Apostolengiri Butý 28 - Библия - Пэ Балтитко Романи чиб (Романэс) 2019

Пэ Ма́льта

¹ И ке́ли амэ зракхцямпэ и гиям пэ брэ́го, тэды амэ уджиндям, со дава́ штэ́то кхардяпэ Мелита.

² А чу́жа штэтытка мануша́ сыкадэ амэ́нгэ древа́н бари пшалы́тко паты́в: ёнэ кэрдэ́ бари яг и прилынэ́ амэн, пал-дова́ со сыс шылало и гия́ баро́ брышы́нд.

³ И ке́ли Па́вли скэдыя́ бут хру́сты (кусты) и чхудя́ пэ яг, тэды выухтя сап ягатыр и ухтылдяпэ пал лэ́скиро васт.

⁴ Ке́ли адалэ́ штэтытка мануша́ дыкхнэ́, со пэ Павли́скиро васт сыс убладо сап, ёнэ лынэ́ тэ ракирэ́н екх екхэ́скэ: “Чачо́, кадава́ ману́ш исын розмарибнари, пало́ дава́, сыр ёв зракхцяпэ морёстыр (дэрьявэстыр), Дэвлэ́скиро сэ́ндо на дэ́ла лэ́скэ тэ дживэ́л.”

⁵ Нэ ёв стринскирдя пэстыр сапэс дрэ яг, и ёв на кэрдя́ лэ́скэ нисаво́ фуипэ́н.

⁶ А ёнэ ужакирдэ, со ёв явэ́ла тэ шулёл ци сыг пэрэ́ла муло́; нэ адя́кэ, сыр ёнэ ужакирдэ ґара́ и дыкхнэ́, со нисаво́ фуипэ́н на кэрдя́пэ лэ́са, тэды ёнэ пириячнэ фуес тэ думинэн пал лэ́стэ, и лынэ́ тэ ракирэ́н, со ёв сыс Дэвэ́л.

⁷ Пашы́л дова́ штэ́то сыс фэлатиня́ екхэ барыдырэстэ, саво́ сыс хула́й пир дава́ о́строво (джип), конэ́с кхардэ́ Публиё; ёв прилыя́ амэн и амэ дыкхцям лэ́скиро лачхо́ ило́.

⁸ Лэ́скиро дад сыс пашто́ дро чхуибэ́н насвало́, лэ́стэ сыс хачкирибэ́н и дукхандынэ виндырья; а Па́вли гия́ кэ ёв, помагдяпэ Дэвлэ́скэ, чхудя́ васта́ пэ лэ́стэ и высастякирдя́ лэс.

⁹ Пало́ (после) дова́, сыр дава́ кэрдя́пэ, сарэ́ насвалэ далэ́ штэто́стыр явэ́нас и сыс высастякирдэ:

¹⁰ ёнэ сыкадэ бари паты́в амэ́нгэ, и ке́ли амэ скэдыямпэ тэ традас дурыдыр, ёнэ дынэ́ амэ́нгэ пэ́са дро дром саро́, со амэ́нгэ трэиндя́.

¹¹ И пир трин чхона́ амэ традыям пэ Александриякири па́рма, сави́ сыс тэрды одо́й ивантэ (зимакиро) и сави́ кхардэ́ Диаскуры.

¹² Амэ явдя́м дрэ Сиракузы, и яцямпэ одо́й трин дывэса́.

¹³ Одотхы́р амэ плывиндям (дыя́м пли́ма) трусця́л и дрэ Ригия, и пал-дова́ со, сыр пир дывэ́с ґаздыя́пэ паш-дывэсы́тко балва́л, амэ пэ яви́р дывэ́с затрадыям дрэ Путеолы,

¹⁴ кай амэ латхям пшалэ́н, и ёнэ мангнэ́ амэн тэ явас пашы́л лэ́ндэ эфта́ дывэса́. Тэ́ньци амэ гиям дро Римо.

¹⁵ И ке́ли пша́ла дро Римо шундлэ́ пал амэ́ндэ, ёнэ гинэ́ амэн тэ стрэнинэн кэ Апиёскиро Форумо и кэ Трин Кирчымы, а ке́ли Па́вли дыкхця́ лэн, ёв парикирдя Дэвлэ́скэ и яця́ муршканэдыр.

¹⁶ Ке́ли амэ явдя́м дро Римо, тэды тысёнцэнгиро барыдыро́ дыя́ во́ля Павлискэ тэ дживэ́л пэ́скэ кхэтанэ́ бахталэдыр пэ́скирэ халадэса-ракхибнариса.

¹⁷ Пир трин дывэса́ Па́вли кхардя́ кхэтанэ́ патывалэ́ Юдэ́н, и, ке́ли ёнэ скэдынэ́пэ, ёв пхэндя́ лэ́нгэ: “Мануша́лэ-Пшала́лэ! Мэ со́мас закэдыно дро Ерусалимо и отдыно́ дрэ Римлянэнгирэ васта́, хоць мэ нисаво́ чорипэ́н на кэрдём проти амарэ́ манушэ́ндэ ци амарэ́ дадэнги́рэ сыкляибэна;

¹⁸ савэ́ допхучнэ ма́ндыр и камлэ́ тэ отмэкэн, пал-дова́ со ёнэ на латхнэ́ пал ма́ндэ нисави́ банг, соб (кай) мэ тэ явав мол мэрибна́скэ.

¹⁹ Нэ палдова́, сыр Юды ракирдэ́ пэ ма́ндэ, ма́нгэ буты́р ничы́ на ячэласпэ, сыр тэ мангав сэ́ндо, и мэ кэрдём дава́ на ваш дова́, соб (кай) тэ бангякирав мирэ́ манушэ́н.

²⁰ Палдава́ мэ и кхардём тумэн, соб (кай) тэ дыкха́в и тэ ракира́в тумэ́нца; пал-дова́ со пал Израилёскири наде́я кадалэ́ зандирья́ (цэ́пи) исын пэ ма́ндэ ададывэ́с.”

²¹ И ёнэ пхэндлэ́ лэ́скэ: “Амэ нисавэ лыла́ на дорэсцям пал ту́тэ Юдэя́тыр, и нико́н пшалэ́ндыр, савэ́ явэ́нас кэ амэ, на ракирдя́ нисаво́ чорипэ́н пал ту́тэ.

²² Нэ амэ камаса кокорэ́ ту́тыр тэ шунас, сыр ту думинэса, пал-дова́ со амэ шундя́м пал дова́ сыкляибэн, пал саво́ машки́р бутэндэ манушэндэр джа́на чингарда́.”

²³ Ёнэ доракирдэпэ Павлиса пал дывэ́с, и древа́н бут мануша́ явнэ́ кэ ёв кхэрэ́; ёв злокостыр кэ/жы́ко бэльвэ́ль ракирдя́ лэ́нгэ пал Дэвлэ́скиро Кралипэ́н, и допхэнэлас лэ́нгэ пал Исусо́стэ Мойза́скирэ Законо́стыр, и пророкэ́нгирэ чхиныбнастыр.

²⁴ Па́вли упатякирдя вари-савэ́н манушэ́н дро дова́, со исын пхэндло́, а яви́р на патяндынэ́.

²⁵ Ёнэ на сыс дрэ екх годы́ машки́р пэ́стэ, и лынэ́ тэ джа́н пэ́скэ коригэды́р долэ́стыр, сыр Па́вли пхэндя́ лэ́нгэ екх лав: “Чачипэ́н пхэндя́ Свэ́нто Ду́хо (Фа́но) тумарэ́ дадэ́нгэ пир пророкостэ Исаёстэ, ракири́:

²⁶ “И джа́ кэ адалэ́ мануша́ и пхэн: ‘Тумэ́ явэ́на канэнца тэ шунэ́н и на ґалёна, и тумэ́ явэ́на тэ дыкхэ́н и нисо́ на дыкхэ́на.

²⁷ Пал-дова́ со кадалэ́ манушэ́нгиро ило́ яця́ пхаро́ тэ ґалёл, и ёнэ на́бут шунэ́на канэнца, и ёнэ зачхакирдэ якха́ пэ́скирэ, соб (кай) тэ на дыкхэ́н якхэ́нца и тэ на шунэ́н канэнца, и ёнэ на ґалёна илэ́са и на явэ́на кэ Мэ, соб (кай) Мэ тэ высастякирав лэн’.

²⁸ Палдава́ мэ кама́м, соб (кай) тумэ́ тэ джинэ́н, со Дэвлэ́скиро зракхибэ́н сыс бичхадо́ Наюдэ́нгэ; ёнэ и ушунэна.”

²⁹ Ке́ли Па́вли пхэндя́ далэ́ лава́, Юды лынэ́ тэ джа́н пэ́скэ, и ёнэ древа́н кошнэпэ екх екхэ́са.

³⁰ Па́вли дживдя́ кэ Римо дуй бэрш дро кхэр, саво́ ёв злыя́, прилэлас сарэ́н, кон явэ́лас кэ ёв,

³¹ и ёв муршканэ́с и псирэ́с (откэрдэ́с) пхэнэлас лав пал Дэвлэ́скиро Кралипэ́н и сыклякирдя́ манушэ́н, ракири́ лэ́нгэ пал Растэ-Дэвлэ́стэ, Исусо́стэ Христосо́стэ.