця кэ Мидия, и яця́ одо́й тэ дживэ́л сыр чу́жо ману́ш, кай бия́ндынэ лэ́стэ дуй чхавэ́.

³⁰ Ке́ли прогия́ (накхця́) штардэша́ бэрш, Мойза́скэ сыкадыя́ Дэвлэ́скиро Янго́ло хрустостыр, саво́ хачия яга́са пэ чхучи́ пхув, на́дур бэрга́тыр, сави́ кхардэ́ “Синаё.”

³¹ Мо́йза сыс древа́н дивиндло, ке́ли ёв дыкхця́ дава́, Ёв подги́я пашылэды́р тэ роздыкхэл, и шундя́ Ра́скирэ-Дэвлэ́скири зан:

³² “Мэ сом Дэвэ́л тырэ́ дадэ́нгиро, Дэвэ́л Авраамо́скиро, Исаакоскиро и Яково́скиро.” Мо́йза издрандыя дара́тыр и лэ́стэ на сыс муршыпэн тэ ґаздэл якха́.

³³ И Рай Дэвэ́л пхэндя́ лэ́скэ: “Сури ґэра́, пал-дова́ со штэ́то, пэ саво́ ту сан тэрдо́, исын свэ́нто пхув.

³⁴ Мэ дыкхцём дро Еги́пто, сыр притасадэ Мирэ́ манушэ́н и Мэ шундём, сыр ёнэ пхарэ́с дэ́на ґондя́ и Мэ явдём тэ мэкав пэ во́ля лэн: джа́, какана́, Мэ бичхава́ва тут палэ дро Еги́пто.”

³⁵ Адалэ́ самонэ Мойза́с, савэ́с ёнэ на прилынэ́ и пхэндлэ́ лэ́скэ: “Кон чхудя́ тут сэндариса и ра́са?” Кокоро́ Дэвэ́л бичхадя́ лэс, соб (кай) ёв тэ ячэ́л сэндариса и выракхибнариса Янголоскирэ вастэ́са, саво́ сыкадыя́ лэ́скэ дро хру́сто.

³⁶ Адава́ Мо́йза вылыджия́ манушэ́н Египто́стыр, ёв кэрдя́ ди́вы и ґертыка́ дро Еги́пто пашы́л Лоло́ мо́рё (дэрья́в), и штардэша́ бэрш пэ чхучи́ пхув.

³⁷ Ѓа́да, одова́-паць Мо́йза, саво́ пхэндя́ Израилёскирэ чхавэ́нгэ: “Дэвэ́л тумаро́ бичхавэ́ла тумэ́нгэ Пророко́с, тумарэ́ пшалэ́ндыр, сыр Ёв бичхадя́ ман; кандэ́н Лэс.”

³⁸ Акэ, ёв роспхэнэлас манушэ́нгэ, савэ́ сыс кэдынэ пэ чхучи́ пхув пал дова́, со Янго́ло лэ́скэ ракирдя́ пэ бэ́рга Синаё, и ёв сыс амарэ́ дадэ́нца; ёв исын одова́-паць, саво́ лыя́ джидэ́ лава́, соб (кай) тэ пиридэл лэн тумэ́нгэ;

³⁹ Савэс амарэ́ дада́ на закамлэ тэ кандэ́н, и на прилынэ́ лэс, а рисинэ́ пэ́скирэ илэнца кэ Еги́пто,

⁴⁰ и пхэндлэ́ Ароноскэ: “Кэр амэ́нгэ дэвлэн, савэ́ лыджа́нас амэн, пал-дова́ со Мо́йза, саво́ вылыджия́ амэн Египто́скирэ пхувья́тыр, амэ на джина́са, со лэ́са кэрдя́пэ.”

⁴¹ И кэрдэ́ ёнэ гуруво́рэс дрэ долэ́ дывэса́, ёнэ яндлэ́ свэ́нта дыибэна́ идолоскэ, и радындлэпэ пашы́л пэ́скирэ-вастэнгирэ бутя́.

⁴² И Дэвэ́л отрисия лэ́ндыр и ячкирдя́ лэн тэ мангэ́нпэ болыбна́скирэ чэргэненгэ, сыр пал дава́ исын чхиндло́ дрэ пророкэнгири лылвари́: “Мануша́лэ Израилёскирэ! Ци янэ́нас тумэ́ ма́нгэ чхиндлэ́ мурдалэ́н и свэ́нта дыибэна́ пал далэ́ штардэша́ бэрш пэ чхучи́ пхув.

⁴³ Тумэ́ лыджа́нас пэ́са тумарэ́ – дэвлэскири Молохоскири ша́тра, Ремфаноскири чэргэн и и́долы, савэ́н тумэ́ кэрдэ́, соб (кай) тэ мангэ́нпэ лэ́нгэ; и Мэ бичхава́ва тумэн дурэды́р Вавилоно́стыр.”

⁴⁴ Дая́ ша́тра сыс тумарэ́ дадэндэ пэ чхучи́ пхув сы́рбы доракирибэ́н, со пхэндя́ Дэвэ́л Мойза́скэ, тэ чхувэ́л дасави́ ша́тра, сави́ ёв дыкхця́;

⁴⁵ сави́ амарэ́ дада́ кхэтанэ́ Исусо́са (Ёхошуаса) лынэ́ Пэ́са ша́тра дрэ дая́ риг, сави́ ёнэ заухтылдэ и савья́тыр Дэвэ́л вытрадыя́ амарэ́ дадэнги́рэ якхэ́ндыр манушэ́н, савэ́ дживдэ́ одо́й кэ Давидо́скирэ дывэса́;

⁴⁶ адава́ Дави́до яця́ дро́го Дэвлэ́скэ и ёв мангдя́ Лэ́стыр тэ кэрэ́л ша́тра Яково́скирэ Дэвлэ́скэ;

⁴⁷ нэ Соломо́но чхудя́ Лэ́скэ Кхэр.

⁴⁸ Нэ Са́мо Вучэды́р Дэвэ́л на дживэ́ла дрэ кхэра́, савэ́ кэрдэ́ манушы́тка васта́, адя́кэ, сыр ракирэ́ла пал дава́ проро́ко:

⁴⁹ “Болыбэ́н исын Миро троно, и пхув исын тэл Мирэ́ ґэра́: саво́ кхэр тумэ́ могинэ́на Ма́нгэ тэ кэрэ́н? – ракирэ́ла Дэвэ́л, – ци кай могинэ́ла тэ явэ́л штэ́то Ма́нгэ ваш откхиныбэн?

⁵⁰ Ци на Мирэ́ вастэ́са кэрдо́ дава́ саро́?”

⁵¹ Тумэ́ сан пхарэ́-илытка мануша́, савэ́ шунэ́на Дэвлэ́скиро лав, а сы́рбы кашукэ усае́кх кэрэ́на пир пэ́скиро! Тумэ́ сан адасавэ́-паць, сыр и тумарэ́ дада́, тумэ́ ўса́ды (сак) (усегда) са́нас проти Свэ́нто Ду́хо (Фа́но).

⁵² Конэ́с пророкэндыр на традынэ тумарэ́ дада́? Ёнэ замардэ́ (умардэ) одолэ́н, кон анги́л ракирдя́ пал Христосо́скиро явибэн, нэ тумэ́ какана́ ячнэ́ Лэ́скирэ здыибнарья и замарибнарья!

⁵³ Тумэ́, савэ́ дорэснэ́ (лынэ́) янголэндыр Зако́но, и савэ́ на зракхнэ́ лэс.”

Стехвано́с Домарэ́на Барэ́нца

⁵⁴ Ке́ли ёнэ шундлэ́ дава́, лэ́нгирэ илэ пхарадынэ холя́тыр и ёнэ скрежындлэ дандэнца пэ лэ́стэ.

⁵⁵ Нэ Стехвано, саво́ сыс пхэрдо́ Свэнтонэ́ Духо́са, дыкхця упрэ́ пэ болыбэ́н и дыкхця́ Дэвлэ́скири сла́ва и Исусо́с, саво́ сыс тэрдо́ пир чачи́ риг Дэвлэ́стыр,

⁵⁶ И пхэндя́ ёв: “Дыкхэ́н! Мэ дыкха́ва отчхакирдо болыбэ́н и Манушэ́скирэ Чхавэ́с, Саво́ сыс тэрдо́ пир чачи́ риг Дэвлэ́стыр.”

⁵⁷ Нэ ёнэ задынэ го́дла и закэрдэ пэ́скирэ кана́, и сарэ́ кхэтанэ́ чхурдынэпэ пэ лэ́стэ;

⁵⁸ и ёнэ тырдынэ лэс пал фо́ро и домардэ́ лэс барэ́нца. А якхи́тка чхудэ́ пэ́скирэ и́ди пашы́л тэрнэ́-манушэ́скирэ ґэра́, савэ́с кхардэ́ Савло.

⁵⁹ Ёнэ ишчо (инкэ́) мардэ́ Стехванос барэ́нца, а Стехвано мангдя́пэ Дэвлэ́скэ и ракирдя́: “Раё Дэ́вла, Ису́се! Прилэ́ миро ду́хо (фа́но).”

⁶⁰ И ёв пыя́ пэ чанга́ и зоралэ́ заня́са пхэндя́: “Раё Дэ́вла! На гин дава́ грэ́хо пал лэ́ндэ.” И далэ́ лавэ́нца Стехвано мыя́.