Apostolengiri Butý 3 - Библия - Пэ Балтитко Романи чиб (Романэс) 2019

Апо́столы Высастякирэ́на Лангалэ́с

¹ Пэ́три и Иа́но е́кхвар гинэ́ кхэтанэ́ дрэ Кхангири́ пэ бэльвэлитко мангипэ́н:

² и сыс одо́й екх ману́ш, саво́ сыс лангало бияныпнастыр, савэ́с со дывэ́с янэ́нас и чхувэ́нас тэ бэшэ́л пашы́л Кхангирья́кири по́рта, сави́ кхарэ́на Лолы, соб (кай) ёв тэ мангэ́л дыибэ́н манушэ́ндыр, савэ́ заджанас дрэ Кхангири́;

³ ке́ли адава́ ману́ш дыкхця́ Пэтрис Ианоса анги́л загиибэ́н дрэ Кхангири́, ёв лыя́ тэ мангэ́л лэ́ндыр.

⁴ И Пэ́три ракхунэс дыкхця́ Ианоса пэ лэ́стэ и пхэндя́: “Дыкх по амэ́ндэ.”

⁵ И ёв лыя́ ракхунэс тэ дыкхэ́л пэ лэ́ндэ, ужакири, со ёнэ дэ́на вари-со лэ́скэ.

⁶ Нэ Пэ́три пхэндя́: “Сувнака́й и руп ма́ндэ нанэ; нэ дова́, со ма́ндэ исын, мэ да́ва ту́кэ: ваш лав Исусо́скиро Христосо́скиро Назаретостыр, ушты́ и псир.”

⁷ И ёв лыя́ лэс пал чачо́ васт и ґаздыя́; и дрэ дова́-паць часо лангалэскирэ ґэра́ высастинэ.

⁸ Ману́ш ухтя пэ ґэра́ и лыя́ тэ псирэ́л, и кхэтанэ́ лэ́нца гия́ дрэ Кхангири́, ёв псирдя́ и ухтя и шардя Дэвлэ́с.

⁹ И сарэ́ мануша́ дыкхнэ́ лэс, сыр ёв псирэлас и шарэлас Дэвлэ́с;

¹⁰ и ёнэ ґалынэ́ лэс, со ёв сыс дова́-паць ману́ш, саво́ сыс бэшто́ пашы́л Кхангирья́кири Лолы по́рта и мангэлас дыибэ́н; дар и ди́во облынэ лэн, со кэрдя́пэ адалэ́ манушэ́са.

Пэтри́скиро Пхэныбэ́н дрэ Кхангири́

¹¹ Нэ палдова́, со лангало, саво́ высастия, на отджалас Пэтристыр Ианоса, сарэ́ мануша́ прастандынэпэ одори́к кэ ёнэ, пэ дова́ штэ́то, саво́ кхарэ́на Соломоно́скиро трэ́мо.

¹² И ке́ли Пэ́три дыкхця́ дава́, ёв пхэндя́ манушэ́нгэ: “Мануша́лэ Израилёскирэ! Со тумэ́ дивинэнапэ пэ дава́? Со́скэ тумэ́ дыкхэ́на адя́кэ пэ амэ́ндэ, сы́рбы, акэ, амэ пэ́скирэ зорья́са ци джиибнаса дрэ дар анги́л Дэвлэ́стэ кэрдя́м адя́кэ, со адава́ ману́ш лыя́ тэ псирэ́л?

¹³ Дэвэ́л Авраамо́скиро и Исако́скиро и Яково́скиро, Дэвэ́л амарэ́ дадэ́нгиро, прославиндя Пэ́скирэ Чхавэ́с Исусо́с, Савэс тумэ́ здынэ и Савэ́стыр отпхэндлэпэ анги́л Пилатостэ, ке́ли Пила́то отсэндиндя тэ отмэкэ́л Лэс пэ во́ля.

¹⁴ Нэ тумэ́ Свэнтонэстыр и Чачунэстыр отпхэндлэпэ, а вымангнэ, соб (кай) тумэ́нгэ тэ отмэкэн розмарибнарис;

¹⁵ нэ тумэ́ мулякирдэ́ джиибна́скирэ Шэрэ Рас, Конэ́с Дэвэ́л отджидякирдя́ мэрибна́стыр и амэ сам якхи́тка дро дава́.

¹⁶ И патяибна́са дро Лэ́скиро лав кэрдя́ зоралэды́р адалэс, савэ́с тумэ́ дыкхэ́на и джинэ́на, и патяибэ́н, саво́ исын Лэ́стыр, высастякирдя́ лэс анги́л тумэ́ндэ сарэ́ндэ.

¹⁷ Пшала́лэ! Какана́ мэ джино́м (джина́в), со тумэ́ и тумарэ́ раё, кэрдэ́ дава́ пир наджиныбэн;

¹⁸ нэ Дэвэ́л саро́ кэрдя́ кэ ко́нцо/яго́ро (сполниндя), со ракирдэ́ Лэ́скирэ проро́ки, со Лэ́скирэ Христосо́скэ явэ́на барэ́ мэ́ньки.

¹⁹ Рискирэ́н пэ́скиро джиибэ́н и рисён кэ Дэвэ́л, соб (кай) тумарэ́ грэ́хи тэ явэ́н кхослэ тумэ́ндыр;

²⁰ соб (кай) тэ бичхавэл Рай Дэвэ́л тумэ́нгэ яви́р лачхо́ часо тэ подрикирэ́л тумэн, соб (кай) Ёв могинэлас тэ бичхавэл Исусо́с Христосо́с, Саво́ сыс ужэ выкэдыно тумэ́нгэ;

²¹ Савэс болыбэ́н сыс банго́ тэ прилэл кэ/жы́ко дава́ часо, пака Дэвэ́л кэрэ́ла саро́, и пал Конэ́стэ англэды́р ракирдя́ пир Пэ́скирэ свэнтонэ́ пророкэ́ндэ свэто́скирэ англыпна́стыр.

²² Мо́йза ж пхэндя́: “Тумаро Рай Дэвэ́л чхувэ́ла тумарэ́ пшалэ́ндыр Пророко́с, сыр и ман; кандэ́н Лэс дро саро́, со Ёв явэ́ла тэ ракирэ́л тумэ́нгэ.

²³ И явэ́ла адя́кэ, со кажно ману́ш, кон на явэ́ла тэ кандэл одолэ́ Пророко́с, лэ́лапэ криг манушэ́ндыр тэ хасёл.”

²⁴ Сарэ́ проро́ки, Самуилостыр и савэ́ сыс коригэды́р (позжэ) лэ́стэ, сарэ́ ракирдэ́, упхэндлэ пэ далэ́ дывэса́.

²⁵ Тумэ́ сан пророкэ́нгирэ чхавэ́ и заветоскирэ, пал савэ́ндэ Дэвэ́л дыя́ лав тумарэ́ дадэ́нгэ; Ёв ракирдя́ Авраамо́скэ: ‘Сарэ́ мануша́ тырэ́ родо́стыр пэ пхув явэ́на бахтякирдэ Дэвлэ́стыр’.

²⁶ Кэ тумэ́ пэ́рва, Дэвэ́л отджидякирдя́ мэрибна́стыр Пэ́скирэ Чхавэ́с и бичхадя́ Лэс кэ тумэ́, соб (кай) тэ бахтякирэ́л тумэн, соб (кай) кажнонэс тумэ́ндыр тэ отрискирэл налачхэ́ тумарэ́ рэндэ́ндыр.”